1-2. Gin ango ma lacoc mo owaco, dok gin ango ma wabinyamo i pwony man?

I KARE-NI dano milion mapol giwaco ni giye i kom Yecu, ento pe giye i kom jami ma en opwonyo. (2 Tem. 4:3, 4) Ki lok ada, lacoc mo kare mo owaco ni: “Ka onongo watye ki ‘Yecu’ mukene i kinwa i kare-ni ma loko kit ma Yecu kikome oloko . . . , tika onongo wabikwere kit ma wakwero kwede Yecu mwaki alip aryo angec? . . . Lagamme tye ni: Ee, onongo wabikwere woko.”

² Jo mapol i cencwari me acel guwinyo pwony pa Yecu dok guneno tango ma en otimo, ento gukwero keto niye i kome. Pingo? I pwony ma okato-ni, wanyamo tyen lok angwen ma oweko dano gukwero Yecu pi jami ma en owaco dok otimo. Kong dong wanyamu tyen lok angwen mukene. Ka wawoto ki timo meno, wabiniang pingo dano i kare-ni gikwero lulub kor Yecu dok wabineno kit ma watwero gwokke kwede wek gin mo keken pe ogengwa ki tic pi Jehovah.

3. Kodi lurem ango ma Yecu oyero ma oweko jo mogo gukwere woko?

³ I kare ma Yecu tye i lobo, en onongo ribbe ki dano ducu. En ocamo ki lulonyo kacel ki jo ma gitye ki twero, ento en bene onongo bedo ki lucan kacel ki jo ma kiunogi. Medo i kom meno, en onongo nyuto kica bot jo ma kinenogi macalo “lubalo.” Jo mogo ma luwakke gukwero Yecu woko pi gin ma en otimo-ni. Gupenyo lupwonnye  pa Yecu ni: “Pingo wucamo dok wumato kacel ki lujog-mucoro ki lubalo?” Yecu ogamo lapenygi ni: “Jo ma komgi yot pe gimito daktar; ento jo ma komgi lit aye mito. An pe abino ka lwongo jo ma kitgi atir, ento lubalo wek gunguti.”​—Luka 5:29-32.

4. Ma lubbe ki lanebi Icaya, ngo ma Lujudaya onongo myero gunge madok i kom Meciya?

⁴ Ngo ma Ginacoya waco? Mwaki mapol ma Meciya peya obino, lanebi Icaya otito ni dano me lobo-ni gibikwero Meciya woko. Lok pa lanebi man tito ni: “Dano gicaye gikwere woko-gu . . . En bedo calo ngat ma dano guumo wanggi woko i kome, dano gicaye, ma pe waparo pire wacel.” (Ic. 53:3) Lok pa lanebi man owaco ni “dano” gibikwero Meciya woko, pi meno, Lujudaya me cencwari me acel onongo myero gunge ni kibikwero Yecu.

5. Jo mapol i kare-ni gineno lulub kor Yecu nining?

⁵ Tika waneno peko acel-li i kare-ni? Ada, waneno. Lutela dini gitye atera me jolo i kanicagi jo ma kinenogi ni pigi tek, lulonyo, kacel ki jo ma kinenogi calo luryeko me lobo-ni. Giye ni jo magi gubed lumemba me kanicagi kadi bed kwogi pe rwatte ki rwom me kwo ma atir pa Lubanga. Lutela dini magi gicayo lutic pa Jehovah ma gikwo ma lubbe ki rwom me kwo pa Lubanga pien ginenogi macalo jo ma rwomgi lapiny. Kit ma Paulo owaco kwede kikome-ni, Lubanga oyero jo “ma rwomgi piny.” (1 Kor. 1:26-29) Kadi bed kit meno, lutic pa Jehovah ducu ma lugen pigi tek adada bote.

6. Watwero lubo cwiny ma Yecu onyuto nining kit ma kitito kwede i Matayo 11:25, 26?

⁶ Watwero gwokke nining ki i gin ma romo balo niyewa? (Kwan Matayo 11:25, 26.) Pe iwek kit ma jo me lobo-ni gineno kwede lutic pa Jehovah obal cwinyi. Nge ni Jehovah tiyo ki jo mamwol keken me cobo mitine. (Jab. 138:6) Dok itam i kom jami madongo ma en ocobo kun tiyo ki jo ma kinenogi calo pe giryek.

7. Pingo Yecu olwongo Luparicayo ni lugoba, dok gin gudok iye nining?

⁷ Ki tekcwiny, Yecu okwero lutela dini me karene pien onongo pe gipwonyo dano me woro Jehovah i yo mupore. Me labolle, en oyaro ka maleng goba pa Luparicayo ma onongo giparo mere kit ma gilwoko kwede ki cinggi makato kit ma gitero kwede lunywalgi. (Mat. 15:1-11) Lupwonnye pa Yecu nen calo gubedo ki ur madit adada i kare ma guwinyo lokke. Pi meno, gupenye ni: “Ingeyo ni Luparicayo cwinygi ocwer twatwal i kare ma guwinyo lok ma in iwaco?” Yecu ogamo lapenygi ni: “Kit ginapita ducu ma Wora ma tye i polo pe opito gibiputo woko ki lwite. Wek gubedi; meno gin lutowang ma gipeyo lutowang wadigi. Ka ce latowang peyo latowang lawote, ci gin aryo ducu gibipoto woko i bur.” (Mat. 15:12-14) Kadi bed ni lutela dini gukeco adada i kom Yecu pi lokke, man pe oweko en ojuko waco lok ada.

8. Yecu onyuto nining ni Lubanga pe jolo dini ducu?

⁸ Yecu bene oyaro ka maleng pwony goba me dini i karene. En pe owaco ni Lubanga jolo dini ducu. Me ka meno, en owaco ni jo mapol gitye i yo malac ma tero dano i to, kun jo manok keken aye gitye i yo ma tero dano i kwo. (Mat. 7:13, 14) En owaco ka maleng ni jo mogo onongo gibitimme calo gitye ka  woro Lubanga, ento ki lok ada nongo pe gitye ka tic pire. En ociko ni: “Wugwokke i kom lunebi ma lugoba, ma gibino botwu ma gurukke woko calo romi, ento ki i cwinygi nongo gitye calo orudi muwor. Wubingeyogi i kom kitgi.”​—Mat. 7:15-20.

9. Mi labol mogo me pwony goba me dini ma Yecu oyaro woko ka maleng.

⁹ Ngo ma Ginacoya waco? Lok pa lunebi me Baibul otito con ka maleng ni Meciya bibedo ki arima madwong pi ot pa Jehovah. (Jab. 69:9; Jon 2:14-17) Arima meno otugo cwiny Yecu me yaro woko ka maleng pwony goba ki tim mogo me dini ma pe tye atir. Me labolle, Luparicayo onongo giwaco ni dano tye ki tipo ma pe to; ento Yecu opwonyo ni jo muto nongo gunino woko. (Jon 11:11) Lucadukayo onongo gikwero woko ni nicer pe; ento Yecu ocero lareme Lajaro. (Jon 11:43, 44; Tic 23:8) Luparicayo onongo gipwonyo ni teko mo ma pe nen nyo Lubanga aye moko jami ducu ma timme i kwowa; ento Yecu opwonyo ni dano tye ki kero me yero me tic pi Lubanga nyo pe.​—Mat. 11:28.

10. Pingo pwonywa weko jo mapol gikwerowa?

¹⁰ Tika waneno peko acel-li i kare-ni? Ada, waneno. Jo mapol i kare-ni gikwerowa pien pwonywa ma jenge i Baibul yaro woko ka maleng pwony goba me dinigi. Lupwonye dini gipwonyo romigi ni Lubanga wango jo maraco i mac me kapiny. Gitiyo ki pwony goba meno wek gibed ki twero me doro romigi. Macalo lutic pa Jehovah, ma giworo Lubanga me mar, wayaro woko pwony goba meno. Lutela dini bene gipwonyo ni dano tye ki tipo ma pe to. Wanyuto ka maleng ni pwony meno oa ki bot lukampiri​—dok ka pwony meno onongo tye ada​—ci nicer pe mitte. Dok kadi bed ni dini mapol gipwonyo ni teko mo nyo Lubanga aye ma omoko woko con jami ma timme i kwowa, wan wapwonyo ni dano tye agonya dok gitwero yero me tic pi Lubanga. Lutela dini gidok i pwonywa magi nining? Pol kare, kiniga makogi matek i komwa!

11. Ma lubbe ki lok pa Yecu ma wanongo i Jon 8:45-47, ngo ma Lubanga mito ki bot jone?

 ¹¹ Watwero gwokke nining ki i gin ma romo balo niyewa? Ka wamaro ada, ci omyero wajol pwony pa Lubanga ducu. (Kwan Jon 8:45-47.) Wan pe watye calo Catan, pien wacung matek i ada. Pe watimo gin mo keken ma pe rwatte ki gin ma wapwonyo. (Jon 8:44) Lubanga mito ni jone ‘gukwer gin marac, dok gumok matek i kom gin maber,’ kit ma Yecu bene otimo kwede.​—Rom. 12:9; Ibru 1:9.

12. Pingo kit ma Yecu oto kwede oweko Lujudaya mapol gukwere woko?

¹² Tyen lok ango mukene ma oweko Lujudaya gukwero Yecu woko i karene? Lakwena Paulo owaco ni: ‘Wan giwa watito pi Kricito ma yam giguro i kom yat, ma lokke ki tung bot Lujudaya obedo lok atata.’ (1 Kor. 1:23) Pingo yo ma Yecu oto kwede obalo cwiny Lujudaya mapol? Ki tung botgi, to pa Yecu oweko en onen calo labalo​—ento pe Meciya.​—Nwo. 21:22, 23.

13. Gin ango ma jo ma gukwero Yecu onongo pe gimito ye?

¹³ Lujudaya ma gukwero Yecu pe guniang ni en pe otimo bal mo, ni kikelo adot gobagoba i kome, dok kingolo kop alenga i wiye. Lungolkop ma gungolo kop i wi Yecu onongo pe giparo pi ngolo kop atir. Lukiko pa Lujudaya gurune ka ngolo kop dok pe gulubo cik me kot meno. (Luka 22:54; Jon 18:24) Lungolkop magi onongo dong gumoko tamgi woko i kare ma gitye ka winyo lok pa lucaden ki adot ma kikelo i kom Yecu. Dok gin lungolkop kikomgi aye “guyenyo lok me caden me goba i kom Yecu wek gineke woko.” I kare ma meno pe olarre, lalamdog madit otemo bito Yecu wek owac gin mo marac ma gitwero make iye. Timgi man onongo pe rwatte ki cik me kot meno. (Mat. 26:59; Mar. 14:55-64) Dok i kare ma Yecu ocer woko, lungolkop ma kitgi raco magi guculo lumony me Roma ma gubedo ka gwoko  dog lyel “lim madit” wek guwac lok goba me tito pingo lyel pa Yecu odong nono.​—Mat. 28:11-15.

14. Gin ango ma Ginacoya onongo otito con madok i kom to pa Meciya?

¹⁴ Ngo ma Ginacoya waco? Kadi bed ni Lujudaya mapol onongo pe gigeno ni Meciya bito, nen kong gin ma Ginacoya otito ni bitimme: “En dong omine kene me to woko, mumiyo gikwane i kin lubalo; ento en otingo bal pa dano mapol, dok obako doge olego pi lubalo adada.” (Ic. 53:12) Pi meno, Lujudaya onongo pe gitye ki tyen lok mo keken me kwero Yecu i kare ma kineke macalo labalo.

15. Adot gobagoba ango ma kiketo i kom Lucaden pa Jehovah ma oweko jo mogo gukwerowa woko?

¹⁵ Tika waneno peko acel-li i kare-ni? Labongo akalakala mo! Kikelo adot gobagoba i kom Yecu dok kingolo kop alenga i wiye, dok Lucaden pa Jehovah i kare-ni kiterogi marac kit meno. Nen kong labol mogo. I lobo Amerika, i kine ka mwaka 1930 ki 1950, wabedo ki pido mapol i kot me gwoko twerowa me woro Lubanga agonya. Lungolkop mogo onongo gingolo kop alenga labongo lewic mo. I Quebec, i lobo Canada, lutela dini pa Katoli ki gamente gutiyo kacel me juko ticwa. Lutit kwena mapol kitweyogi i buc pi tito kwena madok i kom Ker pa Lubanga. I lobo Germany, gamente me Nazi guneko omege matino mapol. Dok mwaki mogo macok cok-ki, utmege mogo ma i lobo Russia kingolo kop i wigi dok kitweyogi i buc pien gubedo ka nyamo lok me Baibul, ma meno kitero ni obedo “tim aranyi.” Kadi wa Baibulwa me New World Translation of the Holy Scriptures i leb Russian kiketo kigeng woko i kome ni obedo “buk pa lutim aranyi” pien tiyo ki nying Jehovah.

16. Kit ma kitito kwede i 1 Jon 4:1, pingo pe omyero wawek goba ma kiwaco i kom jo pa Jehovah obwolwa?

¹⁶ Watwero gwokke nining ki i gin ma romo balo niyewa? Pwony lok ada kikome. I Pwonye me Wi Got, Yecu ociko jo ma onongo gitye ka winyo lokke ni jo mogo “giwaco kit lok ducu maraco gobagoba i komwu pira.” (Mat. 5:11) Goba magi gia ki bot Catan. En doro jo maraco weko giwaco lok goba i kom jo ma gimaro lok ada. (Yabo 12:9, 10) Omyero wakwer woko lajwac goba ma jo ma gidagwa giwaco. Pe omyero wawek lok goba magi owek wadok lwor nyo obal niyewa woko.​—Kwan 1 Jon 4:1.

17. I yo ma nining ma jami mutimme ma Yecu peya oto onongo twero weko jo mogo gikwere?

¹⁷ Nino acel ma Yecu peya oto, ngat acel i kin lukwenane odobe. Lakwenane mukene bene okwere tyen adek kulu, dok lukwenane ducu gungweco guweke woko i dyewor ma peya en oto. (Mat. 26:14-16, 47, 56, 75) Yecu pe obedo ki ur. En onongo otito woko con ni gin ma kit man bitimme. (Jon 6:64; 13:21, 26, 38; 16:32) I nge neno jami mutimme meno, jo mogo onongo gitwero kwero Yecu woko kun gitamo ni, ‘Ka meno aye kit ma lukwena pa Yecu gitimme kwede, an pe amito bedo i kingi!’

18. Lok pa lunebi mene ma ocobbe i kare me to pa Yecu?

¹⁸ Ngo ma Ginacoya waco? Mwaki miya mapol ma Yecu peya obino i lobo, Jehovah otito i Lokke ni kibidobo Meciya pi nyig cente 30 me ryal. (Jek. 11:12, 13) Ngat ma bidobe-ni onongo bibedo lareme macok. (Jab. 41:9) Lanebi Jekaria bene  ocoyo ni: “Go lakwat, wek romi guket woko ata.” (Jek. 13:7) Jo mamwol onongo pe gibikwero Yecu pi jami magi mutimme. Niyegi onongo bijing matek ka guneno lok pa lunebi magi cobbe i kom Yecu.

19. Gin ango ma jo ma cwinygi atir giniang iye?

¹⁹ Tika waneno peko acel-li i kare-ni? Ada, waneno. I kare-ni, Lucaden mogo ma gingene adada guweko ada woko, gudoko jo mungak, ci gucako tute me bito jo mukene me lubo korgi. Ginyayo lok goba i kom Lucaden kun gitiyo ki odi me poko lok angeya kacel ki Intanet. Ento jo ma cwinygi atir pe giweko lok goba magi gengogi ki lubo kor Yecu. Giniang ni Baibul otito woko con ni jami ma kit meno bitimme.​—Mat. 24:24; 2 Pet. 2:18-22.

20. Waromo gwokke nining wek jo ma gua woko ki i ada pe gubal niyewa? (2 Temceo 4:4, 5)

²⁰ Watwero gwokke nining ki i gin ma romo balo niyewa? Mitte ni wagwok niyewa obed matek ki kwano Baibul kare ki kare, lega kare ducu ki bene tiyo tic ma Jehovah ominiwa ki mit kom. (Kwan 2 Temceo 4:4, 5.) Ka watye ki niye matek, komwa pe bimyel ka wawinyo lok maraco i kom Lucaden pa Jehovah. (Ic. 28:16) Marwa pi Jehovah, Lokke, kacel ki marwa pi utmegiwa bikonyowa wek jo ma gua woko ki i ada pe gubal niyewa.

21. Kadi bed pol pa dano i kare-ni gikwero kwenawa woko, gin ango ma watwero bedo ki gen iye?

²¹ I cencwari me acel, jo mapol cwinygi oballe ci gukwero Yecu woko. Kadi bed kit meno, jo mapol bene guye en. I kingi onongo tye iye lamemba acel me Lukiko Madit pa Lujudaya kacel ki ‘lwak lulamdog pa Lubanga mapol.’ (Tic 6:7; Mat. 27:57-60; Mar. 15:43) I yo acel-lu bene, i kare-ni, dano milion mapol guye Yecu. Pingo? Pien gingeyo dok gimaro lok ada ma nonge i Ginacoya. Lok pa Lubanga waco ni: “Jo ma maro cikki limo kuc madit; pe tye gin mo ma bimiyo giyokke atata.”​—Jab. 119:165.