1, 2. (a) Mot ango ma lutic pa Lubanga gitye ka kurone? (b) Ngo ma konyowa me ciko wangwa i kom mot meno? (Nen cal ma tye i pot karatac man.)

LUKRICITAYO ma kiwirogi gitye ki mot mamwonya adada. Gitye ki gen me kwo i wi polo. Lakwena Paulo owaco ni meno ‘aye lwongo ma Lubanga tye ka lwongogi kwede.’ (Jo Pilipi 3:14) Ki i polo, gibiloc kacel ki Yecu i kerre kun gitiyo kacel kwede me konyo dano me lobo wek gudok jo ma pe ki roc mo. (Niyabo 20:6) Man mot ma mamwonya atika! Romi mukene-ni gitye ka kuro mot mukene. Gitye ki gen me kwo pi naka i Paradic i lobo kany dok gen man minigi yomcwiny adada!​—2 Petero 3:13.

² Paulo onongo mito konyo Lukricitayo luwote ma kiwirogi wek gugwok gennegi ci gunong mot. En owaccigi ni: “Wuket cwinywu i kom jami ma tye malo i polo.” (Jo Kolocai 3:2) Onongo mitte ni guket cwinygi i kom motgi me cito i polo. (Jo Kolocai 1:4, 5) Ka wabedo ka tam i kom mot ma Jehovah biminiwa ci bikonyowa me ciko wangwa i kom mot meno. Man tye ada kadi watye ki gen me cito i  polo nyo me bedo i lobo kany.​—1 Jo Korint 9:24.

3. Paulo ociko Lukricitayo i kom gin ango?

³ Paulo ociko Lukricitayo i kom jami mogo ma twero gengogi ki nongo mot. Me labolle, en ocoyo waraga bot Jo Kolocai madok i kom Lukricitayo mogo ma lugoba ma onongo gitemme me yomo cwiny Lubanga ki lubo cik pa Moses maka keto niyegi i kom Yecu. (Jo Kolocai 2:16-18) Paulo bene otito jami mogo ma pud tye i kare-ni ki dok ma twero gengowa ki nongo mot. En bene otitiwa kit ma watwero kwero kwede miti maraco ki dong gin ma myero watim ka watye ki peko i otwa nyo ki utmegiwa ma i kacokke. Tam ma Paulo omiyo-ni twero konyowa bene i kare-ni. Pi meno, kong dong waneno tam mogo ma tye i waragane bot jo Kolocai.

4. Pingo miti macilo twero gengowa ki nongo mot?

⁴ I nge poyo wi utmegine i kom mot mamwonya ma gitye kwede, en owaccigi ni: “Pi meno myero dong wunek gin ducu me lobo ma tye i iwu, ma gin aye abor, caro, mit me kom, ki par marac ma kelo lewic, ki woro me jami.” (Jo Kolocai 3:5) Miti maraco twero bedo tek adada dok twero balo watwa ki Jehovah dok weko warwenyo genwa pi anyim. Omego mo ma otimo tim carocaro ci i ngeye odwogo cen i kacokke owaci miti macilo meno onongo odoko tek “ma pe dong jukke nio wa i bal.”

5. Watwero gwokke ki i jami ma twero terowa i bal nining?

⁵ Omyero wagwokke ka watye ka kemme ki jami ma twero miyo waturo cik pa Jehovah. Me labolle, bedo me ryeko ka jo ma gitye ka winye me nyom pe gibedo ka kengi, kun bene giketo wang coo ka ma tim calo, gudo kom lawoti, ki noto dog myero ogik iye. (Carolok 22:3) Gin mukene ma twero bedo macalo atematema botwa aye ka wacito ka mo pi lok me biacara nyo ka watiyo ki ngat ma pe obedo laco nyo dako calo wan. (Carolok 2:10-12, 16) Ngo ma itwero timone me gwokke ki donyo i tim macilo? Wek dano gunge ni in Lacaden pa Jehovah. Kwo i yo maber, dok pe wii owil ni meno lok oree keto latin ic. Myero bene wagwokke ka wawinyo calo watye kenwa nyo ka cwinywa tye ka cwer. Watwero cako bedo ki miti ni ngat mo onyut ni eparo piwa. Dok man twero terowa bot ngat mo keken. Adwogine twero bedo rac adada. Ka iwinyo kit meno, pe itim gin mo ma twero gengi ki nongo mot. Leg bot Jehovah ci inong kony ki bot omege kacel ki lumege.​—Kwan Jabuli 34:18; Carolok 13:20.

6. Ngo ma myero wiwa opo iye ka watye ka yero galowang?

⁶ Me gwokke ki i miti maraco, myero wakwer galowang ma kubbe ki tim tarwang. I kare-ni, pol galowang ma tye poyo wiwa i kom gin ma onongo timme i Codom ki Gomora. (Juda 7) Jo ma giyubo galowang giweko tim tarwang nen calo gin maber ma pe gudowa i yo marac. Pi meno myero wagwokke i cawa ducu. Pe watwero galowangwa ki jami ducu ma lobo-ni yubo. Ma ka meno, myero wayer jami me galowanga ma pe  bigengowa ki nongo mot me kwo.​—Carolok 4:23.

7. Peko ango ma twero bedo i kacokke?

⁷ Cwinywa yom me bedo i dul pa Jehovah. Wanyamo Lok pa Lubanga i cokkewa, dok bene watye ki yomcwiny me konyo luwotwa. Man konyowa me ciko wangwa i kom mot ma watye kwede. Ento i cawa mukene winye manok twero kelo peko i kin omege ki lumege. Ka pe watute me cobone, man twero weko wamako ngat moni i cwinywa.​—Kwan 1 Petero 3:8, 9.

8, 9. (a) Kit ango ma twero konyowa me nongo mot? (b) Ngo ma twero konyowa me bedo ki kuc i kacokke kadi bed ni Lakricitayo lawotwa ocwero cwinywa?

⁸ Pe myero wawek akemo ogengwa ki nongo mot. Paulo otito gin ma myero Lukricitayo gutim kun waco ni: “Wun aye jo ma Lubanga dong oyero, jo maleng ma Lubanga maro; pi meno myero dong wuruk cwiny ma miyo wuparo pi can pa luwotwu, wubed ki kica, mwolo, woro ki diyo cwiny. Wudi cwinywu kekenwu, ngat acel acel odi cwinye i kom lawote, kun wutimo kica ki luwotwu i kinwu kekenwu pi balwu. Ka ngat mo i kinwu tye ki lok mo i kom lawote, timo kica pi bal myero obed tye macalo Rwot bene ceng otimowu kica. Ento makato magi ducu, myero wubed kun wupong ki mar. Pien mar keken aye tweyo jami ducu, ribogi kacel ma cobo bene maber licwic.”​—Jo Kolocai 3:12-14.

⁹ Cwiny me mar kacel ki kica twero konyowa me timo kica ki jo mukene. Ka cwinywa ocwer i kom ngat mo pi gin ma en owaco nyo otimo, ci watwero tam i kom kare mo ma wan bene waloko nyo watimo gin mo ma ocwero cwiny jo mukene ci gutimiwa kica. Cwinywa obedo yom adada pi margi kacel ki cwiny me kica ma gunyuto! (Kwan Latitlok 7:21, 22.) Watye ki pwoc madit ni Kricito onoto luworo me ada kacel. (Jo Kolocai 3:15) Wan ducu wamaro Lubanga acel, watito kwena acel, dok pekki ma wawok ki iye polle girom. Ka watye ki mar, waparo pi jo mukene dok watimo kica i kinwa, ci dano ducu me kacokke ginote kacel dok waketo cwinywa i nongo mot me kwo.

10, 11. (a) Pingo cwiny me nyeko rac adada? (b) Ngo ma watwero timone wek cwiny me nyeko pe ogengwa ki nongo mot?

¹⁰ Nyeko twero gengowa ki nongo mot. Labol ma tye i Baibul nyuto kit ma cwiny me nyeko rac kwede. Me labolle, nyeko omako Kain i kom Abel ci oneke woko. Nyeko omako Kora, Datan, ki dong Abiram i kom Moses ci gujemo i kome. Nyeko omako Kabaka Caulo i kom Daudi ci otemme me neko Daudi woko. Gin ma Lok pa Lubanga waco tye ada ni: “Ka ma nyeko ki laro dito tye iye, inongo anyobanyoba ki tim ducu maraco tye iye.”​—Yakobo 3:16.

¹¹ Ka watute matek me dongo cwiny me mar ki kica, ci nyeko pe bimakowa oyotoyot. Lok pa Lubanga waco ni: “Mar diyo cwinye, dok lakica bene; mar pe lanyeko.” (1 Jo Korint 13:4) Wek pe wadong cwiny me nyeko, myero watute me neno jami kit ma Jehovah neno  kwede. Myero wanen omegiwa ki lumegiwa calo dul kom acel, ma en aye kacokke. Baibul waco ni: “Ka gipako dul acel, dul mukene-gu bene ducu ribbe kwede ki yomcwiny.” (1 Jo Korint 12:16-18, 26) Ka gin mo maber otimme i kom utmegiwa, wabedo ki yomcwiny pigi dok nyeko pe makowa i komgi. Tam i kom labol maber ma Yonacan wod pa Kabaka Caulo oweko. Nyeko pe omako Yonacan i kare ma kiyero Daudi me bedo kabaka ma ka en. En ocuko cwiny Daudi dok okonye. (1 Camuel 23:16-18) Tika watwero bedo ki cwiny me kica ki mar calo Yonacan?

12. Tam mene me Baibul ma twero konyo jo me otwa me nongo mot?

¹² Ka jo ducu ma i ot giketo i tic cik ma iye lac me Baibul, ci kuc ki yomcwiny bedo tye i ot dok gibinongo mot. Paulo omiyo tam man bot jo me ot ni: “Wun mon, wumine kenwu i te loc pa cogwu, pien meno aye gin ma myero i kin jo ma tye i Rwot. Wun co bene, wumar monwu, pe wubed ki gero i komgi. Wun litino, wuwiny lunyodowu i lok ducu, pien meno aye yomo cwiny Rwot. Wun wego bene, pe myero wuket kolo i kom litinowu, miyo cwinygi balle woko.” (Jo Kolocai 3:18-21) Tika itwero neno kit ma tam man twero konyo kwede jo me oti?

13. Lamego ma woro Jehovah twero konyo cware ma pe i niye wek obed ki miti me woro Jehovah nining?

¹³ Twero bedo ni in lamego ma cware pe woro Jehovah. Ngo ma ibitimo ka iwinyo calo en pe teri kit ma myero en oteri kwede? Cwinyi romo cwer ci i daa kwede, ento tika meno twero  weko jami lokke? Kadi bed ni iloyo daa meno, tika man biweko en bedo ki cwiny me woro Jehovah? Pe wacel. Ento ka ce iwore macalo lawi ot, ci itwero konyo jo me otti wek gubed ki kuc dok man biketo deyo i kom Jehovah. Lanenni maber-ri twero bene weko cwari bedo ki miti me woro Jehovah, ci wun ducu wunongo mot kacel.​—Kwan 1 Petero 3:1, 2.

14. Ngo ma omego ma woro Jehovah myero otim ka dakone ma pe i niye pe wore?

¹⁴ Twero bedo ni in omego ma dakone pe woro Jehovah. Ngo ma ibitimo ka ineno ni en pe wori? Ka itemme me nyute ni in aye ladit kun idange i wiye, tika man miyo en wori? Pe wacel! Lubanga mito ni ibed laco ma lamar ma lubo lanen pa Yecu. (Jo Epeco 5:23) Macalo lawi kacokke, Yecu kare ducu diyo cwinye dok nyuto mar. (Luka 9:46-48) Ka ilubo lanen pa Yecu, ci motmot dakoni bibedo ki miti me tic pi Jehovah.

15. Lakricitayo twero nyuto ki dakone nining ni emare?

¹⁵ Jehovah ociko co ducu kun waco ni: “Wumar monwu, pe wubed ki gero i komgi.” (Jo Kolocai 3:19) Laco ma lamar woro dakone. En timo man nining? En winyo tamme dok weko en ngeyo ni tamme pire tek. (1 Petero 3:7) Kadi bed ni en pe bitimo gin ma dakone mito kare ducu, ento ka ciko ite me winyo lokke ci bikonye me moko tam maber. (Carolok 15:22) Laco ma lamar pe diyo dakone tektek me wore. Ma ka meno, en tute matek me yomo cwiny dakone wek owore. Ka laco maro dakone kacel ki lutinogi, ci man weko gibedo ki yomcwiny ka nongo gitiyo pi Jehovah kacel dok ginongo mot me kwo.

16, 17. Macalo bulu, gin ango ma twero konyi wek akemo pe omaki tutwal ka lunyodoni gumini tira?

¹⁶ Twero bedo ni pud itye ki mwaka apar ki wiye dok itamo ni lunyodoni pe giniang in nyo dok gin lugingi tutwal. Man romo turo cwinyi adada dok weko ibedo ki akalakala ka itwero tic pi Jehovah. Ento ka ia iweko tic pi Jehovah, ci ibiniang ni meno jo me lobo-ni pe gimari calo lunyodoni ma Lukricitayo kacel ki luwoti me kacokke.

¹⁷ Tam kong i kom lok man: Ka lunyodoni pe gujuki ki i timo gin mo ma pe rwatte, ci ibingeyo nining ni giparo piri? (Jo Ibru 12:8) Ki lok ada, gin bene gitye ki roc, pi meno yo ma gimiyo kwede ki tiragi twero cwero cwinyi. Ento pe iket cwinyi i kom gorogi. Ma ka meno, tute me niang tyen lok mumiyo guwaco nyo gutimo gin meno. Dicwinyi, dok pe iwek akemo omaki mukato kare woko. Lok pa Lubanga waco ni: “Ngat ma tye ki ngec loko lok manok, ki ngat ma cwinye opye mot en aye dano ma tye ki niang matut.” (Carolok 17:27) Tute me doko ngat muteggi ma jolo tira kun nongo pwony ki iye labongo paro kit ma kimiyo kwede. (Carolok 1:8) Pe wii owil ni bedo ki lunyodo ma giworo Jehovah obedo mot madit adada. Mitigi tye me konyi wek ibed kwo nakanaka.

18. Pingo imoko tammi me ciko wangwa i kom mot?

¹⁸ Kadi bed ni watye ki gen me cito i polo nyo me kwo i lobo kany, wan ducu ki acel acel watye ka kuro mot mamwonya i anyim. Gen man tye ma kome. Man cung i kom cikke pa Lacwe polo ki lobo, ma owaco ni: “Lobo ducu bipong ki ngec” pa Jehovah. (Icaya 11:9) Cokcok-ki Lubanga aye ma bipwonyo dano ducu ma gibedo i lobo. Ber ka watute me bedo i kin jo ma gibinongo mot meno. Pi meno kare ducu myero wii opo i kom gin ma Jehovah ocikke pire, dok pe myero wawek gin mo keken ogengwa ki nongo mot meno!