1. Kwo pa lakwena Jon onongo tye nining i agikki me cencwari me acel?

I AGIKKI me cencwari me acel, lakwena Jon onongo tye ka kato ki i kwo matek adada. En onongo dong oti woko, kitweye i cula nam ma kilwongo ni Patimo dok nen calo en kene aye onongo pud tye makwo ki i kin lukwena. (Yabo 1:9) En onongo ngeyo ni jo ma gidag ada gitye ka pwonyo pwony goba ki kelo apokapoka. Onongo twero nen calo ma pe otero kare, Lukricitayo me ada dong gibibedo pe.​—Juda 4; Yabo 2:15, 20; 3:1, 17.

2. Ma lubbe ki Niyabo 7:9-14, Jon oneno ginanyuta ango? (Nen cal ma i pok ngeye.)

² I kare ma Jon tye ka kato ki i kwo man matek-ki, Lubanga oweko en oneno ginanyuta i kom jami ma bitimme i anyim. I ginanyuta man, kiwaco ki lumalaika ni gugeng yamo me twon can madit atika wang ma kityeko keto lanyut i tur nyim gurup mo pa lutic pa Lubanga. (Yabo 7:1-3) Gurup meno tye ki dano 144,000 ma gibiloc kacel ki Yecu i polo. (Luka 12:32; Yabo 7:4) I nge meno Jon dok oloko i kom gurup mukene ma jone dwong adada, ma oweko en owaco ni: “Lacen aneno lwak dano mapol ata, ma ngat mo pe romo kwano welgi, ma gua ki i rok ducu, ki i kaka ducu, ki dano ducu me wi lobo, ki leb ducu, ci gucung i nyim komker ki i nyim Latin romo.” (Kwan Niyabo 7:9-14.) Go kong yomcwiny ma Jon obedo kwede me niang ni i kare me anyim dano mapol ata gibiworo Lubanga i yo matir!

3. (a) Pingo ginanyuta ma Jon oneno-ni omyero ojing niyewa? (b) Gin ango ma wabinyamo i pwony man?

³ Watwero bedo ki gen ni ginanyuta man ojingo niye pa Jon. Dong ginanyuta man myero ojing niyewa makato,  pien watye ka kwo i kare me agikki, ma ginanyuta man tye ka cobbe iye! Watye ka neno kit ma kitye ka coko kwede dano milion mapol ata ma gengi tye me bwot ki i twon can madit atika-ni ki me kwo i paradic i lobo kany pi naka. I pwony man, wabineno kit ma Jehovah onyuto angagi ma gitye i kin lwak dano mapol ata-ni mwaki makato 80 angec. Wabineno bene jami aryo madok i kom lwak meno: (1) ditte ki (2) kit ma jone gia ki i kabedo mapatpat i wi lobo-ni. Jami magi omyero ojing niye pa jo ducu ma gitye ki gen me bedo i kin lumemba me gurup man.

4. Lok ada mene me Baibul ma dini pa Lukricitayo ata-ni pe giniang iye, dok Lutino Kwan me Baibul gubedo pat nining?

⁴ Dini pa Lukricitayo ata-ni pe gipwonyo lok ada ma tye i Ginacoya ni dano ma luwiny gibikwo i lobo kany pi naka. (2 Kor. 4:3, 4) I kare-ni, pol pa dini pa Lukricitayo ata-ni gipwonyo ni dano mabeco ducu gicito i polo ka guto. Ento, gurup matidi pa Lutino Kwan me Baibul ma gucako goyo magajin me Wi Lubele i mwaka 1879 gubedo ki tam mapat. Gin guniang ni Lubanga biloko lobo-ni doko Paradic odoco dok ni dano milion mapol ma gin lugen gibikwo i lobo kany​—pe i polo. Ento, otero kare ki gin me niang maber angagi kikome ma gibibedo i kin dano ma luwiny magi.​—Mat. 6:10.

5. Gin ango ma onongo Lutino Kwan me Baibul gitamo i kom jo 144,000?

⁵ Ki lok ada, Lutino Kwan me Baibul bene guniang ki i Ginacoya ni jo mogo “gikokogi woko ki i lobo” wek gucit i polo ka loc kacel ki Yecu. (Yabo 14:3) Gurup man onongo bibedo ki Lukricitayo 144,000 ma gudyere dok komgi mit, ma gutiyo pi Lubanga ki gen i kare ma gitye i lobo. Ento tamgi onongo tye nining i kom lwak dano mapol ata-ni?

6. Gin ango ma Lutino Kwan me Baibul onongo giye madok i kom lwak dano mapol ata-ni?

⁶ I ginanyuta ma Jon oneno, en oneno lwak dano mapol ata ma “gucung i nyim komker ki i nyim Latin romo.” (Yabo 7:9) Lok meno oweko Lutino Kwan me Baibul gutamo ni lwak dano mapol ata-ni bene gibibedo i polo calo jo 144,000. Ka jo 144,000 kacel ki lwak dano mapol ata-ni ducu gibikwo i polo, ci dong apokapoka ango ma tye i kin gurup aryo-ni? Lutino Kwan me Baibul gutamo ni lwak dano mapol ata-ni nen calo gubedo Lukricitayo ma pe gubedo luwiny ki cwinygi ducu i kare ma pud gitye i lobo. Kadi bed onongo gilubo rwom me kwo matir me Baibul, nen calo mogo i kingi gugak lumemba me dini pa Lukricitayo ata-ni. Lutino Kwan me Baibul gumoko ni jo magi gunyutu mar mo olo pi Lubanga ento pe matek ma romo weko giloyo loc kacel ki Yecu. Kit ma margi pi Lubanga pe obedo matek-ki, lwak dano mapol ata-ni gibibedo mupore me cung i nyim komker ento pe me bedo i wi komker.

7. Lutino Kwan me Baibul onongo gitamo ni angagi ma gibikwo i lobo i kare me loc me Mwaka Alip Acel, dok onongo gitamo ningo i kom jo ma lugen ma gukwo con?

⁷ Dong angagi ma onongo gibibedo i lobo? Lutino Kwan me Baibul gutamo ni i nge coko jo 144,000 kacel ki lwak dano mapol ata-ni i polo, Lubanga bimiyo dano milion mukene kwo i lobo wek gunong mot i te Loc me Mwaka Alip Acel pa Kricito. Lutino Kwan me Baibul onongo gitamo ni dano milion magi pe gibitic pi Jehovah ma peya Loc pa Kricito ocakke.  Gutamo ni gurup man kibipwonyogi lok i kom Jehovah i kare me loc me Mwaka Alip Acel. I nge meno, jo ma guye lubo rwom me kwo ma atir pa Jehovah gibinongo mot me kwo pi naka i lobo ento jo ma gukwero kibijwerogi woko. Lutino Kwan me Baibul onongo gitamo ni jo mogo ma gibitic macalo “rwodi” i lobo i kare meno​—ma i kine tye iye “jo macon ma myero” (ma gin aye co ma lugen ma guto ma Yecu peya oto) ma kicerogi—​kibiminigi mot me kwo i polo i agikki me Loc me Mwaka Alip Acel.​—Jab. 45:16.

8. Gurup adek mene ma onongo ginen ki bot Lutino Kwan me Baibul calo gitye i yub pa Lubanga?

⁸ Dong, Lutino Kwan me Baibul gutamo ni tye gurup adek: (1) jo 144,000, ma gibiloc ki Yecu i polo; (2) lwak dano mapol ata ma gia ki i kin Lukricitayo ma pe gutiyo ki mit kom, ma gibicung i nyim komker pa Yecu i polo; ki dong (3) dano milion mapol ma kibipwonyogi ki yo pa Jehovah i lobo kany i kare me Loc me Mwaka Alip Acel pa Kricito. * Ento lacen, Jehovah okonyogi me niang lok man maber.​—Car. 4:18.

9. (a) I yo ma nining ma lwak dano mapol ata ma gitye i lobo gicung “i nyim komker ki i nyim Latin romo”? (b) Pingo niango man manyen-ni i kom Niyabo 7:9 rwatte?

⁹ I mwaka 1935, Lucaden pa Jehovah guniang jo mene ma gubedo lwak dano mapol ata-ni ma Jon oneno i ginanyuta. Lucaden pa Jehovah guniang ni pe mitte ni lwak dano mapol ata-ni gubed wa i polo ka wek gucung “i nyim komker ki i nyim Latin romo.” Me ka meno, ka ma gucung iye tye macalo lanyut. Kadi bed ni gibikwo i lobo, lwak dano mapol ata-ni pud gitwero cung “i nyim komker” ka gitye luwiny bot Jehovah dok gineno en macalo laloc ma loyo polo ki lobo. (Ic. 66:1) Gitwero cung “i nyim Latin romo” ka giketo i tic niyegi i kom ginkok pa Yecu. I yo acel-lu, i Matayo 25:31, 32, kiwaco ni “rok ducu”​—ma i kine tye iye jo maraco—​“bicokke kacel” i nyim Yecu ma obedo i wi komkerre me deyo. Ngene kene ni, rok magi ducu pe gitye i polo ento i lobo kany. Niango man manyen-ni rwatte ki ada mukene me Baibul. Tito pingo Baibul pe waco ni lwak dano mapol ata-ni kibiterogi i polo. Tye gurup acel keken ma kicikke me minigi kwo ma pe tum i polo​—dano 144,000, ma “gibiloyo lobo” kacel ki Yecu.​—Yabo 5:10.

10. Pingo bimitte ni lwak dano mapol ata-ni kipwonygi i yo pa Jehovah ma peya Mwaka Alip Acel ocakke?

¹⁰ Nicakke i mwaka 1935, Lucaden pa Jehovah guniang ni lwak dano mapol ata ma Jon oneno-ni gin aye Lukricitayo ma gugwoko gennegi dok gitye ki gen me kwo pi naka i lobo kany. Wek gubwot ki i twon can madit atika-ni, mitte ni kipwony lwak dano mapol ata-ni wek gunge dok guwor Jehovah ma peya Mwaka Alip Acel ocakke.—Luka 21:34-36.

11. Pingo Lutino Kwan me Baibul mogo gutamo ni kibitero jo mogo i polo i nge loc me Mwaka Alip Acel?

¹¹ Tam man ni jo mogo ma lugen i lobo kany kibiterogi i polo i agikki me Mwaka Alip Acel-li kono? Tam meno ma okatti mwaki mogo angec i Wi Lubele me Febuari 15, 1913 onongo jenge i kom tam ni: ‘Pingo omyero kimi jo ma lugen ma gukwo con mot me kwo i lobo keken kun Lukricitayo ma pe gutiyo ki mit kom kimiyogi mot me kwo i polo?’ Ngene kene ni tam meno onongo jenge i kom tam aryo ma pe  tye kakare: (1) ni lwak dano mapol ata-ni gibibedo i polo ki (2) ni lwak dano mapol ata-ni gubedo Lukricitayo ma pe gutiyo ki mit kom.

12-13. Gin ango ma Lukricitayo ma kiwirogi ki lwak dano mapol ata-ni gingeyo madok i kom motgi?

¹² Ento kit ma dong waneno kwede, nicakke i mwaka 1935, Lucaden pa Jehovah guniang ka maleng ni jo ma gibibwot ki i lweny me Armagedon aye lwak dano mapol ata ma Jon oneno i ginanyuta-ni. Gibikatti ki i “can madit atika” i lobo kany, dok “gidange ki dwan malongo ni, ‘Laro dano tye bot Lubangawa ma obedo i wi komker, ki bot Latin romo!’” (Yabo 7:10, 14) Medo i kom meno, Ginacoya pwonyo ni jo ma kibicerogi me kwo i polo ginongo “gin mo maber makato” jo me kare macon ma lugen. (Ibru 11:40) Pi meno, omegiwa gucako lwongo dano ki mit kom me bino ka tic pi Jehovah wek gubed ki gen me kwo pi naka i lobo kany.

¹³ Jo ma gitye i kin lwak dano mapol ata-ni cwinygi yom adada pi gen ma gitye kwede. Giniang ni Jehovah aye ma yero ka ma luticce ma lugen gibitic pire iye, kadi bed i polo nyo i lobo. Lukricitayo ma kiwirogi kacel ki lwak dano mapol ata-ni giniang bene ni motgi twere pi kica pa Jehovah ma pe gupore pire ma kimiyogi kun wok ki i ginkok pa Yecu Kricito.​—Rom. 3:24.

14. I nge mwaka 1935, pingo jo mapol gubedo ki akalakala i kom kit ma ginanyuta madok i kom lwak dano mapol ata-ni bicobbe kwede?

¹⁴ I kare ma jo pa Lubanga gunongo niango manyen man i mwaka 1935, jo mapol pud gubedo ki akalakala kit ma dano ma gibikwo i lobo gibidoko kwede lwak ma welgi dit. Me labolle, Omego Ronald Parkin onongo tye ki mwaka 12 i kare ma kitito ka maleng jo mene ma lwak dano mapol ata-ni gubedo. Wiye po ni: “I kare meno, onongo wel lutit kwena romo 56,000 keken i wi lobo ducu, dok polgi onongo gubedo jo ma kiwirogi. Pi man lwak dano mapol ata-ni pe onen calo lwak dano kulu.”

15. Tic me coko lwak dano mapol ata-ni tye ka wot nining?

¹⁵ I mwaki ma lubo meno, kicwalo lumiconari i lobe mapol, dok wel Lucaden pa Jehovah obedo ka medde ameda. Ka dong, i mwaka 1968, kicako yub me kwano Baibul ki dano kun kitiyo ki buk me The Truth That Leads to Eternal Life. Yo mayot ma buk man otito kwede lok ada me Baibul oywayo dano ma gimwol bot  Jehovah makato macon. I kine ka mwaka 4 keken, dano ma welgi kato 500,000 gunongo batija. I kare ma Dini pa Katoli ocako doko goro i lobe ma i Latin America ki mukene, dok ma kikwanyo kigeng woko ki i ticwa i lobe ma Tung Kunyango me Ulaya ki lobe mogo ma i Afrika, dano milion mapol gunongo batija. (Ic. 60:22) I mwaki mogo macok cok-ki, dul pa Jehovah oyubo jami tic mapol me konyo dano wek gupwony gin ma Baibul ada pwonyo. Pe tye akalakala mo keken ni Jehovah tye ka coko lwak dano mapol ata-ni​—ma kombeddi welgi kato milion aboro.

16. Kitye ka coko lwak dano mapol ata-ni ki kwene?

¹⁶ I kare ma Jon tye ka coyo ginanyuta meno, en owaco ni lwak dano mapol ata-ni gibia ki i “rok ducu, ki i kaka ducu, ki dano ducu me wi lobo, ki leb ducu.” Lanebi Jekaria con onongo kong otito gin ma cal ki man. En ocoyo ni: “I kare meno jo apar ma gua ki i lwak rok ma lebgi patpat gibimako dog kanyi pa Lajudaya, kun giwacci, ‘Wek wanywak wot kwedi, pien wawinyo ni Lubanga tye kwedwu.’”​—Jek. 8:23.

17. Gin ango ma kitye ka timone me konyo jo me rok ki leb ducu?

 ¹⁷ Lucaden pa Jehovah giniang ni wek kicok dano ma giloko leb mapatpat, omyero kitit kwena maber-ri bene i leb mapatpat. Wabedo ka gonyo jami ma konyowa me kwano Baibul ki dano dong pi mwaki makato 130 kulu, dok kombeddi watye ka cobo tic me gonyo leb madit loyo i tekwaro pa dano, i leb miya mapol. Nen ka maleng ni Jehovah tye ka timo tango i kare-ni me coko lwak dano mapol ata-ni ki i rok ducu. Watye ki pwoc madit pi cam me cwiny ma dong welle tye ka medde ameda i leb mapatpat, dok macalo adwogine, jo me gurup man gitye ma guribbe kacel i woro Lubanga. Dok Lucaden pa Jehovah gingene matek pi mit komgi i tito kwena ki nyuto mar me omego. Man pud dong jingo niyewa ya!​—Mat. 24:14; Jon 13:35.

18. (a) Ma lubbe ki Icaya 46:10, 11, pingo pe watye ki ur ni Jehovah ocobo lok pa lanebi i kom lwak dano mapol ata-ni? (b) Pingo jo ma gitye ki gen me kwo i lobo pe giwinyo calo gitye ka keng gin mo?

¹⁸ Watye ki tyen lok ducu me bedo ki yomcwiny pi ginanyuta ma loko i kom lwak dano mapol ata-ni! Pe watye ki ur ni Jehovah ocobo lok pa lanebi man i yo mamwonya. (Kwan Icaya 46:10, 11.) Lwak dano mapol ata-ni gitye ki pwoc pi gen ma Jehovah ominigi. Pe giwinyo calo gitye ka keng gin mo pien ni pe kiwirogi ki cwiny pa Lubanga wek guti kacel ki Yecu i polo. I Ginacoya, wakwano lok i kom co ki mon ma lugen ma cwiny maleng otelogi kadi bed pe gitye i kin dano 144,000-ni. Jon Labatija tye ngat acel i kingi. (Mat. 11:11) Daudi bene. (Tic 2:34) Gin kacel ki jo mapol ma pe watwero kwano welgi kibicerogi me kwo i paradic i lobo kany. Gin ducu​—kacel ki lwak dano mapol ata-ni—​gibibedo ki kare me nyuto gennegi bot Jehovah ki twero me locce.

19. Cobbe pa ginanyuta ma Jon oneno madok i kom lwak dano mapol ata-ni nyuto nining ni kare dong odic woko?

¹⁹ Pe tye kare mo keken i tekwaro pa dano ma Jehovah onoto kacel dano milion mapol ki i rok ducu. Kadi bed ni genwa tye me kwo i polo nyo i lobo, omyero wakony jo mapol kit ma watwero kwede wek gubed i kin “romi mukene.” (Jon 10:16) Ma pe otero kare, Jehovah bikelo twon can madit atika ma bijwero gamente kacel ki dini ma gukelo peko i kom dano. Lumemba me lwak dano mapol ata-ni pud dong gitye ki mot madit ya​—mot me tic pi Jehovah i lobo kany pi naka!​—Yabo 7:14.