Tika Itye ka Weko Tam pa Jehovah Doko Tammi?
“Wuwek Lubanga olok tamwu odok nyen.”—JO ROMA 12:2.
1, 2. Ngo ma wapwonyo ka wawoto ki dongo i ada? Mi labol.
GO KONG ni ngat mo omiyo mic ki latin mo matidi. Ci lunyodo pa latin meno guwacce ni, “Wacci apwoyo.” Ci en opwoyo mere pien guwacce ni opwo. Ento ka latin meno woto ki dongo, en cako niang pingo lunyodone mito ni en onyut pwoc pi jami mabeco ma jo mukene gitimo. Motmot, en cako dongo cwiny me pwoyo jo mukene pire kene pien nongo dong opwonye me nyuto pwoc.
2 Gin mo ma kit meno bene otimme i komwa. I kare ma pud wacako pwonyo ada apwonya, wapwonyo ni pire tek adada me lubo cik pa Jehovah. Ento ka wawoto ki dongo i ada, wapwonyo matut kit ma en tamo kwede, ma meno kwako jami ma en maro ki ma en pe maro kacel ki kit ma en neno kwede ki jami. Ka waweko ni tam pa Jehovah aye odor tam ma wamoko kacel ki ticwa, ci nongo watye ka weko tamme doko tamwa.
3. Pingo i kine mukene tek adada me tam calo Jehovah?
3 Kadi bed ni wamaro pwonnye me tam calo Jehovah, i
kine mukene tek adada me tam calo en pien watye ki roc. Me labolle, wangeyo kit ma Jehovah neno kwede tim me tarwang, jami me kom, ticwa me pwony, tic ki remo i yo ma pe opore, kacel ki jami mukene. Ento twero bedo tek botwa me niang pingo en neno jami magi kit meno. Pi meno, watwero pwonnye me tam calo Jehovah nining? Dok man twero konyowa nining me timo gin ma atir kombeddi ki i anyim?KIT MA WATWERO WEKO TAM PA LUBANGA DOKO MEWA
4. Tyen lokke ngo ka kiwaco ni wawek Lubanga olok tamwa odok nyen?
4 Kwan Jo Roma 12:2. I tyeng man, lakwena Paulo otito gin ma omyero watim wek watam calo Jehovah. En owaco ni omyero ‘pe walub tam me lobo man.’ Kit ma waneno kwede i pwony mukato-ni, man tyen lokke ni omyero wakwer tam ki cwiny pa jo me lobo-ni. Ento Paulo bene owaco ni mitte ni wawek Lubanga olok tamwa odok nyen. Man tyen lokke ni myero wakwan Lok pa Lubanga, waniang tamme, walwodi, dok wati matek wek wabed ki tamme.
5. Tit kong apokapoka ma tye i kin kwan wiye wiye ki kwan i yo matut.
5 Kwan i yo matut pe obedo kwano wiye wiye ngec moni nyo ngolo te lagam keken. Ka watye ka kwan i yo matut, watamo i kom ngo ma gin ma watye ka kwanone pwonyowa i kom ngat ma Jehovah obedo, gin ma en timo, ki dong kit ma en tamo kwede. Watemme me niang tyen lok mumiyo Jehovah mito ni watim jami mogo dok wakwer mukene. Watamo bene i kom alokaloka ma omyero watim i kwowa ki i tamwa. Ngene kene ni, pe romo bedo yot me lwodo lok i kom jami magi ducu kare weng ma watye ka kwan i yo matut. Ento bedo ber me cwalo cawa, gwok nyo nucu cawa ma watiyo kwede me kwan, pi lwodo lok i kom gin ma wakwano-ni.—Jabuli 119:97; 1 Temceo 4:15.
6. Ngo ma timme ka walwodo Lok pa Lubanga kare ki kare?
6 Gin mo maber adada timme ka walwodo Lok pa Lubanga kare ki kare. ‘Waniang’ nyo waye ki i cwinywa kekenwa, ni tam pa Jehovah pe ki roc mo. Wacako niang kit ma en neno kwede jami, dok i agikkine wajolo tamme. Pi meno waweko en loko tamwa ci wacako tam i yo manyen. Motmot, waweko tam pa Jehovah doko tamwa.
TAMWA GUDO GIN MA WATIMO
7, 8. (a) Jehovah mono neno jami me kom nining? (Nen cal ma tye i pot karatac 27.) (b) Ka waneno jami me kom kit ma Jehovah neno kwede, ngo ma pire bibedo tek loyo botwa kare ducu?
7 Tamwa gudo jami ma watimo. (Marako 7:21-23; Yakobo 2:17) Kong dong wanenu labol mogo ma nyuto man ka maleng. Labol me acel, ma kubbe ki nywalo Yecu, nyuto ka maleng tam pa Jehovah i kom jami me kom. Lubanga kikome aye oyero Yucepu ki Maliam me gwoko Wode kadi bed gin onongo gubedo lucan. (Lulevi 12:8; Luka 2:24) I kare ma kinywalo Yecu, Maliam ‘opyelle i weer cam pa dyang, pien onongo ot welo opong woko pigi.’ (Luka 2:7) Ka onongo Jehovah omito, kono onongo en oyero ni kinywal Yecu i kabedo maber. Ento en onongo mito ni Yecu odong i paco ma giketo woro pa Lubanga bedo mukwongo i kwogi. Meno aye obedo gin ma pire tek loyo bot Jehovah.
8 Lok man i kom ka ma kinywalo iye Yecu pwonyowa kit ma Jehovah neno kwede jami me kom. Lunywal mukene gimito ni lutinogi gubed ki jami me kom mabeco loyo, kadi bed ni meno keto wat pa lutinogi ki Jehovah ka mading. Ento onen ka maleng ni, Jehovah neno watwa kwede calo gin ma pire tek loyo. In tika dong ijolo tam pa Jehovah i kom lok man? Jami ma itimo nyuto ngo?—Kwan Jo Ibru 13:5.
9, 10. Watwero nyutone nining ni waneno lok i kom weko jo mukene poto i bal kit ma Jehovah neno kwede?
9 Labol mukene tye i kom kit ma Jehovah neno kwede dano ma miyo jo mukene gipoto i bal, nyo gijuko tic pi Jehovah woko. Yecu owaco ni: “Ka dano mo miyo ngat mo acel ma i kin jo magi matino ma guye an-ni gupoto i bal, ci bedo ber makato ducu ka gitweyo kidi rego madit i ngute ci gibole kwede wa i nam.” (Marako 9:42) Meno lok matek adada! Dok wangeyo ni Yecu tamo calo Wonne. Dong watwero bedo labongo akalakala mo ni cwiny Jehovah pe bedo yom ka wamiyo lalub kor Yecu mo opoto i bal.—Jon 14:9.
10 Tika waneno lok i kom miyo jo mukene poto i bal kit ma Jehovah gin ki Yecu gineno kwede? Ngo ma jami ma watimo nyuto? Me labolle, romo bedo ni wamaro cital ruk mo. Ento ngo ma wabitimone ka waniang ni gin ma wayero twero balo cwiny jo mogo me kacokke nyo miyo gibedo ki tam macilo? Tika marwa pi omegiwa bitugo cwinywa me weko cital meno woko?—1 Temceo 2:9, 10.
11, 12. Wagwokke nining ka wapwonnye me kwero gin ma Jehovah dag kun wajukke kenwa?
11 Nen kong labol me adek: Jehovah dag tim marac. (Icaya 61:8) Ngene kene ni, en niang ni i kare mukene tek botwa me timo gin ma atir pien watye ki roc. Kadi bed kit meno, en mito ni wadag gin marac, kit ma en bene dag kwede. (Kwan Amoc 5:15.) Ka walwodo tyen lok mumiyo Jehovah dag gin marac, ci man bikonyowa me weko tamme doko megwa dok bimiyowa teko me kwero jami maraco.
Jami mogo raco, kadi bed Baibul pe oloko iye atir atir
12 Ka wapwonnye me kwero gin marac, ci bikonyowa bene me niang ni jami mogo raco, kadi bed Baibul pe oloko iye atir atir. Me labolle, tye myel mo macilo adada ma kilwongo ni myel i em (lap dancing) ma tye ka nya i wi lobo tutwal i kare-ni. Jo mukene giwacci myel man pe rom ki rwatte i * (Nen lok ma tye i tere piny.) Ento tika meno aye kit ma Jehovah winyo kwede? Wi opo ni, Jehovah dag tim marac mo keken. Pi meno, omyero wabed bor ki gin mo keken marac kun wapwonnye me jukke kenwa ki me kwero gin ma Jehovah dag.—Jo Roma 12:9.
buto, pi meno gitamo ni pe obedo gin marac.CAK TAM KOMBEDDI I KOM GIN MA IBITIMO I ANYIM
13. Pingo omyero wacak tam kombeddi i kom kit ma Jehovah neno kwede jami wek wamok tam me ryeko i anyim?
13 Ka watye ka kwan, mitte ni watam i kom kit ma Jehovah neno kwede jami pien man twero konyowa me moko tam me ryeko. Dong, ka wakemme ki gin mo ma mitte ni wamok iye tam cutcut, wabibedo ma wayubbe. (Carolok 22:3) Kong dong wanenu labol mogo me Baibul.
14. Ngo ma wapwonyo ki i lagam pa Yucepu bot dako pa Potipar?
14 I kare ma dako pa Potipar otemo bito Yucepu, en okwero woko cutcut. Ngene kene ni, Yucepu onongo olwodo con kit ma Jehovah neno kwede nyom. (Kwan Acakki 39:8, 9.) Yucepu owaco bot dako pa Potipar ni: “An dok acore ka tiyo bal madit marac kuman nining, kun atimo wa bal i kom Lubanga kulu?” Man nyuto ni en onongo oweko tam pa Lubanga odoko mege. Wan kono? Ngo ma ibitimo ka latic lawoti mo ocako timo tim me oree kwedi? Nyo ka ngat mo ocwalo mecej nyo cal ma tugo miti macilo i cimmi, ibitimo ngo? * (Nen lok ma tye i tere piny.) Bedo lagen bot Jehovah doko yot ka ipwonyo dok ijolo tamme i kom jami magi dok imoko tammi woko con i kom gin ma ibitimo.
15. Watwero bedo lugen bot Jehovah nining, calo Luibru adek-ki?
15 Kong wanenu bene labol pa Luibru adek ma nyinggi Cadrak, Mecak, ki Abednego. I kare ma Kabaka Nebukadnejar omiyogi rukca me woro cal me jabu ma en oyubo-ni, gin gukwero woko lajwac. Lagam ma atir ma gumiyo bot kabaka onyuto ni gin onongo dong gutamo con i kom gin ma romo timme ka gumedde ki bedo lugen bot Jehovah. (Nia 20:4, 5; Daniel 3:4-6, 12, 16-18) I kare-ni kono? Ngo ma ibitimo ka ladit ticci owaco ni imi cente me ajog pi kwer ma kubbe ki dini goba? Me ka kurone wang ma gin ma kit meno otimme, bedo ber ka wacako lwodo kombeddi kit ma Jehovah neno kwede jami magi. Dong, ka wakemme ki gin ma kit meno i nino mo, bibedo yot piwa me timo gin matir, kit ma Luibru adek-ki gutimo kwede.
Tika ityeko kwedo lok, ipongo fom me DPA, dok iloko ki daktarni? (Nen paragraf 16)
16. I yo ma nining ma niang tam pa Jehovah konyowa me yubbe pi peko me yotkom ma bino atura?
16 Lwodo tam pa Jehovah twero bene konyowa me gwoko genewa bote ka watye ki peko me yot kom ma obino atura. Ngene kene ni, dong wamoko tamwa ni pe omyero kimed i komwa remo kikome nyo jami angwen madongo ma tye i remo. (Tic pa Lukwena 15:28, 29) Ento tye yo me cango two mogo ma kwako tic ki jami matino tino ma kikwanyo ki i remo, dok mitte ni Lakricitayo acel acel omok tamme pire kene ma lubbe ki cik ma igi lac me Baibul. Kare mene mupore ki wan me moko tamwa? Tika obedo ma nongo dong watye i ot yat, nyo bene arem odiyowa matek dok kitye ka keto lyeto i komwa ni wamok tamwa oyotoyot? Ngene kene ni pe kumeno. Kombeddi aye obedo kare me kwedo lok, pongo kadwa me DPA, ki dong lok ki daktar. * (Nen lok ma tye i tere piny.)
17-19. Pingo pire tek adada me pwonyo kit ma Jehovah neno kwede jami kombeddi? Mi labol.
17 Me agikkine, tam i kom kit ma Yecu odok kwede oyotoyot i kom tam me mingo pa Petero, ni: “Bed ki kica i komi kekeni, Rwot.” (NW) Ngene kene ni Yecu onongo dong otamo matut i kom gin ma Lubanga mito ni etim kacel ki lok pa lunebi i kom kwone ki tone i lobo kany. Ngec man omine kero me gwoko genene bot Jehovah dok me miyo kwone macalo ginkok pi wan ducu.—Kwan Matayo 16:21-23.
18 I kare-ni, Lubanga mito ni wabed lureme dok wati matek me tito kwena maber-ri. (Matayo 6:33; 28:19, 20; Yakobo 4:8) Ento jo mogo ma nongo pe gitye ki cwiny marac giromo temme me gengowa ki timo meno, kit ma Petero otimo kwede bot Yecu. Me labolle, ladit ticci romo medo mucarani ento nongo myero iti pi cawa malac dok pe ibibedo ki cawa me wot i cokke nyo tito kwena. Nyo ket ni itye i cukul, ci lupwonyeni gumini kare me a woko ki gang wek ibed ki i gang kwan ka nongo pwonnye muromo. Ka gin ma kit meno otimme, tika bimitte ni kong ilegi, ikwed lok, ilok ki jo gangwu nyo luelda ma peya imoko tammi? Bedo ber loyo ka ipwonyo kit ma Jehovah neno kwede jami magi kombeddi ci iwek tamme odok tammi. Dong lacen ka ikemme ki jami magi, pe ibinongo ni gubedo atematema. Nongo ingeyo gin me atima kikome pien dong imoko tammi woko con me keto tic pi Jehovah mukwongo.
19 Iromo bene tamo pi jami mukene ma twero timme atura ma temo genwa bot Jehovah. Ngene kene ni, pe watwero yubbe pi jami ducu ma romo temo genewa. Ento ka walwodo lok i kom tam pa Jehovah i cawa me kwan piwa kenwa, ci wiwa bipo oyotoyot i kom gin ma wapwonyo dok wabingeyo gin me atima i cawa mo keken. Pi meno ka watye ka kwan, myero watem niang kit ma Jehovah neno kwede jami, wawek tamme odok tamwa, dok watam i kom kit ma man twero konyowa me moko tam me ryeko kombeddi-ni ki i anyim.
TAM PA JEHOVAH KI ANYIMMI
20, 21. (a) Pingo wabinongo mit pa bedo agonya i lobo manyen? (b) Watwero bedo ki yomcwiny i kwowa i kare-ni nining?
20 Wan ducu watye ka kuro donyo i lobo manyen. Pol pa wan watye ki gen me kwo i lobo Paradic pi naka. I te loc me Ker pa Lubanga, wabibedo agonya ki i arem ki can ducu ma watye ka kato ki iye i lobo-ni. Dok ngene kene ni, pud wabibedo agonya me moko tamwa ma lubbe ki gin ma wamito.
21 Ento meno pe te lokke ni bedo agonyawa wang coo-ne bibedo pe. Jo mamwol pud gibimoko tamgi kun gijenge i kom cik ki tam pa Jehovah. Dok man bikelo yomcwiny ki kuc madwong. (Jabuli 37:11) Ka wawoto ki kuro kare meno, watwero bedo ki yomcwiny kombeddi ka waweko tam pa Jehovah doko tamwa.
^ para. 12 Myel i em obedo cital myel ma nongo lamyel ma tye cok munero bedo i em kastoma ka timme calo tye ka buto kwede. Ma lubbe ki ngo ma otimme ki kabedone, man kitwero nenone calo tim tarwang dok romo mitte ni luelda guket komitti me ngolo kop. Lakricitayo ma otimo gin ma kit man myero openy pi kony ki bot luelda.—Yakobo 5:14, 15.
^ para. 14 Tic ki cim cing me cwalo mecej, cal, nyo vidio me lewic ma tugo miti macilo kilwongo ni sexting. Ma lubbe ki ngo ma otimme, twero mitte ni luelda guket komitti me ngolo kop. I kine mukene bene, luloc me gamente gumako dok guketo adot i kom lutino ma gitye mwaka apar ki wiye pi tim me sexting. Pi ngec mukene, cit i kabedowa me Intanet me jw.org i te pwony ma wiye tye ni “Young People Ask—What Should I Know About Sexting?” (Nen i te BIBLE TEACHINGS > TEENAGERS.) Nyo nen pwony ma wiye tye ni “Kit me Lok ki Latinni me Mwaka Apar ki Wiye i kom Sexting” i magajin me Awake! me Novemba 2013, pot karatac 4-5.
^ para. 16 Pi ngec mukene i kom cik ma igi lac ma twero konyi, nen buk me ‘Wubed i Mar pa Lubanga’ pot karatac 215-218.