Cwiny me Kica pa Lakricitayo mo
WON John onongo batija macalo ngat acel i kin Lucaden pa Jehovah i mwaka 1950 ki wiye i taun mo matidi i Gujarat, India. Ento John, omegine, lumegine, ki dong megigi onongo gubedo Lukatoli mucwiny. Pi meno onongo pe gimara niye pa wegigi.
I nino mo acel, won John ooro John ni ote waraga mo bot omego mo me kacokke. Ento i odiko meno, John ongolo cinge marac adada ma onongo tye ka yabo wi koc mo. En onongo pud mito lubo o pa wonne, pii meno en otweyo cinge ma onongo pud tye ka cwer ki bongo ci ocako wot me tero waraga meno.
I kare ma John oo kunnu, en omiyo waraga bot dako pa omego-ni. En bene onongo obedo Lacaden pa Jehovah. En oneno ni John owano cinge, ci oye konye. Okwanyo jami me boyo cing John olwoko wange maleng, oketo iye yat ci oboyo woko maber. I ngeye, oyubo cai ki John. Dako pa omego-ni obedo ka tito lok me Baibul bot John i yo maber adada i kare ma onongo gitye kacel.
Pi cwiny me kica ma lamego-ni onyuto, cwiny John ocako lokke i kom Lucaden pa Jehovah. Ci openyo lamego-ni lapeny aryo madok i kom niye pa Lucaden pa Jehovah ma pokogi ki Dini pa Katoli. En openyo ka Yecu obedo Lubanga ki dok ka pore pi Lukricitayo me lega bot Maliam. Lamego-ni onongo ngeyo leb Gujarati, dok obedo ka lok bot John i leb pene kikome. En ogamo lapeny pa John ducu kun tiyo ki Baibul ci omiye buk me “This Good News of the Kingdom.”
Lacen, ma John okwano buk meno, en oniang ni gin ma etye ka kwanone tye ada. En ocito bot padigi ci openye lapeny aryo meno bene. Kiniga omako padi-ni adada ci ocele ki Baibul kun dange ni: “In idoko Catan! Nyutta ki i Baibul ka ma kicoyo ni Yecu pe obedo Lubanga. Nyutta ka ma kicoyo ni myero pe wawor Maliam. Nyutta!” John obedo ki ur madit ka padi bene twero timme kumeno. En owaco ki padi-ni ni pe dong ebidok i kanica pa Katoli matwal. Meno aye gin mutimme!
John ocako kwano Baibul ki Lucaden, ojola ada, ci ocako tic pi Jehovah. I nge kare mo, jo mukene ma i ganggi bene gutimo meno. I nge mwaka 60, poyo ma i cing John-ni pud poyo wiye i kom cwiny me kica ma kinyutte ma oweko ecako woro Jehovah.—2 Jo Korint 6:4, 6.
