LAMONY mo me Nazi odange i wi gurup pa Lucaden pa Jehovah i kare me lweny me Wi Lobo me II ni: “Ka ngat mo keken i kinwu okwero lweny i kom lobo France nyo England, ci wun weng myero wuto!” Kadi bed lumony me Nazi ma gumako muduku onongo gucung cok kenyu, pe tye kadi ominwa mo acel ma oye turo cik pa Jehovah. Pud dong gunyuto tekcwiny ya! Man labol maber ma nyuto kit ma Lucaden pa Jehovah gineno kwede lweny: Pe giye donyo i lweny me lobo-ni. Kadi bed kibwurowa ki to, wamedde ki bedo ma pe wacwako tung ka mo i lweny me lobo-ni.

1. JO PA LUBANGA DUCU ONONGO GITYE I ROK ACEL

I kare macon, Jehovah oyero jo me rok acel me bedo jone—ma en aye Icrael. En olwongo Luicrael ni “jona kikome i kin rok ducu.” (Nia 19:5) Lubanga bene onongo ominigi lobo ma en aye oyero. Pi meno ka onongo Lubanga owaco ki Luicrael ni gucit ka lweny i kom rok mukene, nongo pe gitye ka neko luworo luwotgi. *

I kare-ni, luworo me ada gia ki i “rok ducu, ki i kaka ducu, ki dano ducu me wi lobo, ki leb ducu.” (Yabo 7:9) Ka ni jo pa Lubanga  gunywak i lweny, gibibedo ka lweny i kom luye luwotgi dok gitwero bene nekogi.

2. JEHOVAH AYE ONONGO MOKO KA CE LUICRAEL OMYERO GUCIT I LWENY

I kare macon, Jehovah aye onongo moko awene ki pingo onongo mitte ni Luicrael gucit i lweny. Me labolle, Lubanga owaco ki Luicrael ni gulweny i kom jo Kanaan macalo adwogi me ngolo kop i komgi pien onongo gingene adada pi woro jogi, tim me tarwang malik, ki dong tyero lutino matino. Jehovah owaco ni Luicrael gujwer jo ma gitimo tim maraco magi woko ki i Lobo ma Kiciko Pire, wek gin Luicrael bene pe gucak poro tim maraco magi. (Levi 18:24, 25) Lacen ma dong Luicrael gitye ka bedo i Lobo ma Kiciko Pire, Lubanga onongo i kare mogo waccigi ni gucit ka lweny me gwoko lobogi ki bot lumone ma gibwuro kwogi. (2 Cam. 5:17-25) Ento pe tye kare mo ma Jehovah oye ni Luicrael gumok pigi kengi ka ce omyero gucit ka lweny. Ka onongo gutimo man, adwogine onongo bedo marac adada.—Wel 14:41-45; 2 Tekwaro 35:20-24.

I kare-ni, Jehovah pe tito ki dano ni gucit ka lweny. Lobe pol kare gilwenyo pi cobo miti pa dano, ento pe miti pa Lubanga. Gicako lweny pien nongo gimito nyayo wang lobogi, me tiyo cente madwong, nyo me ilo tam me wibye. Ento jo ma giwaco ni gitye ka lweny i nying Lubanga me gwoko dinigi nyo me neko lumone pa Lubanga kono? Jehovah bigwoko luworo me ada dok neko lumonene i lweny ma bitimme i anyim—meno lweny me Armagedon. (Yabo 16:14, 16) I lweny meno, lumony pa Lubanga gibibedo cwecce me cwiny keken, ento pe dano ma giwore.—Yabo 19:11-15.

3. LUICRAEL ONONGO PE GINEKO JO MA GUNYUTO NIYE I KOM JEHOVAH

I kare macon, lumony me Icrael onongo pol kare gitimo kica ki jo ma gunyuto niye i kom Lubanga dok gineko jo ma Jehovah omoko ni omyero kinekgi keken. Nen kong  labol aryo magi. Kadi bed Jehovah omiyo rukca ni Luicrael onongo myero gujwer Jeriko, Luicrael pe guneko Rakab kacel ki jo me ode pi niyene. (Yoc. 2:9-16; 6:16, 17) Lacen, pe kineko lwak ducu ma i boma me Gibeon pien Lugibeon gunyuto ni gilworo Lubanga.—Yoc. 9:3-9, 17-19.

I kare-ni, lobe ma gitye ka lweny pe giweko jo ma gitye ki niye i kom Lubanga. Dok i kare mogo, gineko kadi wa lutedero ma pe gitye ki bal mo.

4. LUICRAEL ONONGO GILUBO CIK PA LUBANGA MADOK I KOM LWENY

I kare macon, Jehovah onongo mito ni Luicrael gulweny kun gilubo cikke madok i kom lweny. Me labolle, i kare mogo Lubanga onongo waccigi ni gucwal “dwan me kuc” bot jo ma i boma ma gimito lweny i kome. (Nwo. 20:10) Jehovah bene onongo mito ni lumony me Icrael gubed ma komgi leng dok gulub cikke ma kwako kit ma atir. (Nwo. 23:9-14) Kadi bed lumony me rok mukene ma orumogi onongo pol kare gibuto ki mon ma gumako tektek, Jehovah pe oye ni Luicrael gutim bal ma kit meno. Ki lok ada, onongo pe kiye ni laco ma Laicrael onyom dako ma kimako i kare me lweny wang ma dwe acel okato i nge make.—Nwo. 21:10-13.

I kare-ni, pol pa lobe guketo cinggi ci guye ni gibilweny ma lubbe ki cik mogo ma mako lweny. Kadi bed cik magi kiketogi me gwoko lutedero, ento ki cwercwiny madit kiturogi woko.

5. LUBANGA ONONGO LWENYO PI ROKKE

I kare macon, Jehovah olwenyo pi Luicrael, dok pol kare onongo weko giloyo lweny i yo me tango. Me labolle, Jehovah okonyo Luicrael nining me loyo boma me Jeriko? Kit ma Jehovah otittigi kwede, i kare ma Luicrael ‘gudangnge ki woo matek, cel me gang omuk opoto woko piny ducu,’ dok man oweko obedo yot pigi me loyo boma man. (Yoc. 6:20) Dok i yo ma nining ma guloyo kwede lweny i kom jo Amor? “Rwot [Jehovah] ocako coro lwak gwengi madito i komgi mua ki i polo . . . pee meno oneko lwak merok mapol makato dano ma jo Icrael gunekogi ki pala lucwan.”—Yoc. 10:6-11.

LUKRICITAYO ME ADA GITUTE ME YUBO WAT KI JO MUKENE

Kit ma waneno kwede, kwowa i kare-ni pat adada ki kwo pa Luicrael macon. Ento pe apokapoka magi keken aye obedo tyen lok mumiyo wan pe wacito i lweny. Watye ki tyen lok mukene. Me labolle, Lubanga otito con ni i kare me agikki, jo ma en epwonyogi “pe dong gibimedde ki pwonyo lweny,” kadi wa nywako iye. (Ic. 2:2-4) Medo i kom meno, Kricito otito ni lupwonnyene “pe [jo] me lobo”; dok onongo gibibedo ma pe gicwako tung ka mo ka odok i kom tim me wibye me lobo man.—Jon 15:19.

Kricito bene ocuko cwiny lulub kore me timo makato meno. En ocikogi me gwokke ki cwiny ma twero weko ngat moni mako lok i cwinye, bedo ki akemo, dok cito i lweny. (Mat. 5:21, 22) Medo i kom meno, en owaccigi ni gubed “jo ma kelo kuc” dok gumar lumonegi.—Mat. 5:9, 44.

Wan watwero timo man nining? Gwok nyo pe watye ki miti me cito i lweny, ento tika tye ngat mo i kacokke ma waneno macalo lamonewa? Omyero wamedde ki yelle matek me jwayo kodi cwiny meno woko.—Yak. 4:1, 11.

Pe wanywako i lweny ma timme i kin lobe. Me ka meno watiyo matek me bedo ki kuc kacel ki mar i kinwa. (Jon 13:34, 35) Dong omyero wamoku tamwa me medde ki bedo ma pe wacwako tung ka mo ka wakuro nino ma Jehovah bityeko lweny ducu pi naka.—Jab. 46:9.