Wek guti tic man me tito kwena, onongo mitte ni Lutino Kwan me Baibul gubed ki tekcwiny. Onongo bimitte ni gutit “lok me kwena maber” bot jo mamwol kun bene gitito pi “kare me culo kwor” bot jo ma kitgi raco.

Omego J. H. Hoskin, ma onongo bedo i lobo Canada, omiyo caden ki tekcwiny kadi bed kibedo ka keto aunauna i komgi. I acakki me mwaka 1921, en orwatte ki lapwony dini mo. Omego Hoskin ocako lok ki laco man kun waco ni: “Omyero wanywak lok me Baibul ki yomcwiny. Dok kadi bed tamwa pe orwatte i kom pwony mo, pud watwero giko lokwa ki kuc ma nongo pud watye lurem.” Ento tika meno otimme? Omego Hoskin wiye po ni: “Onongo pud waloko pi dakika mo manok keken ci lapwony dini man oloro doggola ci ocanyo matek adada ma atamo ni marayane bipoto wa i ngom.”

Lapwony dini man odange ni: “Pingo pe icit ilok ki lukampiri?” Omego Hoskin pe ogamo lokke meno, ento i kare ma en tye ka a ki gang pa laco man, en obedo ka tam ni, ‘Ki i cwinya abedo ka tamo ni atye ka lok ki lakampiri!’

I kare ma lapwony dini man tye ka pwonyo dano i kanicane orwone, en owaco lok goba mapol i kom Omego Hoskin. Omego Hoskin wiye po ni: “En owaco ki dano ma i kanicane ni an abedo lagoba madit loyo ma pud dong obino i taun meno dok ni omyero kineka woko.” Ento man pe ojuko ominwa-ni, en omedde ki tito kwena dok oloko ki dano mapol. En owaco ni: “Anongo mit pa tito kwena i kabedo man adada. Jo mogo bene guwacca ni, ‘Angeyo ni in itye ka tiyo tic pa Lubanga!’ dok gujalle me mina jami ma amito.”

Me konyo dano niang Baibul maber, Lutino Kwan me Baibul onongo kare ki kare gigoyo lapeny me Baibul kacel ki lagamme i magajin ma i kare-ni walwongo ni Awake! Onongo bene tye lapeny me Baibul pi jo matino ma lunyodo twero tic kwede me nyamo lok me Baibul ki lutinogi. Lunyodo onongo “gipenyo lutinogi lapeny magi dok gikonyogi me nongo lagamme i Baibul.” Lapeny mogo calo “Bukke adi ma tye i Baibul?,” onongo pwonyo jami mayotyot ma tye i Baibul. Lapeny mukene  calo, “Tika Lakricitayo me ada myero onge ni ebikato ki i aunauna i yo mo olo?,” onongo konyo jo matino me doko lutit kwena ma cwinygi tek.

Onongo bene tye lapeny me Baibul ki lagamme pi jo ma olo dong gitye ki ngec i kom Baibul. Lagam magi onongo nonge i buk me acel i kin bukke me Studies in the Scriptures. Jo mapol gupwonyo jami mapol ki i lapeny magi, ento lacen kimiyo lok angeya ni kibijuko goyo lapeny magi woko. Pingo kijuko?

Omege ma onongo gitye ka doro ticwa guniang ni mitte ki dano me pwonyo lok me Baibul kore ki kore. Pi meno, gucwalo woko buk manyen ma wiye tye ni The Harp of God i Novemba 1921. Jo ma gunyuto miti me kwano Baibul onongo gicako yub mo me kwano Baibul ma gitwero timone pigi kengi. Yub me kwano Baibul man okonyo dano me pwonyo lok i kom yub pa Lubanga me miyo ki dano kwo ma pe tum. Yub me kwano Baibul man onongo woto nining?

Ka ngat mo ogamo kopi me buk man, onongo bene kicwale yub me kwan ma kigoyo i kom kad mo matidi. I cabit ma lubo, kicwale kad ma tye ki lapeny madok i kom jami ma en okwano. Kad man onongo gik ki yub me kwan pi cabit ma lubo.

Cabit ducu pi cabit 12, latin kwan man onongo nongo kad manyen ki i ka gamo waraga (posta) ma kacokke macok kwede aye ocwalo. Pol kare jo muti nyo jo ma pe gitwero tito kwena i ot ki ot aye onongo gicwalo kad man. Me labolle, Anna K. Gardner, ma bedo i Millvale, Pennsylvania, i lobo Amerika owaco ni: “I kare ma kicwalo woko The Harp of God, man omiyo ki lamera Thayle, ma tye langolo, tic me atima me cwalo kad ma tye ki lapeny magi cabit ki cabit.” Ka latin kwan otyeko yub me kwano Baibul man, ngat mo ma i kacokke onongo lime wek omedde ki pwonye jami mapol madok i kom Baibul.

I agikki me mwaka meno, Omego J.F. Rutherford ocwalo waraga bot kacokke ducu. En ocoyo i waragane ni “kwena madok i kom Ker-ri i mwaka-ni oo bot jo mapol adada dok okonyo dano mapol makato i mwaki ducu mukato angec.” Ci en omedo ni: “Tic pud tye mapol me atima. Wacuko cwiny jo mukene wek gubin gunywak kacel kwedwa i tic man mamwonya-ni.” Onen ka maleng ni Lutino Kwan me Baibul gutimo gin ma en owaco. I mwaka 1922 gutito kwena me Ker-ri ki tekcwiny makato mwaka mo keken mukato angec.