PWONY ME ANYAMA ME 6
WER 18 Watye ki Pwoc pi Ginkok
Pingo Watye ki Pwoc pi Kica pa Jehovah?
“Lubanga con omaro lobo kumeno, omiyo iye Wode acel keken.”—JON 3:16.
GIN MA WABIPWONYO
Wamito ni wadong pwocwa pi timo kica pa Jehovah. Me timo meno, wabinyamo gin ma Jehovah otimo wek kijwa balwa woko.
1-2. I yo ma nining ma kwowa rom aroma ki pa awobi ma kiloko i kome i paragraf me 1?
GO KONG ni awobi moni odongo i gang lonyo. Ento i nino mo acel, peko opoto; lunyodone guto woko i can me gudi. Lok man obalo wiye adada. Ento, kwena marac makato pud tye ka kuro awobi-ni. En oniang ni lunyodone gubalo limgi woko ducu ci guweko banya madongo i wi latingi. Dong en pe ki ginaleya mo keken. Me ka meno, mitte ni en ocul banya ma lunywalle guweko dok dano gitye ka mito centegi cutcut. Banya man dit ma en pe bitwero culone matwal.
2 I yo mogo, warom aroma ki awobi man. Lunywalwa mukwongo, Adam ki Kawa, onongo gipe ki roc mo dok gikwo i paradic maleng adada. (Acak. 1:27; 2:7-9) Onongo gitye ki kare me kwo ki yomcwiny pi naka. Ento gin mo marac adada otimme. Adam ki Kawa gutimo bal. Macalo adwogine, Jehovah oryemogi woko ki i poto me Eden dok onongo dong pe gitwero kwo pi naka. Ginaleya ango ma guweko pi lutinogi? Baibul tittiwa ni: “Bal yam obino i lobo kun wok ki i dano acel [Adam], ka dong to obino pi bal, kit meno bene to onya oromo kin dano ducu, pien dano ducu gubalo.” (Rom. 5:12) Ginaleya ma Adam owekiwa obedo bal, ma kelo to. Bal ma walako-ni tye calo banya madit, dok pe tye ngat mo keken i kinwa ma twero culone.—Jab. 49:8.
3. I yo ma nining ma bal rom ki “banya”?
3 I Baibul, kiporo bal ki banya. (Mat. 18:32-35) Ka watimo bal, bedo calo watye ki banya pa Jehovah. Labongo kony mo keken, pe watwero culo banya man, dok banya meno kitwero wekone keken ka wato.—Rom. 6:7, 23.
4. (a) Labongo kony mo keken, gin ango ma onongo bitimme i kom lubalo ducu? (Jabuli 49:7-9) (b) Nyig lok man ni “ bal” ma kitiyo kwede i Baibul tyen lokke ngo? (Nen bok ma wiye tye ni “Bal.”)
4 Piwa kenwa, pe twerre kulu me dwoko cen jami ducu ma Adam ki Kawa gurwenyo. (Kwan Jabuli 49:7-9.) Labongo kony mo keken, onongo pe wabibedo ki gen me kwo pi naka nyo gen me nicer. Ki lok ada, towa onongo bibedo rom ki to pa lee.—Latit. 3:19.
5. I yo ma nining ma Wonwa ma lamar-ri okonyowa me culo pi banya me bal ma walako? (Nen bene cal ma tye i )
5 Tam kong dok i kom awobi ma kiloko i kome i acakki me pwony man. Itamo ni en biwinyo nining ka ce lalonyo mo odyere me culo banya ma tye i wiye ducu? Labongo akalakala mo, awobi man bibedo ki pwoc madwong adada dok bijolo mot man. I yo acel-lu, Wonwa ma lamar-ri, Jehovah, ominiwa mic me culo pi banya me bal ma walako ki bot Adam. Yecu otito lokke kit man: “Lubanga con omaro lobo kumeno, omiyo iye Wode acel keken, wek dano ducu ma ye en owek to, ento obed ki kwo ma pe tum.” (Jon 3:16) Medo i kom meno, mic acel-li bene weko twerre botwa me bedo ki wat maber ki Jehovah.
Yecu otito kwena maber ni Jehovah timo kica kun jenge i kom ginkok. (Jon 3:16) I nge meno en omiyo kwone kene me bedo ginkok meno (Nen paragraf 5)
6. Lok mene me Baibul ma wabinyamogi i pwony man, dok pingo?
6 Gin ango ma omyero watim wek wanong adwogi maber ki i mic mamwonya-ni wek Lubanga ojwa balwa nyo “banyawa”? Me gamo lapeny man, wabinyamo lok mogo ma Baibul tiyo kwede, calo dwokowa cen, kwanyo bal, ginkok, koko, kwanowa ni kitwa atir, kacel ki tyen lokgi. Ka wawoto ki lwodo gin ma Jehovah otimo me jwayo balwa, pwocwa pire bidongo.
MITI PA JEHOVAH TYE ME DWOKOWA CEN BOTE
7. (a) Gin ango mukene ma Adam ki Kawa gurwenyo? (b) Macalo likwayo pa Adam ki Kawa, gin ango ma wamito adada? (Jo Roma 5:10, 11)
7 I kare ma Adam ki Kawa gutimo bal, onongo dong pe gitwero kwo pi naka. Ento bene gudoko lumone pa Wongi, Jehovah. Ma onongo peya gubalo, Adam ki Kawa onongo gitye i kin jo me ot pa Lubanga. (Luka 3:38) Ento i kare ma gujemo i kom Jehovah, kiryemogi woko ki i kin jo me ot pa Jehovah. Man otimme ma onongo peya gucako nywalo lutino. (Acak. 3:23, 24; 4:1) Macalo likwayo pa Adam ki Kawa, onongo mitte ni kidwokwa cen bot Jehovah. (Kwan Jo Roma 5:10, 11.) Pi meno, onongo wamito kony wek wabed ki wat maber kwede odoco. Ma lubbe ki buk mo acel, nyig lok me leb Grik ma kigonyo ni “dwokowa cen” twero gonnye ni “loko lamone wek odok larem.” Tye me ur ni, Jehovah aye okwanyo kare me yubo wat man odoco. En otimo man nining?
YUB PA JEHOVAH: KWANYO BAL
8. Yub ango ma Jehovah oketo?
8 Kwanyo bal obedo yub ma Jehovah oketo pi dano ma lubalo me doko lureme. En oketo yub me dwoko cen gin ma Adam orwenyo kun miyo gin ma welle rom ki ma orwenyo-ni. Ginacoya me leb Grik bene loko i kom yo ma Jehovah otiyo kwede wek otwerre pi ngat acel acel me bedo ki wat maber kwede.—Rom. 3:25.
9. Yub ango ma Jehovah oketo pi tutunu wek kitim ki Luicrael kica?
9 Jehovah oketo yub wek kijwa bal pa Luicrael pi tutunu dok wek gubed ki wat maber kwede. Onongo mitte ni Luicrael gubed ka kwero kwer mo ma kite dok pat mwaka ki mwaka. Kwer man onongo kilwongo ni Nino me Kwanyo Bal. I nino meno, lalamdog madit onongo tyero lee mogo pi bal pa dano. Ngene kene ni, remo pa lee onongo pe twero kwanyo bal woko i yo ducu pien dano rwomgi lamal loyo lee. Ento ka onongo Luicrael ma gungut gumiyo gityer ma Jehovah mito, en onongo bedo atera me timmigi kica. (Ibru 10:1-4) Gityer ma onongo Luicrael gimiyo i Nino me Kwanyo Bal kacel ki i kare mukene, onongo konyo me poyo wigi ni gin lubalo dok gimito gin mo me umo balgi i yo ducu.
10. Gin ango ma Jehovah otimo ma oweko twerre me timo kica bot dano ducu?
10 Gin ango ma Jehovah otimo ma oweko twerre me timo kica bot dano ducu? En oketo yub pi Wode ma lamar-ri wek “otyerre kene kicel me tingo bal pa jo mapol.” (Ibru 9:28) Yecu omiyo “kwone me koko jo mapol.” (Mat. 20:28) Ginkok obedo gin ango?
WEL MA KICULO: GINKOK
11. (a) Ma lubbe ki Baibul, pingo onongo mitte ni kicul ginkok? (b) Ngat ma biculo ginkok onongo myero obedo dano ma nining?
11 Ma lubbe ki Baibul, Jehovah omoko ni omyero kicul ginkok wek kikwany balwa dok kidwokwa cen bote. a Ngo ma onongo mitte ni kicul macalo ginkok wek dano gunong gin ma Adam orwenyo? Wi opo ni, Adam ki Kawa gurwenyo kwo ma pe ki roc kacel ki gen me kwo pi naka. Dong onongo mitte ni ginkok obed ki wel marom ki gin ma kirwenyo. (1 Tem. 2:6) Ngat ma onongo biculo ginkok man myero obed laco ma (1) pe ki roc; (2) tye ki kare me bedo kwo i lobo nakanaka; ki (3) tye atera me miyo, nyo jalo kwone piwa. Kwo pa ngat meno aye onongo biculo, nyo leyo kaka kwo ma kirwenyo.
12. Pingo Yecu aye onongo opore me culo wel me ginkok ma mitte?
12 Nen kong tyen lok adek mumiyo Yecu onongo twero culo ginkok. (1) Kinywale labongo roc mo keken dok “bal mo pe ma en otimo.” (1 Pet. 2:22) (2) Pi tyen lok meno, en onongo tye ki kare me kwo pi naka i lobo. (3) En onongo tye atera me jalo kwone piwa. (Ibru 10:9, 10) Macalo laco ma pe ki roc, Yecu onongo rom ki laco mukwongo Adam, i kare ma Adam peya otimo bal. (1 Kor. 15:45) Dong pien en oto piwa, Yecu onongo twero culo wel ma mitte kikome me leyo kaka gin ma Adam orwenyo. (Rom. 5:19) Pi meno, Yecu odoko “Adam me agikkine.” Pe dok mitte ni ngat mukene ma pe ki roc obin ka culo pi gin ma Adam orwenyo. Yecu oto “kicel keken ma otyeko lok ducu.”—Ibru 7:27; 10:12.
13. Apokapoka ango ma tye i kin kwanyo bal ki ginkok?
13 Dong, apokapoka ango ma tye i kin kwanyo bal ki ginkok? Yub me kwanyo bal obedo gin ma Lubanga timo me dwoko cen wat maber i kin en ki dano. Ginkok obedo wel ma kiculo wek otwerre me kwanyo bal pa dano ma lubalo. Remo pa Yecu ma oony piwa aye rwatte ki wel man.—Ep. 1:7; Ibru 9:14.
ADWOGINE: JEHOVAH KOKOWA DOK KWANOWA NI KITWA ATIR
14. Gin ango ma dong wabinyamo, dok pingo?
14 Adwogi maber ango ma wanongo ki i gin ma Jehovah otimo piwa? Me gamo lapeny meno, wabinyamo lok aryo mapatpat ma Baibul tiyo kwede ma twero konyowa me niang kit ma wanongo kwede adwogi maber ki i kica pa Jehovah.
15-16. (a) I Baibul, lok man ni “koko” tyen lokke ngo? (b) Gin ango ma kityeko gonyowa ki i iye pi ginkok?
15 I Baibul, koko kwako gonyo dano, nyo weko balgi macalo adwogi me culo ginkok. Lakwena Petero oloko iye kit man: “Wun wungeyo ni gityeko kokowu ki i kit pa kwarowu ma pe konyo. Pe gikokowu ki gin ma balle woko, macalo ryal nyo jabu, ento gikokowu ki remo pa Kricito me wel madwong ma rom ki latin romo ma bal mo nyo roc mo pe i kome.”—1 Pet. 1:18, 19.
16 Pi ginkok pa Kricito, kitwero gonyowa ki i opii me bal ki to, ma kelo can madwong adada. (Rom. 5:21) Watye ki pwoc madit bot Jehovah kacel ki Yecu pien dong gityeko kokowa ki remo pa Yecu.—1 Kor. 15:22.
17-18. (a) Tyen lokke ngo ka kikwanowa ni kitwa atir? (b) Adwogi maber ango ma wanongo pien Jehovah okwanowa ni kitwa atir?
17 Baibul tito ni lutic pa Jehovah kikwanogi ni kitgi atir. Man tyen lokke ni en pe dong mito ni wacul pi bal ma watimo. Kadi bed en otimo man, Jehovah pe odwoko piny rwomme me ngolo kop atir. En kwanowa ni kitwa atir, pe ni pien watimo gin mo me nongone. Ki tungcel bene, Jehovah pe cwako balwa. Ento Jehovah tye atera me weko balwa pien wanyuto niye i kom gin ma en kacel ki Yecu gutimo me miyo botwa ginkok.—Rom. 3:24; Gal. 2:16.
18 Adwogi maber ango ma wanongo ka Jehovah okwanowa ni kitwa atir? Jo mogo ma kikwanogi ni kitgi atir kiyerogi me loc kacel ki Yecu i polo dok gudoko lutino pa Lubanga. (Tito 3:7; 1 Jon 3:1) En otyeko timmigi kica pi balgi. Bedo calo pe gutimo bal magi, dong pi meno gupore me bedo i Ker pa Lubanga. (Rom. 8:1, 2, 30) Jo mukene ma kikwanogi ni kitgi atir gibikwo pi naka i lobo kany. Jehovah otyeko weko balgi dok gudoko lureme. (Yak. 2:21-23) Lwak dano mapol ata-ni, ma gibibwot ki i Armagedon, gitye ki gen me kato ki i twon can madit atika-ni labongo to. (Jon 11:26) “Jo ma kitgi atir” ki “jo ma kitgi pe atir” ma guto woko kibicerogi. (Tic 24:15; Jon 5:28, 29) I agikkine, lutic pa Jehovah ducu ma lugen ma gitye i lobo gibibedo ki “deyo ma gimiyo ki litino pa Lubanga.” (Rom. 8:21) Watye ka kuro ki miti madwong kare meno ma wan ducu wabibedo lutino pa Wonwa Jehovah, ma wape ki roc!
19. I yo ma nining ma kwowa olokke pi berre? (Nen bene bok ma wiye tye ni “ Timo Kica pa Jehovah.”)
19 Ki lok ada, kwowa onongo yam tye calo pa awobi ma kiloko i kome-ni ma orwenyo jami ducu dok oleyo banya madit ma pe bitwero culone matwal. Kwowa olokke pien Jehovah oketo yub me kwanyo bal kacel ki culo ginkok. Niyewa i kom Yecu Kricito oweko kitwero kokowa nyo gonyowa ki i opii me bal ki to. Ka Jehovah otimiwa kica pi balwa, bedo calo pe watimo bal magi kulu. Ento, ma dong pire tek loyo, watwero bedo ki wat maber ki Wonwa me polo ma lamar, Jehovah.
20. Gin ango ma wabinyamo i pwony ma lubo man?
20 Wabedo ki pwoc madwong adada bot Jehovah kacel ki Yecu ka walwodo lok i kom jami ducu ma gutimo piwa. (2 Kor. 5:15) Labongo konygi, onongo kono wape ki gen mo keken! Pwony ma lubo man bitic ki lapor mapatpat ma nonge i Baibul me konyowa me neno ni ka Jehovah otimiwa kica, nongo dong pe mitte ni wabed ma cwinywa pidowa.
WER 10 Pak Jehovah, Lubangawa!
a I leb mukene, lok man ni “ginkok” kigonyo atir atir ni “wel kwo,” nyo “wel ma kiculo.”
