1, 2. (a) Tic ango ma pire obedo tek loyo i kwo pa Yecu, dok pingo? (b) Ngo ma omyero watim wek wacob ticwa macalo “lutic kacel ki Lubanga”?

YECU KRICITO kong obedo lapac ci lacen odoko lapwony. (Marako 6:3; Jon 13:13) En otiyo tic aryo-ni ducu maber adada. Macalo lapac, en opwonyo kit me tic ki jami ticce me yubo jami mabeco ki i kom bao. Dok macalo lapwony, en otiyo ki ngecce matut i kom Ginacoya me konyo dano wek guniang lok ada me Baibul. (Matayo 7:28; Luka 24:32, 45) I kare ma Yecu tye ki mwaka 30, en oweko tic macalo lapa bao ci odoko latit kwena pien man aye tic ma pire tek loyo ma etwero timone. En owacci tyen lok acel mumiyo Lubanga oore i lobo aye me tito lok me kwena maber me Ker pa Lubanga. (Matayo 20:28; Luka 3:23; 4:43) Yecu oketo cwinye i tic me tito kwena maber-ri, dok onongo mito ni jo mukene gutim kit meno.​—Matayo 9:35-38.

² Pol pa wan pe wabedo lupac, ento wan ducu wabedo lutit kwena dok wapwonyo jo mukene kwena maber-ri. Tic man pire tek adada ma oweko Lubanga kikome bene timo. Ki lok ada, kilwongowa ni “lutic kacel ki Lubanga.” (1 Jo Korint 3:9; 2 Jo Korint 6:4) Waye lok pa laco jabuli ma  owaco ni: “Lokki ducu ocung i kom ada.” (Jabuli 119:159, 160) Lok pa Jehovah aye ada. Meno aye tyen lok mumiyo wamito “tero lok me ada i yo [ma] atir” i ticwa me pwony. (Kwan 2 Temceo 2:15.) Pi meno watute me doko ludiro i tic ki Baibul, ma obedo gin ticwa ma pire tek loyo me pwonyo jo mukene lok i kom Jehovah, Yecu, ki dong Kerre. Me konyowa wek wanong adwogi maber i ticwa me pwony, dul pa Jehovah omiyowa jami tic mabeco, dok mitte ni wapwony kit me tic kwedgi. Ginonge i kin Jami Ticwa ma Pigi Tego me Pwony.

3. Gin ango ma omyero waket cwinywa iye i tic me pwony, dok ma lubbe ki Tic pa Lukwena 13:48, jo mene ma omyero wayenygi?

³ Itwero pennye pingo walwongo ni Jami Ticwa ma Pigi Tego me Pwony ento pe Jami Ticwa ma Pigi Tego me Tito Kwena. Tye kit meno pien “tito kwena” obedo waco bot dano lok ma myero en onge, ento “pwony” obedo tito lok meno i yo matut wek ngat meno oniang gin ma owinyo dok oket i tic. Pi kare manok ma pud wadong kwede i lobo-ni, omyero waket cwinywa i kom cako kwano Baibul ki dano ki dong pwonyogi wek gudok lulub kor Kricito. Man tyen lokke ni omyero komwa obed mit ka yenyo jo ducu ‘ma myero pi nongo kwo ma pe tum’ ci wakonygi me cako tic pi Jehovah.​—Kwan Tic pa Lukwena 13:44-48.

4. Watwero nongo ‘jo ma myero me nongo kwo ma pe tum’ nining?

⁴ Watwero nongo ‘jo ma myero me nongo kwo ma pe tum’ nining? Pi Lukricitayo me cencwari me acel, yo acel keken me nongo jo ma myero obedo tito kwena. Yecu owaco bot lupwonnyene ni: “Gang madit nyo paco mo ma wudonyo iye, kong wuniang anga ma myero ma bedo iye.” (Matayo 10:11) Omyero watim kit meno i kare-ni bene. Ngene kene ni, ka dano pe gitye ki cwiny matir, giwakke, nyo pe giparo pi Lubanga, ci pe watwero bedo ki gen ni gibiwinyo kwena maber-ri. Watye ka yenyo jo ma cwinygi atir, ma gimwol dok gimito ngeyo lok me ada. Watwero poro ticwa me yenyo dano ki tic pa Yecu i kare ma en pud lapa bao. Ma peya ocako yubo jami calo doggola, ayoko, nyo gin mo keken, en onongo myero kong oyeny bao maberre. I nge meno, en dong kwanyo jami ticce, dok tiyo ki dirone me yubo gin moni. I kare-ni bene, myero kong wayeny jo ma cwinygi atir, ka dong wati ki jami ticwa kacel ki dirowa me konyogi wek gudok lulub kor Kricito.​—Matayo 28:19, 20.

5. Ngo ma omyero wange i kom gin acel acel i kin Jami Ticwa ma Pigi Tego me Pwony? Mi labol. (Nen cal ma tye i pot karatac 9.)

⁵ Gin acel acel i kin jami tic tye ki ticce. Me labolle, tam kong i kom jami tic ma Yecu otiyo kwede i kare ma en lapa bao. * (Nen lok ma tye i tere piny.) Onongo mitte ni en obed ki jami me pimo, coyo, ngolo, tucu, payo, cwero ki kubo bao magi. Kit meno, gin acel acel i kin Jami Ticwa ma Pigi Tego me Pwony tye ki ticce ma myero otim. Kong dong wanenu kit me tic ki jami tic ma pigi tego magi.

6, 7. (a) In dong itiyo ki kad me jw.org nining? (b) Pingo watiyo ki karatac me lwongo pi cokke?

⁶ Kad me jw.org. Man jami tic matino ento gitiyo maber adada me tito bot dano jo ma wabedo ki me nyutigi kabedowa me Intanet me jw.org. I kabedowa me Intanet, gitwero pwonyo lok mapol i komwa kun bene gipenyo wek kikwan Baibul kwedgi. Dano makato 400,000 kulu dong gupenyo ni kikwan Baibul kwedgi ki i jw.org, dok dano miya mapol mukene gipenyo nino ki nino! Itwero bedo ki kad mogo manok i komi kun itiyo kwede ka iloko ki dano ma irwatte kwedgi nino ducu.

⁷ Karatac me Lwongo. Karatac me lwongo ma kigoyo tye ki lok man: “Wajoli me kwano Baibul ki Lucaden pa Jehovah.” Dok bene wacci itwero timo man “i cokkewa” “nyo kacel ki lapwony me Baibul.” Pi meno, karatac me lwongo man tito ki jo mukene anga ma wabedo dok lwongo “jo ma gingeyo ni gin lucan i lok me cwiny” wek gukwan Baibul kwedwa. (Matayo 5:3) Ngene kene ni, wajolo dano me bino i cokkewa kadi bed guye kwano Baibul kwedwa nyo pe. Ka gubino i cokkewa, gibineno ni gitwero pwonyo jami mapol ki i Baibul.

8. Pingo pire tek ni dano obin kadi i cokkewa acel keken? Mi labol mo.

⁸ Pire tek ni wabed ka lwongo dano me bino i cokkewa kadi kicel mo. Pingo? Pien ka gubino, gibineno ni Lucaden pa Jehovah gipwonyo lok ada ma tye i Baibul dok gikonyo dano me ngeyo Lubanga, ento dini goba pe timo kit meno. (Icaya 65:13) Me labolle, luot mo i lobo Amerika ma nyinggi Ray ki Linda guneno apokapoka man mwaki mogo mukato angec. Gin onongo giye i kom Lubanga dok gimito ni ginge en maber. Pi meno, gumoko tamgi me limo odi lega ducu ma i bomagi kun giyenyo jami aryo ma peya gudoko lumemba me kanica meno. Me acel, onongo gimito ni gipwony gin mo i ot lega meno, ki me aryo, lumemba me ot lega meno myero gurukke calo jo ma gitiyo pi Lubanga. Man oterigi mwaki mapol pien odi lega onongo tye mapol adada i bomagi. Ento gubedo ki tur cwiny keken. Pe gupwonyo gin mo keken, dok lumemba me odi lega magi onongo girukke ki ruk ma kelo lewic. I nge limo ot lega me agikki ma guyubbe pi limone, Linda ocito ka tic dok Ray odok cen gang. Ma Ray tye ka dwoyo mutokane me dok cen gang, en okato ki i nyim Ot me Ker. Otamo ni, ‘Wek kong adony i iye anen gin ma timme kunnu.’ Ngene kene ni, man obedo gin maber loyo ma otimme! Jo ducu ma i Ot me Ker gunyutte cwiny me lirem ki kica dok onongo gurukke maber. Ray ocito obedo anyim dok gin ma opwonyo oyomo iye adada! Man poyo wiwa i kom kit ma lakwena Paulo oloko kwede i kom dano ma obino i cokke pi tyen mukwongo ci owaco ni: “Adada, Lubanga gire tye i kinwu.” (1 Jo Korint 14:23-25) I nge meno, Ray obedo ka bino i cokke i Ceng Cabit ducu. Ka lacen en ocako bino i cokke me dye cabit ducu. Linda bene ocako bino i cokke, dok kadi bed ni onongo gitye mwaka 70 ki wiye, gukwano Baibul ci gunongo batija.

9, 10. (a) Pingo tic ki trak yot? (b) Tit kong kit me tic ki trak me Ker pa Lubanga Obedo Gin Ango?

⁹ Trak. Watye ki trak aboro i kin jami ticwa. Tic kwedgi yot, dok gitiyo maber me cako lok ki dano. Nicakke ma kicwal woko trak magi i mwaka 2013, dong kigoyo kopi ma romo bilion abic kulu! Trak magi ducu kiyubogi macal cal. Pi meno, ka ipwonyo kit me tic ki trak acel, ci nongo dong itwero tic ki mukene-ni ducu! Itwero tic ki trak magi nining me cako lok?

¹⁰ Gwok imito tic ki trak ma wiye tye ni Ker pa Lubanga Obedo Gin Ango? Nyut ki ngatti lapeny ma tye i nyime ci ipenye ni: “Tika dong ipennye kekeni ni Ker pa Lubanga obedo gin ango? Iromo wacci obedo . . . ?” Ci penye ni i kin lagam adek-ki mene ma en yero. Me ka wacce ni oyero lagam ma atir nyo pe, yab mere trak ci inyutte ka ma wacci “Gin ma Baibul Waco” ki i iye, dok ikwan ginacoya ma kiketo kenyu, Daniel 2:44 ki Icaya 9:6. I agikki me lokwu, peny lapeny ma tye i nge trak i te lok ma wiye tye ni “Tam Kong”: “Kwo bibedo nining i te loc pa Ker pa Lubanga?” Iromo gamo lapeny meno ka dok wurwatte. Ka idok cen ka lim, itwero tic ki pwony me 7 i brocuwa me Kwena Maber Mua ki Bot Lubanga!, ma tye i kin jami ticwa me cako kwano Baibul ki dano.

11. Magajinwa kiyubo pi tyen lok ango, dok ngo ma omyero wange i komgi?

¹¹ Magajin. Wi Lubele ki Awake! gubedo magajin ma pud dong kigonyo i leb mapol dok kigoyo i wel madwong loyo ki i wi lobo-ni! Kit macalo dano ma gia ki i lobe mapatpat gikwano magajin magi, lok ma i pok ngeye kiyubo ma nongo twero gudo cwiny dano me kabedo ducu. Myero wati ki magajin magi me konyo dano wek guket cwinygi i kom gin ma pire tek loyo i kwo. Ento mukwongo, omyero kong wange angagi ma kiyubo magajin moni pigi.

12. (a) Magajin me Awake! kiyubo pi jo mene, dok tyen lok ango mumiyo kigoyo magajin man? (b) Adwogi maber ango ma inongo ma cokcok-ki i tic ki magajin man?

¹² Magajin me Awake! kiyubo pi dano ma pe gingeyo gin mo i kom Baibul. Romo bedo ni pe gingeyo gin mo i kom pwony pa Lukricitayo, pe gigeno dini mo, nyo pe gingeyo ni Baibul twero konyogi i kwogi. Tyen lok acel ma pire tek mumiyo kigoyo Awake! aye me konyo jo ma gikwano wek guye ni Lubanga tye ada. (Jo Roma 1:20; Jo Ibru 11:6) Awake! temo bene konyo ngat ma tye ka kwanone me dongo niye ni Baibul “ada aye lok pa Lubanga.” (1 Jo Tecalonika 2:13) Pi mwaka 2018, watye ki Awake! adek ma wi lokgi tye ni: “The Way of Happiness,” “12 Secrets of Successful Families,” ki “Help for Those Who Grieve.”

13. (a) Wi Lubele pi lwak kiyubo pi jo mene? (b) Adwogi maber ango ma inongo cokcok-ki i tic ki magajin man?

¹³ Tyen lok ma pire tek mumiyo kiyubo Wi Lubele pi lwak aye pi tito pwony me Baibul bot jo ma dong gitye ki woro pi Lubanga kacel ki Baibul. Twero bedo ni gingeyo gin mo i kom Baibul, ento pe gitye ki ngec matir i kom gin ma Baibul pwonyo. (Jo Roma 10:2; 1 Temceo 2:3, 4) Pi mwaka 2018 watye ki Wi Lubele  pi lwak adek ma wi lokgi tye ni: “Tika Baibul Pud Konyo i Kare-ni?,” “Ngo ma Bitimme i Anyim?,” ki “Lubanga Tika Paro Piri?”

14. (a) Vidio angwen ma tye i Jami Ticwa ma Pigi Tego me Pwony kiyubogi pingo? (b) Adwogi maber ango ma inongo i tic ki vidio magi?

¹⁴ Vidio. I kare pa Yecu, onongo lapa bao tiyo ki jami tic ma mito kero keken. Ento i kare-ni, lupac gitye ki jami ma tiyo ki mac elektwic, calo macin me nguno yat, ki me tucu ki jwayo bao wek obed mapwot. Ka watye ka tito kwena i kare-ni, medo i kom bukke ma kigoyo, watye ki vidio mabeco me anyuta bot dano. Vidio angwen ma watye kwede i Jami Ticwa ma Pigi Tego me Pwony aye: Pingo Omyero Ikwan Baibul?, Ngo ma Timme ka Kitye ka Kwano Baibul?, Ngo ma Timme i Ot me Ker?, ki dong Lucaden pa Jehovah​—Gubedo Jo Mene? Vidio macego cego waromo tukone i dakika aryo keken nyo ma pe o dok gitiyo maber i lim me acel. Vidio maboco watwero tic kwedgi ka wadok cen ka lim nyo pi jo ma gitye ki cawa. Vidio magi gubedo jami tic mabeco ma twero cuko cwiny dano me cako kwano Baibul ki me bino i cokkewa.

15. Neno vidio i lebgi kikome gudo dano nining? Mi labol mogo.

¹⁵ Me labolle, laminwa mo orwatte ki dako mo ma odak ki i cula nam me Micronesia dok leb pene obedo Yapese. Laminwa onyuto bot dako-ni vidio me Pingo Omyero Ikwan Baibul? i leb Yapese. I kare ma ocako tuko vidio-ni, dako-ni owaco ni: “Man lebwa kikome. Pe atwero ye! Atwero winyo woko ki i dwan laco-ni ni en a ki i cula namwa kikome. En tye ka loko lebwa do!” I ngeye cutcut, dako-ni owacci ebikwano dok eneno jami ducu ma nonge i lebgi ki i jw.org. (Por ki Tic pa Lukwena 2:8, 11.) Labol mukene tye i kom laminwa mo ma bedo i lobo Amerika, ma wod pa omine bedo i lobo mukene. En ocwalo bot wod pa omine link pi vidio man i lebgi. Wod pa omine-ni oneno vidio man ci ocwalo e-mail bote ni: “Bute ma waco ni cwiny mo marac aye tye ka doro lobo-ni ogudo cwiny adada. Apongo fom me penyo wek kikwan Baibul kweda.” Man oyomo cwiny laminwa adada pien wod pa omine-ni bedo i lobo mo ma kigengo iye ticwa!

16. Tit tic pa brocuwa magi ki acel acel: (a) Winy Lok pa Lubanga Wek Ibed Kwo Nakanaka. (b) Kwena Maber Mua ki Bot Lubanga! (c) Jo Mene ma Gitye ka Timo Miti pa Jehovah i Kare-ni?

¹⁶ Brocuwa. Watwero pwonyo lok ada nining bot dano ma pe ngeyo kwan maber nyo pe tye ki gin akwana mo me Baibul i lebgi? Watwero tic ki brocuwa me Winy Lok pa Lubanga Wek Ibed Kwo Nakanaka. * (Nen lok ma tye i tere piny.) Gin tic mukene maber adada me cako kwano Baibul ki dano aye brocuwa me Kwena Maber Mua ki Bot Lubanga! Watwero nyuto ki dano wi lok 14 ma kiryeyogi i ngeye ci wapenye me yero mene ma en tye ki miti me nongo lagamme. Ci wucak kwano pwony meno cutcut. Tika  dong itemo tic ki yo man ka idok cen ka lim? Brocuwa me adek ma tye i kin jami ticwa obedo Jo Mene ma Gitye ka Timo Miti pa Jehovah i Kare-ni? Kiyubo me pwonyo lutino kwan me Baibul lok madok i kom dulwa. Me pwonyo kit me tic ki brocuwa man, nen Kwowa ki Ticwa Macalo Lukricitayo​—Yub me Cokke me Marci 2017.

17. (a) Pingo kiyubo bukke aryo ma watiyo kwedgi me kwano Baibul ki dano? (b) Ngo ma omyero jo manyen gumedde ki timo kadiwa i nge batijagi, dok pingo?

¹⁷ Bukke. I nge cako kwano Baibul kun itiyo ki brocuwa, itwero kobo i kare mo keken ma ineno ni opore i buk me Baibul Twero Pwonyowa Gin Ango? Gin tic man twero konyo dano me pwonyo ngec ma pigi tego me Baibul. Ka latin kwan tye ka dongo maber ci otyeko buk meno woko, wuromo medde ki kwano buk me ‘Wubed i Mar pa Lubanga.’ * (Nen lok ma tye i tere piny.) Gin tic man bikonyo latin kwan me pwonyo kit me keto cik ma igi lac me Baibul i tic i kwone. Wi myero opo ni, kadi bed latin kwan onongo batija, en myero omedde ki kwanne wang ma otyeko bukke aryo magi. Man bikonye me bedo ki niye matek i kom Jehovah ki me bedo lagen bote.​—Kwan Jo Kolocai 2:6, 7.

18. (a) Ngo ma 1 Temceo 4:16 cuko cwinywa me timone macalo lupwonye me lok ada, dok adwogine bibedo ngo? (b) Yubwa nongo tye ningo ka watye ka tic ki Jami Ticwa ma Pigi Tego me Pwony?

¹⁸ Macalo Lucaden pa Jehovah, watye ki tic me pwonyo dano ki “lok me ada, ma en aye lok me kwena maber” ma twero miyogi kwo ma pe tum. (Jo Kolocai 1:5; Kwan 1 Temceo 4:16.) Me konyowa timo meno, watye ki Jami Ticwa ma Pigi Tego me Pwony. (Nen bok ma wiye tye ni “ Jami Ticwa ma Pigi Tego me Pwony.”) Pi meno omyero watute matek me tic ki jami tic magi. Wan ducu ki acel acel myero wayer gin tic ma wabitiyo kwede ki dok i cawa mene. Ento wi myero opo ni, yubwa pe tye me poko bukke keken; dok pe wamiyo bukke bot jo ma gipe ki miti i kwenawa. Yubwa tye me loko dano ma cwinygi atir, ma gimwol, gimito ngeyo Lubanga dok ‘gimyero me nongo kwo ma pe tum’ wek gudok lulub kor Kricito.​—Tic pa Lukwena 13:48; Matayo 28:19, 20.