Abilubo Adani
“Pwonya ki cikki ai Rwot [Jehovah], wek alub adani.”—JABULI 86:11.
1-3. (a) Omyero wawiny nining i kom ada ma tye i Baibul? Mi lapor. (Nen cal ma tye i pot karatac man.) (b) Gin ango ma wabinyamone i pwony man?
I KARE-NI, dano mapol giwilo jami ki i dukan ci gidwoko woko. Rac dong ma loyo ka guwilo ki i Intanet. Twero bedo ni pe gumaro kit ma onongo gutamo, nyo gwok gunongo bal mo i kome. Pi meno, gitwero loko ki mukene nyo bene gipenyo ni kidwok centegi woko.
2 Pe wamito ni watim gin ma kit meno i kom lok ada me Baibul. Teke ‘wawilo ada,’ omyero pe ‘wacati,’ ma obedo pwonyo ada ci dok iweko woko. (Kwan Carolok 23:23; 1 Temceo 2:4) Kit ma wapwonyo kwede i pwony ma okato-ni, watero kare malac wek wapwony ada. Oromo bedo ni wajalo dog tic ma onongo keliwa cente madwong. Dok twero bedo ni wat i kinwa ki wadiwa odoko goro, nyo waloko tamwa kacel ki jami ma watimo, nyo bene wajuko nywako i kwer mogo ma pe yomo cwiny Jehovah. Ento wangeyo atir ni pe tye gin mo keken ma wajalo ma waromo porone ki mot ma wanongo pi ngeyo lok ada.
3 Yecu obolo carolok i kom lacat-wil mo ma onongo yam obedo ka yenyo tiko mabeco me wel. I kare ma en Matayo 13:45, 46) I kare ma pud wapwonyo ada apwonya, lok ada i kom Ker pa Lubanga ki ada mukene ma tye i Baibul, wan bene wabedo atera me jalo gin mo keken wek wanong. Ka wamedde ki tero ada calo gin ma pire tek, ci pe wabiwekone. Ento ki cwercwiny madit, jo pa Lubanga mogo gucako tero ada calo gin ma pire pe tek dok bene gua woko ki i ada. Pe wamito ni watim meno! Omyero walub tam me Baibul ma cuko cwinywa me medde ki “lubo lok ada.” (Kwan 3 Jon 2-4.) Man tyen lokke ni waketo lok ada bedo mukwongo i kwowa dok bene wanyutu man i kit ma wakwo kwede. Ento i yo ma nining ma ngat moni twero “cato” kwede ada nyo wekone, dok timo man pingo? Ngo ma waromo timone wek pe wacat ada matwal? Dok ngo ma waromo timone wek wamedde ki “lubo lok ada”?
onongo tiko mo acel me wel, ocito ocato jami ducu ma en tye kwede, wek ewil tiko meno. Tiko meno onongo cung pi lok ada madok i kom Ker pa Lubanga. I yo ma kit meno, Yecu onyuto kit ma lok me ada pire tek kwede bot jo ma giyenyo. (PINGO JO MUKENE ‘GICATO’ ADA DOK GITIMO MAN NINING?
4. Pingo jo mogo gujuko wot i ada i kare pa Yecu?
4 I kare pa Yecu, jo mukene ma kong gujolo lok ada pe gumedde ki wot i ada. Me labolle, i nge kare ma Yecu otimo tango dok opito lwak jo mapol, lwak-ki gulube wa i loka Nam me Galilaya. Ento Yecu dok owaco lok mo ma otugi obalo wigi woko ni: “Ka pe wucamo kom Wod pa dano, wumato remone, pe wutye ki kwo i iwu.” Me ka penyo Yecu wek otittigi tyen lok meno, gin guwacci: “Man lok matek; anga ma twero winyo?” Macalo adwogine, “lupwonnyene mapol gudok cen, pe dok gubedo ka wot kacel kwede.”—Jon 6:53-66.
5, 6. (a) Pingo jo mukene gua woko ki i ada i karewa-ni? (b) Ngat moni twero ngak woko motmot ki i ada nining?
5 Ki cwercwiny, jo mukene i kare-ni bene guweko ada woko. Pingo? Jo mogo guweko niango mo manyen ma okatti i kom tyeng mo me Baibul nyo gin ma omego mo ma ngene adada otimo nyo owaco odoko ariya botgi. Jo mukene pe gumaro kit ma ngat mo ominigi kwede ki tira me Baibul, nyo gwok winye manok obedo i kingi ki ngat mo me kacokke. Twero bene bedo ni jo mukene gulubo pwony pa jo mungak nyo jo ma loko lok goba i komwa. Magi gubedo tyen lok mogo manok ma oweko jo mukene gua woko pigi kengi ki bot Jehovah kacel ki kacokkene. (Jo Ibru 3:12-14) Onongo bibedo ber adada ka gugeno Yecu kit ma lakwena Petero otimo kwede! I kare ma jo mukene i kin lwak gua woko pi lok matek ma Yecu owaco, Yecu openyo lupwonnyene ka gin bene gimito a woko. Lakwena Petero ogamo ni: “Rwot, wabicito bot anga? In itye ki lok me kwo ma pe tum.”—Jon 6:67-69.
6 Jo mukene gungak woko ki i ada motmot labongo gin bene ngeyone. Jo Ibru 2:1) Pol kare dano ma ngak woko ki i ada motmot pe timo akaka. Ento en weko watte ki Jehovah doko goro, ci motmot en twero rwenyo watte woko. Watwero gwokke nining wek man pe otimme i komwa?
Ngat ma ngak motmot ki i ada bedo calo yeya ma mol motmot ki i dog nam. Baibul cikowa me gwokke “wek pe wangak woko.” (NGO MA WAROMO TIMONE WEK PE WACAT ADA?
7. Ngo ma bikonyowa wek pe wacat ada matwal?
Pe omyero wayer ayera lok ada mene me Baibul ma wabijolo ki ma wabikwero
7 Wek wamedde ki wot i ada, omyero wajol dok walub jami ducu ma Jehovah wacciwa. Mitte ni wawek ada obed gin ma pire tek loyo i kwowa dok walub cik ma igi lac me Baibul i jami ducu ma watimo. Kabaka Daudi ocikke bot Jehovah i lega ni: “Pwonya ki cikki ai Rwot, wek alub adani.” (Jabuli 86:11) Daudi onongo omoko tamme me medde ki wot i ada, wan bene myero watim kit meno. Ka pe watimo meno ci wabicako tamo pi jami ma wajalo pi ada dok wacako mitogi. Ento pe wan aye wayero lok ada mene me Baibul ma wabijolo ki ma wabikwero. Omyero walub “ada ducu.” (Jon 16:13) I pwony mukato-ni, wanyamo jami abic ma oromo bedo ni wajalogi wek wapwony lok ada dok waket i tic. Kombeddi dong wabineno kit ma watwero cung kwede matek wek pe wadok cen i jami magi ma wawekogi i ngewa-ni.—Matayo 6:19.
8. Yo ma Lakricitayo tiyo kwede ki cawane twero weko en cako a woko ki i ada nining? Mi labol.
8 Cawa. Me gwokke wek pe waa woko ki i i ada, omyero wamedde ki tic ki cawawa i yo me ryeko. Ka pe wagwokke, ci wabibedo ka tero cawa malac i galowang, yweyo wic, roto kabedo me Intanet nyo bene neno telebijon. Kadi bed ni jami magi pe girac, twero bedo ni cawa ma nongo watye ka timogi iye obedo cawa ma omyero wati kwede me kwan piwa kenwa nyo tito kwena. Gin ma kit man otimme i kom lamego mo ma nyinge Emma. * (Nen lok ma tye i tere piny.) Cakke wa i kare ma en pud anyaka matidi, onongo maro aguragura adada dok ngweco kwedgi ka mo keken ma iye mito. Ento lacen cwinye ocako pidde pi cawa ma onongo en tero pi timo gin ma cwinye maro dok man oweko en omoko tamme me cako keto pi jami ma pigi tego bedo mukwongo. Lamego Emma bene onongo pwony ki i gin ma otimme i kwo pa lamego mo ma nyinge Cory Wells ma bene onongo maro ngwec ki aguragura adada. * (Nen lok ma tye i tere piny.) Emma dong i kare-ni cwalo pol pa cawane me tic pi Jehovah, dok nongo cawa malac me bedo kacel ki jo me ode ki lureme ma gitiyo pi Jehovah bene. En dong winyo ni etye cok ki Lubanga dok cwinye yom adada ni etye ka tic ki cawane maber.
9. Jami me kom pire twero doko tek botwa mukato kare woko nining?
9 Jami me kom. Wek wamedde ki wot i ada, omyero pe wawek jami me kom pire obed tek botwa mukato kare woko. I kare ma pud wapwonyo ada nyen, waniang ni tic pi Jehovah pire tek loyo pi jami me kom, dok onongo watye atera me jalo jami magi ducu pi lok ada. Ento ka kare woto ki kato, waromo cako neno ka dano giwilo jami me tet ma okatti nyen nyo gitye ki yomcwiny pi jami mogo mukene ma cente romo wilone. Waromo cako winyo ni watye ka keng gin mo. Man twero weko pe wayeng ki jami ma watye kwedgi dok wacako keto cwinywa i nongo jami me kom me ka keto cwinywa i tic pi Jehovah. Man poyo wiwa i kom gin ma otimme i kom Dema. En onongo maro “jami me lobo-ni” tutwal ma omiyo en oweko tic ma onongo gitye ka tiyone gin ki lakwena Paulo. (2 Temceo 4:10) Gwok nyo Dema onongo maro jami me kom makato tic pi Lubanga. Nyo bene en onongo dong pe mito jalo jami wek giti kacel ki lakwena Paulo. Pwony ango ma wanongo? Oromo bedo ni i kare mukato onongo wamaro jami me kom mukato kare woko. Ka pe wagwokke, ci mar meno dok twero dongo i cwinywa kun doko tek ma weko warwenyo marwa pi ada woko.
10. Dic ango ma a ki bot wadiwa ma omyero wakwer woko?
10 Wat i kinwa ki jo mukene. Wek wamedde ki wot i ada, omyero pe wawek jo ma pe giworo Jehovah gudor tamwa. I kare ma wapwonyo ada, wat i kinwa ki wadiwa ma gin pe Lucaden olokke. Oromo bedo ni jo mukene i kingi guworo niyewa manyen-ni, ento mukene gukwero woko. (1 Petero 4:4) Ngene kene ni, watute matek me bedo ki wat maber ki lupacowa dok waterogi i yo me kica. Ento pe watwero kalo cik pa Jehovah wek wayom cwinygi. Dok kit ma wapwonyo kwede ki i 1 Jo Korint 15:33, omyero luremwa macok gubed jo ma gimaro Jehovah.
11. Watwero gengo tam ki tim macilo nining?
11 Tam ki tim macilo. Wek wamedde ki wot i ada, omyero wabed jo maleng i wang Jehovah. (Icaya 35:8; kwan 1 Petero 1:14-16.) I kare ma wapwonyo ada, waloko kwowa wek walub rwom me kwo ma nonge i Baibul. Jo mukene i kinwa gutimo alokaloka madongo adada. Kadi bed kit meno, omyero wagwokke adada wek pe walok kwowa maleng-ngi ki kwo me tarwang. Ngo ma twero konyowa me gwokke ki i timo tim tarwang? Tam i kom gin ma Lubanga omiyo wek wabed jo maleng. En omiyo kwo me wel pa Wode Yecu Kricito! (1 Petero 1:18, 19) Me konyowa wek wabed jo maleng i wang Jehovah, omyero kare ducu wiwa opo i kom kit ma ginkok pa Yecu pire tek kwede.
12, 13. (a) Pingo omyero wanen kwer me nino madito kit ma Jehovah neno kwede? (b) Gin ango ma dok wabinyamo?
12 Kwer ki tim mogo ma pe yomo cwiny Lubanga. Lupacowa, lutic luwotwa, ki lutino kwan luwotwa gitwero bitowa wek waribbe kwedgi i kwero Jo Epeco 5:10) Ka wageno Jehovah kacel ki Lokke, ci pe wabibedo ki lworo i kom gin ma jo mukene tamo.—Carolok 29:25.
kwer mogo. Gin ango ma romo konyowa wek pe wanywak i kwer ki tim mogo me tekwaro ma pe yomo cwiny Jehovah? Omyero wabed ki ngec matir i kom tyen lok ma oweko Jehovah pe cwako kwer magi. Watwero kwedo lok kun watiyo ki bukkewa wek wapo wiwa i kom kit ma kwer magi gucakke kwede. Ka walwodo tyen lok ma i Ginacoya ma oweko pe wakwero kwer magi, ci man weko wabedo ki yomcwiny ni watye ka kwo i yo ma “yomo cwiny Rwot.” (13 Wageno ni wan ducu wabimedde ki wot i ada pi naka. Ngo ma romo konyowa wek wajing tam man me medde ameda ki wot i ada? Tye jami adek ma watwero timogi.
MOK TAMMI ME MEDDE AMEDA KI WOT I ADA
14. (a) Medde ki kwano Baibul piwa kenwa bikonyowa nining wek wamok tamwa pe me weko ada? (b) Pingo wamito ryeko, pwony, ki dong niango?
14 Me acel, medde ki kwano Baibul kun ilwodo lok i kom jami ma ipwonyo. Ket yub me timo meno kare ducu. Ka imedde ki kwan piri keni i yo matut, ci man bene biweko marri pi ada medde ameda dok pe ibiweko ada. Carolok 23:23 wacciwa ni omyero ‘wawil ada’ kacel ki “ryeko, pwony, ki niang maber.” Ngeyo lok ada me Baibul keken pe romo. Omyero waket ngec meno i tic i kwowa. Ka waribo kacel gin ma wapwonyo nyen ki gin ma onongo wangeyo con ci wabibedo ki niango matut. Ryeko weko waketo i tic ngec ma watye kwede. I kare mukene ada tirowa kun nyutiwa alokaloka ma mitte ni omyero watim i kwowa. Dok mitte ni walub oyotoyot tira ma kit magi pien Baibul wacciwa ni giber kato lim.—Carolok 8:10.
15. Ada gwokowa calo del pyer nining?
15 Me aryo, mok tammi me keto i tic lok me ada i kwoni me nino ducu. Baibul poro ada ki del pyer pa lamony. (Jo Epeco 6:14) I kare me Baibul, del onongo konyo dok gwoko lamony i lweny, keken ka del meno omake matek. Ka onongo pe make matek, ci pe bigwoko kome maber. I yo ango ma ada gwokowa calo del? Ka waweko lok ada obedo cok kwedwa kare ducu, ci bigwokowa ki i tamo tam maraco dok konyowa me moko tam mabeco. Ka watye ki peko mo matek nyo watye ka kato ki i atematema me timo gin mo marac, lok ada me Baibul konyowa me cung matek wek watim jami matir. Kit macalo lamony onongo pe cito ka lweny labongo del pyere-ni, wan bene omyero pe wawek ada. Waketo tek me keto i tic lok ada me Baibul i kwowa kare ducu. Lamony onongo royo pala lucwanne i kom del pyere. Kong waneno kit ma wan bene watwero timo gin ma kit man.
16. Pwonyo jo mukene ada twero konyowa me medde ameda ki wot i ada nining?
16 Me adek, tute matek me pwonyo jo mukene ki lok me Baibul. Kiporo Baibul ki pala lucwan. Kit macalo lamony onongo mako pala lucwanne matek, wan bene omyero wamak Lok pa Lubanga matek. (Jo Epeco 6:17) Wan ducu watwero doko lupwonye mucwiny, ‘ma gitero lok ada i yo ma atir.’ (2 Temceo 2:15) Ka watiyo ki Baibul me pwonyo jo mukene, ci wabingeyo dok wabimaro ada matek. Dok man weko wamoko tamwa me medde ki wot i ada.
Ada obedo mot ma pire tek mua ki bot Jehovah
17. Pingo ada pire tek botwa?
17 Ada obedo mot ma pire tek mua ki bot Jehovah. Dok weko twere botwa me bedo ki wat macok ki Wonwa me polo. Wat meno aye gin ma pire tek loyo ma wan watwero bedo kwede. Jehovah dong otyeko pwonyowa ki jami mapol, ento meno pud acakkine keken! En bene ocikke ni ebimedde ki pwonyowa pi naka. Dong, ter ada calo gin ma pire tek kit macalo onongo ibitero ki tiko me wel. Medde ki ‘wilo ada, ento pe icat woko.’ Calo Daudi, ibigwoko cikke man bot Jehovah ma wacci: ‘Abilubo adani.’—Jabuli 86:11.