1. Mar mene ma pire tek loyo, ki dok itwero titone nining? (Nen cal ma tye i pot karatac man.)

JEHOVAH aye Wang It me mar. (1 Jon 4:7) Mar ma pire tek loyo cung i kom cik ma iye lac. Ki i Baibul, kitiyo ki nyig lok me Grik ni a·gaʹpe me lok i kom mar ma kit man. Mar man kwako kit ma wawinyo kwede pi ngat moni, ento kwako bene jami mapol makato kit ma wawinyo kwede keken. Nen i kit ma wajalle kwede me konyo jo mukene. Cuko cwinywa me timo jami mabeco pi jo mukene. Mar man keliwa yomcwiny ki dok yengo i kwowa.

2, 3. Jehovah onyuto marre pi dano nining?

² Jehovah onyuto wacon ni emaro dano ma peya ocweyo Adam gin ki Kawa. En ocweyo lobo wek obed ki jami ducu ma mitte wek kwo pa dano obed mayot. Makato meno, en ocweyo lobo wek obed paco ma kwo mit iye. Jehovah pe otimo jami magi ducu pire. En otimo jami magi piwa. I kare ma otyeko cweyo lobo, en ocweyo dano ci ominigi mot me kwo pi naka i paradic i lobo.

 ³ Lacen, Jehovah onyuto marre pi dano i yo madit loyo. Kadi bed ni Adam gin ki Kawa pe gubedo luwiny, Jehovah onongo pud tye ki gen ni likwayigi mogo bimare ci oketo yub me cwalo Wode wek ojal kwone macalo ginkok me larogi. (Acakki 3:15; 1 Jon 4:10) Nicakke i kare ma Jehovah ocikke pi ginkok, onongo bedo calo en dong otyeko miyo ginkok meno woko. Lacen, i nge mwaki 4,000, Jehovah omiyo Wode acel keken me amara pi dano. (Jon 3:16) Watye ki pwoc madit adada i kom mar ma Jehovah onyuto!

4. Wangeyo nining ni jo ma gitye ki roc bene gitwero nyuto mar me ada?

⁴ Tika watwero nyuto mar ma goba mo pe iye, kadi bed watye ki roc? Twere. Jehovah ocweyowa i calle, man weko wabedo ki kero me lubo kite. Pol kare pe yot me nyuto mar ma goba pe iye, ento watwero. Abel onyuto mar ma kit meno i kare ma omiyo gityer maber loyo bot Lubanga. (Acakki 4:3, 4) Nua onyuto mar i kare ma omedde ki tito kwena pa Lubanga pi mwaki mapol kadi bed ni meno dano pe gubedo ka ye lokke. (2 Petero 2:5) Abram bene onyuto ni emaro Lubanga ki cwinye ducu i kare ma ojalo wode me amara Icaka macalo gityer. (Yakobo 2:21) Calo co magi ma lugen-ni, wan bene wamito nyuto mar ki cwinywa ducu kadi bed ni timone pe yot.

5. Watwero nyuto mar me ada nining?

⁵ Baibul waco ni meno wanyut mar me ada pe “i lok ma waloko ki dogwa keken, ento wamar dano ki mar me ada ma nen i tic.” (1 Jon 3:18) Tika man te lokke ni pe watwero nyuto mar i lok ma waloko? Pe. (1 Jo Tecalonika 4:17) Man te lokke ni pe romo me wacone awaca keken ni “Amari.” Myero wawek onen i tic. Me labolle, ka omego nyo lamego mo pe ki cam nyo bongo, nongo gin ma gimito pe obedo mere lok me cuko cwinygi keken. (Yakobo 2:15, 16) I yo acel-li, pien wamaro Jehovah kacel ki jiraniwa, pe wabilega alega keken wek jo mapol gubin ka tito kwena ento wan kikomwa bene wabitute matek i tic me tito kwena.​—Matthew 9:38.

6, 7. (a) Mar ma goba pe iye obedo ngo? (b) Angagi ma gunyuto mar me goba?

⁶ Lakwena Jon owaco ni myero “wamar dano ki mar me ada ma nen i tic.” Pi meno, marwa myero obed “mar me ada” nyo “ma goba pe iye.” (Jo Roma 12:9; 2 Jo Korint 6:6) I cawa mukene ngat moni twero timme ni etye ki mar. Ento tika nongo obedo mar me ada ma oa ki i cwinye? Mitine mono nongo tye ningo? Pe watwero poro odenge ni watye ki cwiny me mar. Mar ma goba tye iye konye pe.

⁷ Kong dong waneno labol pa jo mogo ma guporo odenge ni gitye ki mar. I kare ma Catan oloko ki Kawa i poto me Eden, gin ma en owaco-ni onongo nen  calo en maro Kawa. Ento ticce onyuto ni en onongo tye ka poro mere odenge. (Acakki 3:4, 5) I kare ma Daudi tye Kabaka, en onongo tye ki lareme ma nyinge Akitopel. Ento Akitopel dok ocako piro lok i kom Daudi me cobo mitine. Gin ma en otimo-ni onyuto ni en onongo pe larem me ada. (2 Camuel 15:31) I kare-ni, jo ma gungak kacel ki jo ma gikelo apokapoka i kacokke “giloko lok maber ma winyone mit adada.” (Jo Roma 16:17, 18) Gitwero timme ni giparo pi jo mukene, ento ki lok ada nongo giparo pigi kekengi.

8. Lapeny ango ma myero wapenye kwede?

⁸ Mar me goba pol kare kelo lewic pien kitiyo kwede me bwolo ngat moni. Watwero poro odenge bot dano ento pe watwero bwolo Jehovah. Yecu owaco ni jo ma ginyuto mar me goba ‘kibipwodogi matek.’ (Matayo 24:51) Macalo lutic pa Jehovah pe wamito ni wabwol dano ni wamarogi. Pi meno myero wapenye ni, ‘Tika atye ki mar me ada, nyo ke ce aparo pira kena dok pe agenne?’ Kong dong waneno yo abongwen ma watwero nyuto kwede ki mar “ma goba pe iye.”

9. Mar me ada cuko cwinywa me timo gin ango?

⁹ Bed ki yomcwiny me tic kadi bed ngat mo pe neno gin ma itye ka timone. Myero wabed atera me konyo jo mukene ki cwiny me mar kadi bed jo mukene pe gubingeyo matwal. (Kwan Matayo 6:1-4.) Anania gin ki dakone Capira onongo gitye ki cwiny mapat. I kare ma gumiyo motgi, onongo gimito nyutte bot jo mukene. Guloko lok goba i kom wel lim ma gumiyo, dok kipwodogi adada pi lok gobagi-ni. (Tic pa Lukwena 5:1-10) Ento ka wamaro utmegiwa ci wabedo ki yomcwiny me timo gin mo keken pigi labongo bedo ki miti ni jo mukene myero gunge. Watwero nongo pwony ki bot omege ma gikonyo kor Lukiko Madit me yubo cam me cwiny. Pe gimito nongo yweka ki bot jo mukene dok pe gitito ngo ma gubedo ka tic iye.

10. Wanyuto woro bot jo mukene nining?

¹⁰ Wor jo mukene. (Kwan Jo Roma 12:10.) Yecu onyuto woro bot lukwenane i kare ma olwoko tyengi. (Jon 13:3-5, 12-15) Myero watute matek me bedo jo mamwol calo Yecu kun watiyo pi jo mukene. Lukwena pe guniang gin ma Yecu otimo-ni kulu nio wa i kare ma gunongo cwiny maleng. (Jon 13:7) Wanyuto woro bot jo mukene ka nongo pe watamo ni wan dok piwa tek katogi pien wakwano i rwom ma lamal, watye ki cente madwong nyo mot me tic i dul pa Jehovah. (Jo Roma 12:3) Pe nyeko makowa ka kipwoyo jo mukene, ento wanywako kacel i yomcwinygi kadi bed ni watamo ni wan bene myero olo to kipwowa.

11. Pingo myero wami pwoc ma a ki i cwinywa?

 ¹¹ Mi pwoc ma a ki cwinyi. Pwo jo mukene pi jami ma gitimo. Wan ducu wangeyo ni miyo pwoc “dongo tam pa dano” ducu. (Jo Epeco 4:29) Ento wamito ni meno gin ma wawaco myero oa ki i cwinywa ento pe obed mere lok mamwa. Pe myero wawac gin mo ma cwinywa pe iye nyo wayeny yo me gengo ngewa wek pe wami tira. (Carolok 29:5) Ka wamiyo pwoc ma cwinywa pe iye ka dok lacen waloko marac i kom ngat ma wapwo nongo watye ka poro odenge. Lakwena Paulo onongo tye ki mar me ada. I kare ma en ocoyo waragane bot Lukricitayo me Korint, en opwoyogi pi jami mabeco ma gubedo ka timone. (1 Jo Korint 11:2) Ento i kare ma en mito minigi tira, en otito tyen lokke atir ka maleng dok i yo me mar.​—1 Jo Korint 11:20-22.

12. Watwero nyuto mar me ada nining ka wajolo welo?

¹² Bed ngat ma cinge yot. Jehovah ocikowa me bedo jo ma cinggi yot bot utmegiwa. (Kwan 1 Jon 3:17.) Ento myero wajol welo ki cwiny matir. Watwero penye kekenwa ni: ‘Tika alwongo lurema macok keken nyo jo ma aneno calo pigi tek i kacokke? Tika alwongo jo ma atamo ni gin bene gitwero lwonga lacen keken? Nyo kece cinga yot bot utmege ma pe angeyogi maber nyo ma pe gitwero timo gin mo pira i ngeye?’ (Luka 14:12-14) Go kong: Ka omego mo mito kony pien ni omoko tam marac kono? Nyo ngo ma wabitimo ket kong ni walwongo ngat mo i gangwa ci pe opwoyowa? Jehovah waco ni: “Wubed jo ma jolo welo ngat man ki lawote, kun pe wungur bene.” (1 Petero 4:9) Wabibedo ki yomcwiny ka wamiyo gin moni ki cwiny matir.​—Tic pa Lukwena 20:35.

13. (a) Pingo myero wadi cwinywa? (b) Gin ango ma watwero timo me cuko cwiny jo ma goro?

¹³ Kony jo ma gigoro. Cik me Baibul ma waco ni meno myero “wukony jo ma goro, wudi cwinywu bene i kom dano ducu” twero nyuto ka ce watye ki mar me ada. (1 Jo Tecalonika 5:14) Utmege mapol ma onongo niyegi goro lacen niyegi ojing odoko matek. Ento mitte ni wadi cwinywa i kom jo mukene dok wakonygi. Watwero konyogi nining? Watwero tic ki Baibul me cuko cwinygi, watiyo kacel kwedgi i ticwa me pwony nyo wawinyo lokgi. Medo i kom meno, pe myero wanen utmegiwa ni man obedo ngat “matek” nyo “magoro.” Ma ka meno, myero wange ni  wan ducu watye ki ka ma watek nyo wagoro iye. Kadi wa lakwena Paulo bene oye gorone. (2 Jo Korint 12:9, 10) Wan ducu wamito kony ki cuko cwiny.

14. Gin ango ma myero watute me timone wek wabed ki kuc ki utmegiwa?

¹⁴ Bed ngat ma kelo kuc. Bedo ki kuc i kin utmege pire tek adada. Kadi bed ni wawinyo ni kiniang i komwa marac nyo kiterowa i yo marac, myero pud watute me timo jami ducu ma watwero wek kuc obed tye i kinwa. (Kwan Jo Roma 12:17, 18.) Ka wacwero cwiny ngat mo, myero wakwa kica. Ento myero oa ki i cwinywa. Me labolle, ma ka wacone ni, “Tima kica pien cwinyi tye ka cwer,” bedo ber ka waye balwa kun wawaco ni, “Tima kica pien gin ma awaco-ni ocwero cwinyi.” Pire tek adada ni luot myero gubed ki kuc i kingi. Obedo gin marac adada ka laco ki dako giporo odenge ni gimarre ka gitye i kin dano ento ka gitye kengi nongo pe giloko, gitiyo ki leb maraco, nyo bene gilwenyo i kingi.

15. Wanyuto nining ni watimo kica ki cwinywa ducu?

¹⁵ Bed ngat ma timo kica. Ka ngat mo ocwero cwinywa, watimme kica ci wajalo lokke woko. Myero watim man kadi bed ni ngat meno pe oniang ni ecwero cwinywa. Watimo kica i kinwa kun ‘ngat acel acel diyo cwinye i kom lawote ki mar. Ki dok waketo tek me gwoko ribbe ma cwiny maleng omiyowa wek wabed acel i twec me kuc.’ (Jo Epeco 4:2, 3) Wek watim kica ki cwinywa ducu, myero pe wabed ka tamo gin marac ma ngat meno otimo. Mar “pe bedo kun keto cwinye i kom gin marac ma gitimo i kome.” (1 Jo Korint 13:4, 5) Ki lok ada, ka wamako akemo i cwinywa, meno twero balo watwa ki  utmegiwa kacel ki Jehovah bene. (Matayo 6:14, 15) Ka walego pi ngat ma ocwero cwinywa-ni meno nyuto atir ni nongo dong watimo kica ki cwinywa ducu.​—Luka 6:27, 28.

16. Myero wanen mot me tic ma kiminiwa nining?

¹⁶ Ket miti pa jo mukene mukwongo. Ka kiminiwa mot me tic i dul pa Jehovah, watwero nyuto ni watye ki mar me ada ka ‘pe walubo gin ma konywa keken, ento walubo gin ma konyo luwotwa bene.’ (1 Jo Korint 10:24) Me labolle, i gure me nino acel ki gure madito, lujol wele gikwongo o i ka gure ma peya jo mukene guo dok cwinygi twero bitogi me yero kabedo maber pigi ki pi jo me otgi. Ma ka meno, polgi giyero kabedo ma dano pe gimaro tutwal ma nongo tye ka ma kiminigi me tic iye. Man nyuto ni gitye ki mar me ada pi jo mukene. Itwero lubo lanengi nining?

17. Ka Lakricitayo otimo bal madit, mar me ada bicuko cwinye me timo gin ango?

¹⁷ Ngut ci iwek timo bal i mung. Lukricitayo mogo ma gutimo bal madongo gutemme me kanone woko. Twero bedo ni pi lewic nyo pe gimito cwero cwiny jo mukene. (Carolok 28:13) Kano bal pe nyuto mar pien kelo adwogi marac i kom labal meno ki dok i kom jo mukene. Man timme nining? Jehovah twero kwanyo cwiny mere maleng woko ki i kacokke dok kuc bene bedo pe. (Jo Epeco 4:30) Pi meno, ka Lakricitayo otimo bal madit, ci mar me ada bicuko cwinye me lok ki luelda wek enong kony ma mitte.​—Yakobo 5:14, 15.

18. Pingo nyuto mar me ada pire tek?

¹⁸ Mar aye pire tek ma loyo ducu. (1 Jo Korint 13:13) Weko dano gingeyo angagi ma gin lulub kor Yecu kikome, ki dok me neno angagi ma gilubo lanen pa Jehovah ma en aye Wang It me mar. (Jo Epeco 5:1, 2) Paulo owaco ni ka onongo epe ki mar ci nongo konye pe. (1 Jo Korint 13:2) Myero wan ducu wamedde ki nyuto wunu mar pe i “lok ma waloko ki dogwa keken” ento ‘wamarre ki mar me ada ma nen i tic.’