OMEGE ki lumege mapol ma onongo yam gukobo i lobe ma woko pi tiyo cente dong gudok cen i lobo me anywaligi. Mar pi Jehovah ki dano luwotgi otugo cwinygi me dak i kabedo ma can lutit kwena me Ker-ri tye iye. (Mat. 22:37-39) Jami ango ma gujalo, dok mot ango ma gunongo? Me gamo lapeny magi, kong wanenu gin ma tye ka timme i lobo Cameroon, ma tye tung kupoto ceng me Afrika.

I mwaka 1998, omego mo ma nyinge Onésime okobo ki i pacone i lobo Cameroon. Pi mwaki 14, en obedo i lobo ma woko. I nino mo acel i cokke, en owinyo lapor ma kubbe ki tito kwena. Lami pwony otito ni, “Ka jo aryo gitye ka mako rec i kabedo mapatpat dok ngat acel tye ka mako rec mapol loyo lawote, tika ngat ma tye ka mako rec manok-ki pe bikobo ka ma rec tye madwong iye-ni?”

Lapor meno oweko Onésime otamo pi dok cen i Cameroon, ka ma dano mapol gitye ki miti me kwano Baibul. Ento en bene obedo ki par. Tika en onongo bingi ki kwo i lobo Cameroon doki pien onongo dong okwo i lobo ma woko pi mwaki mapol? Me niang ka meno twere, en ocito olimo Cameroon pi dwe abicel. Ci i mwaka 2012, en odok cen ka kwo kunnu.

Onésime otito ni: “Onongo mitte ni apwonnye doki me kwo ka ma piny lyet iye dok alok kit me kwona bene. Ka atye i Ot me Ker, onongo mitte ni angi ki bedo i wi fom matek doki.” Ento en owaco ma tye ka bwunyo ni, “I kare ma abedo ka keto cwinya i cokke, miti me bedo i kom mabeco owoto ki rweny woko ki i cwinya.”

I mwaka 2013, Onésime onyomo Géraldine, ma onongo odok cen i lobo Cameroon i nge kwo i lobo France pi mwaki abongwen. Mot ango ma luot man gunongo pien guketo pi miti pa Jehovah obedo mukwongo i kwogi? Onésime owaco ni: “Macalo jo munyomme, wacito kacel i Cukul pi Lutit Kwena me Ker-ri dok watiyo i Betel bene. I mwaka mukato-ni, lutino kwan me Baibul ma romo 20 i kacokkewa gunongo batija. Kombeddi dong awinyo calo atye i kabedo mupore pi ‘mako rec.’” (Mar. 1:17, 18) Géraldine omedde ni: “Anongo mot mapol makato kit ma onongo abyeko kwede.”

Judith odak i lobo Amerika ento onongo tye ki miti madit me medo ticce me pwony. En otito ni, “Kare ducu ka alimo wadina ma i lobo Cameroon, onongo akok ki pig wanga ka atye ka a ki kunnu pien nongo dong atye ka weko jo mapol ma acako kwano Baibul  kwedgi.” Ento Judith obedo ki lworo me dok cen i lobo Cameroon pien onongo tye ki tic ma culle lamal ma onongo konye culo pi yat ki kony me ot yat pa wonne i Cameroon. Kadi bed kit meno, Judith oketo genne i kom Jehovah, ci odok cen i Cameroon. En ye ni gire eparo kwo mayot ma onongo etye kwede i lobo Amerika. En olego bot Jehovah wek okonye me loko kwone dok laneno me adwol mo gin ki dakone gucuko cwinye.

Ka Judith otamo i kom kare ma en odok cen i lobo Cameroon en otito ni, “I kine ka mwaki adek keken abedo ki yomcwiny me konyo dano angwen me nongo batija.” Judith ocako tic macalo painia keken. I kare-ni en kacel ki cware, Sam-Castel, gitiyo tic me limo adwol. Ento ngo mutimme i kom won Judith? Judith ki jo ganggi gunongo ot yat i lobo ma woko ma twero culo pi ayango pa wonne. Ki yomcwiny madit, ayango man owoto maber.

Omego mo ma nyinge Victor odak i lobo Canada. I nge kwano pwony mo i Wi Lubele ma loko i kom kwan i rwom ma lamal, en otamo i kom rwom me kwanne. En oloko tamme pe dong me medde ki kwan i univaciti ento ocito ka kwano tic cing. En owaco ni, “Man okonya me nongo tic oyot ki me timo gin ma onongo abedo ka mito timone pi kare malac​—tic macalo painia.” Lacen, Victor onyomo Caroline, dok gucito kacel ka limo Cameroon. Ki kunnu i kare ma gulimo jang gang kal, kicuko cwinygi me tamo i kom tic i Cameroon. Victor owaco ni: “Pe wabedo ki tyen lok mo me kwero tam meno, dok kit macalo onongo watye ka kwo kwo ma rwomme lapiny, wajolo lwongo man.” Kadi bed Caroline onongo tye ki peko me yotkom, gin gumoko tamgi me kobo.

Victor ki Caroline gucako tic macalo painia marii wek gikony dano mapol ma gitye ki miti me pwonyo lok me Baibul. I acakkine, gubedo ka tic ki cente ma gugwoko ci onongo pe mitte ni gubed ki dog tic. I nge meno, onongo gidok ka tic i Canada pi dwe manok ci cente ma gigwoko konyogi pi tic macalo painia i lobo Cameroon. Mot ango ma gunongo? Gucito i Cukul pi Lutit Kwena me Ker-ri, gutiyo macalo painia keken, dok kombeddi gitye ka tiyo tic me gedo. Victor owaco ni, “Pienni waweko kwo mayot, onongo mitte ni wajenge i kom Jehovah, dok en ogwokowa.”

I mwaka 2002, omego Alain, ma onongo tye ka kwan i univaciti i lobo Germany, okwano trak ma wiye tye ni Youths​—What Will You Do With Your Life? Ngec ma i trak man otugo cwinye me cako keto yub manyen i kwone. I mwaka 2006, en ocito i Cukul pi Luelda ki Lukony Kor Tic ci kicime me cito ka tic i lobo me anywaline, Cameroon.

Ki i Cameroon, Alain onongo dog tic ma pe mitte ni obed iye nino ducu. Lacen, en onongo tic ma culle ber, ento obedo ki par ni pe biweke kare muromo pi tito kwena ki pwony. Pi meno, i kare ma kicime me tic macalo painia keken, en oye labongo galle. Ladit ticce omedo mucarane ento en okwero woko ci odoko painia keken. Lacen, Alain onyomo lamego ma nyinge Stéphanie, ma onongo obedo i lobo France pi mwaki mapol. Pekki ango ma Stéphanie okato ki iye i nge kobo i Cameroon?

Stéphanie owaco ni: “Acako bedo ki pekki mogo matitino ma kubbe ki yotkoma, ento  abedo ka nongo yat kare ki kare ci ocang woko.” Luot man gunongo mot pi diyo cwiny ma gunyuto. Alain otito ni: “I kare ma wacito i caro mo ma kilwongo ni Katé ka tito kwena, wanongo jo mapol ma gimito kwano Baibul. Lacen, wabedo ki kare me kwan kwedgi kun watiyo ki cim. Jo aryo ki i kingi gunongo batija, dok kicako gurup manyen kunnu.” Stéphanie omedde ni: “Pe tye yomcwiny mo madit kato me konyo dano wek odyer kwone bot Jehovah. Pi bedowa kany, oweko wanongo yomcwiny ma kit meno tyen mapol.” I kare-ni, Alain ki Stéphanie gitiyo tic me limo adwol.

Laminwa Gisèle onongo batija i kare ma tye ka kwan me doko daktar i lobo Italy. Kwo ma rwomme lapiny pa luot ma gukwano Baibul kwede, ogudo cwinye adada dok oweko en obedo ki miti me medo ticce me pwony. Pi meno, Gisèle ocako tic macalo painia marii i kare ma en pud tye ka kwan.

Gisèle onongo tye ki miti me dok cen i lobo Cameroon wek emed ticce pi Jehovah, ento en obedo ki par. En owaco ni, “Onongo mitte ni ajal twerona me bedo i lobo Italy dok apokke woko ki jo gangwa kacel ki lurema, ma gibedo i lobo Italy.” Kadi bed kit meno, i Mai 2016, Gisèle okobo i Cameroon. Lacen, en onyomme ki Léonce, dok jang gang kal me Cameroon omiyogi tam ni gukob i taun ma kilwongo ni Ayos, ma tye ki can lutit kwena.

Kwo i Ayos obedo nining? Gisèle otito ni: “Pol kare mac elektwic onongo bedo pe pi cabit mapol, dok nongo pe watwero cajing cim cingwa. Pol kare onongo pe waromo tic ki cimwa. Apwonyo kit me tedo ki yen, dok onongo wacito ki gadigadi kacel ki toc ka twomo pii i dyewor i cawa ma nongo dano nok i kulu.” Ngo ma okonyo Gisèle gin ki cware me kanyo pekki magi? Gisèle owaco ni: “Cwiny pa Jehovah aye okonyowa me cirone. Wan ki cwara bene onongo wakonye i kinwa. Dok wadi ki lurem bene kare mogo gubedo ka konyowa ki cente.”

Tika Gisèle cwinye yom pien odok cen i lobo me anywaline? En owaco ni, “Eyo! Labongo akalakala mo. I acakkine wabedo ki ariya mogo kacel ki turcwiny, ento i kare ma waloyo ariya meno, an ki cwara watimo gin ma onongo wamito timone kikome. Wageno Jehovah dok wawinyo ni watye cok kwede.” Léonce ki Gisèle gucito i Cukul pi Lutit Kwena me Ker-ri, dok i kare-ni gitye ka tic macalo painia keken pi kare mo.

Calo lumak rec ma ginyuto tekcwiny kadi bed ariya tye wek gimak rec mapol, jo ma gidok cen i lobo me anywaligi bene gijalle me konyo jo ma cwinygi atir ma gijolo kwena me Ker-ri. Labongo akalakala mo, Jehovah wiye pe biwil pi tic matek ki mar ma lutit kwena magi gunyuto pi nyinge. (Nek. 5:19; Ibru 6:10) Ka itye ka kwo i lobo ma woko kun i lobo me anywalini can lutit kwena tye iye, tika itwero dok cen? Ka itimo kit meno, Jehovah bimini mot madit.​—Car. 10:22.