NGAT ma byeko kit ma piny bibedo kwede pol kare neno cal ma tye i kompiuta ma nyuto bino pa kot ki yamo. Ka en oneno yamo kot magwar tye ka bino i kabedo ma dano pol iye, en cikogi oyotoyot. En timo man pien paro pigi.

I yo acel-lu, Jehovah tye ka ciko dano ducu pi “yamo kot” magwar loyo mo keken ma guwinyo pire i ripot pa jo ma gibyeko kit ma piny lokke kwede. En tye ka timo meno nining? Dok pingo watwero bedo ki gen ni en miyo kare muromo bot dano me jolo lokke? Me nongo lagam pi lapeny magi, kong wacaku ki neno kit ma Jehovah ociko kwede dano i kare mukato angec.

I kare me Baibul, Jehovah otito pi kodo pa “yamo kot” mapatpat nyo kop ma en bingolo i kom jo ma gikwero lubo cikke akaka. (Car. 10:25; Jer. 30:23) I kare magi ducu, en ociko jo ma pe luwiny con dok owaco botgi gin ma myero gutim wek gulub cikke. (2 Luker 17:12-15; Nek. 9:29, 30) Me konyo dano wek gutim alokaloka ma mitte, en pol kare onongo tiyo ki luticce ma lugen i wi lobo kany me tito pi ngolo koppe wek dano gutim gin ma mitte oyotoyot.​—Amoc 3:7.

Nua obedo ngat acel ma Lubanga otiyo kwede me tito pi ngolo koppe. Pi mwaki mapol, en otiyo ki tekcwiny kun ciko lutim tarwang ki lutim bwami me karene pi Pii Aluka ma tye ka bino. (Acak. 6:9-13, 17) En bene otito ki dano gin ma myero gutim wek gubwot ki i Pii Aluka​—pi meno lacen kilwonge ni “latit lok me kit ma atir.”​—2 Pet. 2:5.

Kadi bed Nua otiyo matek, jo ma gukwo i kare ma Pii Aluka peya obino gucayo kwena ma Lubanga omine-ni. Gunyuto ni pe gitye ki niye. Macalo adwogine, guto i kare ma Pii Aluka opong “ci omologi woko ducu.” (Mat. 24:39; Ibru 11:7) I kare ma kot ocako cwer, onongo pe giromo kok i kom Lubanga ni pe kititigi lok con.

I kine mukene, Jehovah ociko dano ma nongo odong kare manok keken wek “yamo kot” magwar me ngolo koppe ocakke. Kadi bed kit meno, en oneno ni kimiyo kare muromo pi jo ma kingolo kop i komgi-ni me loko kitgi. Me labolle, en otito con pi Pwod Apar ma onongo bipoto i kom jo Ejipt. Macalo labol, Jehovah ocwalo Moses ki Aron me ciko Parao ki luticce i kom pwod me abiro, ma onongo bibedo kot ma cwer ki pee mapek. Kit ma onongo pee bicwer orwone, tika Lubanga omiyogi kare muromo me gwokke wek gubwot ki i pwod man? Baibul tito ni: “Jo ma i kin lutic pa Parao ma gulworo lok pa Rwot [Jehovah], gumiyo lwak opiigi ki Iimgi guringo gularo odi; ento jo ma pe guwinyo lok pa Rwot guweko opiigi ki limgi i olet.” (Nia 9:18-21) Onen ka maleng ni, Jehovah omiyo lok me ciko dano con, dok man oweko jo ma gutimo gin ma mitte oyotoyot gubwot.

Parao ki luticce bene kicikogi ma peya pwod me apar-ri otimme. Kadi bed kit meno, ki minggi gukwero winyo lok. (Nia 4:22, 23) Macalo adwogine, guneno kit ma lutino kayogi guto kwede. Meno okelo cwercwiny madit adada! (Nia 11:4-10; 12:29) Tika onongo kare tye muromo pigi me lubo lok ma kitito botgi? Ee! Moses ociko Luicrael con i kom pwod me apar ma onongo tye ka bino dok otittigi gin ma myero gutim wek gular jo me odigi. (Nia 12:21-28) Dano adi ma guwinyo lok pa Moses ci gubwot? Ma  lubbe ki byek mogo, jo ma welgi romo milion adek, Luicrael kacel ki “lwak kwa rok murubbe” ma i kine tye iye Luejipt ki lurok mukene, gubwot ki i ngolo kop pa Lubanga ci gua woko ki i Ejipt.​—Nia 12:38.

Kit ma labol magi onyuto kwede, Jehovah kare ducu miyo kare muromo ki dano me winyo lokke me ngolo kop. (Nwo. 32:4) Pingo Lubanga timo kit meno? Lakwena Petero otito ni Jehovah “pe mito ni ngat mo orweny woko matwal, ento mito ni jo ducu guo i ningut.” (2 Pet. 3:9) Ada, Lubanga onongo paro pi dano. En onongo mito ni gungut i kom balgi dok gutim alokaloka ma mitte ma peya nino me ngolo koppe oromo.​—Ic. 48:17, 18; Rom. 2:4.

I kare-ni bene, dano ducu myero guwiny lok me ciko dano ma kitye ka titone i wi lobo ducu. I kare ma Yecu onongo tye i lobo, en ociko ni lobo me kare-ni kibijwero woko i kare me “twon can madit atika.” (Mat. 24:21) Ma lubbe ki lok me ngolo kop meno, en otito pi jami ma bitimme kore ki kore, ma lulub kore gibineno ka kare meno woto ki nyiko cok. Dong Yecu otito pi jami madongo ma waneno gitye ka timme i wi lobo i kare-ni.​—Mat. 24:3-12; Luka 21:10-13.

Ma lubbe ki lok pa lanebi meno, Jehovah tye ka lego dano ducu me mine i te locce. En mito ni jo ducu ma gin luwiny gubed ki kwo maber kombeddi dok gunong mot me bedo i lobo manyen, ka ma kit ma atir bibedo iye. (2 Pet. 3:13) Jehovah mito ni dano ducu gudong niye i kom cikkene. En konyogi me timo meno ki miyogi kwena ma bilaro kwogi. Kwena man kilwongo ni “kwena maber me ker pa Lubanga,” ma Yecu owaco ni “gibitito i wi lobo ducu, me bedo caden bot rok ducu; ka dong lacen agikki piny bibino.” (Mat. 24:14) Lubanga oyubo jo ma giwore i yo me ada me miyo “caden” nyo tito kwenane meno i lobe makato 240. Jehovah mito ni jo mapol guwiny lokke wek gubwot ki i “yamo kot” magwar me ngolo koppe.​—Jep. 1:14, 15; 2:2, 3.

Lapeny ma pire tek pe obedo ka Jehovah miyo ki dano kare muromo me winyo lokke me ciko dano. Lanyut ma tye nyuto ni en kare ducu miyo kare muromo ki dano. Me ka meno, lapeny ma pire tek tye ni: Tika dano gibiwinyo lok pa Lubanga me cikogi ma kare pud tye? Dong wan macalo lutit kwena pa Lubanga myero wamedde ki konyo jo mapol kit ma watwero wek gubwot ki i agikki me lobo me kare man.