1-2. Ariya ango ma Lucaden mapol gikemme kwede?

LAKWENA Paulo ocuko cwiny Temceo ki Lukricitayo ducu me cobo ticgi me pwony maber. (2 Tem. 4:5) Pi meno, wan ducu walubo tam pa Paulo dok watute matek i ticwa pi Lubanga. Ento i kare mogo, timo man pe yot. Pi omegiwa ki lumegiwa mapol, tekcwiny mitte adada me nywako i tic me tito kwena. (2 Tem. 4:2) Me labolle, tam i kom omege ma gikwo i lobe ma kigengo iye ticwa ducu nyo mogo. Gimedde ki tito kwena kadi bed gingeyo ni kitwero bologi i buc!

² Jo pa Jehovah gikato ki i pekki mapol ma twero turo cwinygi. Me labolle, pi jo mapol mitte ni guti matek me nongo jami ma mitte pi lupacogi. Ki i cwinygi gimito ni gimed cawagi i tic me pwony, ento i tum cabit nongo dong gipe ki kero mo. Jo mukene gitiyo tic manok adada pi Jehovah pien nongo gitye ki two malit, guti woko, nyo pe gitwero a ki gang. Jo mukene doki giwinyo calo konygi pe bot Jehovah. Laminwa mo ma nyinge Mary, * ma bedo i lobo pa Luarab, owaco ni: “Mitte ni atute matek me bedo ki neno matir ka cwinya otur ma weko awinyo ni aol adada. Meno weko cwinya pida pien kwanyo cawa ki kero ma myero ati kwede i tic me pwony.”

3. Gin ango ma wabinyamo i pwony man?

³ Labongo paro pi peko ma watye ka kato ki iye, Jehovah twero miniwa teko ma wamito me medde ki tic pire kit ma watwero. Ma peya waneno kit ma Jehovah twero konyowa kwede, kong wanenu kit ma en ojingo kwede Paulo ki Temceo me cobo ticgi me pwony kadi bed onongo gitye ki pekki mapol.

4. Pekki ango ma Paulo okato ki iye?

⁴ Paulo okato ki i pekki mapol. En onongo mito kony pa Jehovah tutwalle i kare ma lumonene gugoye, gubole i buc, dok gutemo neke. (2 Kor. 11:23-25) Lewic pe omako Paulo me ye ni i kare mogo ebedo ka lweny ki turcwiny. (Rom. 7:18, 19, 24) En bene obedo ka kanyo peko me yotkom ma onongo tye calo ‘okuto ma girwako i kome’ dok olego adada ni Lubanga okwany woko.​—2 Kor. 12:7, 8.

5. Gin ango ma Paulo ocobo kadi bed en onongo tye ka kato ki i pekki mapol?

⁵ Jehovah omiyo ki Paulo teko me cobo ticce me pwony kadi bed en okato ki i pekki mapol. Nen kong jami ma Paulo ocobo. Me labolle, i kare ma kikete macalo mabuc i ode kene i Roma, en otito kwena ki mit kom i nyim ludito pa Lujudaya ki gwok bene luloc me gamente. (Tic 28:17; Pil. 4:21, 22) En bene otito kwena bot askari pa Cecar mapol, dok omiyo caden bot jo ducu ma gulime. (Tic 28:30, 31; Pil. 1:13) I kare meno bene, Lubanga otiyo ki Paulo me coyo waraga ma okonyo Lukricitayo me ada i kare mukato dok pud tye ka konyogi wa i kare-ni. Medo i kom meno, lanen pa Paulo ojingo kacokke ma i Roma, ma man ‘omiyo omege gutito lok pa Lubanga ki tekcwiny madwong twatwal, labongo lworo.’ (Pil. 1:14) Kadi bed i kare mogo onongo Paulo pe twero cobo tic mapol, en otute me timo gin ma etwero, dok man “okonyo matek me nyayo lok me kwena maber.”​—Pil. 1:12.

6. Ma lubbe ki 2 Jo Korint 12:9, 10, gin ango ma okonyo Paulo me cobo ticce me pwony?

⁶ Paulo oniang ni jami ducu ma ecobo i tic pa Jehovah otwere pi teko pa Lubanga, ento pe mege. En oye ni teko pa Lubanga “bedo tek twatwal ka ma goro tye iye.” (Kwan 2 Jo Korint 12:9, 10.) Jehovah otiyo ki cwiny mere maleng me miyo ki Paulo teko ma en onongo mito me cobo ticce me pwony​—kadi bed kibedo ka une, kitweye i mabuc, dok okato ki i pekki mukene bene.

7. Pekki ango ma Temceo onongo tye kwede ma onongo twero weko bedo tek adada me cobo ticce me pwony?

⁷ Onongo mitte ni Temceo, larem Paulo matidi, bene ojenge i teko pa Lubanga wek ocob ticce me pwony. Temceo owoto  kacel ki Paulo i wot maboco i ticgi macalo lumiconari. Medo i kom meno, Paulo oore i wot mogo me limo ki cuko cwiny kacokke mapatpat. (1 Kor. 4:17) Twero bedo ni Temceo onongo winyo calo pe epore. Meno aye nen calo tyen lok ma oweko Paulo owacce ni: “Pe imi ngat mo ocayi ni pien in pud itidi.” (1 Tem. 4:12) Medo i kom meno, i kare man, Temceo bene onongo tye ki okuto ma kirwako i kome​—nyo ‘two ma make kare ki kare.’ (1 Tem. 5:23) Ento Temceo onongo ngeyo ni cwiny maleng pa Jehovah bimine teko me medde ki tito kwena kacel ki tic pi utmegine.​—2 Tem. 1:7.

8. Jehovah jingo jone i kare-ni nining?

⁸ I kare-ni, Jehovah miyo bot jone “tek madwong me twero” wek gumedde ki tic pire ki gen. (2 Kor. 4:7) Kong dong wanenu jami angwen ma Jehovah miyo botwa me jingowa ki me konyowa wek wagwok gennewa bote: lega, Baibul, ribbe ki Lukricitayo luwotwa, ki dong ticwa me pwony.

9. Lega twero konyowa nining?

⁹ Lega miniwa teko. Kit ma kicoyo kwede i Jo Epeco 6:18, Paulo ocuko cwinywa me lego Lubanga i “kare ducu.” Lubanga bigamo legawa ki miniwa teko. Omego Jonnie, ma bedo i lobo Bolivia, owinyo kit ma Jehovah okonye kwede i kare ma onongo tye ka kato ki i pekki mapol. Dakone kacel ki lunywalle aryo ducu komgi odoko lit matek i kare marom. Obedo tek adada pi Jonnie me timo jami ducu ma mitte me gwoko lutwo adek magi ducu. Mine oto woko, dok otero kare malac pi dakone ki wonne me cang. Ka en otamo i kom kare ma onongo kwo tek adada-ni, Jonnie waco ni, “I kare ma onongo par odiya adada-ni, gin ma kare ducu okonya obedo lega bot Jehovah kun atitte kit ma awinyo kwede kikome.” Jehovah omiyo ki Jonnie teko ma en onongo mito me kanyo pekkine. Ronald, ma tye laelda i lobo Bolivia oniang ni mine tye ki two kanca. Mine oto i nge dwe acel keken. Ngo ma okonye i kare ma onongo kwo tek tutwal-li? En owaco ni: “Ka atye ka lega bot Jehovah, atitte jami ducu ma tye i cwinya ki kit ma awinyo kwede. Aniang ni en ngeya maber ma loyo ngat mo keken, ma loyo wa kit ma an angene kwede kekena.” I kare mukene, waromo winyo calo pe dong watwero kanyo pekkiwa dok pe wangeyo gin ma omyero waleg pire. Ento Jehovah jolowa me lega bote kadi bed wanongo ni tek me wacce kit ma wawinyo kwede.​—Rom. 8:26, 27.

10. Kit ma kinyuto kwede i Jo Ibru 4:12, pingo kwano Baibul kacel ki lwodone pire tek adada?

¹⁰ Kwano Baibul miyowa teko. Kit macalo Paulo ojenge i kom Ginacoya pi teko ki kwe cwiny, wan bene omyero watim kit meno. (Rom. 15:4) Ka wawoto ki kwano Lok pa Lubanga kun walwodo, Jehovah twero tic ki cwiny mere maleng me konyowa niang kit ma Ginacoya meno twero konyowa i kwowa. (Kwan Jo Ibru 4:12.) Ronald, ma kiloko i kome con-ni, owaco ni: “Atye ki pwoc adada ni apwonnye me kwano but Ginacoya mo i otyeno ducu. Alwodo lok i kom kit pa Jehovah ki kit ma ogwoko kwede jone i kare mukato angec. Man konya me nongo teko odoco.”

11. Kwano Baibul ocuko cwiny laminwa mo ma onongo tye ka kumo pi to pa cware nining?

¹¹ Ka walwodo Lok pa Lubanga, konyowa  me bedo ki neno mupore ka odok i kom pekkiwa. Nen kong kit ma Baibul okonyo kwede dato mo ma onongo tye ka kumo. Laelda mo omine tam ni en twero nongo pwony ma tye me kony ki i kwano buk pa Yubu. I kare ma en okwano, gin mukwongo ma en otimo aye me kok i kom Yubu pi bedo ki tam marac. Ki i tamme, en obedo ka ciko Yubu ni: “Yubu! Pe ibed ka tamo pi pekkini keken!” Ento lacen en oniang ni en bene etye ki neno ma pe opore calo pa Yubu. Man okonye me loko nenone dok omine teko me kanyo arem ma obino macalo adwogi me to pa cware.

12. Jehovah tiyo ki omegiwa ki lumegiwa nining me jingowa?

¹² Ribbe kacel ki Lukricitayo luwotwa miniwa teko. Yo mukene ma Jehovah tiyo kwede me jingo Lukricitayo obedo ribbe kacel ki Lukricitayo luwotwa. Paulo ocoyo ni onongo etye ki miti me ribbe ki omegine ki lumegine wek ‘gin kacel ki en gukonnye lawangacel.’ (Rom. 1:11, 12) Mary, ma kiloko i kome con-ni, maro ribbe kacel ki utmegine adada. En owaco ni: “Jehovah otiyo ki omege ki lumege ma onongo bene pe gingeyo pekona me konya. Guwaco gin mo ma ocuko cwinya nyo gucwala kad, dok meno onongo obedo gin ma amito kikome. Anongo kony bene ka aloko ki lumege ma gukato ki i peko macal ki mega dok anongo pwony ki botgi. Dok luelda bene giweko awinyo ni omege ki lumege me kacokke gimara.”

13. Watwero jingo cwiny luwotwa nining i cokke?

¹³ Kabedo maber loyo ma waromo cuko iye cwiny jo mukene obedo i cokke pa Lukricitayo. Ka icito i cokke, itwero tute me jingo jo mukene ki waccigi ni imarogi dok itye ki pwoc pi jami ducu ma gitimo. Me labolle, i nino mo ma onongo cokke peya ocakke, laelda mo ma nyinge Peter owaco bot lamego mo ma cware pe tye Lacaden ni: “Cuko cwinywa adada me neni i cokke. Kare ducu ibino ma iyubo lutinoni abicel ducu maber dok nongo gitye atera me miyo lagam.” Pig wang laminwa-ni oony dok cwinye obedo yom kun waco ni: “Pe itwero ngeyo kit ma onongo amito winyo kwede lok meno tin.”

14. Nywako i tic me pwony konyowa nining?

¹⁴ Tic me pwony jingowa. Ka watito kwena bot jo mukene, wawinyo maber, kadi bed gujolo nyo pe. (Car. 11:25) Laminwa mo ma nyinge Stacy oneno kit ma tic me pwony twero jingowa kwede. I kare ma kiryemo ngat mo me gange woko ki i kacokke, cwinye otur adada, dok en obedo ka pennye kekene ni, ‘Tika tye gin mo ma onongo atwero timo me konye?’ Onongo tek adada pi Stacy me giko tam i kom lok man. Ngo ma okonye me lweny ki peko man? Tic me pwony! I kare ma en obedo ka nywako i tic me pwony, en ocako keto cwinye i kom jo ma i wang ticce ma gimito konye. En owaco ni: “I kare meno, Jehovah omina latin kwan me Baibul ma odongo oyotoyot. Meno ocuko cwinya adada. Gin ma dong okonya loyo obedo cito i tic me pwony.”

15. Ngo ma ipwonyo ki i lok pa Mary?

¹⁵ Pi kit kwo ma jo mukene gitye ka kato ki iye, gitwero winyo calo pe gitwero cobo jami mapol i tic me pwony. Ka meno aye kit ma iwinyo kwede, wi myero opo ni Jehovah cwinye yom ka itimo gin maber loyo ma itwero. Nen kong dok labol pa Mary. I kare ma en okobo i kacokke ma kiloko iye leb mapat, en owinyo calo konye pe. En owaco ni, “Pi kare mo, gin ma onongo atwero timone keken obedo miyo lagam mayot i cokke, nyo kwano wang Baibul,  nyo miyo trak i tic me pwony.” Man oweko en owinyo ni konye pe ka kipore ki jo ma giloko leb man maber. Ento lacen, en oloko tamme. En oniang ni Jehovah twero tic kwede kadi bed pe eloko leb meno maber. En owaco ni, “Lok ada ma twero laro kwo pa dano niang iye yot, dok ada meno aye loko kwo pa dano.”

16. Ngo ma romo konyo jo ma pe gitwero a woko ki gang me nongo teko odoco?

¹⁶ Jehovah neno dok pwoyo mitiwa me nywako i tic me pwony, kadi bed pe watwero a woko ki gang. Dok en twero yabiwa yo me miyo caden bot jo ma gibino gang ka konyowa nyo bot ludaktar ki nac. Ka waporo gin ma watimo kombeddi ki gin ma onongo watimo i kare mukato angec, man twero turo cwinywa woko. Ento ka waniang kit ma Jehovah tye ka konyowa kwede i kare-ni, wabibedo ki kero me kanyo peko mo keken ki yomcwiny.

17. Ma lubbe ki Latitlok 11:6, pingo omyero wamedde ki nywako i tic me pwony kadi bed nen calo pe tye ka nyako nyige cutcut?

¹⁷ Pe wangeyo kodi mene me ada ma wapito ma bidongo. (Kwan Latitlok 11:6.) Me labolle, laminwa mo ma nyinge Barbara, ma tye ki mwaka 80 ki wiye, kare ki kare nywako i miyo caden ki cim nyo coyo waraga. I waragane acel mo, en oketo iye kopi me Wi Lubele me Marci 1, 2014, ma wiye tye ni “Gin ma Lubanga Otimo Piri.” En pe ongeyo ni ecwalo waraga man bot luot mo ma onongo kiryemogi woko ki i kacokke. Gukwano magajin man teretere. Lawi ot-ti owinyo calo Jehovah tye ka lok atir bote. Luot-ti gucako cito i cokke dok lacen kidwokogi i kacokke​—i nge mwaki makato 27. Tam kong cuko cwiny ki kero ma Barbara onongo pi neno adwogi maber ma obino pi waraga acel ma en ocoyo!

18. Ngo ma omyero watim ka wamito nongo teko ki bot Lubanga?

¹⁸ Jehovah miniwa jami mapol me jingowa, calo lega, Baibul, omegiwa ki lumegiwa, ki dong tic me tito kwena. Ka watiyo ki jami magi, wanyuto bot Jehovah ni wageno ni en twero konyowa dok mito timone. Dong omyero kare ducu wajenge i kom Wonwa me polo, ma cwinye yom me “nyuto tekke bot jo ma gitiyo pire ki cwinygi ducu.”​—2 Tekwaro 16:9, NWT.