1-2. (a) Ma pe otero kare, lok angeya ango ma luloc lobo gibimiyo? (b) Lapeny mene ma mito agama?

GO KONG ni lobe pud gumiyo lok angeya ma wabedo ka kurone pi kare malac ni “kuc tye, piny okwe mot, gin mo marac pe.” Giromo wakke ni lobo dong tye ki kuc ma loyo i kare mo keken. Luloc lobo gibimito ni watam ni gitwero cobo pekki ducu ma i lobo-ni. Ento pe gitye ki twero mo keken me juko gin ma bitimme i nge miyo lok angeya meno! Pingo? Ma lubbe ki lok pa lunebi me Baibul, “to biturugi atura . . . ka larre biloyogi woko.”​—1 Tec. 5:3.

² Tye lapeny mogo ma pigi tego ma mito lagam: Gin ango ma bitimme i kare me “twon can madit atika”? Ngo ma Jehovah bimito ni watim i kare meno? Dok waromo yubbe nining kombeddi wek wabed lugen i kare me twon can madit atika?​—Mat. 24:21.

3. Ma lubbe ki Niyabo 17:5, 15-18, Lubanga bijwero “Babilon madit” nining?

³ Kwan Niyabo 17:5, 15-18. Kibijwero “Babilon madit” woko! Kit ma kitito kwede con, lobe pe gibibedo ki twero me juko gin ma bitimme i kare man. Pingo? ‘Pien Lubanga aye ma biketo miti man i cwinygi, wek gucob tamme.’ Meno obedo tam ango? Tam me jwero dini goba  ducu kadiwa dini pa Lukricitayo ata-ni. * Lubanga biketo tamme i cwiny “tung lee apar” pa “lee mo makwar.” Tung lee apar man cung pi gamente ducu ma gicwako ‘lee makwar-ri’​—ma obedo United Nations. (Yabo 17:3, 11-13; 18:8) Ka luloc me lobe gulokke i kom dini goba, meno bibedo lanyut ni twon can madit atika dong ocakke woko. Man bibedo gin me ur dok bikelo lworo i kom jo ducu ma gitye i lobo.

4. (a) Gin ango ma luloc lobo gibiwaco me gengo ngegi pi oto lweny i kom dini goba? (b) Ngo ma jo ma yam gitye lumemba me dini magi gibitimo?

⁴ Pe wangeyo tyen lok ma luloc lobo gibimiyone me gengo ngegi pi oto lweny i kom Babilon Madit. Guromo waco ni dini aye tye ka gengo lobe me bedo ki kuc pien giluto wigi i lok me wibye kare ki kare. Nyo gitwero waco ni dul ma tye i te dini gucoko lonyo madwong adada. (Yabo 18:3, 7) Nen calo lweny pa lobe magi i kom dini goba pe te lokke ni gibineko lumemba me dini magi ducu. Me ka meno, nen calo kibijwero te dul mo keken ma kubbe ki dini goba. Ka kityeko jwero dul magi, jo ma yam gitye lumembagi gibiniang ni lutela dinigi pe gucobo cikkegi. Pi meno lumemba magi gibikwero gin mo keken ma kubbe ki dini.

5. Cikke ango ma Jehovah omiyo madok i kom twon can madit atika, dok pingo?

⁵ Baibul pe tittiwa kare ma rom mene ma jwero Babilon Madit biterone, ento wangeyo ni pe birii. (Yabo 18:10, 21) Jehovah ocikke ni ‘ebijwiko nino’ me twon can madit atika wek ‘jo ma kiyerogi’ kacel ki luworo me ada gubwoti. (Mar. 13:19, 20) Ento ngo ma Jehovah bimito ni watim cakke ki i kare me twon can madit atika me o i Armagedon?

6. Pingo juko bedo lamemba me dini goba keken pe romo?

⁶ Kit ma wanyamo kwede i pwony ma  okato-ni, Jehovah mito ni jo ma giwore gupokke woko ki Babilon Madit. Ento man pe kwako juko bedo lamemba me dini goba keken. Omyero bene wacung matek pi woro me ada. Kong dong wanenu yo aryo ma watwero timo kwede man.

7. (a) Watwero medde ki cung matek pi rwom me kit matir pa Jehovah nining? (b) Pingo Jo Ibru 10:24, 25 tito ni omyero wacokke kacel, dok pingo man pire tek tutwal i kare-ni?

⁷ Mukwongo, omyero wacung matek pi rwom me kit matir pa Jehovah. Pe omyero wacwak tim tarwang me wi lobo man. Me labolle, pe waye tim tarwang i rwom mo keken, kadiwa nyom i kin co ki co nyo mon ki mon. (Mat. 19:4, 5; Rom. 1:26, 27) Me aryo, omyero wamedde ki woro Lubanga kacel ki Lukricitayo luwotwa. Watimo man i kabedo mo keken ma watwero cokke iye, kadi bed i Ot me Ker, nyo ka mitte i gangi pa omege nyo bene i mung. Kadi bed gin ango otimme, pe wabiweko cito i cokke pi worowa. Ki lok ada, omyero wamedde wunu ki cokke kacel ‘makatone kit macalo watye ka neno nino man dong tye ka nyiko cok-ki.’​—Kwan Jo Ibru 10:24, 25.

8. Kwenawa nen calo bilokke nining i anyim?

⁸ I kare me twon can madit atika-ni, kwena ma watito nen calo bilokke woko. I kare-ni, watye ka tito kwena maber me Ker pa Lubanga dok watute matek me loko dano wek gudok lulub kor Kricito. Ento i kare meno, waromo cako tito kwena mapek calo pee madongo. (Yabo 16:21) Watwero tito ni lobo pa Catan-ni dong cokcok-ki kibijwerone woko. I anyim wabiniang kwena ango kikome ma wabitito ki dok kit ma wabititone kwede. Tika pud wabitiyo ki yo me tito kwena ki pwony ma watiyo kwede pi mwaki makato miya acel-li? Nyo wabitic ki yo mukene? Omyero wakur wek wanen. I yo mo keken ma wabitito kwede kwena man, nen calo wabibedo ki mot me tito kwena me ngolo kop pa Jehovah ki tekcwiny!​—Ejek. 2:3-5.

9. Luloc lobo gitwero dok i kom kwenawa nining, ento gin ango ma watye ki gen pire?

⁹ Nen calo kwenawa bitugo cwiny luloc lobo me juko ticwa me tito kwena matwal. Kit ma wajenge i kom kony pa Jehovah i ticwa me pwony i kare-ni, wabimito konye i kare meno bene. Watwero bedo ki gen ni Lubanga biminiwa teko me cobo ticce.​—Mika 3:8.

10. Kit ma kitito kwede i Luka 21:25-28, pol pa dano gibidok nining i kom jami ma bitimme i kare me twon can madit atika?

¹⁰ Kwan Luka 21:25-28. I kare me twon can madit atika, dano gibibedo ki ur ka gineno jami ma onongo gitamo ni bibedo matwal ocako balle woko. Gibibedo ki “remcwiny madwong,” kun gilworo pi kwogi ka gidonyo i kare ma kwo bibedo matek loyo ducu i tekwaro pa dano. (Jep. 1:14, 15) I kare meno, kwo nen calo bibedo tek adada kadi wa pi jo pa Jehovah. Pien wan pe jo me lobo-ni, watwero kato ki i kwo matek adada. Watwero bedo labongo jami mogo ma mitte pi kwo.

11. (a) I nge jwero dini goba ducu, pingo dano ki luloc lobo ducu gibiketo cwinygi i kom Lucaden pa Jehovah? (b) Pingo omyero pe walwor twon can madit atika-ni?

¹¹ I nge kare mo, jo ma kijwero dinigi woko-ni nyeko bimakogi pien ni Lucaden pa Jehovah pud gitye ka medde  ki worogi. Watwero goyo kit ayelayela ma gibikelone i komwa, kadi wa ki i Intanet. Lobe kacel ki lalocgi Catan, gibikwerowa pien diniwa keken aye nongo obwot. Nongo pe gucobo mitigi me jwero dini ducu ki i wi lobo. Pi meno, gibiketo cwinygi dong i komwa keken. I kare meno, lobe gibidoko Gog me Magog. * Gibiribbe kacel me oto lweny i kom jo pa Jehovah. (Ejek. 38:2, 14-16) Twero kelo lworo me tam i kom jami magi kun pe wangeyo jami ducu ma bitimme kore ki kore. Ento tye gin acel ma wangeyo: Pe mitte ni walwor twon can madit atika-ni. Jehovah bititiwa jami ma myero watim me gwoko kwowa. (Jab. 34:19) Wabibedo ki kero me ‘tingo wiwa malo’ pien nongo wangeyo ni kare me ‘kokowa dong onyiko cok.’ *

12. “Lagwok ot ma lagen dok maryek” tye ka konyowa me yubbe pi jami ma bitimme i anyim nining?

¹² “Lagwok ot ma lagen dok maryek” tye ka yubowa me bedo lugen i kare me twon can madit atika. (Mat. 24:45) Gitimo man i yo mapol adada, ento kong wanenu yo acel: yubwa me gure madit me mwaka 2016 me o i mwaka 2018. Pwony ma kimiyogi i gure magi ocuko cwinywa me jingo kit mogo ma mitte ka wawoto ki nyiko cok ki nino pa Jehovah. Kong dong wanenu kit magi wiye wiye.

13. Watwero jingo genewa bot Jehovah nining, dok pingo omyero watim meno kombeddi?

¹³ Bedo lagen: Wi lok madit pi yub me gure madit pi mwaka 2016 onongo tye ni “Bed Lagen Bot Jehovah!” Yub man opwonyowa ni ka watye ki wat macok ki Jehovah, ci wabibedo lugen bote. Kipoyo wiwa ni watwero dongo wat macok ki Jehovah ka walego ki cwinywa ducu dok wakwano Baibul piwa kenwa. Timo meno miyo wabedo ki teko me loyo kadi wa ariya madit adada. Ka lobo pa Catan woto ki nyiko cok ki agikkine, watwero bedo labongo akalakala mo ni kibimedde ki temo genewa bot Lubanga ki Kerre. Dano nen calo gibimedde ki ngalowa. (2 Pet. 3:3, 4) Man twero timme tutwalle ka kitemo cungowa ma pe wacwako tung ka mo keken i lobo pa Catan. Omyero wajing genewa kombeddi wek wamedde ki bedo lugen i kare me twon can madit atika.

14. (a) Alokaloka ango ma bitimme ma lubbe ki omege ma gitye ka doro ticwa i lobo kany? (b) Pingo bimitte ni wabed lugen botgi i kare meno?

¹⁴ I kare me twon can madit atika-ni, alokaloka bitimme ma lubbe ki omege ma gitye ka doro ticwa i lobo kany. Kare bio ma jo ducu ma kiwirogi ma gitye i lobo kibicokogi i polo wek gunywak i lweny me Armagedon. (Mat. 24:31; Yabo 2:26, 27) Man te lokke ni lumemba me Lukiko Madit dong gibibedo pe i wi lobo kany kwedwa. Kadi bed kit meno, lwak dano mapol ata-ni gibimedde ki bedo labongo anyobanyoba mo. Omege ma gupore ki i kin romi mukene-ni aye gibidoro tic. Bimitte ni wanyut gennewa  bot omege magi ki minigi cwak kun bene walubo tira ma ginongo ki bot Lubanga. Meno mitte adada wek wabwot ki i lweny me Armagedon!

15. Watwero jingo kerowa me ciro can nining, dok pingo pire tek me timo man kombeddi?

¹⁵ Ciro Can: Wi lok madit pi yub me gure madit pi mwaka 2017 obedo ni “Pe iol Woko!” Yub man okonyowa me jingo kerowa me ciro can. Wapwonyo bene ni kerowa me ciro can pe jenge i kom bedo ki kwo maber. Watwero jingo kerowa me ciro can ka wajenge i kom Jehovah. (Rom. 12:12) Omyero wiwa pe owil i kom cikke pa Yecu ni: ‘Ngat ma biciro nio wa i agikki bilarre.’ (Mat. 24:13) Cikke man cuko cwinywa me medde ki bedo lugen kadi bed watye ka kato ki i kwo matek. Ka wakanyo peko ducu ma watye ka kato ki iye i kare-ni, niyewa bidongo bedo matek ma nongo twon can madit atika peya ocakke.

16. Gin ango ma weko wabedo ki tekcwiny, dok watwero jingo tekcwinywa i kare-ni nining?

¹⁶ Tekcwiny: Wi lok madit pi yub me gure madit me mwaka 2018 obedo ni “Bed ki Tekcwiny!” Yub man opoyo wiwa ni bedo ki tekcwiny pe jenge i kom tekowa nyo dirowa. Calo ciro can, tekcwiny me ada bene bino ka wajenge i kom Jehovah. Watwero pwonnye me jenge i kom Jehovah nining? Watimo man ki kwano Lokke nino ducu kun walwodo kit ma Jehovah olaro kwede jone i kare mukato. (Jab. 68:20; 2 Pet. 2:9) Ka luloc me lobo guoto lweny i komwa i kare me twon can madit atika, omyero wabed ki tekcwiny dok waket genwa i kom Jehovah makato kare mo keken. (Jab. 112:7, 8; Ibru 13:6) Ka wajenge i kom Jehovah i kare-ni, ci wabibedo ki tekcwiny ma mitte ka Gog me Magog ooto lweny i komwa. *

17. Pingo omyero pe walwor lweny me Armagedon? (Nen cal ma i pok ngeye.)

¹⁷ Kit ma kitito kwede i pwony mukato-ni, pol pa wan dong wakwo kwowa ducu  i kare me agikki. Ento watye bene ki gen me bwot i kare me twon can madit atika-ni. Lweny me Armagedon bikelo agikki me lobo-ni. Kadi bed kit meno, pe omyero walwor gin mo. Pingo? Pien man bibedo lweny pa Lubanga. (Car. 1:33; Ejek. 38:18-20; Jek. 14:3) Ka Jehovah omiyo lok, Yecu bitelo wi mony pa Lubanga me cito ka lweny. En bibino ki jo ma kiwirogi kacel ki lumalaika milion mapol. Gin ducu gibilweny i kom Catan, jogine, ki mony ma i wi lobo kany.​—Dan. 12:1; Yabo 6:2; 17:14.

18. (a) Gin ango ma Jehovah ocikke pire? (b) I yo ango ma Niyabo 7:9, 13-17 miniwa tekcwiny i kom anyim?

¹⁸ Jehovah dong otyeko cikke ni: “Pe tye jami lweny mo ma giteto pi lweny i komi ma bicobo ticce.” (Ic. 54:17) “Lwak dano mapol ata” ma gubedo luwor Jehovah ma lugen gibikato makwo ki i ‘twon can madit atika-ni’! Dok gibimedde ki tic pi Jehovah pi naka. (Kwan Niyabo 7:9, 13-17.) Baibul miniwa tyen lok mapol me bedo ki gen ni kibilarowa i anyim! Wangeyo ni “[Jehovah] gwoko jo ma lugen.” (Jab. 31:23) Jo ducu ma gimaro dok gipako Jehovah gibibedo ki yomcwiny me neno ka en lonyo nyinge maleng-ngi.​—Ejek. 38:23.

19. Mot mamwonya ango ma tye ka kurowa i anyim?

¹⁹ Tam kong kit ma kitwero coyo kwede 2 Temceo 3:2-5 ka onongo tye ka tito kit pa dano i lobo manyen ma Catan pe lalocce. (Nen bok ma wiye tye ni “ Kit pa Dano i Kare Meno.”) Omego George Gangas, * ma otiyo macalo lamemba me Lukiko Madit, oloko iye kit man: “Lobo pud dong bibedo ber ya ka dano ducu tye omego nyo lamego! Ma cokcok-ki ibibedo ki mot me kwo i lobo manyen. Ibimedde ki bedo kwo teke Jehovah pud tye kwo. Wabibedo kwo pi naka.” Man pud dong obedo gen mamwonya ya!