Gen Jehovah Wek Ibed Kwo!
“Gen Rwot [Jehovah] ki cwinyi ducu, pe ibed ka jengnge i kom niang ma itye kwede.”—CAROLOK 3:5.
1. Pingo wan ducu wamito kwe cwiny?
WAN ducu wamito kwe cwiny. Twero bedo ni kwowa opong ki par kacel ki tur cwiny. Peko ma watye ka kato ki iye romo bedo macalo adwogi me two, tiyo, nyo pien warwenyo danowa me amara. Jo mukene i kinwa kitye ka terogi marac. Medo i kom meno, jo ma gurumowa gitye ka doko ger medde ameda. Ada, kwo “marac” ma watye iye-ni nyuto ni watye ka kwo i “kare me agikki” dok ni nino ducu watye ka nyikke cok ki lobo manyen. (2 Temceo 3:1) Kadi bed kit meno, twero bedo ni dong wakuro pi kare malac me neno cobbe pa cikke pa Jehovah, dok watye ka kato ki i peko teretere. Dong watwero nongo kwe cwiny ki kwene?
2, 3. (a) Ngec ango ma watye kwede i kom Kabakuk? (b) Pingo wabinyamo buk pa Kabakuk?
2 Kong dong wanyamu buk pa Kabakuk wek wanong lagam pi lapeny meno. Kadi bed ni Ginacoya pe tito botwa Kabakuk 2:2.
lok matut i kom Kabakuk, ento buk ma en ocoyo cuko cwinywa adada. Nying Kabakuk nen calo tyen lokke tye ni “Kwako Ngat Moni Matek.” Man twero nyuto kit ma Jehovah kweyo kwede cwinywa calo en tye ka kwakowa i kore. Nyo bene twero nyuto kit ma wan wamoko kwede i kom Jehovah liking. Kabakuk oloko ki Lubanga dok openye lapeny mogo. Jehovah oweko Kabakuk ocoyo lokgi piny pien En onongo ngeyo ni wabinongo adwogi maber ki iye.—3 Lok man i kin lanebi ma onongo cwinye tye ka cwer-ri gin ki Jehovah, aye gin ma Baibul tittiwa keken i kom Kabakuk. Ento buk man tye i kin “gin ducu ma yam gicoyo i kare macon” i lok pa Lubanga, “wek wacir can, dok bene owek wabed ki gen pi lok me cuko cwiny ma wakwano i ginacoya.” (Jo Roma 15:4) Buk pa Kabakuk twero konyo wan ducu ki acel acel nining? Twero konyowa me niang tyen lok me geno Jehovah. Dok lok pa lanebi Kabakuk cuko cwinywa ni watwero bedo ma wiwa opye mot kadi bed watye ka kato ki i peko nyo atematema mo keken.
LEG BOT JEHOVAH
4. Pingo cwiny Kabakuk obedo ka cwer?
4 Kwan Kabakuk 1:2, 3. Kabakuk okwo i kare matek adada. Jo ma gurumo kangete onongo gubedo jo mager dok lubwami dok man ocwero cwinye matek. I kabedo ducu, en onongo neno Luicrael gitye ka tero luwotgi ki gero dok i yo marac. Kabakuk nen calo obedo ka pennye ni: ‘Tim bwami-ni ducu bigik awene? Pingo Jehovah tye ka galle agala ki timo gin mo? En owinyo calo gen mo dong pe. Pi meno en obako doge bot Jehovah ni otim gin mo. Oromo bedo ni Kabakuk ocako tamo ni gwok Jehovah dong pe paro pi jone nyo ni En pe bitimo gin mo. Tika in bene dong iwinyo kit meno?
Pe omyero wabed ki lworo me tito ki Jehovah par nyo akalakala ma tye i cwinywa
5. Gin ango ma watwero pwonyo ki i buk pa Kabakuk? (Nen cal ma tye i pot karatac 15.)
5 Tika Kabakuk openyo lapeny magi pien en onongo dong pe geno Jehovah kacel ki cikkene? Pe kumeno! Kabakuk onongo tye ka penyo Jehovah ni okonye ki pekone wek ebed labongo akalakala, ma meno onongo nyuto ni en peya orwenyo gene i kom Lubanga. Kabakuk onongo par odiyo dok wiye onywene woko. En pe oniang pingo Jehovah onongo tye ka galle dok pingo En oweko Kabakuk tye ka deno can tutwal. Tyen lok ma oweko Jehovah oye ni Kabakuk oco par ma i cwinye miyowa pwony ma pire tek. Pe omyero wabed ki lworo me tito ki Jehovah par nyo akalakala ma tye i cwinywa. Ki lok ada, en jolowa me lega bote, dok mito ni watite kit ma wawinyo kwede kikome i cwinywa. (Jabuli 50:15; 62:8) Carolok 3:5 cuko cwinywa ni: “Gen Rwot [Jehovah] ki cwinyi ducu, pe ibed ka jengnge i kom niang ma itye kwede.” Kabakuk oketo lok magi i tic i kwone.
6. Pingo pire tek me lega?
6 Kabakuk ogeno Jehovah, ma obedo Wonne ki Lareme dok otute matek me dirre cok bote. Kabakuk pe obedo mere mot ka paro pi pekone kun temo cobone kekene. Me ka meno, en olego kun tito par ma tye i cwinye kikome. Man obedo lanen maber adada piwa. Jehovah, ma en aye Lawiny lega, lwongo wan ducu me nyuto genwa i kome ki lega kun watite parwa. (Jabuli 65:2) Ka watimo meno, wabineno kit ma Jehovah gamo kwede legawa. Wabiwinyo calo en okwakowa macok kun kweyo cwinywa dok telowa. (Jabuli 73:23, 24) En bikonyowa me niang kit ma en neno kwede pekowa, kadi bed watye ka kato ki i atematema madit. Lega bot Jehovah obedo yo acel maber ma wanyutu kwede genwa i kome.
WINY LOK PA JEHOVAH
7. Jehovah odok iye nining i kare ma Kabakuk otite par ma tye i cwinye?
7 Kwan Kabakuk 1:5-7. I ngeye ma Kabakuk dong otito par ma i cwinye bot Jehovah, romo bedo ni en obedo ka tamo kit ma Jehovah bidok iye. Macalo Wego ma lamar, Jehovah oniang kit ma Kabakuk onongo winyo kwede. En oniang ni Kabakuk onongo tye ka deno can dok tye ka bako doge pi kony. Pi meno Jehovah pe ogere i kom Kabakuk ento otite ngo ma ecok timone i kom Lujudaya ma pe lugen. Ki lok ada, twero bedo ni Kabakuk aye ngat mukwongo ma Jehovah otite ni karene me miyo pwod dong cok.
8. Pingo lagam pa Jehovah obedo pat ki tam pa Kabakuk?
8 Jehovah otito bot Kabakuk ni Etye atera me timo gin mo. En onongo bimiyo pwod i kom Lujudaya magi ma giger dok timgi raco-ni. Jehovah owaco ni man bitimme “i karewu-ni,” meno onongo nyuto ni ngolo koppe bitimme i kare ma Kabakuk nyo Luicrael ma gurume pud gitye kwo. Lagam pa Jehovah obedo pat ki tam pa Kabakuk. Jo Kaldaya nyo Lubabilon onongo giger matek. Onongo giger ma loyo Luicrael, ma onongo olo gingeyo cik pa Jehovah. Dong pingo onongo Jehovah bitic ki rok ma ger dok ma giworo lubange me goba me pwodo jone? Man onongo bimedo peko ameda i kom jo Juda ducu. Kono ibed Kabakuk, onongo ibiwinyo nining?
9. Lapeny mene mukene ma Kabakuk openyo?
9 Kwan Kabakuk 1:12-14, 17. Kadi bed Kabakuk oniang ni Jehovah bitic ki jo Babilon me miyo pwod i kom jo maraco ma gurumo ka ngete, ento lokke onyweno wiye. Kadi bed kit meno, en onongo mwol dok omoko tamme me medde ki geno Jehovah. Ki lok ada, en owaco ni Jehovah pud omedde ki bedo “Got” ma mege. (Nwoyo Cik 32:4; Icaya 26:4) Kabakuk oniang ni Lubanga lamar dok lakica, pi meno en pe olworo penyo Jehovah lapeny mukene calo: Pingo Jehovah oye ni jami omedde ki balle abala i Juda dok jone gumedde ki deno can? Pingo en pe ocobo peko man cutcut? Pingo Won Twer Ducu ‘ling alinga’ kun weko tim maraco nya i kabedo ducu? Man pe tye atir pien Jehovah aye ‘Ngat Maleng,’ dok ‘wange leng, pe romo neno gin marac anena.’
10. Pingo i kare mukene wawinyo calo Kabakuk?
10 I kare mukene watwero winyo calo Kabakuk. Wawinyo lok pa Jehovah. Wagenne dok wakwano Lokke, ma man jingo genwa. Wawinyo bene pi cikkene ka walubo pwony ma dulle miyowa. Ento pud waromo pennye kekenwa ni, ‘Awene ma pekowa bigik iye?’ Waromo nongo pwony ki i gin ma Kabakuk otimo i nge meno.
KUR JEHOVAH, EN BITIMO GIN MO
11. Gin ango ma Kabakuk omoko tamme me timone?
11 Kwan Kabakuk 2:1. Lok pa Kabakuk gin ki Jehovah okonye me bedo ma wiye opye mot. Oweko en omoko tamme me kuro ngo ma Jehovah bitimone. Kabakuk onwoyo tamme i kare ma owaco ni: “Atye ka kuro nino me can mot.” (Kabakuk 3:16) Lutic pa Lubanga mukene ma lugen bene gubedo ka kuro gin ma Jehovah bitimone. Labolgi cuko cwinywa pien nyuto ni wan bene watwero bedo calo gin.—Mika 7:7; Yakobo 5:7, 8.
Omyero wakur Jehovah mot dok wabed ki gen ni en bilarowa ki i pekkiwa i karene kikome
12. Ngo ma waromo pwonyone ki bot Kabakuk?
12 Ngo ma waromo pwonyo ki i diyo cwiny pa Kabakuk? Mukwongo, omyero pe wajuk lega bot Jehovah kadi bed pekowa dit adada. Me aryo, omyero wawiny gin ma Jehovah wacciwa kun tiyo ki Lokke kacel ki dulle. Ki me adek, omyero wakur Jehovah mot dok wabed ki gen ni en bilarowa ki i pekkiwa i karene kikome. Ka walubo lanen pa Kabakuk, wabibedo ma wiwa opye mot kun wadiyo cwinywa. Gen ma watye kwede bikonyowa me diyo cwinywa ki yomcwiny kadi bed watye ki pekki mapol. Watye ki tekcwiny ni Wonwa me polo bitimo gin mo.—Jo Roma 12:12.
13. Jehovah ocuko cwiny Kabakuk nining?
13 Kwan Kabakuk 2:3. Wageno ni Jehovah onongo cwinye yom ni Kabakuk omoko tamme me kuro En. Won Twer Ducu oniang peko ma Kabakuk tye ka kato ki iye, dong En okweyo cwiny lanebine-ni kun cikke ni ebigamo lapenye. Pekki pa Kabakuk onongo dong cok kibikwanyone woko. Obedo calo Jehovah tye ka waco bot Kabakuk ni: “Di mere cwinyi mot ci igena. Abigamo legani, kadi bed tye ka nen calo orii.” Jehovah opoyo wi Kabakuk ni En dong etyeko moko awene ma ebicobo iye yubbe. Pi meno en ocuko cwiny Kabakuk me medde ki kuro. I agikkine, lanebi man onongo genne bicobbe.
Pingo omyero wati pi Jehovah kit ma watwero kwede? (Nen paragraf 14)
14. Ngo ma myero wamok tamwa me timone ka watye ka kato ki i atematema?
Tic pa Lukwena 1:7) Omyero wabed ki gen ni Jehovah aye ngeyo kare maber loyo me timo gin mo. Pi meno, omyero pe wail cingwa ento wabed jo mamwol, wadi cwinywa dok wabed ki niye i kom Lubanga. Dok ka wawoto ki kurone, myero wati ki cawawa maber kun watiyo pi Jehovah ki cwinywa ducu.—Marako 13:35-37; Jo Galatia 6:9.
14 Wan bene myero wakur gin ma Jehovah bitimone. Dok omyero waket cwinywa ka winyo gin ma en waco botwa. Ka watimo kit meno ci wabibedo ki tekcwiny dok ma cwinywa opye mot kadi bed watye i atematema mo keken. Yecu ociko ni pe omyero waket cwinywa tutwal i kom ‘kare ki nino’ ma Lubanga pe otitiwa pire. (JEHOVAH MIYO KWO BOT JO MA GIGENE
15, 16. (a) Cikke mene ma wanongo i buk pa Kabakuk? (b) Cikke magi pwonyowa gin ango?
15 Jehovah ocikke ni: “Ngat ma kite atir bibedo kwo pi niyene,” dok ni “lobo bipong ki ngec me deyo pa [Jehovah].” (Kabakuk 2:4, 14) Ada, Jehovah ocikke me miyo kwo ma pe tum bot jo ma gidiyo cwinygi dok gigene.
16 Cikke ma nonge i Kabakuk 2:4 pire tek adada mumiyo lakwena Paulo onwoyo tyen adek kulu i waragane! (Jo Roma 1:17; Jo Galatia 3:11; Jo Ibru ) Watwero bedo labongo akalakala mo ni kadi bed wakat ki i pekki madongo, wabineno cobbe pa cikke pa Jehovah ka wagene. Jehovah mito ni waket cwinywa i kom genwa pi anyim. 10:38
17. Jehovah cuko cwinywa ni ebitimo gin ango piwa ka wageno en?
17 Buk pa Kabakuk tye ki pwony ma pire tek adada pi wan ducu ma watye ka kwo i kare me agikki-ni. Jehovah ocikke me miyo kwo ma pe tum bot ngat mo keken ma kite atir dok ma geno en. Pi meno wamedde wunu ki jingo genwa i kom Lubanga, kadi bed watye ki peko nyo par mapol. Gin ma Jehovah owaco bot Kabakuk cuko cwinywa ni En bikonyowa dok bilarowa. En kwayowa me keto gen i kome kun wadiyo cwinywa wakuro kare ma en omoko ni Kerre biloyo kwede lobo. I kare meno, lobo bipong ki jo ma cwinygi yom dok ma gitye ki kuc, ma giworo Jehovah.—Matayo 5:5; Jo Ibru 10:36-39.
GEN JEHOVAH WEK IBED KI YOMCWINY
18. Lok pa Jehovah ogudo Kabakuk nining?
18 Kwan Kabakuk 3:16-19. Gin ma Jehovah owaco bot Kabakuk ogudo cwinye adada. Kabakuk olwodo lok i kom jami me aura ma Jehovah otimo pi Jone i kare mukato angec. Man ojingo genne i kom Jehovah. En onongo ngeyo labongo akalakala ni Jehovah bitimo gin mo ma pe orii! Man okweyo cwiny lanebi-ni, kadi bed en onongo ngeyo ni pud etye ki pekki pi kare mo. Kabakuk dong pe obedo ki gung cwiny mo. Me ka meno, en onongo tye ki niye matek ni Jehovah bilarre. Ki lok ada, gin ma owaco i tyeng 18 twero bedo lok ma nyuto gen matek loyo ma kicoyo i Baibul. Jo mogo ma gukwano matut guwacci lok man romo gonye ni: “Abipye malo ki yomcwiny pi Rwot, abimyel ki yomcwiny pi Lubanga.” Man pud dong obedo pwony ma pire tek adada piwa! Jehovah pe omiyowa cikke mamwonya pi anyimwa keken, ento en bene cuko cwinywa ni cokcok-ki ebicobo cikke meno.
19. Calo Kabakuk, watwero nongo kwe cwiny ma a ki bot Jehovah nining?
19 Pwony ma pire tek ma wanongo ki i buk pa Kabakuk en aye ni myero wagen Jehovah. (Kabakuk 2:4) Me medde ki geno Jehovah, omyero wajing watwa kwede. Dong man aye gin ma omyero watim. (1) Wamedde ki lega bot Jehovah, kun watite parwa ducu. (2) Waket cwinywa ka winyo gin ma Jehovah tittiwa i Lokke, dok walub tira ma en miyowa kun wok ki i dulle. (3) Wabed lugen dok wadi cwinywa kun wakuro ni Jehovah ocob cikkene. Meno aye gin ma Kabakuk otimo. Kadi bed ni onongo cwinye otur matek i kare ma ocako lok ki Jehovah, ento i agikkine, cwinye ojing dok onongo yomcwiny! Ka walubo lanen pa Kabakuk, wan bene wabinongo kwe cwiny ki bot Wonwa me polo Jehovah, ka en kwakowa i kore. Man aye pud dong kwe cwiny maber loyo ma watwero nongone i lobo man marac-ci.