1. Bal ma watye kwede weko Lutic pa Lubanga mapol giwinyo nining?

LAKWENA Paulo ocoyo ni, “An ma koma kec kuman-ni!” (Jo Roma 7:24) I kare-ni, lutic pa Lubanga polle giwinyo tur cwiny kacel ki cwer cwiny calo Paulo. Pingo? Pien kadi bed ni wamito yomo cwiny Jehovah, wan ducu walako bal dok watye ki roc. Pi meno, watwero winyo marac adada ka watimo gin mo ma pe yomo cwinye. Lukricitayo mogo ma gutimo bal madongo guwinyo calo Jehovah dong pe twero timigi kica.

2. (a) Jabuli 34:22 nyuto nining ni cwiny lutic pa Lubanga myero pe opidgi tutwal pi balgi? (b) Ngo ma wabipwoyo i pwony man? (Nen bok ma wi lokke tye ni “ Wanongo Pwony ki Iye, Onyo Cung pi Gin Mo?”)

² Ginacoya cuko cwinywa ni ka waringo walaro bot Jehovah, ci pe mitte ni cwinywa opidwa tutwal pi balwa. (Kwan Jabuli 34:22.) Ento, tyen lokke tye ningo ka giwacci waring walar bot Jehovah? Gin ango ma myero watim ka wamito ni Jehovah otimiwa kica pi balwa? Wanongo lagam pi lapeny magi ka waniang i kom yub ma onongo kiketo me bedo ki gangi me laro lunek i lobo Icrael i kare macon. Yub  man onongo lubbe ki gicikke me Cik, ma kiloko woko i Pentekote me mwaka 33. Ento Cik man onongo oa ki bot Jehovah. Pi meno, ki i yub man me bedo ki gangi me laro lunek-ki, wapwonyo kit ma Jehovah neno kwede bal, latim bal ki dong jo ma gungut. Mukwongo, kong wanen tyen lok muweko Luicrael onongo gitye ki gangi me laro lunek ki kit ma onongo konyo kwede ki dano.

3. Gin ango ma onongo Luicrael myero gutim i kom lanek dano?

³ Cwiny Jehovah onongo cwer adada ka kineko ngat mo. Ka Laicrael mo oneko dano, laco ma tye wat macok pa lato-ni, ma kilwongo ni lacul kwor remo onongo myero onek lanek meno woko. (Wel 35:19) Ka gutimo meno, nongo lanek-ki obiculo pi kwo pa ngat ma en oneko-ni ki kwone bene. Ka lanek meno pe kineko cutcut, ci Lobo ma Kiciko Pire-ni binyobbe woko, nyo pe bibedo maleng. Jehovah onongo ocikogi ni: “Pe wubinyobo lobo ma wubibedo iye-ni” ki onyo remo, ma obedo neko dano.​—Wel 35:33, 34.

4. Gin ango ma onongo timme ka cing Laicrael mo ocer ci oneko dano?

⁴ Ento gin ango ma onongo timme ka Laicrael mo cinge ocer ci oneko ngat mo? Kadi bed ni nek meno pe otimme akaka, nongo en pud tye ki alii pi neko ngat ma pe ki bal. (Acakki 9:5) Ka gin ma kit meno otimme, Jehovah owaco botgi ni kitwero timme kica. Lanek ma pe oneko nek akaka-ni onongo myero ongwec ki bot lacul kwor ci ocit i gang mo ki i kin gangi abicel me laro lunek. Ka kiye ni en obed i gang meno, ci en binongo gwok. Ento en myero obed i gang meno, nio wang ma lalam dog madit oto.​—Wel 35:15, 28.

5. Pingo yub ma Jehovah oketo pi Luicrael me bedo ki gangi me laro lunek konyowa me niang i kom Jehovah maber?

⁵ Yub pi Luicrael me bedo ki gangi me laro lunek pe obedo tam pa dano. Oa ki  bot Jehovah. En ociko Yocwa ni: “Wac bot jo Icrael ni, ‘Wuyer gangi me laro lunek dano. ’” Gangi magi onongo ‘kikwerogi pi tic man.’ (Yocwa 20:1, 2, 7, 8) Jehovah kikome aye ma omoko ni kiwek boma magi obed pi tic man. Yub man konyowa me pwonyo jami mapol madok i kom Jehovah. Me labolle, man konyowa me niang i kom kica ma Jehovah tye kwede ki dok pwonyowa kit ma watwero nongo kwede kalarre ki bot Jehovah i kare-ni.

6, 7. (a) Tit kong tic ma ludongo onongo gitye kwede ka gitye ka ngolo kop i wi ngat ma pe oneko nek akaka. (Nen cal ma tye i pot karatac 9.) (b) Pingo onongo obedo me ryeko pi lanek me lok ki ludongo?

⁶ Ka Laicrael mo cinge ocer ci oneko ngat mo, en onongo ringo i gang me laro lunek ci ‘tito lokke’ bot ludongo me gang meno. Ludongo myero gujole. (Yocwa 20:4) I nge kare mo, gin onongo gibicwale me dok cen wek ludongo ma i gang ma en oneko iye dano-ni gungol kop i kome. (Kwan Wel 35:24, 25.) Ka ludongo gumoko ni ngat meno cinge aye ma ocer, ci gicwale dok cen i gang me laro lunek.

⁷ Pingo lanek dano-ni myero olok ki ludongo? Man onongo konyo ludongo me nenone ni kacokke pa Luicrael obedo maleng kun gikonyo ngat ma pe oneko dano akaka me nongo kica pa Jehovah. Laco lok ma dok i kom Baibul owaco ni ka lanek-ki pe ocito bot Ludongo, ci kitwero nekke woko. Dok omedde ni alii me to bibedo i wi lanek-ki pien en pe otimo gin ma Jehovah owaco ni myero en otim. Ngat ma pe oneko dano akaka myero openy pi kony ci oye kony ma kimiye wek omedde ki bedo kwo. Ka en pe ongweco i gang me laro lunek, ci wat macok pa lato-ni onongo tye agonya me nekke.

8, 9. Pingo Lakricitayo ma otimo bal madongo myero olok ki luelda?

⁸ I kare-ni, wek Lakricitayo ma otimo bal madit oyub watte ki Jehovah, en myero ocit bot luelda wek gukonye. Pingo man pire tek adada? Me acel, Jehovah aye ma oketo yub pi Luelda me ngolo kop pi bal madongo. (Yakobo 5:14-16) Me aryo, luelda gikonyo labal ma ongut me nongo cwak pa Lubanga ki dok pe me nwoyo timo bal meno. (Jo Galatia 6:1; Jo Ibru 12:11) Me adek, kimiyo twero bot luelda dok kipwonyogi me cuko cwiny latim bal ki konye wek cwinye pe ocwer nyo opide. Jehovah lwongo luelda magi ni gubedo ‘ka-gwokke ka kot ocorre piny.’ (Icaya 32:1, 2) Yub man obedo yo acel ma Lubanga nyuto kwede ki kicane piwa.

⁹ Lutic pa Lubanga mapol gunongo kwecwiny ma bino pi lok ki luelda ki nongo kony ki botgi. Me labolle, omego mo ma nyinge Daniel otimo bal madit, ento pi dwe mapol, en pe ocito bot luelda. En owaco ni: “Ma dong atero kare malac, abedo ki tam ni pe tye gin mo ma luelda dong gitwero timone pira.” Ento onongo pud tye ki lworo ni olo to wang ma ngat mo oniang i kom balle, dok en onongo winyo calo kare ducu ka ebilego myero kong ecak ki kwayo kica ki bot Jehovah. I ngeye, en openyo pi kony ki bot laelda mo. En owacci: “Ki lok ada, abedo ki lworo me lok botgi. Ento i  ngeye, obedo calo ngat mo otingo yec mo mapek ma onongo tye i wi gwoka.” Daniel dong twero lok agonya ki Jehovah. Cwinye pe dong pide, dok cokcok-ki, kicime me tic macalo lakony kor tic i kacokke.

10. Gin ango ma myero ngat ma pe oneko nek akaka otim wek kitimme kica?

¹⁰ Wek kitimme kica, onongo mitte ni ngat ma pe oneko nek akaka oring cutcut i gang me laro lunek macok loyo. (Kwan Yocwa 20:4.) Kwone onongo cung i kom ngwecce i gang meno, ki bedone kunnu nio ka lalamdog madit oto. Onongo bimitte ni en ojal jami mapol. En biweko ticce ki gange, dok pe bibedo agonya me wot ka ma iye mito. * (Nen lok ma tye i tere piny.) (Wel 35:25) Ento man onongo bikonye. Ka en oa ki i gang meno i kare mo keken, ci nongo tye ka nyutone ni en pe eparo ni eneko dano, dok biketo kwone ka mading.

11. Lakricitayo ma ongut twero nyutone nining ni etye ki pwoc pi kica pa Lubanga?

¹¹ Latim bal ma ongut i kare-ni bene myero otim jami mogo wek Lubanga otimme kica. Myero en ojuk timo balle-ni woko. Man kwako gwokke ki i gin mo keken ma twero tere i timo bal madongo. Lakwena Paulo otito gin ma Lukricitayo ma i Korint ma gungut-ti gutimo. En ocoyo ni: ‘Kong wunen kit ma Lubanga otiyo kwede ki wangcwinywu! Dong wunen kit ma wuketo kwede cwinywu, kit ma dong wuketo kwede tek me nyuto ni wupe ki bal, kit akemowu, kit lworo, kit miti ma wutye kwede, kit arimawu, ki kit ma wuyubo kwede ki kwowu!’ (2 Jo Korint 7:10, 11) Pi meno, ka watute ki kerowa ducu me juko timo bal, ci wanyuto bot Jehovah ni watye ki par dok ni pe watamo ni wabinongo kica pa Jehovah labongo tutewa.

12. Gin ango ma Lakricitayo myero ojal wek en omedde ki nongo kica pa Jehovah?

¹² Gin ango ma Lakricitayo myero ojal wek en omedde ki nongo kica pa Jehovah? Myero en obed atera me jalo kadi wa jami ma en maro ka gitere i timo bal. (Matayo 18:8, 9) Me labolle, ka laremi mo diyi me timo gin mo ma cwero cwiny Jehovah, tika ibijuko bedo kwede woko? Ka inongo tek me gwokke ki i mato kongo wa i labyel kweri, tika ibigwokke ki kabedo mogo ma weko imato kongo madwong? Ka inongo tek me juko mito marac, tika ibigwokke ki i neno vidio, kabedo me intanet, nyo jami mogo ma weko ibedo ki tam macilo? Wi myero opo ni jami ducu ma wajalo me lubo cik pa Jehovah bikeliwa adwogi maber. Pe tye gin mo marac loyo winyone ni Jehovah dong owekowa woko. Dok pe tye gin mo maber loyo bedo i “mar ma pe gik” pa Jehovah.​—Icaya 54:7, 8.

13. Tit kong gin muweko lanek dano onongo twero nongo gwok, bedo agonya, dok ki yomcwiny ka en tye i gang me laro lanek.

¹³ Ka lanek-ki tye i gang me laro lunek, ci en bigwoko kwone. Jehovah oloko i kom gangi magi ni: “Bibedo me laro lanek dano.” (Yocwa 20:2, 3) Jehovah onongo pe mito ni kinwo ngolo kop i wi  lanek-ki pi bal acel-li. Dok onongo pe kiye ni lacul kwo odony i gang meno me neko lanek watte-ni. Ka lanek-ki tye i gang meno, en bibedo i te gwok pa Jehovah. En nongo pe i buc. En onongo bedo agonya me tic, konyo jo mukene, ki dong tic pi Jehovah. Ki lok ada, en onongo bibedo ki kwo maber dok me yomcwiny!

14. Gin ango ma Lakricitayo ma ongut i kom balle twero bedo ki gen iye?

¹⁴ Jo pa Lubanga ma gutimo bal madongo pud cwinygi pidogi kadi bed dong gungut pi balgi woko. Jo mukene giwinyo calo Jehovah pe bitimigi kica matwal pi bal ma gitimo. Ka iwinyo kit meno, bed ki gen ni ka Jehovah otimiwa kica, en timo kica pi balwa ducu. Pe myero cwinyi dok opidi pi bal meno. Meno aye gin mutimme i kom Daniel, ngat ma waloko i kome i acakki-ni. I ngeye ma luelda gumiye tira dok gukonye me bedo ma cwinye pe ngole kop, cwinye okwer mot. En owaco ni: “Cwinya dong pe ngola kop. Ka dong Jehovah otimmi kica pi balli, nongo dong pe. Kit ma Jehovah owaco kwede, en kwanyo balli ci bolo woko ka ma bor. Pe dong ibibedo ki bal meno.” Ka lanek dano-ni tye i gang me laro lunek, pe mitte ni en obed ki lworo ni lacul kwor twero bino ci neke woko. I yo acel-li, ka Jehovah otimiwa kica pi balwa, pe mitte ni wabed ki lworo ni en dok bidwoko bal meno cen i wiwa nyo miniwa pwod iye.​—Kwan Jabuli 103:8-12.

15, 16. Bedo ki ngec ni Yecu oculo ginkok piwa ki dok ni en tye Lalam Dog Madit piwa jingo niyeni nining i kom kica pa Lubanga?

 ¹⁵ Ki lok ada, watye ki tyen lok mapol loyo Luicrael me bedo ki gen i kom kica pa Jehovah. I ngeye ma Paulo owaco ni en ‘kome kec’ pien ni pe etwero lubo cik pa Jehovah labongo timo bal mo, en dok owaco ni: “Apwoyo Lubanga pi Yecu Kricito Rwotwa!” (Jo Roma 7:25) Meno tyen lokke ngo? Kadi bed Paulo onongo tye ka lweny ki miti marac dok otimo bal i kare mukato angec, en onongo dong ongut pi bal meno woko. Pi meno, en onongo tye ki gen ni Jehovah dong otimme kica pi ginkok pa Yecu. Pi ginkok ma Yecu oculo piwa, watwero bedo ki cwiny ma pe ngoliwa kop dok ma cwinywa opye mot. (Jo Ibru 9:13, 14) Macalo Lalam Dog Madit, Yecu “tye ki twer me laro jo ma nyiko cok bot Lubanga, kun giwok ki bote, pien en bedo kwo kare ducu ka bako doge pigi.” (Jo Ibru 7:24, 25) I kare macon, lalam dog madit onongo konyo Luicrael wek gubed ki gen ni Jehovah bitimigi kica pi balgi. Kit macalo Yecu aye dong tye Lalam Dog Madit-ti, watye ki tyen lok madit loyo me bedo ki gen ni Jehovah twero ‘timiwa kica, kun wanongo bene kicane ma konyowa i kare ma mitte.’​—Jo Ibru 4:15, 16.

¹⁶ Wek wanong kalarre ki bot Jehovah, myero wabed ki niye i kom ginkok pa Yecu. Pe myero itam ni ginkok tiyo pi dano ducu lumuku. Bed ki niye ni in kikomi itwero nongo adwogi maber ki i ginkok. (Jo Galatia 2:20, 21) Bed ki niye ni pi ginkok, Jehovah timo boti kica pi balli. Bed ki niye ni ginkok miyo boti gen me kwo pi naka. Ginkok pa Yecu obedo mic ma Jehovah omiyo piri!

17. Pingo imito nongo kalarre ki bot Jehovah?

¹⁷ Yub me bedo ki gangi me laro lunek konyowa me niang kica ma Jehovah tye kwede. Yub man ma Lubanga aye oketo-ni pwonyowa ni kwo pire tek bote. Nyutiwa bene kit ma luelda gitwero konyowa kwede, kit ma watwero ngut ki cwinywa ducu i kom balwa, ki dong pingo watwero bedo labongo akalakala mo ni Jehovah timiwa kica pi balwa ducu. In tika itye ka nongo kalarre ki bot Jehovah? Pe tye kalarre mo keken maber loyo! (Jabuli 91:1, 2) I pwony ma lubo man, wabineno kit ma yub me bedo ki gangi me laro lunek twero konyowa me lubo lanen pa Jehovah, Ngat ma onyutiwa lanen maber loyo i ngolo kop atir kacel ki bedo ki kica.