1. Gin ango ma Jehovah ye ni watim?

JEHOVAH ye ni wayer kit kwo ma wamito. En pwonyowa kit me moko tam mabeco, dok ka wamoko tam ma yomo cwinye, en konyowa me cobo yub meno. (Jab. 119:173) Ka wamedde ki keto ryeko ma nonge i Lok pa Lubanga i tic, ci wabidoko ludiro i moko tam mabeco.​—Ibru 5:14.

2. Ariya ango ma watwero kemme kwede i nge moko tam?

² Ento kadi bed wamoko tam matir, pud romo bedo tek botwa me cobone. Nen kong labol mogo: Omego mo matidi omoko tamme me kwano Baibul wa i tyekone. En ocako maber pi cabit mogo ento lacen ojuko woko pi tyen lok mo. Lamego mo omoko tamme me doko painia marii ento obedo ka diro anyim nino ma ebicako kwede tic man. Luelda me kacokke moni gumoko tamgi me cako cito pi lim me kwat bot omege ki lumege me kacokke, ento i nge dwe mapol peya gucako timone. Labol magi patpat, ento gitye ki gin acel marom. Jo ma gumoko tam magi pe gucobo tamgi. Lukricitayo me cencwari me acel ma onongo gibedo i Korint bene guwok ki i ariya macal ki man. Kong wanyamu pwony ma watwero nongo ki botgi.

3. Tam ango ma kacokke me Korint gumoko, ento ngo mutimme?

³ I kine ka mwaka 55, Lukricitayo me Korint gumoko tam ma pire tek. Guniang ni omegigi ma gibedo i Jerucalem ki Judaya gitye ka kato ki i peko me can lim dok ni kacokke mukene gubedo ka jogo cente me konyogi. Pi kicagi ki yot cinggi, jo Korint gumoko tamgi me miyo mot pi konyo omegigi dok gupenyo lakwena Paulo kit ma gitwero miyo kwede kony. En omiyo tira bot kacokke man dok  ocimo Tito me konyo jogo motgi. (1 Kor. 16:1; 2 Kor. 8:6) Ento, i nge dwe mogo manok, Paulo oniang ni jo Korint pe gujogo mot ma onongo guwaco ni gimito miyone. Macalo adwogine, motgi onongo pe bibedo tye i kare ma kitye ka tero mot pa kacokke mukene i Jerucalem.​—2 Kor. 9:4, 5.

4. Kit ma kinyuto kwede i 2 Jo Korint 8:7, 10, 11, gin ango ma Paulo ocuko cwiny Lukricitayo me Korint me timone?

⁴ Lukricitayo me Korint gumoko tam maber, dok Paulo opwoyogi pi niyegi matek ki mitigi me bedo jo ma cinggi yot. Ento bene onongo mitte ni en ocuk cwinygi me cobo gin ma gucako. (Kwan 2 Jo Korint 8:7, 10, 11.) Gin mutimme i komgi pwonyowa ni kadi wa Lukricitayo ma lugen gitwero nongo tek me cobo tam mabeco ma gumoko.

5. Lapeny mene ma wabigamogi i pwony man?

⁵ Calo Lukricitayo me Korint, wan bene watwero nongo tek me cobo tam ma wamoko. Pingo? Pi roc ma watye kwede, watwero bedo ka diro nino me cako ticwa anyim. Nyo gin mo twero ngole atura ma weko pe watwero cobo tam ma onongo wamoko-ni. (Latit. 9:11; Rom. 7:18) Ngo ma myero watim ka mitte ni wangi tam mo ma wamoko i kare mukato wek wanen ka myero watim alokaloka iye? Dok ngo ma myero watim wek wanen ni wacobo gin ma wacako?

6. Awene ma twero mitte ni walok tam ma wamoko?

⁶ Tam mogo ma wamoko pigi tek adada ma pe twero lokke. Me labolle, wamoko matek i tamwa me tic pi Jehovah, dok wamoko tamwa matek me bedo lagen bot ngat ma wanyomme kwede. (Mat. 16:24; 19:6) Ento tam mukene twero mitte ni kilok woko. Pingo? Pien kwo pa dano lokke. Ngo ma romo konyowa me moko tam mabeco?

7. Ngo ma omyero waleg pire, dok pingo?

⁷ Leg pi ryeko. Jehovah oweko Yakobo ocoyo ni: “Ka ce tye ngat mo i kinwu ma ryekone nok, myero en oleg Lubanga ma miyo bot jo ducu ki yomcwiny.” (Yak. 1:5) I yo mo olo wan ducu ‘ryekowa nok.’ Pi meno, jenge i kom Jehovah ka itye ka moko tam ki ka itye ka ngiyo tam ma imoko con. Ci Jehovah bikonyi me yero gin maber.

8. Kwed ango ma myero watim ma peya wamoko tam?

⁸ Kwany kare me kwedo lok i yo matut. Kwan Lok pa Lubanga, kwan bukke ma dul pa Jehovah cwalo, dok ilok ki dano ma igenogi. (Car. 20:18) Kwedo lok ma kit meno pire tek ma nongo peya imoko tam calo me loko dog ticci, dak i kabedo mukene, nyo yero rwom me kwan ma biweko inongo cente me gwoki kun bene imedde ki tic pi Jehovah.

9. Adwogi maber ango ma wanongo ka watye ki tyen lok matir me moko tam?

⁹ Tem niang tyen lok mumiyo imoko tam meno. Jehovah paro pi tyen lok mumiyo watimo gin moni. (Car. 16:2) En mito ni wabed jo ma gene i jami ducu. Dong ka wamoko tam, myero wan bene wagenne kekenwa dok wabed lugen bot jo mukene ma lubbe ki cwiny ma watye kwede. Ka pe watye ki tyen lok matir, ci wabinongo ni tek me cobo tic ma wamoko tamwa me timone. Me labolle, omego mo matidi twero moko tamme me doko painia marii. Ento i nge kare mo en nongo ni cobo cawa ma mitte odoko tek adada dok pe etye ka nongo yomcwiny i ticce me  pwony. Twero bedo ni en onongo otamo ni tyen lok mumiyo ecako tic macalo painia aye ni pien emito yomo cwiny Jehovah. Ento mono pe twero bedo ni en odonyo i tic man pien mito yomo cwiny lunywalle nyo ngat mo mukene ma en maro?

10. Ngo ma mitte wek ngat moni otim alokaloka?

¹⁰ Tam kong i kom latin kwan me Baibul ma omoko tamme me juko mato taa. I acakkine, en oyelle matek ci pe omato taa pi cabit acel nyo aryo, ento lacen wany taa obwoye woko ci odok ka matone. Kadi bed kit meno, i agikkine, en oloyo miti meno! Marre pi Jehovah ki mitine me yomo cwinye okonye me juko mato taa.​—Kol. 1:10; 3:23.

11. Pingo omyero ibed ki yub moni kikome ma imito ni icobbi?

¹¹ Bed ki yub moni kikome ma imito ni icobbi. Ka itye ki yub moni kikome ma imito cobo, ci bibedo yot boti me cobo gin ma icako. Me labolle, twero bedo ni imoko tammi me cako kwano Baibul kare ki kare. Ento ka pe itye ki yub me kwan ma ilubu, ci pe ibitwero cobone. * Nyo luelda me kacokke mo gitwero moko tamgi me cito i lim me kwat kare ki kare, ento i nge kare malac, nongo peya guketo i tic tam ma gumoko-ni. Me cobo tic man maber, gitwero penyo lapeny calo magi: “Tika wacoyo piny nying omege ki lumege ma gimito kony tutwal? Tika dong wamoko nino ma myero walimgi iye?”

12. Gin ango ma twero mitte ni watim, dok pingo?

¹² Bed ki neno matir. Pe tye ngat mo i kinwa ma tye ki cawa, cente, nyo kero me timo jami ducu ma en mito. Pi meno bed ki neno matir. Ka mitte, itwero loko tam ma onongo imoko ka pe dong iromo cobone. (Latit. 3:6) Ento, go kong ni ingiyo tam ma onongo imoko, itimo alokaloka ma mitte, dok iwinyo ni dong itwero cobone maber. Jami abic magi twero konyi me cobo tic ma icako.

13. Itwero nongo teko ma mitte me cobo tam ma imoko nining?

¹³ Leg pi teko me cobo ticci. Lubanga twero mini “teko me tic” wek icob tam ma imoko. (Pil. 2:13) Pi meno, leg Jehovah pi cwiny mere maleng wek omini teko ma imito. Medde ki lega kadi bed iwinyo ni legani pe kitye ka gamone. Kit ma Yecu owaco kwede: “Wulegi, ci gibimiyo botwu [cwiny maleng].”​—Luka 11:9, 13.

14. Cik ma iye lac ma tye i Carolok 21:5 twero konyi nining me cobo tam ma imoko?

¹⁴ Go pulan. (Kwan Carolok 21:5.) Me tyeko tic mo keken ma icako, mitte ni igo pulan. I nge meno myero ilub pulan ma igoyo. I yo acel-lu, ka imoko tammi me timo gin moni, co piny jami ducu ma myero itim wek icob ticce maber. Ka itye ki tic mo matek me atiya, pok i tic meno matino tino wek timone obed yot. Kare ki kare ka ityeko tic acel i kin magi, ibineno maber ngo ma dong icobo ki ngo mudong. Paulo ocuko cwiny Lukricitayo ma i Korint me gwoko motgi i “nino mukwongo i cabit acel acel” me ka jogo mot meno lawang acel ka en oo. (1 Kor. 16:2) Poko i tic mo matek wek timone obed yot bikonyi weko pe inyoyo komi woko.

15. I nge goyo pulan, ngo ma itwero timo?

¹⁵ Ka icoyo piny jami ducu ma imito timone, ci cobone bibedo yot. (1 Kor.  14:40) Me labolle, kimiyo tira ki luelda ni omyero gucim laelda acel ma ticce tye me coyo piny tam ducu ma luelda gumoko, ngat ma luelda gucimo me cobo tam meno, ki nino dwe ma en myero otyek kwede tic meno. Luelda ma gilubo tira man pol kare bedo yot botgi me cobo tam ma gumoko. (1 Kor. 9:26) Itwero timo gin ma rom i kwoni me nino ducu. Me labolle, itwero coyo piny jami ma imito timo nino ki nino kun icako ki coyo gin mukwongo ma myero itim. Man twero konyi pe me cobo gin ma icako keken ento bene me cobo tic madwong i cawa manok.

16. Gin ango ma myero itim wek icob tam ma imoko maber, dok Jo Roma 12:11 cwako man nining?

¹⁶ Tute matek. Mito tute matek me lubo pulan ma igoyo wek icob gin ma icako. (Kwan Jo Roma 12:11.) Paulo owaco ki Temceo ni ‘omi karene’ dok ‘omak matek’ yubbe wek obed lapwony mucwiny. Tam pa lakwena Paulo meno bene tiyo maber pi gin mo keken ma wamito timo pi Jehovah.​—1 Tem. 4:13, 16.

17. Jo Epeco 5:15, 16 twero konyowa nining me cobo tam ma wamoko?

¹⁷ Ti maber ki cawani. (Kwan Jo Epeco 5:15, 16.) Yer kare ma imito ni icob kwede tammi dok imok matek iye. Pe ikur ni kare kong obed maber wek icak ticci; pien kare maber pe oromo bino. (Latit. 11:4) Gwokke wek jami ma pigi pe tek pe obal cawani dok otyek kero ma iromo tic kwede me cobo jami ma pigi tego. (Pil. 1:10) Ka twere, yer cawa ma nongo jo mukene pe gibibedo ka yelli. Wek gunge ni imito cawa me keto cwinyi i kom gin ma itye ka timo. Itwero neko cimmi woko nyo iroto e-mail nyo ka nywako lok i Intanet lacen. *

18-19. Ngo ma romo konyi pe me ilo cingi woko ki i cobo tam mabeco ma imoko kadi bed irwatte ki ariya?

¹⁸ Ket cwinyi i kom adwogi maber ma ibinongo. Adwogi me tam ma imoko tye calo kabedo ma itye ka wot iye. Ka imito o i kabedo meno, ibimedde ki wotti kadi bed inongo ni kigengo yo woko ci mitte ni iyeny yo mukene. I yo acel-lu, ka waketo cwinywa i kom adwogi maber ma wabinongo ci pe wabiilo cingwa woko ka warwatte ki ariya mo.​—Gal. 6:9.

¹⁹ Moko tam mabeco pe yot, dok cobone bene twero bedo tek. Ento ki kony pa Jehovah, itwero nongo ryeko ki teko ma mitte me cobo gin ma icako.