1. Mitiwa me ngeyo “lok me cwiny” kwako ngo, dok man kubbe nining ki yomcwiny?

 YOMCWINY me ada pe kwako winyo mere maber pi kare mo ci i ngeye rweny woko. Yomcwiny me ada twero rii pi kare me kwo pa ngat moni kulu. Man twere nining? I Pwonye me Wi Got, Yecu otito ni: “Gitye ki gum [yomcwiny] jo ma gingeyo ni gin lucan i lok me cwiny.” (Mat. 5:3) Yecu onongo ngeyo ni dano ducu kicweyogi ki miti me ngeyo ki woro Lacwecgi, Lubanga Jehovah. Meno aye mitiwa me ngeyo “lok me cwiny.” Dok kit macalo Jehovah obedo “Lubanga ma layomcwiny,” jo ma giwore bene gitwero bedo ki yomcwiny.—1 Tem. 1:11, NWT.

2-3. (a) Ma lubbe ki lok pa Yecu, angagi mukene ma gitwero bedo ki yomcwiny? (b) Ngo ma wabinyamo i pwony man, dok pingo pire tek?

² Tika watwero bedo ki yomcwiny keken ka wape ki peko mo i kwowa? Pe tye kit meno. I Pwonye me Wi Got, Yecu owaco lok mo me ur adada. En owaco ni: “Jo ma kumo”—gwok nyo pien cwinygi pidogi pi bal ma gutimo nyo pien gitye ka kato ki i pekki madongo i kwogi—gitwero bedo ki yomcwiny. Yecu bene oloko kit meno i kom “jo ma giketo ayelayela i komgi pi bedo jo ma kitgi atir” nyo ‘kingalogi’ pi bedo lulub kor Kricito. (Mat. 5:4, 10, 11) Ento twere nining me bedo ki yomcwiny me ada ka itye ka kato ki i pekki magi?

³ Yecu onongo tye ka pwonyowa ni yomcwiny pe bino pi bedo labongo peko mo keken i kwowa ento pi cobo mitiwa me cwiny ki dong nyikke cok ki Lubanga. (Yak. 4:8) Watwero timo meno nining? I pwony man, wabinyamo jami adek mapatpat ma watwero timogi me bedo ki yomcwiny me ada.

4. Gin mukwongo ango ma omyero watim ka wamito nongo yomcwiny me ada? (Jabuli 1:1-3)

⁴ YO ME 1: Me bedo ki yomcwiny me ada, omyero wakwany kare me kwano Baibul i yo matut. Yecu oporo Lok pa Lubanga ki cam. Dano kacel ki lee omyero gucam wek gumedde ki bedo kwo. Ento dano keken aye gitwero kwano Lok pa Lubanga, dok mitte adada ni gutim meno. Meno aye tyen lok mumiyo Yecu owaco ni: “Dano pe bibedo kwo ki kwon keken, ento bedo kwo ki lok ducu ma a ki i dog Lubanga.” (Mat. 4:4) Pi meno, pe omyero wawek nino mo keken okat ma nongo pe wakwanyo kare me kwano Baibul, ma en aye Lok pa Lubanga. Laco jabuli owaco ni: ‘Dano ma maro kwano cik pa Jehovah, dok bedo ka lwodo lok i kom cikke dyeceng ki dyewor bedo ki yomcwiny.’—Kwan Jabuli 1:1-3.

5-6. (a) Gin ango ma watwero pwonyo ki i Baibul? (b) I yo mapatpat ango ma kwano Baibul twero konyowa i kwowa?

⁵ I Baibul, Jehovah ominiwa ngec ma pire tek i kom kit me bedo ki yomcwiny i kwowa. Wapwonyo yub ma en tye kwede piwa. Wapwonyo kit me nyikke cok bote ki kit me nongo kicane ka watimo bal. Dok wapwonyo lok i kom anyim mamwonya ma en ocikke me miniwa. (Jer. 29:11) Lok ada magi ma wanongo ki i kwano Baibul weko wabedo ki yomcwiny madwong adada!

⁶ Kit ma wangeyo kwede, Baibul opong ki tira ma twero konyowa i kwowa me nino ducu. Ka walubo tira meno, ci wabinongo yomcwiny. Kare mo keken ka  iwinyo ni cwinyi otur pi pekki ma itye ka kato ki iye i kwoni, ter kare me kwano ki lwodo Lok pa Lubanga i yo matut. Yecu owaco ni: “Gitye ki gum [yomcwiny], jo ma giwinyo lok pa Lubanga, dok gigwoko!”—Luka 11:28.

7. Ngo ma romo konyi me nongo adwogi maber loyo ki i kwano Lok pa Lubanga?

⁷ Ka itye ka kwano Lok pa Lubanga, ter kare me nongo mit pa gin ma itye ka kwanone. Me labolle, tika gin ma kit man dong otimme i komi? Ngat mo oteddi dek ma imaro adada. Ento pien onongo itye ka rune nyo pien tammi tye ka mukene, imwonyo meri dek oyotoyot labongo bilo ki nongo mitte. I nge tyeko cam, iniang ni icamo oyotoyot dok icako paro ni kono onongo icamo mot wek inong mit pa dek meno. Tika dong nino mo ikwano Baibul oyotoyot ma oweko pe inongo mit pa kwenane? Ter kare muromo me kwano ki nongo mit pa Lok pa Lubanga; go gin ma tye ka timme-ni i wi, tem winyo dwan dano ma gitye ka lok, dok itam matut i kom gin ma ikwano. Ka itimo kit meno, ci ibinongo yomcwiny.

8. “Lagwok ot ma lagen dok maryek” tye ka cobo maber tic ma kimine nining? (Nen lok ma i tere piny.)

⁸ Yecu ocimo “lagwok ot ma lagen dok maryek” me miyo cam me cwiny i kare ma mitte kikome, dok watye ki cam me cwiny muromo. * (Mat. 24:45) Baibul aye obedo gin ma pire tek loyo ma lagwok ma lagen tiyo kwede me yubo cam me cwiny. (1 Tec. 2:13) Cam me cwiny meno konyowa me ngeyo tam pa Jehovah kit ma kinyuto kwede i Baibul. Meno aye gin mumiyo wakwano magajin me Wi Lubele ki Awake! kacel ki pwony mogo ma katti i jw.org. Wayubbe maber pi cokkewa me dye cabit ki tum cabit ducu. Dok waneno purogram ducu ma katti i JW Broadcasting^®. Ka wamedde ki kwano Baibul i yo matut, ci wabibedo ki kero me timo gin me aryone ma mitte me bedo ki yomcwiny.

9. Yo me aryo me nongo yomcwiny me ada i kwo obedo ngo?

⁹ YO ME 2: Me bedo ki yomcwiny me ada, mitte ni wakwo ma lubbe ki rwom me kit ma atir pa Jehovah. Laco jabuli ocoyo ni: ‘Tye ki yomcwiny dano ma lworo Jehovah, ma bedo kun lubo yone!’ (Jab. 128:1) Lworo Jehovah tyen lokke ni wawore matek adada ma weko wagwokke ki timo gin mo keken ma twero cwero cwinye. (Car. 16:6) Meno weko wamedde ki tute me lubo rwomme me gin ma atir ki gin marac kit ma kitito kwede i Baibul. (2 Kor. 7:1) Wabibedo ki yomcwiny ka watimo jami ma Jehovah maro dok wakwero jami ma en dagi.—Jab. 37:27; 97:10; Rom. 12:9.

10. Ma lubbe ki Jo Roma 12:2, tic ango ma tye i wiwa?

¹⁰ Kwan Jo Roma 12:2. Ngat moni romo ngeyo ni Jehovah tye ki twero me moko gin maber ki gin marac ento en myero bene oye lubo rwom me kit ma atir pa Jehovah. Me labolle, ngat moni twero ngeyo ni gamente tye ki twero me moko cipid ma mutoka myero ongwec kwede i gudi. Ento en pe twero ye lubo cik meno. Macalo adwogine, en twero dwoyo mutoka i cipid ma lamal mukato kare woko.  Wanyuto ki i kit ma wakwo kwede ni waye ni lubo rwom me kit ma atir pa Jehovah aye obedo yo me kwo ma pud dong ber loyo. (Car. 12:28) Meno aye kit ma Kabaka Daudi onongo winyo kwede pien en oloko kit man i kom Jehovah: “In dong ibinyuta yo ma tera i kwo; bedoni kweda miyo abedo ki yomcwiny madwong mada, i tung cingi lacuc tye iye gin ma yomo cwiny dano nakanaka.”—Jab. 16:11.

11-12. (a) Ka watye ki peko nyo cwinywa otur, omyero wagwokke ki timo gin ango? (b) Lok ma i Jo Pilipi 4:8 twero konyowa nining ka odok i kom yero jami ma wagalo ki wangwa?

¹¹ Ka watye ki peko nyo cwinywa otur, watwero winyo ni omyero watim gin mo ma kwanyo tamwa woko ki i kom pekkiwa. Miti meno pe obedo gin marac, ento omyero wagwokke adada wek pe wacak timo gin marac nyo gin mo ma Jehovah dagi.—Ep. 5:10-12, 15-17.

¹² I waragane bot Lukricitayo ma i Pilipi, lakwena Paulo ocuko cwinygi me medde ki keto tamgi i kom jami “ma tye atir,  . . . maleng, . . . , ma mwonya, . . . ki gin mo maber makato.” (Kwan Jo Pilipi 4:8.) Kadi bed Paulo onongo pe tye ka lok atir atir i kom galowang, lok ma en ocoyo-ni myero ogud jami ma wayero me yweyo ki wiwa. Nen ka ce wer ma iwinyo, filim ma ineno, bukke ma ikwano, kacel ki tuko me vidio ma ituko rwatte ki gin ma Paulo oloko iye-ni. Timo meno bikonyi me niang mene ma opore i wang Jehovah ki mene ma pe opore. Wamito ni kwowa obed ma rwatte ki rwom me kit ma atir pa Jehovah ma tye lamal adada-ni. (Jab. 119:1-3) Meno biweko wabedo ma cwinywa pe pidowa, dok wabedo atera me kwanyo yo me adek ma weko wanongo yomcwiny me ada i kwowa.—Tic 23:1.

13. Yo me adek me nongo yomcwiny me ada obedo ngo? (Jon 4:23, 24)

¹³ YO ME 3: Ket woro Jehovah obed gin ma pire tek loyo i kwoni. Macalo Lacwecwa, Jehovah aye opore me nongo worowa. (Yabo 4:11; 14:6, 7) Pi meno, omyero waket tek me wore i yo ma en cwako, ma en aye ki “cwiny ki ada.” (Kwan Jon 4:23, 24.) Wamito ni cwiny maleng pa Lubanga aye otir worowa dok obed ma rwatte ki lok ada ma i Baibul. Worowa myero obed gin mukwongo i kwowa kadi bed watye ka kwo i lobo ka ma kiketo kigeng i kom ticwa mogo nyo ducu. I kare-ni, omegiwa ki lumegiwa makato 100 kitweyogi pien gitye Lucaden pa Jehovah. * Kadi bed kit meno, gitute matek me lega, kwano Baibul, ki lok i kom Lubanga ki Kerre. Ka kingalowa nyo kiunowa, watwero bedo ki yomcwiny pien nongo wangeyo ni Jehovah tye kwedwa dok en biminiwa mot.—Yak. 1:12; 1 Pet. 4:14.

14. Gin ango mutimme i kom omego mo matidi ma bedo i lobo Tajikistan, dok pingo?

¹⁴ Omegiwa ki lumegiwa mogo gukato ki i kwo matek adada, ento pud gumedde ki bedo ki yomcwiny me ada pien gutimo jami adek ma waa ka nyamogi-ni. Nen kong gin mutimme i kom ominwa Jovidon Bobojonov ma tye ki mwaka 19, dok a ki i lobo Tajikistan, i kare ma okwero donyo i mony. I nino dwe 4 me Oktoba, 2019, kimake tektek ki i ganggi, dok  kigwoke i buc pi dwe mapol kun onongo kitere calo latim aranyi. Tim marac ma kitimo i kome-ni okatti i ka poko lok angeya ma i lobe mapol. Lok angeya okatti ni kigoye matek i kare ma kitye ka keto dic i kome me kwongo kwong me donyo i mony ki me ruko bongo mony. I nge meno, kot ongolo kop i kome ni en otimo bal ci kicwale i buc mukene ka ma lumabucce gitiyo tic opii, nio wa i kare ma preciden me lobogi otime kica ci owacci kigonye woko. I kare ma Jovidon obedo ka kato ki i pekki magi, en pe orwenyo yomcwinye dok omedde ki gwoko genene. Man otwere nining? En onongo kare ducu tute matek me cobo mitine me cwiny.

15. Jovidon obedo ka nongo cam me cwiny nining i kare ma tye i buc?

¹⁵ I kare ma Jovidon tye i buc, en omedde ki pwonyo lok i kom Jehovah, kadi bed en onongo pe tye ki Baibul nyo bukkewa mo. Meno otwere nining? Omege ki lumege ma kunu onongo gitere cam dok onongo gicoyo ginacoya me nino ducu i kom kavera ma gutere kwede ki cam. Meno oweko otwere bote me kwano Baibul nino ducu kacel ki lwodo lok iye. I kare ma kigonye ki i buc, en omiyo tam man bot jo ma peya gukato ki i pekki madongo:  “Pire tek ma pe wacce ni iti ki kare ma nongo itye agonya maber me medo ngecci i kom Jehovah ki kwano Lokke kacel ki bukkewa.”

16. Jovidon obedo ka oketo tamme i kom ngo?

¹⁶ Ominwa Jovidon obedo ka kwo ma lubbe ki rwom me kit ma atir pa Jehovah. En pe obedo ka tam i kom miti maraco nyo nywako i timo jami maraco, me ka meno, en oketo tamme i kom Jehovah kacel ki jami ma Jehovah maro. Jovidon okwanyo kare me pwoyo ki lwodo lok i kom cwec pa Jehovah. Odiko ducu en onongo co ka winyo koko ki wer pa winyo. I dyewor, en onongo bedo ka neno dwe kacel ki lakalatwe. En owaco ni: “Mic magi ma oa ki bot Jehovah-ni onongo cuko cwinya dok miya yomcwiny.” Ka watye ki pwoc pi mic pa Jehovah ma wanenogi ki ma pe wanenogi, wabedo ki yomcwiny dok yomcwiny meno konyowa me kanyo pekkiwa.

17. Lok ma kicoyo i 1 Petero 1:6, 7 twero konyo dano ma tye ka kato ki i kwo macal ki pa Jovidon nining?

¹⁷ Jovidon bene oketo worone pi Jehovah obedo mukwongo i kwone. En oniang kit ma gwoko genene bot Jehovah pire tek kwede. Yecu owaco ni: “Wor Rwot [Jehovah] Lubangani, dok bene iti pire keken.” (Luka 4:8) Ludito wi mony kacel ki lumony mukene-ni onongo gimito ni Jovidon okwer bedo Lacaden woko. Ento en omedde ki lega matek dyeceng ki dyewor ducu, kun kwayo Jehovah ni okonye wek pe eil cinge woko dok pe etim gin mo ma weko eturo niyene. Kadi bed kitere marac adada, Jovidon pe otimo gin mo keken ma oturo niyene. Macalo adwogine, en twero bedo ki yomcwiny pien i kare-ni en tye ki gin mo ma yam onongo pe kwede i kare ma peya kimake tektek, kigoye ci kitweye i buc. Niyene kombeddi tye matek adada pien kityeko temone.—Kwan 1 Petero 1:6, 7.

18. Watwero medde ki bedo ki yomcwiny nining?

¹⁸ Jehovah ngeyo gin ma wamito wek wabed ki yomcwiny me ada. Ka ilubo yo adek ma weko wabedo ki yomcwiny me ada, ci ibimedde ki bedo ki yomcwiny kadi bed itye ka wok ki i kwo matek. Ka itimo meno, in bene ibibedo ki kare me waco ni: ‘Gitye ki yomcwiny jo ma Jehovah aye Lubangagi!’—Jab. 144:15.