1. Wangeyo nining ni Jehovah mito bedo cok kwedwa?

 JEHOVAH lwongowa me bedo cok kwede. (Yak. 4:8) En mito bedo Lubangawa, Wonwa, ki Laremwa. En gamo legawa dok konyowa i kare me peko. Dok en tiyo ki dulle me pwonyowa ki gwokowa. Ento ngo ma omyero watim me nyikke cok ki Jehovah?

2. Watwero nyikke cok ki Jehovah nining?

² Watwero nyikke cok bot Jehovah ki lega bote kacel ki kwano Lokke ki dong lwodone. Ka wawoto ki timo man, marwa ki pwocwa pire bidongo. Man tugo cwinywa me bedo luwiny bote kacel ki miyo bote pak ma en opore me nongone. (Yabo 4:11) Ka ngecwa i kom Jehovah woto ki medde, genwa i kome kacel ki dul ma en oketo me konyowa bene bidongo.

3. Catan tute nining me poko kinwa ki Jehovah, ento ngo ma bikonyowa pe me weko Lubangawa kacel ki dulle? (Jabuli 31:13, 14)

³ Ento Larac-ci tute matek me pokowa woko ki Jehovah, tutwalle ka watye ka kato ki i peko. En timo man nining? En tute me neno ni motmot warwenyo genwa woko i kom Jehovah ki dulle. Ento watwero cung matek i kom lweny pa Catan. Ka niyewa kacel ki genwa i kom Jehovah tye matek liking, pe wabiweko Lubangawa kacel ki dulle.—Kwan Jabuli 31:13, 14.

4. Ngo ma wabinyamo i pwony man?

⁴ I pwony man, wabinyamo pekki adek ma pe a ki i kacokke ento ki woko; peko acel acel twero weko genwa i kom Jehovah ki dulle doko legelege. Pekki magi twero pokowa woko ki Jehovah nining? Dok ngo ma watwero timo me loyo tute pa Catan?

5. Pekki ma wakato ki iye twero weko genwa i kom Jehovah ki dulle doko goro nining?

⁵ I kare mogo, wakato ki i kwo matek—calo aunauna ma a ki bot wadiwa nyo ka warwenyo ticwa woko. I yo ma nining ma pekki ma kit meno twero rwenyo genwa i kom dul pa Jehovah kun pokowa kwede? Ka wakato ki i peko pi kare malac, cwinywa twero tur dok waromo rwenyo gen woko. Catan tiyo ki kare ma kit meno wek wabed ki akalakala ka ce Jehovah marowa. Larac-ci mito ni watam ni Jehovah nyo dulle aye okelo peko man i komwa. Gin ma kit meno bene otimme i kom Luicrael mogo ma onongo gitye i Ejipt. I acakkine, guye ni Jehovah aye ocimo Moses ki Aron me larogi ki i opii. (Nia 4:29-31) Ento lacen i kare ma Parao oweko kwogi odoko tek adada, gin gukok i kom Moses ki Aron pi pekkigi, kun giwaco ni: ‘Wun wumiyo nyingwa odoko ngwe lituny i nyim Parao ki luticce, dok wumiyo pala lucwan i cinggi me nekowa.’ (Nia 5:19-21) Gukok i kom lutic pa Lubanga ma lugen. Man pud dong obedo me cwercwiny ya! Ka dong ibedo ka kanyo peko moni pi kare malac, itwero weko genni i kom Jehovah ki dulle bedo matek nining?

6. Gin ango ma wapwonyo ki bot lanebi Kabakuk ka odok i kom kit me kanyo pekkiwa? (Kabakuk 3:17-19)

⁶ Yab cwinyi bot Jehovah i lega, dok iyeny kony ki bote. Lanebi Kabakuk okato ki i pekki mapol. I kare mo, en nen calo obedo ki akalakala ka ce Jehovah paro pire. Pi meno, en oyabo cwinye bot Jehovah i lega. En owaco ni: “[Jehovah], imito akok boti pi kare ma rom mene pi kony, ka wek iwiny kokona? . . . Pingo imiyo aneno tim maraco kun wanga neno tim aranyi?” (Kab. 1:2, 3) Jehovah ogamo lega pa laticce ma lagen-ni. (Kab. 2:2, 3) I nge lwodo matut kit ma Jehovah olaro kwede jone, cwiny Kabakuk odoko yom doki. En omoko ni Jehovah paro pire dok bikonye me ciro peko mo keken. (Kwan Kabakuk 3:17-19.) Pwony ango ma wanongo? Ka itye ka kato ki i peko, leg bot Jehovah dok ititte kit ma iwinyo kwede. I nge meno, yeny kony ki bote. Ka itimo kit meno, itwero bedo ki gen ni Jehovah bimini teko ma mitte me kanyo peko meno. Dok ka iwinyo ni en tye ka konyi, niyeni i kome bene bidongo matek.

7. Gin ango ma onongo omin Shirley mito ni en oye, dok ngo ma okonye pe me rwenyo genne i kom Jehovah?

⁷ Medde ki timo jami ma weko ibedo cok ki Jehovah. Nen kong kit ma timo man okonyo kwede laminwa Shirley, ma bedo i lobo Papua New Guinea, i kare ma en okato ki i kwo matek. b Jo gang pa Shirley onongo gubedo lucan adada, dok i kare mogo onongo giyelle ayela me nongo ginacama. Omin Shirley otemo balo genne i kom Jehovah. En owaco ni: “In iwaco ni cwiny maleng pa Lubanga tye ka konyi, ento konye mono tye kwene? Jo gangi pud gitye lucan. Itye ka balo mere cawa ni itye ka tito kwena.” Shirley oye ni: “Apennye kekena ni: ‘Lubanga tika ada paro piwa nyo pe?’ Alego bot Jehovah cutcut ci atitte jami ducu ma atye ka tamone. Pe ajuko kwano Baibul kacel ki bukkewa, dok amedde ki tito kwena kacel ki cito i cokke.” Ma pe orii, en oniang ni Jehovah kara tye ka gwoko jo  gange. Jo gange onongo pe gibuto kec, dok onongo cwinygi yom. Shirley owaco ni: “Awinyo ni Jehovah tye ka gamo legana.” (1 Tem. 6:6-8) Ka imedde ki timo jami ma weko ibedo cok ki Jehovah, in bene pe ibiye ni peko nyo akalakala opoki woko ki bot Jehovah.

8. Gin ango ma romo timme i kom omege ma gitye ka telo wiwa i dul pa Jehovah?

⁸ Lumonewa gitiyo ki odi me poko lok angeya kacel ki kabedo me nywako lok i Intanet me nyayo lok goba nyo kelo akalakala i kom omege ma gitye ka telo dul pa Jehovah. (Jab. 31:13) Omege mogo dong kimakogi dok kimoro adot i komgi ni gubedo lutim bal. Lukricitayo me cencwari me acel bene gukato ki i peko meno i kare ma kimako lakwena Paulo ci kikok i kome gobagoba. Gin gudok iye nining?

9. Lukricitayo mogo gudok iye nining i kare ma kitweyo lakwena Paulo i buc?

⁹ Lukricitayo mogo me cencwari me acel gujuko miyo cwak bot lakwena Paulo i kare ma kitweye i buc i Roma. (2 Tem. 1:8, 15) Pingo? Tika onongo lewic tye ka makogi i kom Paulo pien onongo dano nene macalo labalo? (2 Tem. 2:8, 9) Nyo mono gubedo ki lworo ni gin bene kibiketo aunauna i komgi? Labongo paro pi tyen lokgi, tem goyo kong kit ma Paulo owinyo kwede. En onongo okato ki i pekki mapol dok oketo kwone ka mading pigi. (Tic 20:18-21; 2 Kor. 1:8) Walego ni pe wabed calo jo magi ma guweko Paulo niyak i kare ma en onongo mito konygi adada! Ngo ma myero wiwa opo iye ka kiketo aunauna i kom omege ma gitye ka telo wiwa?

10. Ngo ma myero wiwa opo iye ka kitye ka keto aunauna i kom omege ma gitelo wiwa?

¹⁰ Wi opo i kom tyen lok mumiyo kiunowa ki anga ma tye i nge aunauna meno.  Buk pa 2 Temceo 3:12 waco ni: “Jo ma mito lubo kit pa jo ma lworo Lubanga, kun gibedo i Kricito Yecu, gibiunogi.” Dong pe omyero wabed ki ur ni Catan tye ka lweny tutwalle ki omege ma gitye ka telo wiwa. En mito ni omege magi gujuk bedo lugen bot Jehovah dok mito bwurowa bene.—1 Pet. 5:8.

11. Gin ango ma wapwonyo ki i lanen pa Oneciporo? (2 Temceo 1:16-18)

¹¹ Medde ki miyo cwak bot omegini dok imok matek i komgi. (Kwan 2 Temceo 1:16-18.) Lakricitayo mo me cencwari me acel ma nyinge Oneciporo odok iye mapat i kare ma onongo Paulo tye i buc. ‘Lewic pe omake pi twec ma gitweyo kwede Paulo ki nyor.’ Me ka meno, Oneciporo oyenyo Paulo matek, dok i kare ma ononge, en otute matek me mine kony ma mitte. I timo meno, Oneciporo oketo kwone ka mading. Pwony ango ma wanongo? Pe omyero wawek lworo dano obal cwinywa nyo ogengwa woko ki miyo kony bot omegiwa ma kitye ka unogi. Me ka meno, omyero wacwakgi dok watim jami ducu ma watwero me konyogi. (Car. 17:17) Gimito marwa ki konywa.

12. Pwony ango ma wanongo ki bot omegiwa ki lumegiwa ma i lobo Russia?

¹² Nen kong kit ma omegiwa ki lumegiwa ma i lobo Russia gukonyo kwede luye luwotgi ma kitweyogi i buc. Ka jo mogo i kingi kikelogi i kot ka pido i komgi, omege ki lumege mapol gibino me miyogi cwak. Pwony ango ma wanongo? Ka kibalo nying omege ma gitelo wiwa, nyo kimakogi, nyo kiunogi, pe iwek lworo omaki. Leg pigi, gwok jo me pacigi, dok iyeny yo mukene me miyogi kony.—Tic 12:5; 2 Kor. 1:10, 11.

13. Ngala twero weko genwa i kom Jehovah kacel ki dulle doko legelege nining?

¹³ Wadiwa ma pe gitye Lucaden, lutic luwotwa, nyo lutino kwan luwotwa gitwero ngalowa pien watito kwena nyo pien wakwo ma lubbe ki cik pa Jehovah. (1 Pet. 4:4) Gin giromo waco ni: “An amari, ento diniwu-ni diyo dano dok karene okato woko.” Jo mukene giromo kok i komwa pi kit ma watero kwede jo ma kiryemogi woko ki i kacokke, kun giwaco ni: “Itwero lwonge nining ni ibedo dano ma lamar?” Lok ma kit meno twero weko wabedo ki akalakala ka ce cik pa Jehovah tye kakare. Watwero cako pennye ni: ‘Tika lubo cik pa Jehovah tek loyo wa bedo i buc? Dulle mono keto gingi tutwal i komwa?’ Ka ikemme ki gin ma kit meno, itwero medde ki bedo cok ki Jehovah kacel ki dulle nining?

14. Myero wadok iye nining ka jo mukene gingalowa pien wakwo ma lubbe ki cik pa Jehovah? (Jabuli 119:50-52)

¹⁴ Mok tammi me medde ki timo gin ma Jehovah waco ni tye atir. Yubu onongo obedo laco ma timo gin ma tye atir i wang Jehovah kadi bed kingale pi timo meno. Laco acel ma oporo bedo larem Yubu otemo bito Yubu me ye ni Lubanga pe paro kadi bed en otim gin ma atir. (Yubu 4:17, 18; 22:3) Ento Yubu okwero ye goba ma kit meno woko. En onongo ngeyo ni rwom pa Jehovah me gin ma atir ki gin marac tye kakare, dok omoko tamme me lubone. En pe oye ni jo mukene gubal genene woko. (Yubu 27:5, 6) Pwony ango ma wanongo? Pe iwek lok ngala pa jo mukene owek ibed ki akalakala i kom gin ma atir nyo marac i wang Jehovah. Tam kong i kom gin ma  otimme i kwoni. Nen calo ineno tyen mapol ni kwoni bedo maber ka itimo gin ma Jehovah waco ni tye atir. Mok tammi me medde ki bedo i dul ma cwako rwom ma kit meno. Kadi dano gingalowa nining, wan pe wabijuko tic pi Jehovah.—Kwan Jabuli 119:50-52.

15. Pingo dano gubedo ka ngalo Brizit?

¹⁵ Nen kong gin mutimme i kom laminwa Brizit ma bedo i lobo India. Wadine gungale matek pi niyene. Ma pe orii i nge Brizit nongo batija i mwaka 1997, cware, ma pe obedo Lacaden-ni, orwenyo ticce woko. Pi meno, cware omoko tamme ni en, Brizit, kacel ki anyiragi adek-ki myero gucit ka kwo kacel ki lunywalle, ma onongo gibedo i boma mukene. Ento Brizit onongo pud dok bikato ki i pekki mukene madongo. Kit macalo cware onongo pe ki tic, onongo bimitte ni Brizit oti nino ducu me gwoko jo me ode. Medo i kom meno, kacokke macok kwedgi onongo borre tye kilomita 350 nyo mairo 220 ki botgi. Ki cwercwiny, jo gang pa cware guketo aunauna magwar i kome pi niyene. Aunauna man odoko rac adada ma oweko Brizit kacel ki jo me ode gua woko ki bot lunywal pa cware. Ci cware oto woko atura. Lacen, nyare me adek-ke oto woko ki two kanca ma tye ki mwaka 12 keken. Ma dong rac loyo, wadi pa Brizit gukok i kome pi pekki magi ducu. Gin guwaco ni ka onongo en pe odoko Lacaden pa Jehovah, kono pekki magi ducu pe opoto i komgi. Kadi bed kit meno, en omedde ki geno Jehovah dok obedo cok ki dulle.

16. Mot ango ma Brizit onongo pi bedo lagen bot Jehovah kacel ki dulle?

¹⁶ Kit macalo Brizit onongo bedo mabor adada ki kacokke, laneno me adwol ocuko cwinye me tito kwena i kabedo ma en kwo iye ki me bedo ki cokke i gange. I acakkine, en owinyo calo man gin ma timone tek adada. Ento en olubo tira ma omego-ni omiyo bote. En onywako kwena maber ki jo mukene, oyubo cokke i gange, dok kare ki kare obedo ki woro pi  jo me ot kacel ki anyirane. Adwogine obedo nining? Brizit obedo ki kare me cako kacel ki kwano Baibul ki dano mapol, dok lutino kwanne mapol gunongo batija. I mwaka 2005 en ocako tic macalo painia marii. En onongo mot mapol pi keto genne i kom Jehovah kacel ki bedo lagen bot dulle. Anyirane gitye ka tic pi Jehovah ki gen, dok i kare-ni gitye ki kacokke aryo i wang ticce! Brizit ye labongo akalakala mo ni Jehovah omine teko me ciro pekkine ki me kanyo ngala ma oa ki bot jo gange.

17. Gin ango ma omyero wamok tamwa me timone?

¹⁷ Catan mito ni waye ni Jehovah wekowa niyak i kare me pekowa, dok ni bedo i dul pa Jehovah bimiyo kwowa bedo tek adada. Catan mito ni lworo omakwa ka kibalo nying omege ma gitelo wiwa, kiketo aunauna i komgi, nyo kitweyogi i buc. En bene tiyo ki lok ngala wek genwa i kom cik pa Jehovah kacel ki Dulle obed legelege. Ento, wangeyo dirone maraco-ni dok pe wabiye ni obwolwa. (2 Kor. 2:11) Mok tammi me kwero goba pa Catan ki me medde ki bedo lagen bot Jehovah ki Dulle. Wi opo ni, Jehovah pe biweki matwal. (Jab. 28:7) Pi meno, pe iwek gin mo opoki ki bot Jehovah!—Rom. 8:35-39.

18. Gin ango ma wabinyamo i pwony ma lubo man?

¹⁸ I pwony man, wanyamo pekki mogo ma watwero kato ki iye ma pe a ki i kacokke. Ento ariya mogo ma a ki i kacokke bene gitwero temo genwa i kom Jehovah kacel ki dulle. Watwero loyo ariya ma kit meno nining? Meno aye gin ma wabinyamo i pwony ma lubo man.