1. Tyen lokke ngo me bedo ma igwokke? (2 Temceo 4:5)

 KA GIN mo otimme ma ocwero cwinywa, man twero temo genwa i kom Jehovah kacel ki dulle. Ento watwero loyo pekki ma kit magi nining? Omyero wabed ma wagwokke dok wabed ma wangwa twolo, kun wacung matek liking i kom niyewa. (Kwan 2 Temceo 4:5.) Wabedo ma wagwokke ki bedo ma wiwa opye mot, ma watamo tam ma atir, kun waneno jami kit ma Jehovah neno kwede. Ka watimo meno, ci cwercwinywa pe bigudo kit ma watamo kwede.

2. Gin ango ma wabinyamo i pwony man?

² I pwony ma okato-ni, wanyamo pekki adek ma watwero kato ki iye ma a ki woko ento pe ki i kacokke. I pwony man, wabinyamo pekki adek mapatpat ma twero bino ki i kacokke ma twero temo genwa i kom Jehovah. Gin aye, (1) ka wawinyo calo Lakricitayo lawotwa mo oterowa marac, (2) ka kiminiwa tira, ki dong (3) ka wanongo ni tek me jolo alokaloka mogo i dul pa Jehovah. Watwero bedo ma wagwokke nining kun wamedde ki bedo lugen bot Jehovah kacel ki dulle ka wakemme ki pekki ma kit magi?

3. Watwero dok iye nining ka wawinyo calo Lakricitayo lawotwa mo oterowa marac?

³ Tika dong iwinyo calo Lakricitayo lawoti mo oteri marac, ma man twero bene bedo ngat mo ma tye ki mot me tic i kacokke, calo laelda? Ka tye kit meno, ci nen calo omego-ni onongo pe tye ki tam marac me cwero cwinyi. (Rom. 3:23; Yak. 3:2) Kadi bed kit meno, gin ma en otimo-ni ocwero cwinyi. Twero bedo ni pe inino i dyewor pien ibedo ka tam i kom lok meno. Oromo bedo ni ipennye  keken ni, ‘Ka omego kulu twero timme kit man, ci tika ada man obedo dul pa Lubanga?’ Meno aye kit ma Catan mito ni watam kwede kikome. (2 Kor. 2:11) Ka watamo kit meno, ci watwero juko tic pi Jehovah dok waa woko ki i dulle. Dong, ka wawinyo ni omego nyo lamego mo oterowa marac, watwero bedo ma wagwokke nining kun pe wabedo ka tam kit ma Catan mito ni watam kwede?

4. Yucepu omedde ki bedo ma gwokke nining i kare ma kitere marac, dok pwony ago ma wanongo ki i lanenne? (Acakki 50:19-21)

⁴ Pe imak akemo i cwinyi. I kare ma Yucepu tye mwaka apar ki wiye, omegine madongo gutere marac. Gin onongo gidage, dok mogo onongo gimito wa neke woko. (Acak. 37:4, 18-22) Lacen gucate woko i opii. Macalo adwogine, Yucepu okato ki i pekki mapol pi mwaki ma romo 13 kulu. Yucepu onongo twero cako tamo ni Jehovah pe mare. Dok en onongo twero tamo ni Jehovah oweke woko i kare ma emito kony. Ento Yucepu pe omako akemo i cwiny. Me ka meno, en obedo ma gwokke kun bedo ma cwinye opye mot. Ma kare owec bote me culo wang gin marac i kom omegine, en pe otimo meno ento onyutigi mar dok otimigi kica. (Acak. 45:4, 5) Yucepu odok iye kit meno pien en onongo tye ki neno ma atir. Me kaka keto cwinye i kom pekkine, en obedo ka tam i kom gin ma Jehovah mito. (Kwan Acakki 50:19-21.) Pwony ango ma wanongo? Ka kiteri marac, pe imak akemo i kom Jehovah nyo ibed ka tamo ni en oweki woko. Me ka meno, bed ka lwodo kit ma en tye ka konyi kwede me kanyo peko meno. Medo i kom meno, ka kiteri marac wi myero opo ni “mar umo lwak bal mapol.”—1 Pet. 4:8.

5. Omego Mark obedo ma gwokke nining i kare ma en owinyo calo kitere marac?

⁵ Tam i kom labol pa laelda mo ma a ki i Amerika ma Tung Kupiny ma nyinge Mark. b Wiye pud po i kom kare ma en onongo winyo calo omege ma gitye ki mot me tic i dul pa Jehovah gutere marac. En owaco ni: “Ma naka kinywala onongo pud pe akato ki i par ma kit man. Lworo omaka matek. Onongo pe aromo nino i dyewor, dok abedo ka kok pien awinyo ni gin mo ma atwero timo pe.” Kadi bed kit meno, Mark omedde ki bedo ma gwokke dok otute pe me mako akemo i cwinye. En olego teretere, kun penyo Jehovah ni omine cwiny maleng ki teko me kanyo. En bene otimo kwed i bukkewa i kom pwony ma twero konye. Pwony ango ma wanongo? Ka iwinyo ni omego nyo lamego mo oteri marac, bed ma komi opye mot dok itute me juko tam mo marac ma gwok nyo itye kwede. Twero bedo ni pe ingeyo jami ducu mutimme ma oweko ngat meno oloko nyo otimo gin ma kit meno. Pi man, leg bot Jehovah, dok ipennye ni okonyi me neno gin mutimme-ni kit ma ngat meno neno kwede. Timo man bikonyi me tam ni omego nyo lamego-ni onongo pe ki cwiny me timo gin marac i komi dok bikonyi me timme kica. (Car. 19:11) Wi opo ni Jehovah ngeyo gin ma tye ka timme dok en bimini kero ma imito me kanyone.—2 Tekwaro 16:9; Latit. 5:8.

6. Pingo pire tek ni wanen tira pa Jehovah calo lanyut me mar? (Jo Ibru 12:5, 6, 11)

⁶ Ka Jehovah ominiwa tira, man twero cwero cwinywa adada. Ento ka wabedo  ka tam i kom arem cwinywa keken, ci watwero cako tam ni tira meno pe tye atir dok pe opore piwa, nyo ni kimiyo i yo me gero tutwal. Man twero gengowa ki niang gin mo ma pire tek adada, ma en aye ni, Jehovah tye ka miniwa tira pien marowa. (Kwan Jo Ibru 12:5, 6, 11.) Dok ka waye ni tam marac odorwa, ci wamiyo kare ki Catan me dorowa. En mito ni wakwer tira, dok makato ducu, en mito ni motmot wajuk tic pi Jehovah dok waa woko ki i kacokke. Ka kimini tira, itwero bedo ma igwokke nining?

7. (a) Kit ma kinyuto kwede i cal-li, Jehovah otiyo ki Petero nining i kare ma en ojolo tira? (b) Gin ango ma ipwonyo ki i lanen pa Petero?

⁷ Jol tira, dok itim alokaloka ma mitte. Tyen makato acel, Yecu omiyo ki Petero tira i nyim lukwena mukene-ni. (Mar. 8:33; Luka 22:31-34) Man nen calo oweko lewic omako Petero mada! Kadi bed kit meno, Petero omedde ki bedo lagen bot Yecu. En ojolo tira dok onongo pwony ki i bal ma otimo. Macalo adwogine, Jehovah omiyo mot ki Petero pi bedo lagen dok omiye tic ma pire tek i kacokke. (Jon 21:15-17; Tic 10:24-33; 1 Pet. 1:1) Gin ango ma wapwonyo ki i lanen pa Petero? Wanongo adwogi maber dok wakonyo jo mukene bene ka pe waketo cwinywa i kom lewic ma omakowa ento wajolo tira man, dok watimo alokaloka ma mitte. Ka watimo meno, wabibedo jo ma konygi tye bot Jehovah ki utmegiwa.

8-9. I nge nongo tira, Bernardo kong owinyo nining, ento gin ango ma okonye me loko tamme?

⁸ Nen kong gin mutimme i kom omego mo ma nyinge Bernardo, ma bedo i lobo Mozambique. Kikwanye woko ki i tic macalo laelda. I acakkine Bernardo owinyo nining? En owaco ni, “Akemo omaka pien pe amaro tira ma anongo-ni.” En obedo ka paro kit ma jo mukene me kacokke gibinene kwede. En oye ni, “Otera dwe mapol me bedo ki neno mupore i kom tira meno, ki me geno Jehovah kacel ki dulle odoco.” Ngo ma okonyo Bernardo me loko nenone?

⁹ Bernardo oloko tamme. En otito ni: “I kare ma atiyo macalo laelda, onongo atiyo ki Jo Ibru 12:7 me konyo jo mukene me bedo ki neno mupore i kom tira pa Jehovah.  Man apennye kekena ni, ‘Anga ma myero dong oket ginacoya man i tic?’ Lutic pa Jehovah ducu—kadi wa an.” I nge meno, Bernardo otimo alokaloka mukene me dongo genne i kom Jehovah kacel ki dulle. Omedo cawa ma tero me kwano Baibul ki lwodo jami ma en okwano. Kadi bed en onongo pud paro pi kit ma omegine ki lumegine ginene kwede, en obedo ka tic kacel kwedgi i tic me pwony kun bene miyo lagam i cokke. I nge kare mo, kicimo Bernardo me tic macalo laelda odoco. Ka in bene inongo tira calo Bernardo, pe iket cwinyi tutwal i kom kit ma lewic omaki kwede, ento jol tira dok itim alokaloka ma mitte. c (Car. 8:33; 22:4) Ka itimo meno, ci itwero bed ki gen ni Jehovah bigoyo laane i komi pi bedo lagen bote kacel ki dulle.

10. Alokaloka ango ma otimme i dul pa Jehovah ma nen calo otemo genne pa co mogo me Icrael?

¹⁰ Alokaloka ma timme i dul pa Jehovah twero temo genewa. Ka pe wagwokke, gitwero pokowa woko ki bot Jehovah. Me labolle, nen kong kit ma alokaloka mo mutimme i te Cik pa Moses ogudo kwede Luicrael mogo. Ma Jehovah peya omiyo Cik bot Luicrael, luwi odi aye onongo gitimo tic pa lulamdog. Onongo gicano keno tyer dok gityero gitum awanga pi jo me odigi. (Acak. 8:20, 21; 12:7; 26:25; 35:1, 6, 7; Yubu 1:5) Ento i kare ma kiminigi Cik, onongo dong pe kiye ni luwi odi guti tic magi. Jehovah ocimo lulamdog ma gia ki i doggola pa Aron me wango gityer. I kare ma kiketo alokaloka meno i tic, ka lawi ot ma pe obedo lakwar Aron ocako tiyo tic pa lalamdog, onongo kitwero neke woko. d (Levi 17:3-6, 8, 9) Tika oromo bedo ni alokaloka man tye i kin tyen lok ma oweko Kora, Datan, Abiram, ki lutel wi lwak 250 gujemo i kom twero pa Moses ki Aron? (Wel 16:1-3) Pe watwero mokone. Ento wangeyo ni Kora ki lujemo luwote pe gubedo lugen bot Jehovah. Ka alokaloka mo i dul pa Jehovah otemo genneni, ngo ma itwero timone?  

11. Ngo ma watwero pwonyo ki i lanen pa Lulevi mogo ma gua ki i doggola pa jo Kokat?

¹¹ Cwak alokaloka ma i dul pa Jehovah. I kare me wotgi i tim, doggola pa jo Kokat onongo gitye ki tic ma pire tek adada. Kare ducu ka Luicrael gutongo gony ka mo, likwayo pa Kokat mogo onongo gitingo canduk me gicikke kun gitelo yo. (Wel 3:29, 31; 10:33; Yoc. 3:2-4) Man pud dong obedo mot madit ya! Ento jami olokke woko pigi i kare ma Luicrael gudonyo i Lobo ma Kiciko Pire. Onongo dong pe mitte ni canduk me gicikke kibed ka kobone kare ducu. Pi meno, i kare ma Solomon tye ka loc macalo kabaka, jo mogo ma i doggola pa Kokat onongo dong kiminigi tic macalo luwer, lugwok doggola, ki dong tic me gwoko odi me kano lim. (1 Tekwaro 6:31-33; 26:1, 24) Pe tye rekod mo ma nyuto ni jo me doggola pa Kokat gubedo ka nguru, nyo mito rwom madit pien ni yam gubedo ki tic ma pire tek. Pwony ango ma wanongo? Mi  cwak ki cwinyi ducu pi alokaloka mo keken ma dul pa Jehovah otimo, kadi wa alokaloka ma gudo ticci. Nong yomcwiny i tic mo keken ma kimini. Dok wi opo ni pe tic ma itimo aye moko ka ce piri tek bot Jehovah. Ento Jehovah neno bedo lawiny bote calo gin ma pire tek loyo tic mo keken.—1 Cam. 15:22.

12. Zaina owinyo nining i kare ma kiloko ticce ki i Betel ci kicwale ka tic macalo painia keken?

¹² Nen kong labol pa Zaina, laminwa mo ma bedo i lobo pa Luarab, ma orwenyo mot me tic ma en maro adada. Kicwale ka tic macalo painia keken i nge tic i Betel pi mwaki makato 23 kulu. En owaco ni: “Alokaloka man obedo me ur adada bota. Awinyo calo konya pe, dok abedo ka pennye kekena ni, ‘Gin ango ma atimo marac?’” Ki cwercwiny, omege ki lumege mogo ma i kacokke gumedo kado i wang bure ki wacce ni: “Kono onongo itiyo ticci ma i Betel maber, dul pa Jehovah onongo pe bicwali woko.” Pi kare mo, cwiny Zaina onongo otur adada ma oweko en onongo kok dyewor ducu. Ento en owaco ni: “Pe aye ni adong cwiny me akalakala i kom dulwa nyo mar pa Jehovah.” Ngo ma okonyo Zaina me bedo ma gwokke?

13. Gin ango ma Zaina otimo me loyo turcwinye?

¹³ Zaina onongo kero me loyo turcwiny ma en onongo tye kwede. En otimo man nining? En okwano pwony ma i bukkewa ma loko i kom peko ma en tye ka kato ki iye dok man okonye me kanyone. Pwony ma wiye tye ni “Itwero Lweny ki Turcwiny!” i Watchtower me Febuari 1, 2001, okonye adada. Pwony meno otito kit ma Marako, ma ocoyo buk me Baibul, nen calo olwenyo ki turcwiny i kare ma mot me ticce olokke. Zaina wiye po ni, “Lanen pa Marako obedo calo yat ma okonya me cango turcwinya.” Zaina bene omedde ki bedo cok ki lureme. En pe okwero ribbe ki omege ki lumege dok pe obedo ka paro pi pekone tutwal. En oniang ni cwiny maleng aye tiro jo ma gimoko tam i dul pa Jehovah dok ni omege ma gitye ka telo wiwa giparo pire adada. Ento en bene oniang ni pire tek adada ni dul pa Jehovah otim gin ma mitte me cobo tic pa Jehovah.

14. Alokaloka mene ma Omego Vlado onongo ni tek me jolone, dok ngo ma okonye?

 ¹⁴ Vlado, laelda mo ma tye ki mwaka 73 ma bedo i lobo Slovenia, cwinye pe obedo yom i kare ma kiribo kacokkegi ki kacokke mukene ci kiloro Ot me Ker ma onongo gicokke iye. En owaco ni: “Pe aniang pingo omege ma gidoro wi ticwa gumoko ni pe dong wabitiyo ki Ot me Ker mamwonya adada-ni. Cwinya otur pien onongo pud waroco Ot me Ker man aroca. An atiyo macalo lapa bao, dok onongo ayubo kom manyen ma kitiyo kwede i ot man. Medo i kom meno, ribo kacokke man okelo alokaloka ma onongo pe yot pi wan lutit kwena ma wateggi.” Ngo ma okonyo Vlado me cwako alokaloka man? En otito ni: “Lubo alokaloka ma dul pa Jehovah oketo kare ducu kelo mot mapol. Alokaloka magi gitye ka yubowa pi alokaloka madongo ma wabikato ki iye i anyim.” Tika itye ka yelle me jolo alokaloka ma obino pien kiribo kacokkewu nyo inongo mot me tic manyen? Bed ki tekcwiny ni Jehovah niang kit ma iwinyo kwede. Ka icwako alokaloka macalo meno, dok imoko matek i kom Jehovah kacel ki dul ma en tye ka tic kwede, labongo akalakala mo ibinongo mot.—Jab. 18:25.

15. Watwero bedo ma wagwokke nining ka wakemme ki ariya ma a ki i kacokke?

¹⁵ Ka wawoto ki nyikke cok ki agikki me lobo-ni, myero wange ni wabinongo ariya mogo ma bino ki i kacokke. Ariya magi twero temo genewa bot Jehovah. Pi meno omyero wabed ma wagwokke. Ka ce iwinyo calo Lakricitayo lawoti mo oteri marac, pe imak akemo i cwinyi. Ka kimini tira, pe ipar tutwal pi lewic ma omaki, jol tira meno dok itim alokaloka ma mitte. Dok ka dul pa Jehovah otimo alokaloka ma ogudi, jol ki cwinyi ducu dok icwak alokaloka meno.

16. Itwero medde ki bedo lagen bot Jehovah kacel ki dulle nining?

¹⁶ Itwero medde ki bedo lagen bot Jehovah kacel ki dulle ka kitemo genneni. Ento me timo meno, myero ibed ma igwokke, nyo ni, ibed ma wi opye mot, ma itamo tam ma atir, kun ineno jami kit ma Jehovah neno kwede. Mok tammi me kwano labol pa jo mogo ma i Baibul ma gulwenyo ki pekki marom ki megi, dok ilwod lok i kom lanengi. Leg bot Jehovah pi kony. Dok pe ikwer ribbe ki jo me kacokke. Dong kadi bed gin ango otimme, Catan pe bibedo ki kare me poki ki bot Jehovah nyo Dulle.—Yak. 4:7.