1. Pingo omyero wamine i te loc pa Jehovah?

OMYERO wamine i te twero * pa Jehovah pien en aye Lacwecwa. Pi tyen lok man, en tye ki twero me miyo cik bot cwecce. (Yabo 4:11) Ento watye ki tyen lok mukene me winyo dog Jehovah​—yo me locce aye ber loyo. Nicakke wa con i tekwaro pa dano, luloc gubedo ki twero i kom jo mukene. Ka waporo locgi ki kit ma Jehovah loyo kwede locce, wanongo ni Jehovah aye Laloc maryek, lamar, dok lakica loyo ducu.​—Nia 34:6; Rom. 16:27; 1 Jon 4:8.

2. Jo Ibru 12:9-11 miniwa tyen lok ango me mine i te loc pa Jehovah?

² Jehovah mito ni wawinye, pe pien ni walwore ento pien wamarre dok wanene calo Wonwa ma marowa. I waragane but jo Ibru, Paulo otito ni “myero wamine mukato i te loc pa Wonwa me cwiny” pien en “pwonyowa pi konyowa.”​—Kwan Jo Ibru 12:9-11.

3. (a) Wanyuto nining ni watye ka mine i te loc pa Jehovah? (b) Wabigamo lapeny mene?

³ Wamine i te loc pa Jehovah ka watute ki kerowa ducu me timo jami i yone me ka jenge i kom niangowa. (Car. 3:5) Wanongo yot me mine i te twero pa Jehovah ka wapwonyo lok i kom kite mapatpat. Pingo? Pien kite magi aye tugo cwinye me timo jami ducu ma en timo. (Jab. 145:9) Marwa pire dongo ka ngecwa i kome bene  tye ka medde. Dok ka wamaro Jehovah, ci pe wamito cik mapol me wacciwa gin ma omyero watim ki ma pe watim. Watute matek me loko tamwa ki kit ma wawinyo kwede wek obed ma rwatte ki gin maber i wang Jehovah kun wagwokke ki i gin marac. (Jab. 97:10) Ento i kare mukene, wanongo ni pe yot me winyo Jehovah. Pingo tye kit man? Dok gin ango ma luelda, wege, ki mege giromo pwonyone ki i lanen pa Nekemia; Kabaka Daudi; ki Maliam min Yecu? Pwony man bigamo lapeny magi.

4-5. Ma lubbe ki Jo Roma 7:21-23, pingo twero bedo tek me mine i te twero pa Jehovah?

⁴ Tyen lok acel ma omiyo watwero nongo tek me mine i te twero pa Jehovah aye pien wan ducu walako bal dok watye ki roc. Pi meno wan ducu watye ki cwiny me jemo. I kare ma Adam ki Kawa gujemo i kom Lubanga ci gucamo nyig yat ma kigengogi iye-ni, gucako moko pigi kengi gin maber ki gin marac. (Acak. 3:22) I kare-ni, pol pa dano pud gicayo cik pa Jehovah dok gimoko pigi kengi gin maber ki gin marac.

⁵ Kadi jo ma gingeyo dok gimaro Jehovah pud ginongo ni tek me mine i te twerone. Lakwena Paulo bene oyelle ki goro man. (Kwan Jo Roma 7:21-23.) Calo Paulo, wan ducu wamito timo gin ma atir i wang Jehovah. Ento kare ducu omyero walweny ki cwiny me timo gin marac.

6-7. Tyen lok mukene ango ma oweko twero bedo tek me mine i te loc pa Jehovah? Mi labol.

⁶ Tyen lok mukene mumiyo twero bedo tek me mine i te loc pa Jehovah aye obedo kit me tekwarowa ma wadongo iye. Tam pa dano pol kare pe rwatte ki cik pa Jehovah, pi meno omyero wabed ka tute matek pe me tam kit ma jo magi gitamo kwede. Tam kong i kom labol acel man.

⁷ I kabedo mapol, jo matino ginongo lyeto matek me tiyo cente madwong. Laminwa mo ma nyinge Mary * okato ki i ariya man. Ma peya en opwonyo lok i kom Jehovah, en okwano i univaciti maber adada i lobogi. Mary onongo lyeto magwar ki bot jo ganggi me nongo dog tic ma culle lamal dok bene dano woro. En bene onongo tye ki miti me timo meno. Ento, i nge pwonyo lok i kom Jehovah ki dongo mar pire, en oloko yubbe woko. Kadi bed kit meno en owaco ni: “I kine mukene aneno yo mogo me tiyo cente madwong, ento angeyo ni bigenga ki tic pi Jehovah kit ma amito kwede. Pi kit ma adongo kwede, pud atute me kwero tic magi. Pol kare alego Jehovah ni okonya akwer atematema me ye dog tic ma twero kwanya woko ki i tic pire.”​—Mat. 6:24.

8. Gin ango ma wabineno kombeddi?

⁸ Wanongo adwogi maber ka wamine i te loc pa Jehovah. Ento jo ma gitye ki twero, calo luelda, wege, ki mege, gitye ki tyen lok mukene me lubo tira pa Lubanga; gitye ki kare me konyo jo mukene. Kong dong wanenu labol mogo ki i Baibul ma twero pwonyowa kit me tic ki twerowa i yo ma yomo cwiny Jehovah.

9. Ariya ango ma Nekemia okemme kwede?

⁹ Jehovah omiyo ki luelda tic ma pire tek adada me gwoko jone. (1 Pet. 5:2) Luelda  gitwero pwonyo jami mapol ki i kit ma Nekemia otero kwede jo pa Jehovah. Kit macalo Nekemia onongo obedo laloc me Juda, en onongo tye ki twero madit adada. (Nek. 1:11; 2:7, 8; 5:14) Go kong ariya mogo ma Nekemia okemme kwede. En onongo ni dano gupyedo ot pa Lubanga dok pe gitye ka miyo acel me apar bot Lulevi kit macalo cik onongo mito kwede. Lujudaya onongo pe gitye ka lubo cik me Cabat, dok co mogo gunyomo mon ma lurok ma pe giworo Jehovah. Nekemia macalo Laloc onongo myero ocob pekki magi.​—Nek. 13:4-30.

10. Nekemia odok i ariya ma en okemme kwede nining?

¹⁰ Nekemia pe otiyo ki twerone i yo marac kun diyo dano ni gulub tamme. Me ka meno, en olego ki cwinye ducu bot Jehovah kun penyo pi konye, dok opwonyo dano ki Cik pa Jehovah. (Nek. 1:4-10; 13:1-3) Nekemia bene otiyo kacel ki utmegine, kun bene konyogi ki gero cel me Jerucalem.​—Nek. 4:15.

11. Ma lubbe ki 1 Jo Tecalonika 2:7, 8, luelda omyero guter jo me kacokke nining?

¹¹ Pe dong tye ni luelda ducu gibikemme ki pekki calo ma Nekemia okemme kwede-ni, ento pud gitwero lubo lanenne i yo mapol. Me labolle gitiyo matek me konyo omege ki lumege. Dok pe giweko twero ma gitye kwede miyo gibedo jo ma wakke. Me ka meno, gitero omege ki lumege me kacokke ki kica. (Kwan 1 Jo Tecalonika 2:7, 8.) Pien gubedo jo mamwol dok gimaro dano, giloko ki dano i yo me kica. Andrew, ma obedo laelda pi mwaki mapol owaco ni: “Aneno ni ka laelda lakica dok tye ki cwiny me lirem, man gudo cwiny omege ki lumege. Dok man tugo cwinygi me tic kacel ki luelda.” Tony, ma bene otiyo macalo laelda pi mwaki mapol owaco ni: “Atute me keto i tic tira ma tye i Jo Pilipi 2:3 dok  pol kare atemme me neno jo mukene calo rwomgi loyo mega. Man konya pe me diyo jo mukene.”

12. Pingo pire tek adada ki luelda me bedo jo mamwol?

¹² Luelda myero gubed jo mamwol, kit macalo Jehovah bene mwol-li. Kadi bed Jehovah obedo Won Twer ducu, en “kulle neno piny” ka ilo “lucan malo nia ki i apwa.” (Jab. 18:35; 113:6, 7) Ki lok ada, Jehovah dag jo ma giwakke.​—Car. 16:5.

13. Pingo omyero laelda otute matek me “juko lebe”?

¹³ Laelda ma mine i te twero pa Jehovah omyero otute matek me “juko lebe.” Ka pe otimo kit meno, en twero lok marac bot ngat mo ma pe onyute woro. (Yak. 1:26; Gal. 5:14, 15) Andrew, ma kiloko i kome con-ni owaco ni: “I kine mukene nongo amito lok marac adada bot omego nyo lamego mo ma pe onyuta woro macalo laelda. Kadi bed kit meno, alwodo lanen pa co ma lugen ma tye i Baibul, dok man okonya me pwonyo kit ma pire tek kwede me bedo mwol.” Luelda ginyuto ni gimine i te twero pa Jehovah ka giloko ki jo me kacokke i yo me mar ki mwolo, kadi wa bot luelda luwotgi.​—Kol. 4:6.

14. Tic ango ma Jehovah omiyo ki wege, dok en mito gin ango ki botgi?

¹⁴ Jehovah oketo wego macalo lawi ot, dok Lubanga mito ni en opwony lutinone dok ominigi tira. (1 Kor. 11:3; Ep. 6:4) Ento twero pa wego tye ki wang cone​—en myero oter jo gange kit ma Jehovah mito kwede, pien Jehovah aye Ngat ma ocako te yub me ot. (Ep. 3:14, 15) Wege ginyuto ni gimine i te twero pa Jehovah ka gitiyo ki twerogi i yo ma yomo cwiny Lubanga. Gitwero pwonyo jami mapol ki i kwo pa Kabaka Daudi.

15. Pingo Kabaka Daudi obedo lanen maber adada ma wege myero gulubi?

¹⁵ Jehovah pe ocimo Daudi macalo lawi otte keken ento bene macalo lawi rok me Icrael ducu. Macalo kabaka, Daudi onongo tye ki twero madwong adada. I kare mogo, en otiyo ki twerone i yo marac dok otimo bal madongo. (2 Cam. 11:14, 15) Ento en onyuto ni emine i te twero pa Jehovah ki jolo pwod ma kimine. En otito lok ducu ma i cwinye bot Jehovah i lega. Dok en otute matek me lubo tira ma Jehovah omine. (Jab. 51:1-4) Medo i kom meno, en onyuto mwolone ki jolo  tira pe ki bot co keken ento ki bot mon bene. (1 Cam. 19:11, 12; 25:32, 33) Daudi onongo pwony ki i balle dok oweko tic pi Jehovah obedo gin ma pire tek loyo i kwone.

16. Pwony ango ma wege gitwero nongone ki bot Daudi?

¹⁶ Nen kong pwony mogo ma wege gitwero nongone ki bot Kabaka Daudi: Pe iti ki twero ma Jehovah omini i yo marac. Ye balli, dok ijol tira me Baibul ma jo mukene gimini. Ka itimo kit meno, jo me paconi gibimini woro pi mwoloni. Ka itye ka lega kacel ki jo me otti, tit lok ma i cwinyi ka maleng bot Jehovah​—wek gin guwiny kit ma ijenge kwede i kom Jehovah. Dok ma pire tek loyo ducu, wek tic pi Jehovah obed gin ma pire tek loyo i kwoni. (Nwo. 6:6-9) Lanenni maber obedo mot acel ma pire tek ma itwero miyo ki jo me paconi.

17. Tic ango ma Jehovah omiyo ki mege?

¹⁷ Jehovah bene omiyo ki mege tic ma pire tek adada i paco, dok bene ominigi twero i kom lutinogi. (Car. 6:20) Gin ma mege giwaco dok gitimo twero gudo lutinogi pi kare me kwogi ducu. (Car. 22:6) Nen kong gin ma mege gitwero pwonyone ki bot Maliam min Yecu.

18-19. Gin ango ma mege gitwero pwonyo ki i lanen pa Maliam?

¹⁸ Maliam onongo ngeyo Ginacoya maber adada. En odongo woro matut pi Jehovah dok onongo tye ki wat macok kwede. En obedo atera me jolo tira pa Jehovah, kadi bed ni onongo man biloko kwone i yo ducu.​—Luka 1:35-38, 46-55.

¹⁹ Mege, wutwero lubo lanen pa Maliam i yo mapol. Wutwero timo man nining? Me acel, ka igwoko watti ki Jehovah bedo matek ki kwano Baibul piri keni kun bene ilego kare ki kare. Me aryo, ka ibedo atera me keto alokaloka i kwoni wek iyom cwiny Jehovah. Me labolle, twero bedo ni i paco ma idongo iye lunyodoni onongo gikeco oyotoyot dok giloko ki gero i kom lutinogi. Pi meno twero bedo ni idongo ma itamo ni meno aye kit me pwonyo lutino. Kadi wa i nge pwonyo rwom me kwo ma Jehovah mito, pud itwero nongo ni tek adada me diyo kinigani ka lutinoni guwango i, tutwalle ka iol. (Ep. 4:31) I kare ma kit man, mitte tutwal ni ijenge i kom Jehovah i lega makato kare mo keken. Mego mo ma nyinge Lydia owaco ni: “I kine mukene mitte ni aleg matek adada wek pe alok  ki gero ka woda pe owinyo loka. I kare mogo agiko loka atura ci alego bot Jehovah wek okonya. Lega konya me bedo ma cwinya opye mot.”​—Jab. 37:5.

20. Ariya ango ma mege mukene gikemme kwede, dok gitwero loyone nining?

²⁰ Mege mukene dok gitye ki ariya mapat​—ginongo ni tek me nyuto mar pi lutinogi. (Tito 2:3, 4) Pol pa mege magi gudongo i paci ma lunyodogi onongo pe ginyuto mar bot lutinogi. Ka meno aye kit ma idongo kwede, pe mitte ni inwo bal ma lunyodoni gutimo. Mego ma mine i te twero pa Jehovah myero opwony kit me nyuto mar bot lutinone. Twero bedo tek bote me loko tamme, kit ma en winyo kwede, ki jami ma en timo. Ento alokaloka magi twere, dok man bikelo adwogi maber bote kacel ki lupacone.

21-22. Ma lubbe ki Icaya 65:13, 14, adwogi maber ango ma wanongo ka wamine i te twero pa Jehovah?

²¹ Kabaka Daudi onongo ngeyo ber pa mine i te loc pa Jehovah. En ocoyo ni: “Pwony pa Rwot [Jehovah] tye atir, yomo cwiny dano; cik pa Rwot tye maleng, miyo dano niang maber. Gimiyo ngec bot laticci; ngat ma ogwoko cikki limo mot madit.” (Jab. 19:8, 11) I kare-ni watwero neno apokapoka i kin jo ma gimine i te twero pa Jehovah ki jo ma gikwero tirane. Jo ma gimine i te loc pa Jehovah ‘giwero ki yomcwiny.’​—Kwan Icaya 65:13, 14.

²² Ka luelda, wege, ki mege gimine i te twero pa Jehovah, kwogi lokke bedo maber, jo me pacigi gibedo ki yomcwiny, dok jo me kacokke gibedo ma gunote. Ma dong pire tek loyo ducu, giyomo cwiny Jehovah. (Car. 27:11) Meno aye yomcwiny madit loyo ma watwero bedo kwede!