PWONY ME ANYAMA ME 45
Kit ma Jehovah Konyowa Kwede me Cobo Ticwa me Pwony
“Gibingeyo ni lanebi yam obedo i kingi.”—EJEK. 2:5.
WER 67 ‘Tit Lok-ki’
GIN MA WABINYAMO a
1. Ngo ma omyero wange ni wabikemme kwede, dok gen ango ma waromo bedo kwede?
MYERO wabed ma wangeyo ni wabirwatte ki adegadega ka wawoto ki tito kwena. Adegadega meno oromo medde matek i anyim. (Dan. 11:44; 2 Tem. 3:12; Yabo 16:21) Kadi bed kit meno, waromo bedo ki gen ni Jehovah bimiyowa kony ma wamito. Pingo? Pien Jehovah kare ducu okonyo luticce me cobo tic ma en omiyo botgi—kadi bed tic meno tek nining. Me labolle, kong wanyamu jami mogo mutimme i kwo pa lanebi Ejekiel, ma obedo ka tito kwena bot Lujudaya ma onongo gitye opii i Babilon.
2. Jehovah oloko i kom jo ma Ejekiel onongo myero otit kwena botgi nining, dok gin ango ma wabinyamo i pwony man? (Ejekiel 2:3-6)
2 Kodi dano ango ma onongo myero Ejekiel otit kwena botgi? Jehovah owaco ni gubedo “jo ma kitgi obedo acak,” “ngutgi bene nwang,” dok gin “lujemo.” Onongo gibit calo okuto dok gupong ki kwir calo oton. Meno aye tyen lok ma oweko Jehovah owaco ki Ejekiel tyen mapol ni: “Pe myero ilworgi”! (Kwan Ejekiel 2:3-6.) Ejekiel obedo ki kare me cobo ticce me tito kwena pien (1) Jehovah aye oore, (2) cwiny maleng pa Lubanga omine teko ma mitte, ki (3) lok pa Lubanga ojingo niyene. Jami adek magi okonyo Ejekiel nining? Dok gitwero konyowa i kare-ni nining?
JEHOVAH AYE OORO EJEKIEL
3. Lok mene ma nen calo ocuko cwiny Ejekiel, dok Jehovah omoko bote nining ni ebikonye?
3 Jehovah owaco bot Ejekiel ni: ‘Abicwali.’ (Ejek. 2:3, 4) Lok meno nen calo ojingo cwiny Ejekiel adada. Pingo? Pien nen calo Ejekiel wiye opo ni Jehovah owaco bot Moses kacel ki Icaya lok macal ki meno i kare ma en oyerogi me bedo lunebine. (Nia 3:10; Ic. 6:8) Ejekiel bene onongo ngeyo kit ma Jehovah okonyo kwede lunebi aryo magi me loyo ariya madongo. Pi meno, i kare ma Jehovah owaco ki Ejekiel kiryo ni: ‘Abicwali,’ lanebi-ni obedo ki tyen lok maber me geno konyo pa Jehovah. Medo i kom meno, i buk pa Ejekiel, wanongo lok man tyen mapol ata, ni: “Rwot [Jehovah] oloko kweda.” (Ejek. 3:16; 6:1) Labongo akalakala mo, Ejekiel onongo tye ki tekcwiny ni Jehovah aye oore. Won Ejekiel onongo obedo lalamdog. En nen calo opwonyo Ejekiel ni Jehovah kare ducu owaco bot Lunebine ni ebikonyogi. Me labolle, Jehovah onongo otito ki Icaka, Yakobo, ki Jeremia ni: “Atye kwedi.”—Acak. 26:24; 28:15; Jer. 1:8.
4. Lok ango ma nen calo ojingo cwiny Ejekiel?
4 Pol pa Luicrael onongo gibidok iye nining i kom tito kwena pa Ejekiel? Jehovah owaco ni: “Jo me ot pa Icrael pe gibiwinyo lokki; dok bene pe gibiwinyo lokka.” (Ejek. 3:7) Ka gukwero Ejekiel, jo magi nongo bene gitye ka kwero Jehovah. Lok magi ocuko cwiny Ejekiel ni en ocobo ticce macalo lanebi maber, kadi bed dano onongo gukwere woko. Jehovah bene ocuko cwiny Ejekiel ni ka kwena me ngolo kop ma en otito ocobbe, ci dano onongo “gibingeyo ni lanebi yam obedo i kingi.” (Ejek. 2:5; 33:33) Labongo akalakala mo, lok magi omiyo ki Ejekiel teko ma mitte me cobo ticce me pwony.
JEHOVAH AYE OROWA I KARE-NI
Calo Ejekiel, waromo rwatte ki jo ma cwinygi nok nyo wakato ki i aunauna, ento wangeyo ni Jehovah tye kwedwa (Nen paragraf 5-6)
5. Gin ango ma Icaya 44:8 waco ni bimiyowa tekcwiny?
5 Wan bene watye ki tekcwiny pien wangeyo ni Jehovah oorowa me tito kwena. En ominiwa deyo ki lwongowa ni ‘lucadenne.’ (Ic. 43:10) Meno pud dong obedo mot madit ya! Kit macalo Jehovah owaco bot Ejekiel ni: “Pe myero ilworgi,” Jehovah cuko cwinywa bene ni: “Pe wulwor.” Pingo pe omyero walwor jo ma dagwa? Pien, calo Ejekiel, wan bene Jehovah aye oorowa dok watye ki cwakke.—Kwan Icaya 44:8.
6. (a) Lok pa Jehovah mene ma moko botwa ni wabinongo cwakke? (b) Watwero nongo kwe cwiny kacel ki teko ki kwene?
6 Jehovah ocikke ni ebikonyowa. Me labolle, ma peya Jehovah owaco ni: “Wun cadenna,” en owaco ni: “Ka ibiwok ki i dye nam matut, abibedo kwedi, abigwoki; pii ma i kulu bene pe bimwonyi; kadi ibiwot iwok ki i dye mac, pe ibiwang, leb mac pe bigudo komi.” (Ic. 43:2) Ka wawoto ki tito kwena, i kare mogo wakato ki i ariya mapol adada ma watwero porogi ki pii aluka, nyo pekki malyet adada ma watwero poro ki mac. Kadi bed kit meno, ki kony pa Jehovah wamedde ki tito kwena. (Ic. 41:13) Calo jo ma i kare pa Ejekiel, i kare-ni bene, pol pa dano gikwero kwenawa woko. Ento meno pe tyen lokke ni pe wacobo ticwa me tito kwena maber. Wanongo kwe cwiny ki teko ki i ngeyo ni Jehovah cwinye bedo yom ka wamedde ki tito kwena kun wabedo lugen. Lakwena Paulo otito ni: “Ngat acel acel binongo mucarane muporo tic ma en otiyo.” (1 Kor. 3:8; 4:1, 2) Laminwa mo ma dong otiyo macalo lapainia pi mwaki mapol owaco ni: “Yomo cwinya adada me ngeyo ni Jehovah miyowa bakacic pi yellewa.”
CWINY MALENG OMIYO KI EJEKIEL TEKO MA MITTE
Ejekiel oneno ginanyuta i kom gadigadi pa Jehovah, dok man ojingo genne ni Jehovah bikonye me cobo ticce me tito kwena (Nen paragraf 7)
7. Ejekiel onongo winyo nining kare ducu ka en olwodo ginanyuta ma en oneno-ni? (Nen cal ma tye i pok ngeye.)
7 Ejekiel oneno kit ma cwiny maleng pa Lubanga tek kwede. Gin ma Ejekiel oneno i ginanyuta okonye me niang ni cwiny maleng aye obedo ka konyo lumalaika matego dok obedo ka doro lawala madongo me gadigadi me polo. (Ejek. 1:20, 21) Ejekiel odok iye nining? En ocoyo gin mutimme. “I kare ma aneno ci atugi poto woko piny aryeba ic.” Ejekiel obedo ki ur madit adada mumiyo en opoto piny wa i ngom. (Ejek. 1:28) Lacen, kare ducu ka Ejekiel olwodo lok i kom ginanyuta ma en oneno-ni, nen calo onongo omine tekcwiny ni ki kony pa cwiny maleng, ebitwero tyeko ticce me pwony.
8-9. (a) Ngo mutimme i kom Ejekiel i kare ma Jehovah owacce ni “a icung”? (b) Jehovah omedde ki jingo Ejekiel nining pi tito kwena i wang tic ma tic iye tek?
8 Jehovah owaco bot Ejekiel ni: “Wod pa dano, a icung, ci abilok kwedi.” I kare ma Jehovah owaco ki Ejekiel ni ocung, Ejekiel onongo cwiny maleng ma en mito me a malo ki i ngom. Ejekiel ocoyo ni: “Cwiny pa Lubanga odonyo i iya ci omiyo acung.” (Ejek. 2:1, 2) Lacen i kare me ticce me pwony ducu, ‘cing’ Lubanga, ma en aye cwiny mere maleng, obedo ka doro Ejekiel. (Ejek. 3:22; 8:1; 33:22; 37:1; 40:1) Cwiny maleng pa Lubanga omiyo teko ki Ejekiel pi cobo tic ma onongo kimiyo bote—me tito kwena bot jo ma “cwinygi nwang dok wigi tek” ma gibedo i wang ticce. (Ejek. 3:7) Jehovah owaco bot Ejekiel ni: “Nen, kombeddi dong abimiyo cwinyi bedo nwang calo cwinygi ki wii bene bedo tek calo wigi. Abimiyo wii bedo tek calo got lela matek makato got mabit woko; pe ilworgi, pe bene ilwor kit wang ma gineni kwede.” (Ejek. 3:8, 9) Obedo calo Jehovah onongo tye ka waco bot Ejekiel ni: ‘Pe iwek dingo pa jo magi otur cwinyi. Abimiyi teko.’
9 I nge meno, cwiny pa Lubanga otingo Ejekiel otere i wang ticce. Ejekiel ocoyo ni: “Onongo Rwot [Jehovah] tye ka diya matek ki cinge.” Otero cabit acel pi lanebi-ni me pwonyo ki niang maber kwena ma onongo mitte ni en otitti wek en otit ki tekcwiny. (Ejek. 3:14, 15) I nge meno Jehovah owacce ni ocit i dye bar ka ma ‘cwiny pa Jehovah odonyo i kome.’ (Ejek. 3:23, 24) Ejekiel onongo dong tye atera me cako ticce me tito kwena.
CWINY PA LUBANGA MIYOWA TEKO I KARE-NI
Gin ango ma okonyo Ejekiel, dok ma konyowa i kare-ni me cobo ticwa me pwony? (Nen paragraf 10)
10. Kony ango ma wamito wek wamedde ki ticwa me tito kwena, dok pingo?
10 Kony ango ma wamito wek wamedde ki tito kwena? Me gamo lapeny meno, tam kong gin mutimme i kom Ejekiel. Ma peya en ocako ticce me tito kwena, cwiny maleng pa Lubanga omine teko ma onongo mitte. I kare-ni, calo i kare pa Ejekiel, watwero cobo tic me tito kwena ki kony pa cwiny maleng pa Lubanga keken. Pingo? Pien Catan tye ka lweny i komwa me jukowa ki tito kwena. (Yabo 12:17) Pol pa dano gitamo ni Catan tek tutwal ma pe watwero loyo lweny i kome. Ento ki ticwa me miyo caden, watye ka loyo Catan! (Yabo 12:9-11) I yo ma nining? Ka wanywako i tic me pwony, wanyuto ni pe walworo bwura pa Catan. Kare ducu ka watito kwena, waloyo Catan. Dong, gin ango ma watwero moko ka wanongo ni watwero medde ki tito kwena kadi bed lumonewa gitye ka lweny i komwa? Watwero moko ni Jehovah miyowa teko kun tiyo ki cwiny mere maleng dok ni watye ki cwakke.—Mat. 5:10-12; 1 Pet. 4:14.
11. Cwiny maleng pa Lubanga bitimo gin ango piwa, dok watwero medde ki nongone nining?
11 Gin ango mukene ma wapwonyo ka watamo i kom kit ma Jehovah omiyo ki Ejekiel teko ma mitte me tito kwena? Cwiny maleng twero miyowa teko ma wamito me loyo peko mo keken ma warwatte kwede i ticwa me tito kwena. (2 Kor. 4:7-9) Dong ngo ma omyero watim ka wamito medde ki nongo cwiny maleng? Mitte ni waleg pire, labongo ilo cingwa, kun wageno ni Jehovah biwinyo legawa. Yecu opwonyo lupwonnyene ni: “Wumedde ki lega, . . . wumedde ki yenyo, . . . wumedde ki dwongo doggola.” Jehovah “bimiyo cwiny maleng makato bot jo ma lege.”—Luka 11:9, 13, NWT; Tic 1:14; 2:4.
LOK PA LUBANGA OJINGO NIYE PA EJEKIEL
12. Ma lubbe ki Ejekiel 2:9–3:3, buk adola man oa ki kwene, dok ngo ma onongo kicoyo i iye?
12 Cwiny maleng pa Lubanga omiyo ki Ejekiel tekcwiny ma mitte me tito kwena. Ento pe meno keken. Lok pa Lubanga bene ojingo niye pa Ejekiel. I ginanyuta, Ejekiel oneno cing ma omako buk adola. (Kwan Ejekiel 2:9–3:3.) Buk adola meno oa ki kwene? Gin ango ma onongo kicoyo iye? Ojingo niye pa Ejekiel nining? Kong dong wanenu. Buk adola man oa ki i komker pa Lubanga. Nen calo Jehovah otiyo ki lamalaika acel i kin angwen ma Ejekiel onenogi-ni me miyo buk man bote. (Ejek. 1:8; 10:7, 20) Buk adola man onongo tye ki lok pa Lubanga—ma en aye kwena me ngolo kop mabor adada ma onongo mitte ni Ejekiel otit bot Lujudaya ma lujemo-ni. (Ejek. 2:7) Onongo kicoyo kwena man ryoryo, i iye ki tung ngeye bene.
13. Gin ango ma Jehovah owaco ni Ejekiel otim ki buk adola-ni, dok pingo obedo lim?
13 Jehovah owaco bot lanebine ni ocam buk adola-ni ‘nio ka oyeng woko kwede ma iye odeng.’ Ejekiel obedo lawiny ci ocamo buk adola-ni otyeko woko. But ginanyuta man tyen lokke ngo? Onongo mitte ni Ejekiel oniang maber kwena ma en bicito ka titone. Onongo mitte ni en oye kwena meno wek otug cwinye me titone. I nge meno gin mo me ur adada otimme. Ejekiel onongo ni buk adola-ni ‘lim mada i doge calo moo kic.’ (Ejek. 3:3) Pingo? Ki tung bot Ejekiel, deyo me cung pi Jehovah onongo obedo gin ma lim nyo ma yomo cwinye adada. (Jab. 19:8-11) En onongo tye ki pwoc madit adada ni Jehovah oyere me tic macalo lanebine.
14. Gin ango ma okonyo Ejekiel me bedo atera me cako ticce?
14 Lacen, Jehovah owaco bot Ejekiel ni: “Lok ducu ma abiwacci myero igam obed i cwinyi, dok iwiny bene ki iti.” (Ejek. 3:10) Ki lok meno, Jehovah owaco ki Ejekiel ni myero otute wek wiye opo i kom gin ma kicoyo i buk adola-ni dok otam iye matut. I kare ma Ejekiel otimo meno, niyene ojing matek. Medo i kom meno, buk adola man omine kwena ma pire tek adada ma onongo mitte ni en otit bot dano. (Ejek. 3:11) I kare ma Ejekiel oniang dok oye kwena pa Lubanga, en onongo dong tye atera me cako tito kwena ki me medde ki tic man nio wang ma otyeko maber.—Por ki Jabuli 19:14.
LOK PA LUBANGA JINGO NIYEWA I KARE-NI
15. Me medde ki ticwa me pwony, gin ango ma ‘myero wagam obed i cwinya’?
15 Me medde ki ticwa me pwony, wan bene myero waye ni lok pa Lubanga omedde ki jingo niyewa. ‘Myero wagam’ jami ducu ma Jehovah wacciwa ‘obed i cwinya.’ I kare-ni, Jehovah loko kwedwa kun tiyo ki Lokke, Baibul. I yo ma nining ma watwero weko Lok pa Lubanga medde ki gudo tamwa, kit ma wawinyo kwede, kacel ki tyen lok mumiyo watimo jami?
16. Gin ango ma omyero watim ki Lok pa Lubanga, dok watwero weko donyo i cwinywa nining?
16 Ka wacamo dek ci otiyo i komwa, komwa bedo matek. Dok ka wakwano Lok pa Lubanga kun walwodo, niyewa jing matek. Meno aye pwony ma wanongo ki i lok madok i kom buk adola-ni. Ka odok i kom Lok pa Lubanga, Jehovah mito ni wacam ‘nio ka wayeng woko kwede ma iwa odeng,’ nyo ni omyero waniang maber adada. Watimo meno ki lega, kwanone, kacel ki lwodone. Mukwongo, walego. Man yubo cwinywa wek obed atera me jolo tam pa Lubanga. I nge meno, wakwano lok mo ki i Baibul. Ka dong, wacung manok wek walwod, nyo watam matut, i kom gin ma wakwano. Adwogine bibedo nining? Ka walwodo matut, Lok pa Lubanga bene bidonyo i cwinywa matut.
17. Pingo pire tek me lwodo gin ma wakwano ki i Baibul?
17 Pingo pire tek me kwano Baibul ki lwodone? Timo meno miniwa teko me medde ki tito kwena me Ker-ri kombeddi ki me tito kwena me ngolo kop ma wabitimo cokcok-ki i anyim. Medo i kom meno, ka walwodo kit pa Jehovah mamwonya adada-ni, watwa kwede bijing bedo matek. Macalo adwogine, wabinongo gin mo ma lim nyo me yomcwiny adada—wic ma opye mot kacel ki bedo ma wayeng ki jami ma watye kwede.—Jab. 119:103.
GIN MA MIYOWA TEKO ME MEDDE KI TITO KWENA
18. Gin ango ma bimitte ni dano ma i wang ticwa guniang iye, dok pingo?
18 Ejekiel onongo obedo lanebi, ento wan pe wabedo. Kadi bed kit meno, wamoko tamwa me medde ki tito kwena pa Jehovah ma en ogwoko i Baibul nio wang ma kityeko tito kwena kit ma en mito kwede. Ka kare me ngolo kop oromo, dano ma i wang ticwa pe gibibedo ki tyen lok mo me waco ni pe kicikogi nyo ni Lubanga ocayogi woko. (Ejek. 3:19; 18:23) Me ka meno, gibiniang ni kwena ma watito botgi oa ki bot Lubanga.
19. Ngo ma biminiwa teko me cobo ticwa me pwony?
19 Ngo ma biminiwa teko me cobo ticwa me pwony? Jami adek magi ma ojingo Ejekiel. Wamedde ki tito kwena pien wangeyo ni Jehovah aye oorowa, cwiny mere maleng miyo botwa teko, dok Lok pa Lubanga jingo niyewa. Ki kony pa Jehovah, wanongo teko me medde ki tito kwena kun wadiyo cwinywa “nio wa i agikki.”—Mat. 24:13.
WER 65 Wot Anyim!
a I pwony man, wabinyamo jami adek ma okonyo lanebi Ejekiel me cobo ticce me tito kwena. Wabinyamo kit ma Jehovah okonyo kwede lanebine, dok man biminiwa tekcwiny ni Jehovah bikonyowa bene me cobo ticwa me pwony.