1. Gin ango ma gwok oweko ibedo ki ur adada i kare ma itemo nywako kwena me Baibul pi tyen mukwongo ki jo mukene?

TIKA wi po i kom tyen mukwongo ma iniang ni inongo ada? Onongo yot adada me niang jami ducu ma onongo itye ka pwonyo ki i Baibul! Itamo ni jo ducu cwinygi bibedo yom me jolo jami manyen ma ipwonyo-ni. Onongo imoko piri keni ni kwena me Baibul bimini kwo maber i kare-ni ki gen mamwonya pi anyim. (Jab. 119:105) Pi meno, ki mit kom madit itito bot luremi ki wadini ducu lok ada ma ipwonyo. Ento ngo ma otimme? Ki ur madit, pol pa jo ma itittigi gin ma ipwonyo-ni gukwero woko.

2-3. I kare pa Yecu, pol pa dano onongo gitamo ningo i kome ki kwena ma en tito?

² Pe omyero wabed ki ur mo ka jo mukene gikwero kwena ma watito botgi. I kare pa Yecu, pol pa dano gukwere woko kadi bed en otimo tango mapol ma onyuto ni en tye ki cwak pa Lubanga. Me labolle, Yecu ocero Lajaro. Meno onongo obedo tango ma lumonene pe gitwero kwerone. Kadi bed kit meno, lutela dini pa Lujudaya pud pe guye ni Yecu aye Meciya. Gin onongo bene gimito neko Yecu kacel ki Lajaro!​—Jon 11:47, 48, 53; 12:9-11.

³ Yecu onongo ngeyo ni pol pa dano pe gibiye ni en aye Meciya. (Jon 5:39-44) En owaco bot lupwonnye aryo pa Jon Labatija ni: “Dano ma pe tamme oballe i koma tye ki gum [yomcwiny].” (Mat. 11:2, 3, 6) Pingo jo mapol gukwero Yecu?

4. Ngo ma wabinyamo i pwony man?

⁴ I pwony man kacel ki ma lubone, wabinyamo tyen lok mogo mumiyo jo mapol i kare pa Yecu gukwere woko. Wabineno bene tyen lok ma oweko jo mapol i kare-ni gikwero  kwena ma watito botgi. Ma dong pire tek loyo, wabipwonyo pingo omyero wabed ki niye matek i kom Yecu wek gin mo keken pe ogengwa ki lubo kore.

5. Pingo jo mogo onongo gitamo ni Yecu pe twero bedo Meciya ma kiciko pire con-ni?

⁵ Jo mapol gukwero Yecu pi kabedo ma en odongo iye. Gin guye ni Yecu onongo obedo lapwony maber adada dok ni en onongo timo tango mapol. Ento gutamo ni en obedo mere wod pa lapa bao mo ma lacan. Dok en onongo a ki i Najaret, ma onongo obedo boma ma dano gitamo ni pire pe tek tutwal. Kadi wa Natanael ma lacen odoko lapwonnye pa Yecu kong owaco ni: “Gin mo maber twero katti ki i Najaret?” (Jon 1:46) Twero bedo ni Natanael onongo pe maro boma ma Yecu odongo iye-ni. Nyo gwok en obedo ka tamo i kom lok pa lanebi ma nonge i Mika 5:2, ma otito con ni kibinywalo Meciya i Beterekem, ento pe i Najaret.

6. Ngo ma onongo twero konyo dano me kare pa Yecu me niang ni en aye Meciya?

⁶ Ngo ma Ginacoya waco? Lanebi Icaya otito con ni lumone pa Yecu onongo pe gibiparo “pi gin ma otimme i kome [Meciya].” (Ic. 53:8) Pol pa jami ma otimme i kom Meciya onongo kitito woko con. Ka onongo jo magi gukwanyo kare me ngiyo lok ada magi ducu, onongo gibiniang ni Yecu kinywalo i Beterekem dok ni en obedo lakwar Kabaka Daudi. (Luka 2:4-7) Pi meno, Yecu kinywalo i kabedo ma kitito pire i Mika 5:2. Dong peko onongo tye kwene? Dano onongo girune ka moko tam ma pe tye atir. Onongo pe gingeyo lok ada ducu. Pi meno, gin gukwero Yecu woko.

7. Pingo jo mapol i kare-ni gikwero Lucaden pa Jehovah?

⁷ Tika waneno peko acel-li i kare-ni? Ada, waneno. Pol pa jo pa Jehovah pe gubedo lulonyo nyo jo ma pigi tek. Pi meno, pol pa dano ginenogi calo “jo mogo ata ma pe gupwonnye.” (Tic 4:13) Jo mogo gitamo ni Lucaden pa Jehovah pe gupore me pwonyo lok me Baibul pien pe gukwano i cukul me pwonyo lutela dini. Jo mukene giwaco ni Lucaden pa Jehovah gubedo “dini ma oa ki i lobo Amerika.” Ento lok ada tye ni ngat acel keken ki i kin Lucaden abiro aye a ki i lobo Amerika. Jo mukene doki kiwacigi ni Lucaden pa Jehovah pe giye i kom Yecu. Pi mwaki mapol dong, dano gilwongo jo pa Jehovah ni “dini me te pii,” “dini pa lulonyo,” ki dok ni wabedo “lugingi.” Pi meno, jo mapol pe gimito doko Lucaden pa Jehovah pien giwinyo lok goba magi dok pe gingeyo lok ada madok i kom jo pa Jehovah.

8. Ma lubbe ki Tic pa Lukwena 17:11, gin ango ma dano myero gutim ka gimito niang angagi ma gubedo lutic pa Lubanga i kare-ni?

⁸ Ngat mo twero gwokke nining ki i gin ma romo balo niyene? Mitte ni dano gutute matek me niang lok ada. Meno aye gin ma Luka laco Jiri onongo omoko tamme me timone. En otute matek me ‘ngiyo gin ducu nia i acakki kore ki kore.’ En onongo mito ni jo ma gibikwano lokke ‘guniang ada me lok’ ma guwinyo i kom Yecu. (Luka 1:1-4) Lujudaya ma i boma macon me Berea onongo gitye calo Luka. I kare ma guwinyo kwena maber madok i kom Yecu pi tyen mukwongo, guporo kwena meno ki Ginacoya me leb Ibru wek gumok ni gin ma kiwacigi tye ada. (Kwan Tic pa Lukwena 17:11.) I yo acel-lu, mitte ni dano i kare-ni bene gungi lok ada. Omyero gupor gin ma jo  pa Lubanga giwacigi ki gin ma Ginacoya waco. Mitte bene ni gupwony jami mogo ma jo pa Jehovah gutimo i kare-ni. Ka gutimo kwed muromo, ci pe gibiye ni lok ma giwinyo nyo cwiny me apokapoka oum wanggi woko.

9. Gin ango ma otimme i kare ma Yecu okwero miyo lanyut ma oa ki i polo?

⁹ Jo mogo i kare pa Yecu pe guyeng ki pwony pa Yecu mamwonya adada-ni. Onongo gimito makato meno. Gin onongo gimito ni en omok ada ni en aye Meciya ki nyuto “lanyut ma oa i polo.” (Mat. 16:1) Twero bedo ni onongo gimito ni en otim meno pi niango marac ma gitye kwede i kom Daniel 7:13, 14. Ento, meno aye onongo pe kare pa Jehovah me cobo lok pa lanebi man. Gin ma Yecu obedo ka pwonyo onongo romo me nyuto botgi ni ada en aye Meciya. Ento i kare ma en okwero timo tango ma onongo gimito-ni, gin gukwere woko.​—Mat. 16:4.

10. Yecu ocobo lok ma lanebi Icaya ocoyo madok i kom Meciya nining?

¹⁰ Ngo ma Ginacoya waco? Lanebi Icaya ocoyo kit man i kom Meciya: “En pe bikok dok pe bidange kun ilo dwane malo, pe gibiwinyo dwane i wanga yo.” (Ic. 42:1, 2) Yecu ocobo ticce me pwony i yo ma pe ywayo tam pa dano i kome. En pe ogero odi me woro madongo, dok pe oruko bongi ma kite dok pat pa lutela dini nyo obedo ki miti ni kilwonge ki nying me dog tic madongo. I kare ma kitye ka pido i kome, Yecu okwero timo tango me yomo cwiny Kabaka Kerode kadi bed kwone onongo tye ka mading. (Luka 23:8-11) Yecu otimo tango mogo gire, ento ticce ma pire tek loyo obedo me tito kwena maber-ri. En owaco bot lupwonnyene ni: “Meno en aye gin mumiyo abino.”​—Mar. 1:38.

11. Tam ma pe tye kakare ango ma jo mukene gitye kwede i kare-ni?

¹¹ Tika waneno peko acel-li i kare-ni? Ada, waneno. I kare-ni, gin ma gudo  cwiny dano mapol obedo odi lega madongo ma kideyo igi ki cal ma welgi tego, lutela dini ma gitye ki nying me dog tic madongo, ki kwer mogo ma pol pa dano wigi owil woko ni oa ki bot lukampiri. Ento jo ma gicito i lega magi pe gipwonyo gin mo i kom Lubanga kacel ki yubbe. Jo ma gicito i cokkewa gipwonyo jami mapol madok i kom gin ma Jehovah mito ki botwa ki kit me tiyo mitine. Odiwa me Ker nongo igi tye maleng dok pe kideyo igi ki jami mogo ma welgi tego adada. Jo ma gitelo worowa pe giruko bongi mogo ma kite dok pat; dok pe gitiyo ki nying dog tic madongo. Gin ma wapwonyo dok ma waye iye a ki i Baibul. Kadi bed kit meno, jo mapol i kare-ni gikwero kwena ma watito pien wape ki kwer mogo madongo me dini. Dok gin ma wapwonyo pe rwatte ki gin ma gimito winyo.

12. Kit ma kitito kwede i Jo Ibru 11:1, 6, niyewa myero ojenge i kom gin ango?

¹² Watwero gwokke nining ki i gin ma romo balo niyewa? Lakwena Paulo owaco bot Lukricitayo ma onongo gikwo i Roma ni: “Niye bino pi winyo lok ma gitito, lok ma giwinyo a i lok ma gitito i kom Kricito.” (Rom. 10:17) Pi meno, wadongo niyewa ki kwano Ginacoya, pe ki nywako i kwer mogo me dini ma Baibul nyuto ni pe tye atir, kadi bed ni ginen mwonya nyo giyomo cwiny dano. Mitte ni wadong niye matek ma lubbe ki ngec ma tye atir pien “labongo niye pe twerre me yomo cwinye [Lubanga].” (Kwan Jo Ibru 11:1, 6.) Dong, pe mitte ni wanen tango mo ma oa ki i polo wek waye ni wanongo ada. Ngiyo kore ki kore pwony me Baibul ma jingo niyewa romo me moko botwa ni wanongo ada dok konyo me kwanyo akalakala mo keken ma watye kwede.

13. Ngo ma oweko jo mapol gukwero Yecu?

¹³ I kare pa Yecu, lupwonnye pa Jon Labatija wigi ocung pien lupwonnye pa Yecu onongo pe giri kec. Yecu otittigi ni pe  mitte ni lupwonnyene guri kec pien en pud etye kwo. (Mat. 9:14-17) Kadi bed kit meno, Luparicayo kacel ki lumone pa Yecu mukene gukwere pien en onongo pe lubo tekwarogi. Akemo omakogi matek i kare ma Yecu ocango jo ma komgi lit i nino me Cabat. (Mar. 3:1-6; Jon 9:16) Onongo gitye ki awaka adada me waco ni gilubo cik me Cabat; ento ki tungcel onongo gipe ki peko mo keken me ye ni dano gutim biacara i ot pa Lubanga. Kiniga omakogi adada i kare ma Yecu owaccigi ni meno pe tye atir. (Mat. 21:12, 13, 15) Dok jo ma Yecu otito kwena botgi i kacokke pa Lujudaya ma i Najaret, akemo omakogi matek i kare ma Yecu otiyo ki lapor ma i tekwaro pa Luicrael me nyuto botgi ni gin luworo dok pe gitye ki niye. (Luka 4:16, 25-30) Jo mapol gukwero Yecu pien en pe otimo gin ma onongo gimito.​—Mat. 11:16-19.

14. Pingo Yecu okwero tim me tekwaro pa dano ma pe rwatte ki pwony me Ginacoya?

¹⁴ Ngo ma Ginacoya waco? Jehovah otiyo ki lanebine Icaya me waco ni: “Rok man kara ginyiko cok kweda ki doggi nono, giketo deyo i koma bene ki doggi nono, cwinygi pe tye i koma wacel, lworo ma gilwora kwede-ni meno cik pa dano ma gipwonyogi kwede.” (Ic. 29:13) Yecu otimo gin ma atir i kare ma okwero tim me tekwaro pa dano ma pe rwatte ki Ginacoya. Jo ma onongo gitamo ni tekwaro kacel ki cik pa dano pire tek loyo gin ma Baibul pwonyo, gukwero bene Jehovah kacel ki ngat ma en ocwalo macalo Meciya.

15. Pingo jo mapol i kare-ni pe gimaro Lucaden pa Jehovah?

¹⁵ Tika waneno peko acel-li i kare-ni? Ada, waneno. Pol pa dano gikeco adada ka Lucaden pa Jehovah pe guribbe kwedgi i kwero kwer mogo ma pe rwatte ki Ginacoya, me labolle kwero nino nywal ki Karama. Jo mukene igi wang ka Lucaden pa Jehovah pe guribbe kwedgi i kwer mogo ma miyo deyo ki lobogi nyo gukwero lubo kwer me yik ma pe rwatte ki Lok pa Lubanga. Oromo bedo ni jo ma cwinygi cwer i kom Lucaden pa Jehovah pi tyen lok magi gitamo ni Lubanga jolo worogi. Ento pe giromo yomo cwinye ka gimaro kwer me lobo-ni ma loyo pwony ma nonge i Baibul.​—Mar. 7:7-9.

16. Ma lubbe ki Jabuli 119:97, 113, 163-165, ngo ma omyero watim dok gin ango ma omyero wagwokke kwede?

¹⁶ Watwero gwokke nining ki i gin ma romo balo niyewa? Mitte ni wadong mar matek adada pi cik kacel ki cik ma igi lac pa Jehovah. (Kwan Jabuli 119:97, 113, 163-165.) Ka wamaro Jehovah, wabikwero kit kwer mo keken ma cwero cwinye. Pe wabiye ni gin mo keken pire obed tek botwa loyo marwa pi Jehovah.

17. Gen ango ma jo mapol i kare pa Yecu onongo gitye kwede i kom Meciya?

¹⁷ Jo mogo i kare pa Yecu onongo gimito alokaloka i gamente. Gin onongo gitye ka tamo ni Meciya bikelo loc ken botgi kun gonyogi ki i te loc pa jo Roma ma gidiyogi. Ento i kare ma gutemo keto Yecu macalo kabakagi, en okwero woko. (Jon 6:14, 15) Lulamdog kacel ki jo mukene onongo gitye ki lworo ni Yecu biloko gamente. Meno onongo biweko kiniga mako jo Roma ci gikwanyo twero ma onongo gumiyo i cing lulamdog woko. Kit macalo Lujudaya mapol onongo gitye ki lworo i kom lok me wibye, gin gukwero Yecu woko.

18. Lok pa lunebi me Baibul mene madok i kom Meciya ma Lujudaya mapol gucayo?

 ¹⁸ Ngo ma Ginacoya waco? Kadi bed ni lok pa lunebi mapol onongo tito ni Meciya biloyo lweny, ento lok pa lunebi mukene waco ni en kong myero oto pi balwa. (Ic. 53:9, 12) Dong, pingo onongo Lujudaya gitye ki gen ma pe atir i kom Meciya? Jo mapol i kare pa Yecu onongo gicayo lok pa lunebi ma pe ocikke ni Meciya bikwanyo pekkigi woko ducu i kare meno.​—Jon 6:26, 27.

19. Tam ma pe tye atir ango ma weko jo mapol gikwero kwena ma watito botgi?

¹⁹ Tika waneno peko acel-li i kare-ni? Ada, waneno. Jo mapol i kare-ni gikwerowa pien pe wadonyo i tim me wibye. Gimito ni wabol kwir i kare me yera. Ento wan waniang ni ki i neno pa Jehovah, ka wayero latela ma dano me loyowa, ci nongo wakwere woko. (1 Cam. 8:4-7) Jo mapol bene gitamo ni omyero wager cukul ki odi yadi dok watim jami mogo me konyo dano ma i kabedowa. Gikwero kwenawa pien wan watute matek me tito kwena, ento pe me cobo pekki me lobo man pi tutunu.

20. Gin ango ma pire myero obed tek loyo botwa ma lubbe ki lok pa Yecu ma kicoyo i Matayo 7:21-23?

²⁰ Watwero gwokke nining ki i gin ma romo balo niyewa? (Kwan Matayo 7:21-23.) Tic ma pire tek loyo botwa myero obed tic ma Yecu ocikowa ni watim. (Mat. 28:19, 20) Pe myero wawek tim me wibye ki cobo pekki me lobo man owir tamwa woko. Wamaro dano dok waparo pi pekkigi, ento wangeyo ni yo maber loyo me konyo jo macok kwedwa obedo ki pwonyogi lok i kom Ker pa Lubanga kacel ki konyogi me dongo wat macok ki Jehovah.

21. Omyero wamoku tamwa me timo gin ango?

²¹ I pwony man, wanyamo tyen lok angwen ma oweko dano mapol i kare pa Yecu gukwere dok ma twero weko jo mogo i kare-ni gikwero lulub kor Yecu. Ento tika magi keken aye obedo jami ma omyero wagwokke kwede? Pe. I pwony ma lubo man, wabineno jami angwen mukene ma twero gengo dano ki doko lulub kor Yecu. Dong omyero wamoku tamwa pe me kwero Yecu ki me gwoko niyewa wek obed matek!