1-2. (a) Lapeny mene ma wabinyamogi i pwony man? (b) Ngo ma nyuto ni Jehovah tye ki miti madwong me konyowa?

 JEHOVAH twero konyowa me ciro pekkiwa ki me nongo yomcwiny i ticwa pire. I yo ma nining ma Jehovah konyowa kwede? Watwero nongo adwogi maber loyo nining ki i kony ma Jehovah miniwa? Lapeny magi wabigamogi i pwony man. Ento ma peya wagamo lapeny magi, kong wanyamu lapeny man: Tika Jehovah tye ki miti madwong me konyowa?

² Nyig lok ma lakwena Paulo otiyo kwede i waragane bot Luibru twero konyowa me nongo lagamme. Paulo ocoyo ni: ‘Jehovah en lakony mera, pe abibedo ki lworo; ngo kono ma dano twero timo i koma?’ (Ibru 13:6) Buk mo acel ma loko i kom Baibul owaco ni, nyig lok man ni “lakony” ma kitiyo kwede i tyeng man, kitiyo kwede me lok i kom ngat ma tye ka ngwec me laro ngat mo ma tye ka kok wek kikonye. Go kong ni Jehovah tye ka rune me bino ka konyo ngat mo ma tye i peko. Labongo akalakala mo, iye ni lok meno nyuto ni Jehovah tye ki miti madwong me konyowa. Ka Jehovah tye ka konyowa, watwero kanyo pekkiwa ki yomcwiny.

3. Jami adek mene ma Jehovah timo me konyowa kanyo pekkiwa ki yomcwiny?

³ Yo mapatpat ango ma Jehovah konyowa kwede me ciro pekkiwa ki yomcwiny? Me nongo lagam, wabikwano but buk pa Icaya. Pingo? Pien pol lok pa lunebi ma Jehovah onyutogi bot Icaya gitye ka cobbe bot lutic pa Lubanga  i kare-ni. Medo i kom meno, Icaya pol kare tiyo ki nyig lok ma niang iye yot ka tye ka lok i kom Jehovah. Icaya cura 30 tye ki labol mogo. I cura man, Icaya otiyo ki lapor mogo mamwonya adada me tito kit ma Jehovah konyo kwede dano. En ocoyo ni Jehovah konyowa (1) ki winyo kun bene gamo legawa, (2) ki miniwa tira, (3) ki miniwa mot kombeddi kacel ki i kare me anyim. Kong dong wanyamu matut yo adek magi ma Jehovah konyowa kwede.

4. (a) Jehovah oloko nining i kom Lujudaya me kare pa Icaya, dok gin ango ma En oye ni otimme i komgi? (b) Gen ango ma Jehovah omiyo ki Luicrael ma lugen? (Icaya 30:18, 19)

⁴ I nyig lok mogo mukwongo me Icaya cura 30, Jehovah olwongo Lujudaya ni “litino ma lujemo,” ma “medo bal i kom bal.” En omedde ki waco ni: “Gin gubedo lujemo, . . . ma kwero winyo lok pa [Jehovah].” (Ic. 30:1, 9) Pien dano gukwero winyo lok pa Jehovah, Icaya otito ni Jehovah onongo biye ni guden can. (Ic. 30:5, 17; Jer. 25:8-11) Dok meno aye gin mutimme i kare ma Lubabilon omakogi ci kiterogi i Babilon macalo opii. Kadi bed kit meno, jo mogo i kin Lujudaya onongo gubedo lugen dok Icaya onongo tye ki kwena maber me gen pigi. En otittigi ni nino mo acel Jehovah biye ni gudok cen ka kwo i Jerucalem odoco. (Kwan Icaya 30:18, 19.) Dok meno aye gin mutimme kikome. Jehovah ogonyogi ki i opii i lobo Babilon. Kadi bed kit meno, mwaki mapol okato ma peya Jehovah olarogi. Lok man ni “[Jehovah] tye ka kuro me nyuto berre botwu” onyuto ni kare mo bikato ma nongo jo magi ma lugen-ni peya kilarogi. Ki lok ada, Luicrael gubedo i Babilon macalo opii pi mwaki 70 kulu ma peya kiye ni jo mogo i kingi gudwog cen i Jerucalem. (Ic. 10:21; Jer. 29:10) I kare ma Luicrael gitye opii i lobo Babilon, onongo gikok pien cwinygi cwer, ento i kare ma gudwogo cen i lobo tugi, gukok pien onongo cwinygi yom adada.

5. Lok ango ma kicoyo i Icaya 30:19 ma cuko cwinywa?

⁵ I kare-ni, watwero nongo cuko cwiny ki i lok pa Lubanga man ni: ‘En bitimowu kica cutcut ka owinyo kokowu.’ (Ic. 30:19) Icaya otitiwa ni Jehovah bitero ite dok winyo kokowa ka wakok bote, dok en bigamo legawa oyotoyot. Icaya omedo ni: “ka owinyo ci en bigamo dogwu.” Lok magi cuko cwinywa ni Wonwa tye ki miti madwong me laro jo ma gilege pi kony. Ngeyo lok man konyowa me kanyo peko ki yomcwiny.

6. Lok ma kicoyo i tyeng me 19 nyuto nining ni Jehovah winyo lega pa luticce ki acel acel?

⁶ Tyeng man pwonyowa gin ango mukene ka odok i kom legawa? Jehovah winyo lega pa wan ducu ki acel acel. Pingo watwero waco kit meno? Kadi bed kwena ma kicoyo i cura me 30 onongo kicoyo bot rok me Icrael lumuku, lok ma i tyeng me 19 nyuto ni Jehovah onongo tye ka lok bot ngat acel acel. Icaya ocoyo ni: ‘Pe dong ibikok matwal’; ‘abitimmi kica’; ‘abigamo legani.’ Macalo Wego ma lamar, Jehovah pe waco ki wode nyo nyare ma cwinye otur ni, “In myero ibed tek calo omeru nyo lameru.” Me ka meno, en keto cwinye i komwa ki acel acel dok tero ite kun winyo legawa.—Jab. 116:1; Ic. 57:15.

7. Lok pa Icaya ki Yecu nyuto nining ni pire tek ni omyero wamedde ki lega?

 ⁷ Ka walego bot Jehovah kun watite peko ma watye ka kato ki iye, i acakkine Jehovah twero miniwa kero me kanyo peko meno. Dok ka peko meno pe ogik cutcut kit ma wabyeko kwede, ci twero mitte ni waleg Jehovah teretere pi kero me kanyone. En wacciwa ni omyero watim kit meno. Man nen ka maleng i lok man pa Icaya ni: “Pe wumiye [Jehovah] kare me yweyo.” (Ic. 62:7) Meno tyen lokke ngo? Omyero waleg bot Jehovah teretere ma twero nen calo pe watye ka miyo ki Jehovah kare me yweyo. Lok pa Icaya poyo wiwa i kom lapor ma Yecu otiyo kwede i Luka 11:8-10, 13. Ki kany, Yecu ocuko cwinywa me ‘dido’ kun ‘wamedde ki penyo’ pi cwiny maleng. Watwero bene lego Jehovah ni ominiwa tira ma mitte wek wamok tam maber.

8. Lok ma kicoyo i Icaya 30:20, 21 ocobbe nining bot Luicrael macon?

⁸ Kwan Icaya 30:20, 21. I kare ma lumony me Babilon gurumo Jerucalem pi mwaka acel ki nucu, pekki odiyo dano adada dok par odoko gin me nino ducu calo kwon ki pii. Ento ma lubbe ki lok ma kicoyo i tyeng me 20 ki 21, Jehovah ocikke ni ka Lujudaya gungut ci guloko kwogi, ci ebilarogi. Icaya olwongo Jehovah ni “Lapwonywu,” dok ocikke ni Jehovah bipwonyogi kit me wore i yo ma En cwako. Lok magi ocobbe i kare ma kigonyo Lujudaya ki i opii. Jehovah onyuto ni ebedo Lapwony Madit pigi, dok pi tirane, jone gudwoko cen woro me ada. Watye ki twon mot madit adada me bedo ki Jehovah macalo Lapwonywa Madit i kare-ni!

9. I yo mene ma wanongo kwede tira ki bot Jehovah i kare-ni?

⁹ I tyeng magi, Icaya owaco ni watye calo lutino kwan ma Jehovah tye ka pwonyogi i yo aryo mapatpat. Mukwongo, Icaya owaco ni: “Wubibedo ka neno Lapwonywu ki wangwu.” I lapor man, Icaya owaco ni Lapwony tye ocung i nyim lutino kwanne. Watye ki mot me nongo adwogi maber ma en miyo i kare-ni. Jehovah miniwa tira nining? En timo man kun tiyo ki dulle. Pud dong watye ki pwoc madit ya, pi tira magi ma niang iye yot ma wanongo ki i dul pa Jehovah! Tira ma wanongo ki i cokkewa, gure me adwol, gure madito, bukkewa, purogram  me JW Broadcasting^® ki dong mukene mapol ata, gikonyowa me medde ki kanyo pekkiwa ki yomcwiny.

10. I yo ma nining ma wawinyo ‘lok ma a ki yo tung ngewa’?

¹⁰ Icaya otito yo me aryo ma Jehovah miniwa kwede tira, kun wacci: “Wubiwinyo lok ma a ki yo tung ngewu.” Ki kany, lanebi man otito ni Jehovah tye calo lapwony ma otero ite kun tye ka wot i nge lutino kwanne, dok tye ka waccigi yo mene ma myero gulubi. I kare-ni bene wawinyo dwan Lubanga ki i ngewa. Man timme nining? Lok pa Lubanga ma tye i Baibul, kicoyo wacon mwaki mapol angec. Pi meno ka watye ka kwano Baibul, bedo calo watye ka winyo dwan Lubanga ma a ki i ngewa.—Ic. 51:4.

11. Ka wamito kanyo pekkiwa ki yomcwiny, jami aryo mene ma omyero watimgi, dok pingo?

¹¹ Watwero nongo adwogi maber nining ki i tira ma Jehovah miniwa kun tiyo ki dulle kacel ki Lokke? Nen ni Icaya oloko i kom jami aryo. Me acel en owaco ni, “yo ene.” Me aryo en owaco ni, “wulubi.” (Ic. 30:21) Pe omyero wangeyo “yo” meno keken, ento bene omyero ‘walubi.’ Kit ma dul pa Jehovah gonyo kwede Lok pa Lubanga konyowa me niang gin ma Jehovah mito ki botwa. Waniang bene kit me keto gin ma wapwonyo i tic. Ka wamito kanyo pekkiwa ki yomcwiny, ci omyero waket i tic jami aryo magi ducu. Dong, ka waketo i tic gin ma wapwonyo, ci watwero bedo ki gen ni Jehovah biminiwa bakacic.

12. Ma lubbe ki Icaya 30:23-26, Jehovah onongo bigoyo laane i kom jone nining?

¹² Kwan Icaya 30:23-26. Lok magi ocobbe nining i kom Lujudaya ma gudwogo cen i Jerucalem i nge bedo opii i Babilon? Jehovah ominigi jami mapol wek okonygi ki bedo kwo kacel ki medde ki tic pire. Jehovah omiyo ki jone cam me acama madwong ata. Ento ma pire tek loyo, en ominigi jami ducu ma gimito me nyikke cok bote dok me cako wore i yo ma en cwako. Mot me cam me cwiny ma jo pa Lubanga gunongo i kare meno obedo dit ma kato kare mo keken. Kit ma kinyuto kwede i tyeng me 26, Jehovah omiyo dero oryeny maleng, ma meno tyen lokke ni Jehovah okonyogi me niang Lokke matut. (Ic. 60:2) Mot ma Jehovah omiyo bot jone okonyogi me medde ki tic pire ki yomcwiny  kacel ki wic ma opye mot “pien cwinygi tye maber.”—Ic. 65:14, NWT.

13. Lok pa lunebi me dwoko cen woro me ada ocobbe nining i karewa-ni?

¹³ Tika cobbe pa lok pa lunebi me dwoko cen woro me ada ocobbe i komwa i kare-ni? Ngene kene ni ocobbe! I yo ma nining? Cakke i mwaka 1919, dano milion mapol dong gua woko ki i opii i te Babilon Madit, ma en aye dini goba ducu me lobo-ni. Kicwalogi i kabedo maber loyo Lobo ma Kicito Pire pi Luicrael. Kicwalogi i paradic me cwiny. (Ic. 51:3; 66:8) Paradic me cwiny obedo gin ango?

14. Paradic me cwiny obedo gin ango, dok angagi ma gibedo iye i kare-ni? (Nen Lok ma Kitito Tere.)

¹⁴ Nicakke i mwaka 1919, jo ma kiwirogi gitye ka nongo mit pa bedo i paradic me cwiny. b Jo ma gitye ki gen me bedo i lobo kany, ma gin aye “romi mukene,” bene gudonyo i paradic me cwiny dok gitye ka nongo mit pa mot mapol ma Jehovah miyo.—Jon 10:16; Ic. 25:6; 65:13.

15. Paradic me cwiny tye nonge i lobo mene?

¹⁵ Lobo nyo paradic me cwiny, mono tye kwene i karewa-ni? Jo ma giworo Jehovah ginonge i but lobo ducu. Pi meno, paradic me cwiny ma gibedo iye tye nonge i kabedo ducu ma i but lobo-ni. Dong, i kare-ni, watwero bedo i paradic me cwiny i lobo mo keken ma wabedo iye teke watye ka cwako woro me ada.

16. Gin ango ma wan ducu ki acel acel watwero timo me medde ki bedo ma wanotte i kacokke?

¹⁶ Ka wamito medde ki bedo i paradic me cwiny, ci omyero wamedde ki bedo ki pwoc pi jo ma gitye i kacokke pa Lukricitayo ma tye nonge i but lobo-ni ducu. Watwero timo meno nining? Watimo man ki keto tamwa i kom mwonyane, ento pe i kom roc pa jo ma tye iye. (Jon 17:20, 21) Pingo man pire tek adada? Tam kong i kom lapor man. Wangeyo ni tye yadi mapatpat i bunga mamwonya. I yo acel-lu, paradic me cwiny tye mamwonya  adada pien dano ma kitgi patpat ma watwero porogi ki yadi bene gitye iye. (Ic. 44:4; 61:3) Pire tek ni wamedde ki keto cwinywa i kom mwonya pa “bunga” ento pe i kom roc pa “yat” ma tye cok kwedwa. Pe omyero waye ni gorowa nyo goro pa jo mukene ma i kacokke ogengwa ki neno mwonya pa kacokke pa Lukricitayo ma i but lobo-ni ducu.

17. Wan ducu ki acel acel watwero timo gin ango me dongo kuc ma tye i kacokke?

¹⁷ I yo ma nining ma wan kikomwa watwero kelo kwede note man? Watwero timone ki bedo jo ma kelo kuc. (Mat. 5:9; Rom. 12:18) Kare ducu ka wakwanyo kare me kelo kuc i kinwa ki jo me kacokke, ci wakonyo me dongo mwonya pa paradic me cwiny. Pire tek ni wiwa opo ni Jehovah aye okelo ngat acel acel ma tye i paradic me cwiny i woro me ada. (Jon 6:44) Go kong kit ma cwiny Jehovah bedo yom kwede ka onenowa ka tic matek me jingo kuc ki note i kin jo ma en neno ni pigi tek—luticce!—Ic. 26:3; Ag. 2:7.

18. Gin ango ma pol kare omyero walwodi, dok pingo?

¹⁸ Jehovah miyo ki luticce jami mabeco mapol. Dong, watwero nongo adwogi maber loyo nining ki i kom jami magi? Watwero tam matut i kom gin ma wakwano i Lok pa Lubanga kacel ki bukkewa ma jenge i Baibul. Kwan kacel ki lwodo lok ma kit meno bikonyowa me dongo kit mabeco pa Lukricitayo ma bitugo cwinywa me nyuto ‘mar i kinwa kekenwa ki cwinywa ducu macalo utmege,’ i kacokke. (Rom. 12:10) Ka wamedde ki lwodo mot mapatpat ma watye ka nongone i kare-ni, wajingo watwa ki Jehovah. Medo i kom meno, lwodo lok i kom mot mapol ma Jehovah ociko pire biweko genwa me tic pire pi naka bedo ma kome. Jami magi ducu bikonyowa me tic pi Jehovah ki yomcwiny i kare-ni.

19. (a) Ma lubbe ki Icaya 30:18, watwero bedo ki gen i kom gin ango? (b) Gin ango ma bikonyowa me kanyo peko ki yomcwiny?

¹⁹ Jehovah “bicung” piwa i kare ma en bikelo agikki pa lobo man marac-ci. (Ic. 30:18, NWT) Watye ki gen matek ni Jehovah—“Lubanga ma ngolo kop atir”—pe biye ni lobo pa Catan-ni omedde ki bedo makato kare ma opore. (Ic. 25:9) Wadiyo cwinywa kun wakuru kacel ki Jehovah nino ma en bikelo larre iye. Pi kombeddi, wamoku tamwa me medde ki bedo ki pwoc pi mot me lega, kwan piwa kenwa, ki keto i tic Lok pa Lubanga i kwo, kacel ki lwodo mot mapatpat ma watye kwede. Ka watimo meno, Jehovah bikonyowa me medde ki wore ki yomcwiny.