1. Wero wer konyowa me timo gin ango?

LACO wer mo muywek owaco ni: “Nyig lok weko ibedo ka tam. Wer ma kitye ka werone weko iwinyo maber. Ento wero wer ma kicoyo piny weko iniang i kom wer meno.” Werwa weko wanyuto pak ki marwa pi Wonwa me polo, Jehovah. Weko wanyikke cok bote. Meno aye gin muweko wer obedo but worowa ma pire tek adada, kadi bed watye ka wer kenwa nyo ki utmegiwa.

2, 3. (a) Jo mogo giwinyo nining me wer ki dwan malongo i kacokke? (b) Lapeny mene ma wabinyamogi i pwonywa man?

² Ento in iwinyo nining ka itye ka wero wer ki dwan malongo kacel ki kacokke? Tika mini lewic? I tekwaro mogo, co pe giwinyo agonya ka gitye ka wer i nyim lwak. Tam ma kit man twero gudo kacokke i yo marac, tutwalle ka luelda pe gimito wero wer nyo ka gilungo wigi ka timo tic mukene i cawa me wer.​—Jabuli 30:12.

³ Wer obedo but worowa bot Jehovah. Pi meno, pe wamito ni wakat woko i cawa me wer nyo wakeng but yub  man me cokkewa. Dong, myero wapenye ni: ‘Atero wer ma kiwero i cokke nining? Gin ango ma atwero timone ka pe amaro wer i nyim jo mukene? Dok atwero wero wer ki cwinya ducu nining?’

4, 5. Yub ango ma kiketo me wero wer i ot pa Lubanga i kare pa Luicrael?

⁴ Jo ma giworo Jehovah gubedo ka wero wer me pako Jehovah nicakke wa con. Wer onongo obedo but woro ma pire tek adada bot Luicrael i kare ma gubedo ka tic pi Jehovah ki cwinygi ducu. Me labolle, i kare ma Daudi obedo ka yubbe pi gero ot pa Lubanga, en oketo yub wek Lulevi ma romo 4,000 gupak Jehovah ki wer. I kin jo magi, dano ma romo 288 “ma yam luryeko” “gipwonyogi ki wer bot Rwot [Jehovah].”​—1 Tekwaro 23:5; 25:7.

⁵ Wer bene obedo gin ma pire tek adada i kare ma kidyero iye ot pa Lubanga. Baibul wacciwa ni: “I kare ma [lukut tum ki luwer] gucako wer, kacel ki tum ki atego agoya ki jami mukene ducu me wer, pi pako [Jehovah], . . . deyo pa Rwot opongo i ot woko.” Go kong kit ma gin mutimme-ni ojingo kwede niye pa Luicrael!​—2 Tekwaro 5:13, 14; 7:6.

6. Nekemia oketo yub ango me wer i kare ma en tye laloc me Jerucalem?

⁶ Nekemia oketo yub pi Luicrael me roco cel me Jerucalem dok bene oyero Lulevi pi wero ki goyo wer. Wergi oweko yub me dyero cel man obedo mamit adada. Nekemia ocimo “dul madito aryo” ma giwero wer me miyo pwoc. Luwer magi gubedo ka wot i wi cel me boma meno nio ka gurwatte i kabedo ka ma ot pa Lubanga tye iye. Dwangi onongo longo adada dok kadi wa jo ma gitye ka mabor onongo giromo winyogi. (Nekemia 12:27, 28, 31, 38, 40, 43) Watwero bedo labongo akalakala ni cwiny Jehovah obedo yom adada me winyo ka giwero wer me pakke ki dwan malongo.

7. Yecu onyuto nining ni wer bibedo but woro ma pire tek adada bot Lukricitayo?

⁷ I kare ma Yecu tye i lobo, wer onongo bene obedo but woro ma pire tek adada. Tam kong i kom gin mutimme i dyerwor ma pud dong pire tek loyo i tekwaro pa dano. I ngeye ma Yecu kacel ki lukwenane gucamo Cam me Otyeno pa Rwotwa, gin ducu guwero wer me pak bot Jehovah.​—Kwan Matayo 26:30.

8. Lukricitayo me cencwari me acel guwekiwa lanen maber ma lubbe ki wer me pako Lubanga nining?

⁸ Lukricitayo me cencwari me acel guwekiwa lanen maber ma lubbe ki wer me pako Jehovah. Lukricitayo magi onongo gicokke i gangi pa utmege, pe calo Luicrael ma onongo gicito wa i ot pa Lubanga ka woro Jehovah. Kadi bed gangi magi onongo pe mwonya calo ot pa Lubanga, utmege magi onongo pud giwero ki cwinygi ducu. Ki lok ada, lakwena Paulo owaco ki utmegine ni: “Ka wupwonnye, kun wujukke bene kekenwu ki ryeko ducu ma Lubanga omiyowu. Dok bene ka wuwero  jabuli, wer me pako Lubanga ki wer mogo mukene me dini, wuwer bot Lubanga ki pwoc i cwinywu.” (Jo Kolocai 3:16) Myero wawer wer ma i buk werwa ki cwiny me “pwoc.” Gubedo but “cam” me cwiny ma “lagwok ot ma lagen dok maryek” miniwa “i kare ma mitte” kikome.​—Matayo 24:45.

9. (a) Pingo jo mukene lewic makogi me wero wer ki yomcwiny i cokke nyo i gurewa? (b) Myero wawer wer me pak bot Jehovah nining, dok angagi ma myero gunyut lanen maber i timo man? (Nen cal ma tye i pot karatac 3.)

⁹ Tyen lok ango ma weko i kine mukene inongo tek me wero wer? Gwok dano ma gangwu nyo me tekwarowu pe gungi ki wer. Nyo ka iwinyo luwer ma giwero mamit i redio nyo i telebijon ci iporo ki kit ma iwero kwede, inongo dwani winyone pe mit dok keli lewic. Ento wan ducu watye ki tic me wero wer me pako Jehovah. Pi meno, mak buk werri maber, il wi, ci iwer ki cwinyi ducu! (Ejira 3:11; kwan Jabuli 147:1.) Pol pa Odi me Ker i kare-ni gitiyo ki vidio me nyuto wer ma kicoyogi i buk werwa, dok man konyowa me wer maber. Dok tye me yomcwiny ni i kare-ni, wer obedo but yub me Cukul pi Luelda. Man nyuto kit ma pire tek kwede pi luelda me nyuto lanen maber i wero wer i kacokke.

10. Gin ango ma wiya myero opo iye ka walwor me wer ki dwan malongo?

¹⁰ Jo mukene gilworo wer ki dwan malongo pien gitamo ni gwok bibedo calo gitye ka dange adanga, nyo ni winyo dwangi pe mit. Ento tam kong i kom lok man. ‘Wan ducu watimo lwak roc mapol’ i lok, ento man pe gengowa ki lok. (Yakobo 3:2) Ci dong pingo  waye ni dwanwa ogengwa ki wero wer me pak bot Jehovah?

11, 12. Watwero dongo dirowa me wer nining?

¹¹ Gwok walworo wero wer pien pe wangeyo kit me wer. Ento tye jami mogo manok ma waromo timogi wek wayub kit ma wawero kwede. *​—Nen lok ma tye i tere piny.

¹² Itwero wer maber dok ki dwan malongo ka ipwonyo kit me ywayo yamo i yo maber. Kit macalo kitiyo kwede ki mac elektwic me caro ot, yamo ma iywayo bene mini kero me lok nyo me wer. Myero iwer ki dwan malongo kit ma iloko kwede nyo bene malongo makato. (Nen tam ma kimiyo i buk me Benefit From Theocratic Ministry School Education, pot karatac 181 me o i 184, i te wi lok ni “Ywa Yamo i Yo Maber.” [“Properly Control Your Air Supply”]) Ki lok ada, Baibul bene waco ni jo ma giworo Jehovah myero ‘guwer matek ki yomcwiny’ ka gitye ka pako Jehovah.​—Jabuli 33:1-3.

13. Tit kong ngo ma twero konyi me wer ki tekcwiny.

¹³ I kare me worowu pi jo me ot nyo i kwan pire keni, tem timo man: Yer wer ma in nyo jo me oti maro loyo ki i buk werwa. Kwan nyig lok ma kicoyogi ki dwan malongo. Ci dok kwan lain acel labongo ling i dwan malongo bene. I ngeye, wer lain meno dok i dwan malongo. (Icaya 24:14) Dwani biyubbe motmot. Pe iwek lewic omaki!

14. (a) Yabo dogwa malac twero konyowa nining me wer maber? (Nen bok ma wiye tye ni “ Pwonyo Kit me Wer i Yo Maber.”) (b) Ki i kin tam ma kimiyogi-ni, mene ma inongo ni konyi me wer maber?

¹⁴ Wek iwer ki dwan malongo, myero iyab dogi malac. Dok ka itye ka wer yab dogi malac loyo kit ma iyabo kwede ka itye ka lok. Ento gin ango ma myero itim ka iwinyo ni dwani lapiny tutwal nyo lamal dok tutwal? Itwero nongo tam mogo ma twero konyi i bok ma wiye tye ni “Kit me Lweny ki Pekki Mapatpat” [“Overcoming Specific Problems,”] i buk me Benefit From Theocratic Ministry School Education, i pot karatac 184.

15. (a) Lok angeya ango ma kiwaco i cokke ma timme mwaka ki mwaka me 2016? (b) Pingo kigonyo odoco buk werwa?

¹⁵ Jo ducu ma gubedo tye i cokke ma timme mwaka ki mwaka me 2016 gubedo ki yomcwiny madit i kare ma Omego Stephen Lett, Lamemba me Lukiko Madit ocwalo woko buk wer manyen ma wiye tye ni “Sing Out Joyfully” to Jehovah. Kit ma Omego Lett otito kwede, tyen lok me acel ma oweko onongo wamito buk wer manyen aye ni pien kigonyo odoco Baibulwa me New World Translation of the Holy Scriptures. Kiloko nyig lok me wer mogo wek orwatte ki kit ma tye kwede i Baibulwa me New World Translation manyen-ni. Dok bene kimedo wer manyen ma loko i kom ticwa me tito kwena ki ginkok. Medo i kom meno, kit macalo wer obedo but worowa ma pire tek tutwal-li, Lukiko Madit onongo mito ni wabed ki buk wer maber dok ma rwomme lamal. Pi meno kiyubo pok nge buk wer man kit ma New World Translation manyen-ni tye kwede.

16, 17. Ngo mukene ma kilokogi ki i buk werwa manyen-ni?

¹⁶ Wek tic ki buk wer man obed yot, kipoko kin wer i dul ki dul. Me labolle, Wer 12 mukwongo giloko i kom  Jehovah, 8 ma lubo giloko i kom Yecu ki ginkok, ki mukene mapol. Kiryeyo dul magi ducu i acakki me buk wer. Man twero bedo me kony adada, me labolle, ka omego mo tye ka yero wer me pwony pi lwak.

¹⁷ Me konyo dano wek guwer ki cwinygi ducu, kiloko nyig lok mogo wek guniange maber. Kiloko bene nyig lok mogo ma pe gimaro tic kwedgi. Kit meno bene, wer ma wiye tye ni “Long-Suffering” odoko “Exercise Patience,” kiloko bene lok mogo ki i wer man manok. Onongo bene pore ni kilok wi lok me wer ma waco ni: “Guard Your Heart” ma onongo bedo calo kitye ka ciko ngat moni wek odok ni “We Guard Our Hearts.” Pingo? Pien con onongo ka ngat moni tye ka wero wer man, nongo en tye ka waco ki jo mukene gin ma myero gutim. Man onongo pe pore ki jo ma gunongo batija nyen, jo ma gitye ki miti, jo matino, ki dong lumege ma gubino i cokke, gurre me nino acel ki gurre madito. Pi meno, kiloko wi lok me wer man kacel ki nyig lokke.

18. Pingo myero wapwony wero wer ma gitye i buk wer manyen-ni? (Nen lok ma tye i tere piny.)

¹⁸ Wer mapol ki i buk wer me “Sing Out Joyfully” to Jehovah gitye calo lega. Wer magi gitwero konyi me tito ki Jehovah kit ma iwinyo kwede. Wer mukene bikonyowa me dongo “i mar ki i tiyo tic mabeco.” (Jo Ibru 10:24) Wamito ni wange dwan me wero wer magi kacel ki nyig lok ma tye i igi. Yo acel ma watwero timo man aye me winyo dwan utmege ma gimako ma gitye ka wero wer magi. Dwan magi ma kimako-ni nonge i jw.org. Ka ipwonyo wero wer magi ki gang ci bikonyi me werogi ki tekcwiny dok ki cwinyi ducu. *​—Nen lok ma tye i tere piny.

19. Jo ducu ma i kacokke gitwero woro Jehovah nining?

¹⁹ Wi myero opo ni wer obedo but worowa ma pire tek adada. Obedo yo maber me nyuto bot Jehovah ni wamarre dok ni watye ki pwoc pi jami ducu ma en otimo piwa. (Kwan Icaya 12:5.) Ka iwero ki cwinyi ducu, ci man cuko cwiny jo mukene me timo kit meno bene. Jo ducu ma i kacokke, kadi bed dong guri i ada nyo pud ginyen, gitwero woro Jehovah i yo man. Pi meno, myero iwer ki cwinyi ducu. Lub tira pa laco jabuli ma owaco ni: ‘Wuwer bot Jehovah’ ki yomcwiny madit!​—Jabuli 96:1.