Kinywala i mwaka 1983. I mwaki mukwongo me kwona, onongo abedo latin ma kome yot, ento i kare ma ao mwaka apar, acako winyo arem malit i koma weng. Lacen i nge mwaka aryo, aco kudiko nino mo acel ci anongo ni dong pe atwero wot. Kadi bed atute matek me ilo tyena, kero mo onongo dong pe i tyena. Cakke i nino meno, dong pe amedo ki wot matwal. Twona-ni bene oweko pe adongo. Nio wa i kare-ni, pud acek calo latin.

Dwe mogo manok i nge two maka ma dong pe atwero cito ka mo, Lucaden pa Jehovah aryo gubino gangwa. Pol kare ka welle obino, onongo atemo kanne woko, ento i nino meno aweko mon-ni guloko kweda. I cawa ma guloko i kom Paradic, wiya opo i kom jami ma awinyo ma onongo pud atye ki mwaka abic. I kare meno, lamiconari mo ma nyinge Jethro, ma onongo bedo i lobo Suriname, onongo limo carowa kicel dwe ki dwe dok kwano Baibul ki babana. Jethro onongo tera maber adada. Onongo amare matek. Medo i kom meno, kwara ki dadana onongo gitera i cokke mogo pa Lucaden pa Jehovah, ma bedo i carowa. Dong i kare ma Florence, lamego acel i kin aryo ma gubino ka tito kwena botwa-ni openyo ka amito nongo ngec mukene, aye cutcut.

Florence odwogo gin ki cware, Justus, dok gucako kwano Baibul kweda. I kare ma guneno ni pe angeyo kwan, gupwonya kit me kwan. I nge kare mo, onongo dong atwero kwan pira kena. I nino mo acel, luot-ti gutitta ni kicwalogi ka tito kwena i lobo Suriname. Ki cwercwiny madit, onongo pe tye ngat mo ma odong i Orealla ma twero medde ki kwano Baibul kweda. Ento cwinya obedo yom ni, Jehovah wiye pe owil i koma.

Ma pe otero kare, lapainia mo ma nyinge Floyd obino i Orealla, dok orwatte kweda i kare ma en tye ka tito kwena i ot ki ot. I kare ma en oloko kweda i kom kwano Baibul, acako bwunyo. En openya ni, “Pingo itye ka bwunyo?” Awacce ni dong atyeko kwano brocuwa me Ngo ma Lubanga Mito ki Botwa? woko dok onongo acako kwano buk me Ngec Ma Terowa i Kwo ma Pe Tum. * Atitte pingo kwanna ogik. Floyd okwano kweda buk me Ngec wa i tyekone, ento en dok bene kicwale ka mukene. Dok adong labongo ngat mo ma myero okwan Baibul kweda.

 I mwaka 2004, Granville ki Joshua, omege aryo ma gitye painia keken, kicwalogi i Orealla. Gubedo ka tito kwena i ot ki ot, ci gunonga. I kare ma gupenya ka amito kwan, acako bwunyo. Apenyogi ni gukwan kweda buk me Ngec nia ki i acakkine. Onongo amito neno ka gibipwonya jami marom ki ma lupwonyena macon gupwonya kwede. Granville otitta ni gitye ki cokke i carowa. Kadi bed onongo dong pe aa ki gang pi cokcok mwaki apar, abedo ki miti me cito i cokke. Pi meno Granville obino wa gang ka gama, oketa i lela pa lungolo ci ocora me cito wa i Ot me Ker.

I nge kare mo, Granville ocuko cwinya me donyo i Cukul me Tiokraci. En owacca ni: “In langolo, ento itwero lok. Nino mo acel, ibimiyo pwony pi lwak. Man bitimme ada.” Lokke-ni omiyo abedo ki gen i koma kekena.

Acako nywako i tito kwena kacel ki omego Granville. Ento, pol pa yo ma i carowa onongo rac adada ma lela pa lungolo pe twero ngwec iye maber. Man oweko apenyo Granville me bedo ka lora ki wilba. Yub meno otiyo maber adada. I April mwaka 2005, anongo batija. I nge meno cutcut, omege gupwonya kit me tic i kom bukke me kacokke ki tic i kom jami lakub dwan i Ot me Ker.

Ki cwercwiny madit, i mwaka 2007 babana opoto ki i yeya i dye nam ci oto woko. Lupacowa ducu gubedo ka kumu matek. Granville olego kwedwa dok onywako kwedwa ginacoya mapatpat ma ocuko cwinywa. I nge mwaka aryo, dok wakumo matek pi to mukene​—Granville olwiny i nam ki yeyane i dyewor.

Kacokkewa matidi-ni odong ki lakony kor tic acel ento labongo laelda mo. To pa Granville ocwero cwinya adada; en onongo obedo larem me ada bota. En onongo kare ducu konya me nyikke cok ki Jehovah dok miya jami mukene ma mitte pi kwo bene. I cokke mukwongo ma wabedo kwede i nge tone, onongo atye ki tic me kwano paragraf ma i Wi Lubele. Akwano paragraf aryo mukwongo maber, ento i nge meno acako koko dok pig wanga obedo ka mol amola. Aa woko ki i wi abam.

Acako winyo maber ber i kare ma omege ma gua ki i kacokke mukene gubino ka konyowa i Orealla. Medo i kom meno, jang gang kal ocwalo omego Kojo, ma tye painia keken. Cwinya obedo yom adada i kare ma mamana ki omera matidi gucako kwano Baibul ci gunongo batija. Ci, i Marci 2015, kicima macalo lakony kor tic. I nge kare mo, amiyo pwonya mukwongo pi lwak. I nino meno, abedo ka bwunyo kun bene akok i kare ma atamo i kom gin ma omego Granville owacca mwaki mogo angec, ni: “Nino mo acel, ibimiyo pwony pi lwak. Man bitimme ada.”

Ki i purogram me JW Broadcasting^®, aniang ni Lucaden luwota mogo bene gitye ki goro macal ki mega-ni. Ento kadi bed gitye ki goro, gitye ka cobo jami mapol dok cwinygi yom. An bene pud atwero timo jami mogo. Abedo ki miti me tic pi Jehovah ki kerona ducu. Meno aye tyen lok mumiyo acako tic macalo painia marii. Dok anongo kwena mo ma onongo pe abyeko i Sektemba mwaka 2019! I dwe meno, aniang ni kicima me tic macalo laelda i kacokkewa ma tye ki lutit kwena 40.

Atye ki pwoc madit pi omege ki lumege ma gukwano kweda dok gukonya me cobo ticca me pwony. Ma dong pire tek loyo, atye ki pwoc madit ni Jehovah wiye pe owil i koma.