1-3. (a) I kare ma Jekaria ocako tito lok ma Lubanga ocwale me titone, kwo pa Luicrael onongo tye nining? (b) Pingo Jehovah onongo mito ni jone gudwog bote?

BUK adola ma tye ka tuk, dako ma tye i aduku, ki mon aryo ma gitye ka tuk ki bwomgi calo winyo acebe. Magi aye ginanyuta ma Jekaria oneno. (Jekaria 5:1, 7-9) Pingo Jehovah oweko lanebine oneno ginanyuta magi mamwonya-ni? Kwo pa Luicrael onongo tye nining i kare meno? Dok watwero nongo adwogi mabeco nining ki i ginanyuta magi i kare-ni?

² I mwaka 537 ma peya kinywalo Kricito, jo pa Jehovah onongo cwinygi yom adada. Gubedo opii i Babilon pi mwaki 70, ento onongo dong gitye agonya! Cwinygi onongo yom me dok i Jerucalem me gero odoco ot pa Lubanga wek gibed ki kare me woro Jehovah. I nge mwaka acel, Luicrael guketo guti me te ot pa Lubanga. Dano  onongo cwinygi yom adada, dok “lwak gubedo ka dangnge matek twatwal, dok dwangi bene owinnye wa ka mabor.” (Ejira 3:10-13) Ento Lurok onongo gitye ka medde ameda ki jemo wek pe kiger ot pa Lubanga. Man oturo cwiny Luicrael adada ci guweko gero ot pa Lubanga woko. Ma ka meno, gucako keto cwinygi i gero odigi ki puru potigi. I nge mwaka 16, ot pa Lubanga onongo peya kityeko gerone. Onongo mitte ni kipo wi jo pa Lubanga wek gudok cen ka woro Jehovah ki dok guwek paro pi mitigi. Jehovah onongo mito ni gubed ki arima kacel ki tekcwiny me wore.

³ Pi meno i mwaka 520, Jehovah ocwalo lanebi Jekaria wek opo wi Luicrael i kom tyen lok ma oweko kigonyogi ki i opii i Babilon. Tye me ur ni nying Jekaria gonye ni “Wi Jehovah Opo.” Kadi bed ni Luicrael wigi owil woko i kom gin ma Jehovah otimo pigi, ento Lubanga wiye pe owil. (Kwan Jekaria 1:3, 4.) Jehovah ocikke me konyogi me roco woro me ada. Ento en bene ocikogi ni ebiye worogi keken ka guwore ki cwinygi ducu. Kong wanen lok i kom ginanyuta me abicel ki abiro ma Jekaria oneno. Wabineno kit ma Jehovah ocuko kwede cwiny Luicrael ki dok kit ma ginanyuta aryo magi gitwero konyowa kwede i kare-ni.

4. Gin ango ma Jekaria oneno i ginanyuta me abicel? Pingo onongo buk adola man tye ki coc i iye ki ngeye ducu? (Nen cal me 1 i pot karatac 15.)

⁴ Jekaria cura 5 cakke ki tito lok i kom ginanyuta mo ma dok kite pat adada. (Kwan Jekaria 5:1, 2.) Jekaria oneno buk adola ma tye ka tuk i wi yamo. Buk adola man onongo borre romo futi 30 ki lacce futi 15. Buk man onongo iye tye ayaba dok kicoyo kwena iye. (Jekaria 5:3) Onongo obedo kwena ma pire tek me ngolokop. I kare macon dano onongo gicoyo i buk adola tungcel keken ento pe i ngeye. Ento kwena man onongo pire tek adada ma oweko kicoyo i iye ki ngeye ducu.

5, 6. Jehovah neno tim me kwo nining?

⁵ Kwan Jekaria 5:3, 4. Lubanga bingolo kop i kom ngat acel acel ma lubbe ki ticci. Man tutwalle bigudo jo pa Jehovah pien kilwongogi ki nyinge. Pien gimare dok gingeyo ni kwalo kwo balo nying Lubanga. (Carolok 30:8, 9) Jo mogo gitamo ni kwalo kwo pe rac ka ce gitye ki tyen lok matir. Kadi bed ni watye ki tyen lok matir, ento ngat ma kwalo kwo nyuto ni cobo mitine pire tek kato lubo Cik pa Jehovah, ki keto deyo i kom Nyinge.

⁶ Tika iniang ni Jekaria 5:3, 4 waco ni cen ‘bidonyo i ot pa lakwo’ dok “bibedo i ode kun tyeko woko”? Pi meno Jehovah twero tucu ka maleng tim marac ci ngolokop i kom ngat mutimo. Kadi  bed ni lakwo twero kano timme ki bot abili, ladit ticce, luelda, nyo lunyodone, ento en pe twero kanne ki bot Jehovah. Lubanga binyuto kit tim me kwo mo keken ka maleng. (Jo Ibru 4:13) Wabedo agonya kacel ki jo ma gitute matek me bedo lugen “kare ducu”!​—Jo Ibru 13:18.

7. Watwero gwokke ki i cen ma a ki i buk adola ma tye ka tuk-ki nining?

⁷ Tim me kwo mo keken rac bot Jehovah. Ber me ngeyo ki lubo cik pa Jehovah ki dok me kwo i yo ma pe kelo lewic i kom nyinge. Ka watimo man ci wabibwot ki i ngolokop pa Jehovah i kom jo ma pe luwiny.

8-10. (a) Kwong obedo gin ango? (b) Kwonge mene ma Kabaka Jedekia pe ogwoko?

⁸ I ngeye, buk adola ma tye ka tuk-ki otero kwena me ciko jo ma “kwongo kwong” goba goba i nying Lubanga. (Jekaria 5:4) Kwong obedo lok ma moko ni gin moni tye ada, nyo cikke ma pire tek me timo gin moni nyo pe me timone.

⁹ Kwongo kwong i nying Lubanga Jehovah obedo gin ma pire tek adada. Wangeyo man ki i gin ma otimme i kom Jedekia, ma obedo kabaka me agikki me Jerucalem. Kabaka Jedekia okwonge i nying Jehovah ni ebimine i te loc pa kabaka me Babilon. Ento Jedekia pe ogwoko kwongene meno. Pi meno, Jehovah owaco bot Jedekia ni en bito i Babilon, pien ocayo kwongnge, dok oturo gicikke ma onongo en omoko ki kabaka me Babilon, ma okete me bedo i wi komker.”​—Ejekiel 17:16.

 ¹⁰ Kabaka Jedekia onongo okwonge i nying Lubanga, dok Jehovah onongo mito ni en ogwok kwongene. (2 Tekwaro 36:13) Ento Jedekia pe ogwoko kwongene dok olego kabaka me Ejipt wek okonye me a woko ki i cing Babilon. Ento Ejipt onongo pe twero konye.​—Ejekiel 17:11-15, 17, 18.

11, 12. (a) Ngo ma pire tek loyo ducu ma wacikke me timone? (b) Dyerewa myero ogud kit ma wakwo kwede nining?

¹¹ Gin ma otimme i kom Jedekia-ni nyuto ni Jehovah winyo cikke ducu ma wacikke pire. Myero wagwok cikkewa wek wayom cwinye. (Jabuli 76:11) Kwong ma pire tek loyo ma myero wagwok aye dyerewa bot Jehovah. Ka wadyero kwowa bote, nongo wakwonge me tic pire kadi bed gin ango otimme i kwowa.

¹² Watwero gwoko cikkewa bot Jehovah nining? “Nino ki nino” wakato ki i atematema matino ki madongo bene. Kit ma wadok kwede i atematema magi ducu nyuto wat ma tye i kinwa ki Jehovah. (Jabuli 61:8) Me labolle, ngo ma ibitimo ka ngat mo ki i gang kwan nyo i gang tic ocako loko lok ore boti? Ka ce en ocako nyuto miti i komi, tika ibikwero timme-ni dok inyuto ni in lawiny bot Jehovah? (Carolok 23:26) Ngo ma ibitimo ka in keni ki gangwu aye ma iworo Jehovah? Tika ilego Jehovah wek okonyi me medde ki kwo macalo Lakricitayo? Tika ipwoyo Jehovah nino ducu pi marre ki tirane, kadi bed ni itye ka wok ki i kwo matek? Tika ikwanyo kare me kwano Baibul nino ducu? Wacikke me timo jami magi ducu i kare ma wadyero kwowa bot Jehovah. Ka wawinyo lokke dok watiyo pire ki cwinywa ducu, wanyuto ki Jehovah ni wamarre dok ni wabedo jone. Worowa aye yo me kwowa. Jehovah ocikke me miniwa mot mamwonya i anyim pien wan lugen bote.​—Nwoyo Cik 10:12, 13.

13. Ngo ma wapwonyo ki i ginanyuta me abicel ma Jekaria oneno?

¹³ Ginanyuta me abicel ma lanebi Jekaria oneno okonyowa me niang ni ka wamaro Lubanga Jehovah ci pe wabikwalo kwo, dok wabigwoko cikkewa mo keken ma wacikke me timone. Wapwonyo bene ni kadi bed ni Luicrael gutimo bal mapol, ento Jehovah pud ogwoko cikkene dok pe owekogi ata. En onongo ngeyo ni gitye ka kato ki i kwo matek ki i cing lurok ma gurumo ngetgi. Lanen pa Jehovah pwonyowa ni myero bene wagwok kwongewa. Dok watwero bedo labongo akalakala ni en bikonyowa me timone. Jehovah ominiwa gen pi anyim mamwonya. Cokcok-ki, en bijwayo tim maraco ducu ki i lobo. Gen man tye kicoyo pire i ginanyuta ma dok Jekaria oneno lacen.

14, 15. (a) Gin ango ma Jekaria oneno i ginanyuta me abiro? (Nen cal me 2 i pot karatac 15.) (b) Dako ma onongo tye i aduku-ni cung pi gin ango? Pingo lamalaika oumo wi aduku woko?

¹⁴ I ngeye ma Jekaria oneno buk adola ma tye ka tuk, lamalaika dok owacce ni: “Ting wangi malo kong inen.” Ci Jekaria dok oneno “aduku” mo. (Kwan Jekaria 5:5-8.) Onongo giumo wi aduku man ki nyonyo mapek. I kare ma giyabo wi aduku man, Jekaria oneno “dako mo [ma] onongo tye obedo” iye. Lamalaika otito ki Jekaria ni dako ma tye i aduku-ni onongo cung pi “Tim Marac.” Go kong lworo ma Jekaria obedo kwede i kare ma oneno ka dako-ni tute me kato woko! Ento lamalaika omako dako-ni odwoke i aduku oyotoyot ci oumo wiye ki nyonyo mapek-ki. Man te lokke ngo?

¹⁵ Ginanyuta man miniwa tekcwiny ni Jehovah pe biye tim maraco i kin jone. Ka Jehovah oneno gin marac, en bikwanyone oyotoyot adada labongo galle. (1 Jo Korint 5:13) Lamalaika onyuto man i kare ma odwoko dako-ca ci oumo wiye oyotoyot ki nyonyo mapek.

16. (a) Gin ango ma kitimo i kom aduku? (Nen cal me 3 i pot karatac 15.) (b) Mon ma gitye ki bwomgi-ni gutero aduku-ni wa kwene?

¹⁶ Lacen Jekaria oneno mon aryo ma gitye ki bwomgi dok bwomgi tek calo bwom acebe. (Kwan Jekaria 5:9-11.) Mon magi onongo gipat adada ki dako ma kite rac ma tye i aduku-ni. Ki bwomgi matek-ki gutingo aduku man  ma tye ki “Tim Marac” i iye-ni ci gutuk kwede woko. Gutere wa kwene? Gutero aduku man wa i “lobo me Cinar,” ma en aye Babilon. Pingo gutere kunnu?

17, 18. (a) Pingo Babilon onongo obedo “kabedo ma giyubo” pi “Tim Marac”? (b) Imoko tammi me timo ngo?

¹⁷ Luicrael ma gukwo i kare pa Jekaria onongo gitwero niang pingo Babilon obedo ka maber me tero “Tim Marac.” Onongo gingeyo ni boma meno opong ki tim me tarwang ki woro me goba. Jekaria ki Lujudaya mukene ma gukwo i boma meno gutute matek nino ducu me cung matek wek pe gitim gin mo keken ma kubbe ki woro me goba. Pi meno, ginanyuta man nyuto ni Jehovah bigwoko woro me ada wek obed maleng.

¹⁸ Ginanyuta man bene opoyo wi Lujudaya ni meno gin bene gitye ki tic me atima me gwoko woro me ada wek obed maleng. Tim marac pe giye dok myero obed pe i kin jo pa Lubanga. I kare-ni bene, Jehovah okelowa i dulle maleng, ka ma wanongo iye marre dok bene wanongo gwokke. Wan ducu ki acel acel watye ki tic me atima me gwoko dul pa Jehovah wek obed maleng. Tim maraco myero obed pe i kin jo pa Jehovah.

19. Ginanyuta ma Jekaria onenogi-ni gudowa nining i kare-ni?

¹⁹ Ginanyuta me abicel ki me abiro ma Jekaria onenogi-ni tye ki lok ma pire tek me ciko jo ma gitimo jami maraco. Jehovah pe biye ni tim maraco omedde pi naka. Wan bene macalo luticce, myero wakwer tim maraco. Ginanyuta magi gicuko cwinywa ni ka watute matek me yomo cwiny Wonwa ma lamar-ri, ci en pe bicennowa ento bigwokowa dok biminiwa mot. Kadi bed ni tek me bedo jo maleng i lobo ma opong ki tim maraco, ento ki kony pa Jehovah pud watero cung matek! Ento wangeyo nining ni woro me ada bimedde nakanaka? Ka twon can madit-ti medde ki nyiko cok, wangeyo nining ni Jehovah bigwoko dulle? Wabinyamo lapeny magi i pwony ma lubo man.