1. Ngo ma Jehovah twero timone me cobo yubbe?

JEHOVAH twero doko gin mo keken ma mitte wek ecob mitine. Me labolle, Jehovah odoko Lapwony, Lakwe Cwiny, ki Latit Kwena, i kin jami mapol mukene. (Ic. 48:17; 2 Kor. 7:6; Gal. 3:8) Kadi bed kit meno, en pol kare tiyo ki dano me cobo yubbe. (Mat. 24:14; 28:19, 20; 2 Kor. 1:3, 4) Jehovah twero bene miniwa ryeko ki teko ma wamito wek wadok gin mo keken ma mitte me cobo yubbe. Man ducu tye but tyen lok me nying Jehovah, kit ma lukwan mapol giniang kwede.

2. (a) Pingo i kine mukene wabedo ki akalakala ka Jehovah ada tye ka tic kwedwa? (b) Ngo ma wabinyamo i pwony man?

² Wan ducu wamito ni Jehovah oti kwedwa, ento jo mogo gikalo akala ka ada Jehovah tye ka tic kwedgi. Pingo? Pien giwinyo calo mwakagi, kwo ma gitye iye, nyo kerogi gengogi ki tic matek. Ki tungcel, jo mukene guyeng woko ki gin ma gitye ka timone dok pe gineno calo mitte me medo ticgi. I pwony man, wabinyamo kit ma Jehovah twero miyo ki ngat mo keken jami ma mitte me cobo mitine. I nge meno, wabineno lok mogo me Baibul ma nyuto kit ma Jehovah omiyo ki luticce​—ma co wa ki mon—​miti ki teko me tic. I agikkine, wabineno kit ma watwero weko Jehovah tiyo kwedwa.

3. Ma lubbe ki lok ma tye i Jo Pilipi 2:13, i yo ma nining ma Jehovah miniwa miti me tic?

³ Kwan Jo Pilipi 2:13. * Jehovah romo miniwa miti me tic. En twero timo man nining? Romo bedo ni waniang ni kony mo mitte i kacokkewa. Nyo luelda gitwero kwano waraga ma oa ki i jang gang kal ma tittiwa ni kony mitte i kacokke mukene. Meno twero tugo cwinywa me pennye kekenwa ni, ‘Kony ango ma an atwero miyone?’ Gwok nyo kiminiwa mot me tic mo ma pe yot, dok watye ka paro ka ce watwero timone maber. Nyo i nge kwano Lok pa Lubanga, waromo pennye ni, ‘Aromo tic ki ginacoya man me konyo jo mukene nining?’ Jehovah pe bidiyowa me timo gin mo keken. Ento ka en oneno ni watye atera me ngine kekenwa, Jehovah twero miniwa miti me cobo gin ma watamo pire-ni.

4. Jehovah twero miniwa teko me tic nining?

⁴ Jehovah bene twero miyo botwa teko me tic. (Ic. 40:29) En twero miniwa cwiny mere maleng wek odong diro ma watye kwede con. (Nia 35:30-35) Jehovah twero tic ki dulle me pwonyowa kit me cobo tic mogo. Ka pe ingeyo kit me timo tic moni, bedo ber ka ipenyo pi kony. Medo i kom meno, bed agonya me penyo Wonwa me polo pi ‘teko madwong.’ (2 Kor. 4:7; Luka 11:13) Baibul tye ki labol pa co ki mon mapol ma Jehovah okonyogi kun miyo botgi miti ki teko me tic. Ka wawoto ki neno labol magi, tam i kom kit ma Jehovah twero tic kwedi bene calo gin.

5. Gin ango ma wapwonyo ki i kit ma Jehovah otiyo kwede ki Moses me laro jone, ki dok awene ma kitiyo kwede?

⁵ Jehovah oweko Moses odoko lalar pa jo Icrael. Ento awene ma Jehovah ocako tic kwede? Tika kitiyo ki Moses i kare ma en onongo winyo ni epore mada i nge ‘pwonyo ryeko ducu pa Luejipt?’ (Tic 7:22-25) Pe kit meno. Jehovah otiyo ki Moses i kare ma dong En otyeko yubo Moses odoko dano ma mwol dok ma pe keco oyot. (Tic 7:30, 34-36) Jehovah omiyo ki Moses tekcwiny me cung i nyim laloc matek loyo i Ejipt. (Nia 9:13-19) Ngo ma wapwonyo ki i kit ma Jehovah otiyo kwede ki Moses, ki dok awene ma kitiyo kwede? Jehovah tiyo ki jo ma gilubo kite dok gijenge i kome pi teko.​—Pil. 4:13.

6. Ngo ma wapwonyo ki i kit ma Jehovah otiyo kwede ki Barjilai me konyo Kabaka Daudi?

⁶ Mwaki miya mapol i nge meno, Jehovah otiyo ki Barjilai me konyo Kabaka Daudi. Daudi kacel ki lwak ma gitye kwede onongo ‘kec obedo ka nekogi, omiyo guol matek, orwo pii bene onekogi’ i kare ma gitye ka ngwec me laro kwogi ki i cing wod pa Daudi ma nyinge Abcalom. Barjilai, laco ma mwakane dong dit, oketo kwone ki kwo pa jo mukene ka mading wek emi kony bot Daudi ki jo ma gitye kwede. Barjilai pe otamo ni kit ma dong eti woko-ni, konye pe bot Jehovah. Me ka meno, en otiyo ki jamine me konyo lutic pa Lubanga ma gitye i can. (2 Cam. 17:27-29) Pwony ango ma wanongo ki i gin mutimme man? Labongo paro pi mwakawa, Jehovah twero tic kwedwa me cobo miti pa luye luwotwa ma gitye i kacokkewa nyo i lobo mukene, ka gipe ki jami ma mitte pi  kwo. (Car. 3:27, 28; 19:17) Kadi bed pe watwero miyogi kony atir atir, gwok nyo waromo miyo mot pi ticwa ma kwako wi lobo ducu, wek kiti kwede me miyo kony i cawa ki kabedo ma mitte.​—2 Kor. 8:14, 15; 9:11.

7. Jehovah otiyo ki Cimeon nining, dok ngeyo lok meno cuko cwinywa nining?

⁷ Jehovah ocikke bot Cimeon, laco muteggi ma bedo i Jerucalem, ni en pe bito wang ma oneno Meciya. Cikke meno nen calo ocuko cwiny Cimeon matek, pien en obedo ka kuro bino pa Meciya pi mwaki mapol. Jehovah omiyo mot bot Cimeon pi ciro can ki nyuto niye. Nino mo acel, en obino i ot pa Lubanga “kun cwiny maleng aye tele.” Ki kunu, Cimeon oneno latin Yecu dok Jehovah otiyo kwede me lok macalo lanebi kun tito gin ma bitimme i kom latin man ma bidoko Kricito-ni. (Luka 2:25-35) Kadi bed Cimeon nen calo oto ma peya Yecu ocako ticce me pwony, en obedo ki pwoc ni Jehovah otiyo kwede i yo man. Dok i kare me anyim, en binongo jami mabeco mapol! I lobo manyen, laco ma lagen meno bineno kit ma loc pa Yecu bikelo kwede mot bot dano ducu ma i wi lobo. (Acak. 22:18) Wan bene watwero bedo ki pwoc pi mot mo keken ma Jehovah miniwa i ticce.

8. Jehovah twero tic kwedwa nining kit ma otiyo ki Barnaba?

⁸ I cencwari me acel K.M., laco mo ma cinge yot ma nyinge Yucepu onongo tye atera wek Jehovah oti kwede. (Tic 4:36, 37) Nen calo Yucepu onongo maro kweyo cwiny dano tutwal mumiyo lukwena gulwonge ni Barnaba, ma te lokke ni “ngat ma jingo cwiny dano.” Me labolle, i kare ma Caulo odoko Lakricitayo, omege mapol gubedo ki lworo me cito bote pi timme macon ma obedo ka unu kwede kacokke. Kadi bed kit meno, Barnaba okonyo Caulo dok okweyo cwinye, dok Caulo nen calo opwoyo kica ma kinyutte-ni adada. (Tic 9:21, 26-28) Lacen, luelda me kacokke me Jerucalem guneno ni mitte ni kicwal ngat mo wek ocit ocuk cwiny omege ma gibedo wa i Antiokia ma i lobo Ciria. Anga ma gucwalo? Barnaba! Guyero maber. Ginacoya waco ni Barnaba “ocuko cwinygi me moko i kom Rwot matek ki cwinygi ducu.” (Tic 11:22-24) I kare-ni bene, Jehovah twero konyi me bedo “ngat ma jingo cwiny” Lukricitayo luwoti. Me labolle, en romo tic kwedwa me kweyo cwiny jo ma gurwenyo danogi me amara i to. Nyo twero tugo cwinywa me limo nyo goyo cim bot ngat mo ma kome lit nyo cwinye otur wek wanywak kwede lok mogo me kica. Tika ibiweko Jehovah tiyo kwedi kit ma otiyo ki Barnaba?​—1 Tec. 5:14.

9. Pwony ango ma wanongo ki i kit ma Jehovah okonyo kwede omego ma nyinge Vasily me doko laelda mucwiny?

⁹ Jehovah okonyo omego mo ma nyinge Vasily me doko laelda mucwiny. I kare ma kicimo Vasily macalo laelda ma onongo en tye ki mwaka 26, en obedo ki lworo ni pe epore me konyo jo me kacokke, tutwalle omege ki lumege ma gitye ka wok ki i kwo matek. Kadi bed kit meno, en onongo pwonye maber ki i Cukul me Ticwa me Ker. Vasily otiyo matek me dongo i yo me cwiny. Me labolle, en ocoyo piny yubbe mogo matino tino. Ma en owoto ki cobo yubbe magi ki acel acel, tekcwinye bene owoto ki medde. I kare-ni en waco ni: “Jami ma onongo yam mina lworo dong kombeddi mina yomcwiny aye. Ka Jehovah okonya me nongo  wang ginacoya mupore me kweyo cwiny omego nyo lamego mo i kacokke, anongo yomcwiny madwong.” Omege, ka ilubo lanen pa Vasily ci imine wek Jehovah oti kwedi, en twero mini kero me cobo tic ma pigi tego i kacokke.

10. Gin ango ma Abigail otimo, dok pwony ango ma waromo nongo ki i lanene?

¹⁰ Kabaka Caulo onongo tye ka yenyo Daudi ki jo ma lugen bote me aneka, pi meno onongo gimito kony. Jo pa Daudi gulego Laicrael mo ma olony ma nyinge Nabal pi cam mo manok ma laco-ni twero miyo botgi. Guwinyo agonya me penyo Nabal pien onongo gubedo ka gwoko romine i tim. Ento Nabal ma laworo-ni okwero miyogi gin mo keken. Akemo omako Daudi matek mumiyo en ocako yubbe me neko Nabal ki co ducu ma gitye i ode. (1 Cam. 25:3-13, 22) Ento, Abigail dako pa Nabal, onongo ryek dok mwonya adada. En onyuto tekcwiny madit ki cito bot Daudi, ci oryebbe piny ka tyene kun bako doge bot Daudi ni pe oting alii ki dwoko gin marac i kom marac. Ki mwolo, en omiyo ki Daudi tam ni owek jami ducu i cing Jehovah. Lok me mwolo ki ryeko pa Abigail ogudo cwiny Daudi. En oniang ni Jehovah aye ocwalo Abigail. (1 Cam. 25:23-28, 32-34) Abigail onongo odongo kit mogo mabeco ma oweko Jehovah otiyo kwede. I yo acel-lu, lumegiwa i kare-ni ma gudongo kit mabeco calo ryeko ki mwolo giweko Jehovah tiyo kwedgi me jingo jo me odigi ki jo me kacokke.​—Car. 24:3; Tito 2:3-5.

11. Tic ango ma anyira pa Calum gutimo, dok angagi ma gitye ka lubo lanengi i kare-ni?

¹¹ Mwaki miya mapol i nge meno, anyira pa Calum gubedo i kin jo ma Jehovah otiyo kwedgi me yubo cel me Jerucalem. (Nek. 2:20; 3:12) Kadi bed wongi onongo obedo wod ker, anyira pa Calum gutiyo tic matek dok ma oketo kwogi ka mading. (Nek. 4:15-18) Pe watwero porogi ki ludito me awora pa jo Tekoa ma “pe guye tiyo tic mapek”! (Nek. 3:5) Go kong yomcwiny ma anyira pa Calum gubedo kwede i kare ma kityeko tic man i nino 52 keken! (Nek. 6:15) I karewa-ni, lumege ma gudyere cwinygi bedo yom me tiyo tic mo ma kite dok pat pi Lubanga​—tic me gero ki roco odi ma kitiyo kwede pi woro Jehovah. Dirogi, mit komgi, ki gennegi pire tek adada me cobo tic man.

12. Jehovah twero tic kwedi nining kit ma en otiyo ki Tabica?

¹² Jehovah otugo cwiny Tabica me “tiyo tic mabeco mapol mada,” tutwalle me konyo mon to. (Tic 9:36) Pi yot cinge ki kicane, dano mapol gukok pire i kare ma oto. Ento gubedo ki yomcwiny madwong adada i kare ma lakwena Petero ocerre. (Tic 9:39-41) Pwony ango ma wanongo ki bot Tabica? Kadi bed pud watino nyo watii, wabedo co nyo mon, watwero timo jami ma konyo omegiwa ki lumegiwa.​—Ibru 13:16.

13. Jehovah otiyo ki laminwa mo ma lalewic ma nyinge Ruth nining, dok ngo ma en owaco?

¹³ Laminwa mo ma lalewic adada ma nyinge Ruth onongo mito doko lamiconari. I kare ma en pud anyaka matidi, en onongo rune aruya i dog ot ki i dog ot ka poko trak. En otito ni: “Onongo amaro tic man matek.” Kadi bed kit meno, en onongo ni lok ki dano i dog otgi ki tito botgi lok i kom Ker pa Lubanga tek adada. Kadi bed en lalewic, Ruth odoko painia marii i kare ma en tye ki mwaka 18. I  mwaka 1946, en obedo i Cukul me Gilead dok lacen otiyo macalo lamiconari i lobo Hawaii ki Japan. Jehovah otiyo kwede i yo magwar me tito kwena maber i lobe magi. I nge tic macalo latit kwena cokcok dong pi mwaki 80, Ruth owaco ni: “Jehovah kare ducu aye ma omina teko. En okonya me loyo lewic. Aye labongo akalakala mo ni Jehovah twero tic ki ngat mo keken ma oketo genne i kome.”

14. Ma lubbe ki Jo Kolocai 1:29, ngo ma myero watim wek Jehovah oti kwedwa?

¹⁴ Nicakke con i tekwaro pa dano, Jehovah oweko luticce gucobo tic mapatpat. Ngo ma en biweko in idoko? Polle jenge i kom mitini me jalle me tic matek. (Kwan Jo Kolocai 1:29.) Ka ijalle, Jehovah twero weko idoko latit kwena ma kome mit, lapwony mucwiny, lakwe cwiny dano, latic ma ladiro, larem ma miyo kony, nyo gin mo keken ma mitte me cobo mitine.

15. Ma lubbe ki tira ma tye i 1 Temceo 4:12, 15, gin ango ma omege matino i kare-ni myero guleg Jehovah wek okonygi me timone?

¹⁵ Wun omege ma pud wutye bulu kono? Watye ki can co ma komgi tek ma gitwero medo ticgi kun gitiyo macalo lukony kor tic. I kacokke mapol, luelda welgi kato wel lukony kor tic. Wun omege matino, tika wuromo dongo miti me medo ticwu i kacokke? I kine mukene omege mogo giwaco ni, “Cwinya yom me tic mere macalo latit kwena keken.” Ka meno aye kit ma iwinyo kwede, leg Jehovah wek okonyi me dongo miti me bedo ma ipore me tic macalo lakony kor tic ki me mini teko me timo jami ducu ma itwero i ticce. (Latit. 12:1) Wun bulu, wamito kony ki botwu!​—Kwan 1 Temceo 4:12, 15.

16. Ngo ma omyero waleg Jehovah pire, dok pingo?

¹⁶ Jehovah twero weko idoko gin mo keken ma mitte me cobo mitine. Pi meno, penye wek omini miti me timo ticce, dok ilege me mini teko ma imito me cobo tic meno. Kadi bed pud itidi nyo dong iti woko, ti ki cawani, keroni, ki jamini me woro Jehovah kombeddi. (Latit. 9:10) Pe iwek lworo nyo tam ni pe itwero tic owek ikeng mot me medo ticci pi Jehovah. Pud dong watye ki mot madit me timo kadi gin mo matidi me kelo deyo ma mitte bot Wonwa ma lamar-ri!