1. Pingo dano mapol wigi tye ma onywene?

TYE dini mapol adada i kare-ni ma giwaco ni gibedo Lukricitayo dok ni giworo Lubanga i yo ma yomo cwinye. Meno aye tyen lok mumiyo dano mapol wigi onywene woko! Gipennye kekengi ni, “Tika tye dini acel me ada, nyo dini ducu yomo cwiny Lubanga?” Tika watye labongo akalakala mo keken ni wan macalo Lucaden pa Jehovah wapwonyo lok ada dok ni yo ma waworo kwede Jehovah aye obedo yo ma yomo cwinye? Tika twere me bedo ki gen matek kit meno? Kong dong wanyamu lanyut ma moko.

2. Ma lubbe ki 1 Jo Tecalonika 1:5, pingo lakwena Paulo onongo tye ki gen matek ni etye i ada?

² Lakwena Paulo onongo tye ki gen matek adada ni enongo ada. (Kwan 1 Jo Tecalonika 1:5.) En pe oye meno pien ni onongo weko en winyo maber. Paulo onongo obedo dano ma kwano Lok pa Lubanga i yo matut. En onongo ye ni: ‘Ginacoya ducu ma yam gicoyo, gicoyo pi teko pa cwiny pa Lubanga.’ (2 Tem. 3:16) Gin ango ma en opwonyo ki i kwanne? Ki i Ginacoya, Paulo onongo lanyut ma moko ni Yecu obedo Meciya ma kiciko pire—lanyut ma lutela dini pa Lujudaya gukwero woko. Lutela dini magi onongo giwaco ni gicung pi Lubanga ento jami ma onongo gitimo nyuto ka maleng ni gukwero Lubanga woko. (Tito 1:16) Paulo pe obedo calo co magi. En pe oyero but Lok pa Lubanga ma ebilubo ki ma pe ebilubo. En onongo tye atera me pwonyo ki keto i tic Lok pa Lubanga ducu.—Tic 20:27.

3. Wek wabed ki gen matek, tika mitte ni kong wanong lagam pi lapenywa ducu? (Nen bok ma wiye tye ni “ Tam Kacel ki Tic pa Jehovah—‘Pol Makato ma Pe Gitwero Kwano Welgi.’”)

 ³ Jo mogo gitamo ni dini me ada myero obed atera me gamo lapeny ducu, kadi wa lapeny ma pe kigamo atir atir i Baibul. Tika meno obedo gin ma twere? Nen kong labol pa Paulo. En ocuko cwiny luye luwote me bedo ki “wang mabit me neno jami ducu,” ento en bene oye ni tye jami mapol ma en pe eniang iye. (1 Tec. 5:21) Paulo ocoyo ni: “Wangeyo dul mogo manoknok keken,” ci omedo lokke ni, “gin ma waneno kombeddi cal ki tipo ma nen ribiribi i kiyo.” (1 Kor. 13:9, 12) Paulo onongo pe niang jami ducu; wan i kare-ni bene watye kit meno. Ento Paulo onongo niang lok ada i kom Jehovah kacel ki yubbe. En onongo tye ki ngec muromo ma oweko en moko ni etye i ada!

4. Watwero jingo genwa nining ni wanongo ada, dok gin ango ma wabipwonyo madok i kom Lukricitayo me ada?

⁴ Yo acel ma watwero jingo kwede genwa ni wanongo ada aye ki poro yo me woro ma Yecu oweko ki yo me woro pa Lucaden pa Jehovah i kare-ni. I pwony man wabineno ni Lukricitayo me ada (1) gimiyo woro ki Jehovah keken, (2) giketo deyo i nying Lubanga, (3) gimaro ada, dok (4) gimare matek i kingi.

5. Gin ango ma watwero pwonyo ki bot Yecu madok i kom yo mupore me woro Lubanga, dok watwero keto pwony meno i tic nining?

⁵ Kit macalo Yecu onongo maro Jehovah matek-ki, en omiyo woro ki Jehovah keken, i kare ma en tye i polo ki i kare ma en tye i lobo kany. (Luka 4:8) En opwonyo lupwonnyene me timo kit  meno. Yecu kacel ki lupwonnyene ma lugen pe gutiyo ki cal apaya mo keken i worogi. Kit macalo Lubanga obedo cwiny, pe tye gin mo keken ma dano gitwero yubo ma nen calo Lubanga! (Ic. 46:5) Ento yubo cal pa jo maleng ki lega botgi kono? I cik me aryone i kin Cik Apar, Jehovah owaco ni: ‘Pe iti cal apayani mo, nyo cal gin ma tye malo i polo, nyo ma tye piny i wi lobo. Pe iryebbe piny i nyimgi.’ (Nia 20:4, 5) Lok meno niang iye yot adada bot jo ma gimito yomo cwiny Lubanga.

6. Yo me woro ango ma Lucaden pa Jehovah gilubo i kare-ni?

⁶ Luco lok me tekwaro giwaco ni i kare pa lukwena, Lukricitayo onongo pe gitiyo ki cal apaya i worogi. Me labolle, buk mo acel ma tito lok me tekwaro owaco ni Lukricitayo me kare macon “onongo gibikwero woko lajwac” tim man me woro cal. I kare-ni, Lucaden pa Jehovah gilubo yo me woro ma Lukricitayo me cencwari me acel guweko. Pe walego bot cal ma kiyubo pa “jo maleng” nyo lumalaika; pe walego bene kadi wa bot Yecu. Dok pe wagoyo calut i kom bandera nyo watimo gin mo keken ma nyuto ni watye ka miyo woro ma omyero wami ki Lubanga bot gamente. Kadi bed gin ango otimme, wan wamoko tamwa me lubo lok pa Yecu ni: “Wor Rwot [Jehovah] Lubangani dok bene iti pire keken.”—Mat. 4:10.

7. Apokapoka ango ma nen ka maleng i kin Lucaden pa Jehovah ki dini mukene-ni?

⁷ I kare-ni, jo mapol gimaro lutela dini ma gingene adada. Gimaro lutela dini magi matek adada ma dong cokcok giworogi awora. Dano gipong i kanicagi libic, giwilo bukkegi, dok gimiyo cente madwong me cwako yub mogo pa lutela dini magi. Jo mogo giye jami ducu ma lutela dini magi giwaco. Cwinygi bed yom adada me neno lutela dini magi calo guneno Yecu kikome! Ki tungcel, Lucaden pa Jehovah pe gitye ki lupwonye dini. Kadi bed wawinyo tira pa jo ma gitye ka telo wiwa, walubo pwony pa Yecu ma owaco ni: “Wun ducu dong wudoko utmego.” (Mat. 23:8-10) Pe wamiyo ki dano mo keken woro ma omyero wami ki Lubanga, kadi bed gubedo lutela dini nyo lutela pa gamente. Dok pe wamiyo cente me cwako yubgi. Me ka meno, wabedo ma pe wacwako tung ka mo keken. Wan wapat adada ki dini mukene-ni ducu ma giwaco ni gibedo Lukricitayo.—Jon 18:36.

8. Wangeyo nining ni Jehovah mito ni kiket deyo i kom nyinge dok kiwek ongene bot dano mapol?

⁸ I nino mo acel Yecu olego ni: “Abana, ket deyo i kom nyingi.” Jehovah kikome ogamo lega meno ki dwan malongo calo mor kot ki i polo, kun cikke ni ebiketo deyo i kom nyinge. (Jon 12:28) I kare me ticce me pwony ducu, Yecu oketo deyo i kom nying Wonne. (Jon 17:26) Pi meno, rwatte ni Lukricitayo me ada gubed ki awaka me tic ki nying Lubanga dok gutit pire bot jo mukene.

9. Lukricitayo me cencwari me acel gunyuto nining ni giworo nying Lubanga?

⁹ I cencwari me acel, i nge kare manok ma kicako kwede kacokke pa Lukricitayo, Jehovah onyuto ni “eparo pi Lurok kun okwanyo ki i kingi lwak ma gilwongo ki nyinge.” (Tic 15:14) Lukricitayo me cencwari me acel magi onongo gitye ki awaka me tic ki nying Lubanga dok guweko nying man ongene bot jo  mukene. Lukwena ki lupwonnye gutiyo ki nying Lubanga i kare ma gitye ka tito kwena ki i kare ma gucoyo bukke ma i Baibul. * Gunyuto ka maleng ni gubedo lwak ma kilwongo ki nying Lubanga.—Tic 2:14, 21.

10. Gin ango ma nyuto ni Lucaden pa Jehovah gubedo lwak pi nying Jehovah?

¹⁰ Tika Lucaden pa Jehovah gubedo lwak pi nying Lubanga? Nen kong lanyut ma moko. I kare-ni, lutela dini mapol gutimo jami ducu ma gitwero me kano woko lok ada man ni Lubanga tye ki nyinge. Gukwanyo nying Lubanga woko ki i Baibul ma gugonyo, dok i kare mogo guketo kigeng ni pe kiti ki nying Lubanga i kanicagi nyo i wer legagi. * Tika tye ngat mo ma twero kwero woko ni Lucaden pa Jehovah keken aye giworo nying Jehovah dok gimiyo deyo mupore pire? Watye ka weko nying Jehovah ngene matek adada makato dini mo keken! Watye ka tic matek adada me cobo gin ma nyingwa waco ni wabedo, wan wabedo Lucaden pa Jehovah. (Ic. 43:10-12) Wagoyo kopi makato milion 240 me Baibul me New World Translation of the Holy Scriptures, ma tiyo ki nying Lubanga i kabedo ducu ma lugony Baibul mukene-ni gukwanyo woko. Dok wayubo gin akwana kacel ki vidio ma  yweko nying Jehovah i leb makato 1,000 kulu!

11. Lukricitayo me cencwari me acel gunyuto margi pi lok ada nining?

¹¹ Yecu maro ada, ma en aye lok ada i kom Lubanga kacel ki Yubbe. Yecu okwo ma lubbe ki lok ada man, dok en oweko lok ada meno ongene bot jo mukene. (Jon 18:37) Lulub kor Yecu me ada bene gimaro ada matek. (Jon 4:23, 24) Tye ni, lakwena Petero olwongo dini pa Lukricitayo ni “yo me ada.” (2 Pet. 2:2) Pi mar matut pi ada, Lukricitayo macon gukwero tam mogo me dini, tim me tekwaro, kacel ki tam pa jo mogo ma pe rwatte ki lok ada me Baibul. (Kol. 2:8) I yo acel-lu i kare-ni bene, Lukricitayo me ada gitute matek me “lubo lok ada” kun gijengo niyegi kacel ki yo me kwogi i kom Lok pa Jehovah.—3 Jon 3, 4.

12. Gin ango ma timme ka Lukiko Madit oniang ni niangowa i kom gin moni omyero kilok woko, dok pingo gitimo man?

¹² Lucaden pa Jehovah pe giwaco ni giniang jami ducu ma tye i Baibul. I kare mukene pe gubedo ki niango ma atir madok i kom pwony mo me Baibul nyo kit ma guyubo kwede kacokke. Meno omyero pe owek wabed ki ur. Ginacoya waco ka maleng ni ngec ma atir woto ki medde ka kare woto ki kato. (Kol. 1:9, 10) Jehovah nyuto ada motmot, dok omyero wadi cwinywa wang ma watwero niang lok ada moni maber. (Car. 4:18) Ka Lukiko Madit oniang ni mitte ni walok niangowa nyo kit ma watimo kwede ki jami, gitimo alokaloka man cutcut. Dini mapol i kare-ni giloko pwonygi pien gimito yomo cwiny dano ma i kanicagi nyo ni wek jo me lobo-ni gumargi, ento i dul pa Jehovah kitimo alokaloka pien wamito nyiko cok ki Lubanga dok wamito wore kit ma Yecu otimo. (Yak. 4:4) Pe watimo alokaloka pien kwo pa dano olokke i kare-ni, ento pien waniang Ginacoya maber. Wamaro ada!—1 Tec. 2:3, 4.  

13. Kit mene ma pire tek loyo ma Lukricitayo me ada ginyuto, dok man nen ka maleng i kin Lucaden pa Jehovah i kare-ni nining?

¹³ Lukricitayo me cencwari me acel onongo gingene pi nyuto kit mabeco mapol, ento kitgi ma pire tek loyo onongo obedo mar. Yecu owaco ni: “Pi man dano ducu bingeyo ni wun lupwonnyena, ka mer tye i kinwu.” (Jon 13:34, 35) I kare-ni, Lucaden pa Jehovah i wi lobo ducu ginyuto mar kacel ki note i kingi. Wan wapat ki dini mukene-ni pien watye calo jo me ot acel kadi bed waa ki i lobe kacel ki tekwaro mapatpat. Waneno mar me ada i cokkewa, i gure me adwol, kacel ki gure madito. Man konyowa me bedo ki gen matek ni watye ka woro Jehovah i yo ma yomo cwinye.

14. Ma lubbe ki Jo Kolocai 3:12-14, yo mene ma pire tek ma watwero nyuto kwede mar matut i kinwa?

¹⁴ Ginacoya cuko cwinywa ni, “wumok matek i marre kekenwu.” (1 Pet. 4:8) Yo acel ma watimo kwede meno aye ki timo kica ki luwotwa kun wadiyo bene cwinywa i komgi pi gorogi. Wayenyo bene yo me nyuto yot cingwa kacel ki jolo welo bot jo ducu ma i kacokke, kadi wa bot jo ma gwok gucwero cwinywa. (Kwan Jo Kolocai 3:12-14.) Ka wanyuto mar ma kit meno, wanyuto ka maleng ni wabedo Lukricitayo me ada.

15. I yo mukene ango ma watye ka lubo kwede yo me woro ma Lukricitayo me cencwari me acel gulubo?

¹⁵ Walubo yo mukene me woro ma Lukricitayo me cencwari me acel gulubo bene. Me labolle, dulwa tye ma oyubbe i yo acel ma kacokke me cencwari me acel oyubbe kwede. Watye ki luneno ma giwoto awota, dok watye ki luelda kacel ki lukony kor tic kit macalo kacokke magi onongo gitye kwede. (Pil. 1:1; Tito 1:5) Dok calo gin, wan bene waworo cik pa Lubanga madok i kom nyom ki tim me buto, yo mupore me tic ki remo, dok wagwoko jo ma i kacokke ki ryemo jo ma pe gimito lubo cik pa Lubanga.—Tic 15:28, 29; 1 Kor. 5:11-13; 6:9, 10; Ibru 13:4.

16. Gin ango ma wapwonyo ki i lok ma kicoyo i Jo Epeco 4:4-6?

¹⁶ Yecu owaco ni jo mapol gibiwaco ni gibedo lupwonnyene, ento pe gin ducu gibibedo lupwonnyene me ada. (Mat. 7:21-23) Ginacoya bene ociko wacon ni i kare me agikki, dano mapol ‘gibilubo dini i kitgi ma nen ki woko keken.’ (2 Tem. 3:1, 5) Kadi bed kit meno, Baibul tittiwa ka maleng ni tye “niye acel” keken ma tye ki cwak pa Lubanga.—Kwan Jo Epeco 4:4-6.

17. Jo mene ma i kare-ni gitye ka lubo kor Yecu ki niye acel me ada?

¹⁷ Jo mene ma gitye ka lubo niye acel me ada i kare-ni? Watyeko nyamo lanyut ma moko ka maleng. Waneno bene yo me woro ma Yecu opwonyo dok Lukricitayo me cencwari me acel gulubo. Tye lagam acel keken—Lucaden pa Jehovah. Pud dong obedo twon deyo madit ya, me bedo ngat acel i jo pa Jehovah ki me ngeyo lok ada i kom Jehovah kacel ki yubbe! Dong pi meno, wamito ni watim gin ducu ma watwero me mako ada ki gen matek.