1, 2. (a) Gi ango ma pire tek loyo i kwoni? (b) Lok ada mene ma pire tek botwa, dok pingo? (Nen cal ma tye i pot karatac man.)

GIN ango ma dong pire tek loyo i kwoni? Macalo jo pa Jehovah, gin ma pire tek loyo botwa aye watwa kwede. Dok pe wamito ni wacat pi tyen lok mo keken. Watero bene lok ada me Baibul calo gin ma pire tek pien konyowa me bedo lurem Jehovah.​—Jo Kolocai 1:9, 10.

² Jehovah obedo Lapwonywa Madit, dok pwonyowa ki lok ada mapol mabeco ma nonge i Lokke, Baibul. En pwonyowa ber pa nyinge dok tittiwa kite mabeco. En bene wacciwa ni emarowa adada muweko emiyo kwo pa Wode me amara piwa. Jehovah bene pwonyowa lok i kom Ker pa Meciya. En miniwa gen pi anyim, gen me cito i polo pi Lukricitayo ma kiwirogi, nyo me bedo i paradic i lobo kany pi “romi mukene.” (Jon 10:16) Jehovah pwonyowa kit ma myero wakwo kwede. Watero lok ada magi calo jami ma pigi tego adada pien gikonyowa me nyiko cok ki  Lacwecwa dok giminiwa tyen lok me bedo kwo.

3. Tika Jehovah penyowa me culo cente pi ada?

³ Jehovah obedo Lubanga ma cinge yot. En cinge yot adada ma oweko omiyo Wode piwa. Ka Jehovah oneno ngat mo ma tye ka yenyo ada, en konyo dano meno me nongone. En pe penyowa me culo cente wek wapwony ada. I kare mo acel, laco mo ma nyinge Cimon omiyo cente bot lakwena Petero wek en bene enong twero me miyo cwiny maleng bot jo mukene. Ento Petero otito bote ni tamme-ni pe tye atir dok owacce ni: “Centeni myero orweny woko matwal, kacel ki in, pien itamo pi wilo mot pa Lubanga ki lim!” (Tic pa Lukwena 8:18-20) Dong, tyen lokke ngo me ‘wilo ada’?

4. I pwony man, ngo ma wabipwonyo madok i kom lok ada?

⁴ Kwan Carolok 23:23. Wek wapwony ada ma i Baibul, mito keto tek. Mitte bene ni wajal jami mukene pire. Ka ‘wawilo ada,’ ma meno obedo pwonyo lok ada me Baibul, omyero wagwokke pe me ‘catone’ ma obedo weko ada woko. Watwero ‘wilo’ ada me Baibul nining? Dok man tero ciling adi? Lagam pi lapeny magi twero konyowa me tero ada calo gin ma pire tek dok biweko wamoko tamwa pe me wekone. Wabiniang bene pingo ada ma a ki bot Jehovah pire tek loyo gin mo keken.

5, 6. (a) Watwero wilo ada labongo cente nining? Tit kong. (b) Ada konyowa nining?

⁵ Lok ada tye ni, ka gin moni tye me nono pe tere ni wabinongone labongo tute nyo jalo gin mo. Nyig lok me leb Ibru ma kigonyo ni “wil” i Carolok 23:23 twero bene gonye ni “nong.” Nyig lok magi nyuto ni ngat moni omyero ojal gin mo dok otute matek wek ebed ki gin ma pire tek. Me konyowa wek waniang kit ma watwero wilo kwede ada, go kong ni, kitye ka poko labolo me nono i cuk mo. Tika iromo tamo ni labolo-ni bibino kene i wi mejani? Pe, omyero icit wa i cuk meno ci igam ikel gang. Dong kadi bed labolo meno tye me nono, pud omyero iket tek me nongone. I yo acel-lu, pe mitte ni wabed ki cente wek wapwony ada, ento mito keto tek ki jalle.

⁶ Kwan Icaya 55:1-3. Gin ma Jehovah owaco-ni konyowa me niang tyen lok me ‘wilo ada.’ I tyeng magi, Jehovah oporo lok ada ki pii, cak, ki dong kongo vino. Kit macalo pii mangic keto orwo pa ngat ma orwo pii neko, ada bene kweyo cwinywa. Dok bene kit macalo cak weko latin dongo doko matek-ki, lok ada ma i Baibul bene weko watwa ki Jehovah dongo doko matek. Jehovah bene oporo lokke ki kongo vino. Pingo? Baibul tittiwa ni kongo vino weko cwiny dano bedo yom. (Jabuli 104:15) Pi meno, ka Jehovah wacciwa ni ‘wawil kongo vino’ nongo en tye ka konyowa me niang ni ka walubo tirane i kwowa ci wabibedo ma cwinywa yom. (Jabuli 19:8) Jehovah tiyo ki lapor magi me konyowa niang adwogi maber ma wanongo ka wapwonyo dok walubo lok ada ma i Baibul. Kong dong wanyamu jami abic ma twero mitte ni wajal wek wawil ada.

7, 8. (a) Pingo kare mitte me pwonyo lok me ada? (b) Jami ango ma latin kwan mo acel ojalo, dok adwogine obedo nining?

⁷ Cawa. Kare mitte pi ngat moni me winyo kwena me Ker-ri, kwano Baibul ki bukke ma jenge i kom Baibul, kwano Baibul kacel ki Lucaden pa Jehovah, yubbe pi cokke, ki dong cito i cokke magi. Me timo jami magi ducu, omyero wati ki cawa ma onongo waromo tic kwede pi jami mukene ma pigi pe tek. (Kwan Jo Epeco 5:15, 16.) Tero kare ma rom mene me pwonyo lok ada ma pigi tego me Baibul? Kare ma ngat acel tero pe romo bedo rom ki ngat mukene. Pe watwero tyeko pwonyo jami ducu i kom ryeko pa Jehovah, yone, ki jami ma en otimo. (Jo Roma 11:33) Magajin me Wi Lubele ma kikwongo goyone oporo lok ada ki “ature mo matidi ma okanne” dok magajin meno omedde ni: “Pe iyeng woko ka inongo ature acel keken me lok ada. Ka onongo acel romo, kono mukene pe. Medde ameda ki cokone dok iyeny mukene.” Pi meno, watwero pennye kekenwa ni, ‘Jami adi ma dong apwonyo i kom Jehovah?’ Kadi wabed kwo pi naka, pud wabimedde ki pwonyo jami mapol i kom Jehovah. Ento i kare-ni, pire tek adada ni wati ki cawa ma watye kwede me pwonyo lok mapol i kome kit ma watwero. Nen kong labol pa ngat mo ma otimo kit meno.

⁸ Mariko, * (nen lok ma tye i tere piny) anyaka ma oa ki i lobo Japan, okobo i lobo Amerika ka kwan i boma me New York. I nino mo acel, laminwa mo ma painia onywako lok me kwena maber kwede ki i gange. Mariko onongo dong tye ki dinine, ento en ocako kwano Baibul ki laminwa-ni. En omaro jami ma tye ka kwanone matek adada mumiyo openyo ka kitwero kwan kwede kiryo cabit ducu. Kadi bed Mariko onongo cawane nok pien cito i cukul dok tye bene ki dog tic ma timo i nino mogo, en ocako cito i cokke cutcut. Odwoko piny cawa ma cwalo i mato yamo wek enong kare me pwonyo lok ada. Jalle i yo magi okonyo Mariko me nyikke cok ki Jehovah, dok i kine ka mwaka acel keken, en onongo batija. I nge dwe abicel, i mwaka 2006, en odoko lapainia, dok pud tye ka medde ki tic macalo painia wa tin.

9, 10. (a) Pwonyo ada loko kit ma waneno kwede jami me kom nining? (b) Jami ango ma laminwa mo acel ojalo, dok man oweko en winyo nining?

⁹ Jami me kom. Wek wapwony ada, twero mitte ni wajal dog tic ma culle lamal nyo kare me tiyo cente madwong i lobo-ni. Me labolle, Petero ki Anderiya onongo gubedo lumak rec, ento i kare ma Yecu olwongogi me doko lulub kore, gin guweko biacaragi me mako  rec cutcut. (Matayo 4:18-20) Man pe te lokke ni ka ipwonyo ada ci omyero iwek dog ticci woko. Dano ducu myero guti wek gugwok jo me odigi. (1 Temceo 5:8) Ento ka ipwonyo ada, kit ma ineno kwede jami me kom lokke. Iniang gin ma pire tek loyo i kwo. Yecu owacci: “Pe wukan lonyo piwu kenwu i lobo.” Me ka meno, en ocuko cwinywa ni: “Wukan lonyo piwu kenwu i polo.” (Matayo 6:19, 20) Meno aye gin ma nyako mo ma nyinge Maria otimo.

¹⁰ Maria onongo maro tuko golf cakke i kare ma en pud anyaka matidi. I kare ma tye i cukul cinia, dirone i tuko man obedo ka omedde ameda. En odoko latuku makwiri adada mumiyo kimine mot me kwan nono i univaciti. Gin ma Maria onongo mito loyo i kwone aye me doko latuk golf mucwiny kun etiyo cente madwong. Lacen en ocako kwano Baibul. En omaro jami ma opwonyo dok ocako ketone i tic i kwone. En owaco ni, “Ma amedde ki loko tamma ki kwona i yo ma lubbe ki cik me Baibul, yomcwinya bene omedde.” Maria oniang ni bibedo tek mada me dongo watte ki Jehovah kun kitungcel bene eketo cwinye i tuko golf. (Matayo 6:24) Pi meno, en omoko tamme me jalo yubbe me doko latuk golf muywek pi gin maber loyo. I kare-ni, Maria tye lapainia dok owaco ni meno aye “kwo me yomcwiny, dok ma tye ki tyen lok maber loyo.”

11. Ka wapwonyo ada, ngo ma romo timme i kom wat i kinwa ki wadiwa nyo luremwa mukene?

¹¹ Wat i kinwa ki jo mukene. Ka wacako keto i tic jami ma wapwonyo ki i Baibul, watwa ki wadiwa kacel ki luremwa romo lokke woko. Yecu okonyowa me niang tyen lok mumiyo man timme i kare ma en olego pi lulub kore ni: “Lonygi i ada gibed maleng; lokki en ada.” (Jon 17:17) Ka kiwacci “lonygi” twero bene gonye ni “pokgi woko.” Ka wacako keto lok ada i tic i kwowa, wapokke woko ki jo me lobo-ni pien nongo walubo cik me Baibul. Kadi bed watute me gwoko wat maber i kinwa ki wadiwa ki luremwa, polgi pe gibimarowa kit macon nyo bene giromo dagowa pi niyewa manyen-ni. Man pe miniwa ur. Yecu owacci: “Lukwor pa dano bibedo jo ma i pacone.” (Matayo 10:36) Ento Yecu bene ocikke ni kadi bed wajal gin ango pi lok me ada, wabinongo mot makato ma wajalo-ni tyen mapol!​—Kwan Marako 10:28-30.

12. Gin ango ma awobi mo ma Lajudaya ojalo pi ada?

¹² Pi kwone ducu, awobi mo ma Lajudaya ma nyinge Aaron onongo tamo ni lwongo nying Lubanga obedo bal. Ento en onongo tye ki miti me ngeyo lok ada i kom Lubanga. Nino mo acel, Lacaden mo onyutte ni ka omedo nukuta ma  kelo dwan i kom nukuta angwen ma cung pi nying Lubanga i leb Ibru-ni, ci kitwero lwongone ni “Jehovah.” Ngeyo lok man oyomo cwiny Aaron adada mumiyo en oringo wa i kacokke pa Lujudaya ka titone bot lupwonye dinigi nyo rabbi! En otamo ni cwinygi bibedo yom me pwonyo lok ada i kom nying Lubanga, ento pe obedo kit meno. Me ka meno, gungulo laa i kome ci guryeme woko. Jo gang pa Aarongi bene gulokke i kome. Ento en pe oweko man ojuke ki pwonyo lok i kom Jehovah. Aaron odoko Lacaden pa Jehovah dok otiyo pi Jehovah ki gen pi kwone kulu. Wan bene omyero wange ni watwa ki jo mukene romo lokke woko teke wapwonyo ada.

13, 14. Omyero walok tamwa ki kit ma watimo kwede jami nining i nge pwonyo ada? Mi labol.

¹³ Tam ki tim macilo. Ka wapwonyo ada ci wacako kwo ma lubbe ki rwom me Baibul, omyero wabed atera me loko tamwa ki kit ma watimo kwede jami. Lakwena Petero ocoyo ni: “Macalo litino ma luwiny, pe wumi kwowu orwatte ki mitiwu ma yam kong wubedo kwede i kare ma onongo pud wukwiya piny ca.” Ci en omedo ni: “Wun bene wubed jo maleng i kitwu ducu.” (1 Petero 1:14, 15) I boma me Korint macon, jo mapol onongo gin lutim tarwang. Onongo mitte ni jo ma gibedo kunnu gutim alokaloka madongo i kwogi wek gudok leng i wang Jehovah. (1 Jo Korint 6:9-11) I kare-ni, jo mapol bene giloko kwogi ka gupwonyo lok ada. Petero otito man i kare ma en ocoyo ni: “Wuwek kare ma yam wubedo iye ka tiyo gin ma jo ma pe ngeyo Lubanga gimaro timo oromwu. Yam wulubo kit me tarwang, ki miti me kom, mero, karama me woro cam ki tuko marac, mat, ki woro jogi ma ic dagi.”​—1 Petero 4:3.

¹⁴ Devynn gin ki Jasmine gubedo lumero pi mwaki mapol. Kadi bed ni Devynn obedo accountant ma ladiro, ento en onongo pe twero gwoko dog tic mo keken pi lok me mero. Jasmine onongo ngene macalo ngat ma keco oyot dok ger bene. I nino mo acel ma en omer woko, orwatte ki lumiconari aryo i yo. Gupenye ka gitwero kwano Baibul kwede. Ento i nino ma gucito i ganggi i cabit ma lubo, gunongo Jasmine gin ki Devynn gumer woko. Onongo pe guye ni lumiconari magi gitwero paro pigi ma weko gibino wa i ganggi. I nino mukene ma lumiconari magi gudwogo, gunongo jami olokke woko. Jasmine gin ki Devynn gubedo ki miti me pwonyo lok ada me Baibul, dok cutcut gucako keto i tic jami ma gupwonyo. Ma peya dwe adek okato, onongo dong gujuko mato kongo woko, dok lacen gucoyo nyomgi. Dano mapol i carogi guneno kit ma Jasmine ki Devynn gulokke kwede, dok man oweko gin bene gucako kwano Baibul.

15. Alokaloka ango ma timone twero bedo tek adada i nge pwonyo lok ada, dok pingo?

¹⁵ Kwer ki tim mogo ma pe yomo cwiny Lubanga. Alokaloka mukene ma timone twero bedo tek adada aye juko nywako i kwer ki tim ma pe yomo cwiny Jehovah. Kadi wa i nge pwonyo kit ma Jehovah winyo kwede i kom kwer magi, jo mukene pud ginongo  tek adada me jukone. Giparo kit ma jo ganggi, lutic luwotgi, nyo luremgi biterogi kwede. Gingeyo ni dano pol kare pe gitero kwer magi tuko tuko, me labolle kwer ma kwako woro wadiwa ma guto. (Nwoyo Cik 14:1) Dong, ngo ma romo konyowa me timo alokaloka ma mitte? Watwero nongo pwony ki i lanen maber pa jo me kare me Baibul ma guloko kwogi i kare ma gupwonyo ada, me labolle Lukricitayo ma i Epeco.

16. Gin ango ma jo mogo me Epeco gujalo?

¹⁶ I boma macon me Epeco, timo tango onongo onya adada. Gin ango ma lutim tango magi gutimo i kare ma gudoko Lukricitayo? Baibul tittiwa ni: “Jo ma yam lujogi gukelo buk tyetgi guguro kacel guwangogi woko i nyim lwak ducu. Ka gikwano welgi ci ginongo romo lim ryal alip pyerabic kulu. Kit meno lok pa Rwot [Jehovah] odongo omedde ki twero madwong.” (Tic pa Lukwena 19:19, 20) Lukricitayo ma lugen magi gubedo atera me jalo bukkegi ma welgi tek, dok Jehovah ogoyo laane i komgi pi timo meno.

17. (a) Jami ango ma watwero jalone pi lok me ada? (b) Lapeny mene ma wabinongo lagamgi i pwony ma lubo man?

¹⁷ Gin ango ma in dong ijalo wek ipwony lok ada? Wan ducu wajalo cawawa. Jo mogo i kinwa gujalo jami ma onongo twero weko gidoko lulonyo. Dok wat i kinwa ki wadiwa nyo luremwa dong odoko bor. Pol pa wan dong waloko kitwa ki tamwa dok wakwero nywako i kwer ki tim mogo ma pe yomo cwiny Jehovah. Ento wamoko tamwa ni lok ada me Baibul pire tek loyo gin mo keken ma wajalo. Lok ada me Baibul weko twere piwa me bedo ki wat macok ki Jehovah, dok meno aye gin ma pire tek loyo i kwowa. Ka watamo i kom adwogi mabeco ma wanongo pi ada ma wapwonyo, tek adada me niang pingo ngat mo twero ‘cato’ ada woko. Meno twero timme nining? Dok watwero gwokke nining wek pe watim bal meno? Wabigamo lapeny magi i pwony ma lubo man.