1. Mot macalo mene ma Yecu omiyo bot dano?

 PE TYE dano mo ma dong onyuto yot cing loyo Yecu. I kare ma onongo en tye i lobo, en pol kare onongo tiyo ki tekone me timo tango me konyo jo mukene. (Luka 9:​12-17) En omiyo mot ma pud dong dit loyo ki jalo kwone piwa. (Jon 15:13) Kadi wa i nge cerre, Yecu omedde ki nyuto yot cinge. Kit ma en onongo ocikke kwede, en olego Jehovah me miyo cwiny mere maleng me pwonyowa kacel ki kweyo cwinywa. (Jon 14:​16, 17; 16:13) Dok bene Yecu tiyo ki cokkewa me miniwa jami ducu ma mitte wek wabed ki kero me pwonyo dano i but lobo-ni ducu lok i kom Baibul kun wakonyogi me doko lupwonnye.—Mat. 28:​18-20.

2. Angagi ma gitye i kin “mot ma gubedo dano” ma kiloko i komgi i Jo Epeco 4:​7, 8?

² Tye bene mot mukene ma Yecu omiyo botwa. Lakwena Paulo ocoyo ni i ngeye ma Yecu odok cen i polo, en “omiyo mot ma gubedo dano.” (Kwan Jo Epeco 4:7.) Jo Epeco 4:8 (NWT) waco ni: “En mumiyo yam giwaco ni, ‘Ka ceng oito malo, otero opii mapol ma en oyako i lweny; omiyo mot ma gubedo dano.’” Paulo otito ni Yecu omiyo co magi me konyo kacokke i yo mapatpat. (Ep. 1:​22, 23; 4:​11-13) I kare-ni, i kin ‘mot magi ma gubedo dano-ni’ tye iye lukony kor tic, luelda, ki luneno me adwol. a Ngene kene ni, co magi gitye ki roc, pi meno pe giromo timo jami ducu kakare. (Yak. 3:2) Ento Rwotwa Yecu Kricito tiyo kwedgi me konyowa.

3. Mi labol ma nyuto kit ma wan ducu watwero konyo kwede mot ma kiminiwa ma gubedo dano-ni.

³ Yecu omiyo ki co magi tic ma pire tek adada me jingo kacokke. (Ep. 4:12) Ento wan ducu watwero konyogi me cobo  tic ma pire tek meno. Me labolle: Watwero porone ki tic me gero Ot me Ker. Jo mogo gitimo tic me gedo kikome. Jo mukene gikonyo lugedo ki tedo, kelo jami me tic nyo i yo mukene mapat. I yo acel-lu, i lokwa ki ticwa, wan ducu watwero miyo kony bot lukony kor tic, luelda, ki luneno me adwol wek gucob ticgi me jingo kacokke. Kong dong wanyamu kit ma watwero nongo kwede adwogi maber ki i ticgi ki kit ma watwero nyuto kwede pwoc botgi kacel ki Yecu, ma ominiwa ‘mot ma gubedo dano-ni.’

LUKONY KOR TIC GITIYO “TIC ME KONY”

4. “Tic me kony” mene ma twero bedo ni lukony kor tic onongo gitimo i cencwari me acel?

⁴ I cencwari me acel, omege mogo kicimogi me tic macalo lukony kor tic. (1 Tem. 3:8) Nen calo gin aye onongo gitiyo “tic me kony” ma lakwena Paulo ocoyo pire i 1 Jo Korint 12:28. Dong oromo bedo ni lukony kor tic onongo gitimo tic mukene ma mitte wek luelda gubed ki kare muromo me pwony ki kwat. Me labolle, twero bedo ni lukony kor tic onongo gikonyo me kobo Ginacoya ki cinggi nyo wilo jami ma mitte me kobo coc.

5. Tic ma pigi tego ango ma lukony kor tic gitimo i kare-ni?

⁵ Tam kong i kom jami mogo ma pigi tego ma lukony kor tic gitimo i kacokkewu. (1 Pet. 4:10) Kitwero minigi tic me gwoko lim nyo yubo wang tic pa kacokke, penyo pi bukke ma mitte ki me pokone bot lutit kwena, tic i kom jami lakub dwan ki vidio, tic macalo lujol wele, nyo miyo kony me gwoko lengo ki roco Ot me Ker. Tic ma pire tek magi ducu mitte wek dano gunong mit pa cokke ki dok wek tic me pwony ocobbe kore ki kore. (1 Kor. 14:40) Medo i kom meno, lukony kor tic mukene gimiyo pwony i cokke me Kwowa ki Ticwa kacel ki pwony pi lwak. Kitwero bene cimo lakony kor tic me konyo laelda ma neno wi gurup me tito kwena. Dok i kare mogo, laelda twero penyo lakony kor tic me cito kacel kwede i lim me kwat.

6. Tit kong tyen lok mogo mumiyo watye ki pwoc pi lukony kor ticwa.

⁶ I yo ma nining ma tic pa lukony kor tic konyo kwede kacokke? Laminwa mo ma nyinge Brenda, b ma a ki i lobo Bolivia owaco ni, “Pi tic matek ma lukony kor tic gitimo, anongo mit pa cokke adada. Pi ticgi, atwero wer, miyo lagam, winyo pwony mapatpat, ki nongo pwony ki i vidio kacel ki cal. Gitute me gwoko ber bedo pa jo ma gitye i cokke, dok gikonyo me kubo jo ma pe gitwero bino i cokke. I nge tyeko cokke, gitelo wi dano i tic me gwoko lengo, gineno lok i kom lim, dok gineno ni watye ki bukke ma wamito. Atye ki pwoc madwong adada pigi!” Laminwa Leslie, ma bedo i lobo Colombia dok cware tiyo macalo laelda, owaco ni: “Cwara jenge i kom kony ma lukony kor tic gimiyo. Labongo konygi, kono onongo tic omako wi cwara ma pe larre, pi meno atye ki pwoc madwong pi mit komgi kacel ki cwiny me miyo kony ma gitye kwede.” Labongo akalakala mo, meno aye kit ma in bene iwinyo kwede.—1 Tem. 3:13.

7. I yo ma nining ma watwero nyuto kwede pwocwa pi lukony kor tic? (Nen bene cal.)

⁷ Kadi bed watwero winyo ni watye ki pwoc pi tic pa lukony kor tic, ento Baibul cuko cwinywa ni: ‘Wubed jo ma miyo pwoc kare ducu.’ (Kol. 3:15) Laelda mo i lobo Finland ma nyinge Kristofer, owaco ni en enyuto pwocce kit man, “Acwalo kad nyo mecej i cim bot lakony kor tic moni kun acoyo gin ma en otimo nyo owaco ma ocuko cwinya nyo pingo atye ki pwoc pi ticce.” Omego Pascal ki dakone Jael, ma gibedo  i lobo New Caledonia, pol kare gilego pi lukony kor tic. Pascal otito ni, “Macok cok-ki, wabedo ka lega tutwal pi lukony kor ticwa, kun wapwoyo Jehovah pigi, dok walege ni okonygi.” Jehovah winyo lega ma kit meno, dok macalo adwogine, jo me kacokke ducu ginongo mot.—2 Kor. 1:11.

LUELDA ‘MA GITYE KA TIC MATEK I KINWU’

8. Pingo Paulo owaco ni luelda luwote onongo ‘gitye ka tic matek?’ (1 Jo Tecalonika 5:​12, 13)

⁸ Luelda me cencwari me acel onongo gitiyo matek pi kacokke. (Kwan 1 Jo Tecalonika 5:​12, 13; 1 Tem. 5:17) Onongo gitelo wi kacokke ki doro cokke kacel ki moko tam pi kacokke. Onongo gimiyo tira i yo me mar bot omege ki lumege wek gumedde ki cung matek i niye. (1 Tec. 2:​11, 12; 2 Tem. 4:2) Ngene kene ni, co magi bene onongo gitiyo matek me miyo jami ma mitte pi jo me pacigi ki me gwoko watgi ki Jehovah wek obed matek.—1 Tem. 3:​2, 4; Tito 1:​6-9.

9. Tic macalo mene ma luelda gitye kwede i kare-ni?

⁹ Luelda ma i kare-ni gitye ki tic mapol. Gubedo lutit kwena. (2 Tem. 4:5) Giweko lanen maber ki tito kwena ki mit kom, giyubo tic me tito kwena i wang tic me kacokkegi, dok gipwonyowa kit me tito kwena i yo maber. Gitiyo bene macalo lungolkop ma pe gidworo kor dano dok ginyuto cwiny me kica. Ka ngat mo ma i kacokke otimo bal madit, luelda gitute matek me konye wek oyub watte ki Jehovah. Ki tungcel bene, gitute matek me gwoko lengo me kacokke i yo me cwiny. (1 Kor. 5:​12, 13; Gal. 6:1) Ento tutwalle tic ma pire tek pa luelda obedo me kwat. (1 Pet. 5:​1-3) Gimiyo pwony ma a ki i Baibul ma guyubo maber, gitute matek me ngeyo jo ducu me kacokke, dok gicito i lim me kwat. Luelda mukene bene gimiyo kony i gero ki roco Odi me Ker, yubo gure madito, dok gitiyo ki Komitti ma Kubu kin Lucaden ki Ludaktari (HLC) nyo Gurup ma Gilimo Lutwo (PVG), medo i kom ticgi mukene. Ada, luelda gitiyo matek piwa!

10. Tyen lok ango ma watye kwede me bedo ki pwoc pi lueldawa ma gitiyo matek tutwal-li?

¹⁰ Jehovah otito con ni wabibedo ki lukwat ma gibigwokowa maber ma oweko ‘pe dong wabibedo ki lworo mo, dok cwinywa bene pe biballe.’ (Jer. 23:4) Man aye gin ma otimme i kom laminwa mo ma nyinge Johanna, ma bedo i lobo Finland, i kare ma kom mamane odoko lit adada. En otito ni: “Pe yot bota me nywako ki jo mukene kit ma awinyo kwede. Ento, laelda mo ma pe acok kwede tutwal odiyo cwinye ka winyo lokka i kare ma onongo atye atera me tito kit ma awinyo kwede, olego kacel kweda, dok oweko aniang ni Jehovah mara. Wiya pe po i kom gin ma en owaco kikome, ento wiya po ni lworona orweny woko. Aye ada ni Jehovah ocwale me konya i cawa ma onongo amito kikome.” Luelda me kacokkewu dong gukonyi nining?

11. Watwero nyuto pwoc nining pi luelda? (Nen bene cal.)

¹¹ Jehovah mito ni wanyut pwoc ma a ki i cwinywa pi luelda “pi ticgi” matek. (1 Tec. 5:​12, 13) Laminwa Harriet, ma bene bedo i lobo Finland, owaco ni: “Luelda gikonyo dano ki cwinygi ducu, ento man pe te lokke ni gitye ki teko nyo cawa madwong loyowa nyo ni gipe ki pekki i kwogi. I kare mogo awaccigi ni: ‘In ibedo laelda maber adada. Amito ni inge meno.’” Laminwa mo ma bedo i lobo Türkiye c ma nyinge Sera owaco ni: “Luelda gimito cuko cwiny wek gumedde ki tiyo ticgi. Me timo man, waromo coyo botgi kad, lwongogi i pacowa ka cam,  nyo cito i tic me pwony kacel kwedgi.” Tika tye laelda mo ma itye ki pwoc madit pire pi tic ma en timo i kacokke? Titte ni itye ki pwoc pi ticce.—1 Kor. 16:18.

LUNENO ME ADWOL GIKONYO ME JINGO KACOKKE

12. Yub ango ma kiketo i cencwari me acel me jingo kacokke? (1 Jo Tecalonika 2:​7, 8)

¹² Yecu Kricito bene omiyo bot co mogo tic me konyo kacokke i yo mapat. En oweko luelda ma i Jerucalem gucwalo Paulo, Barnaba, ki co mukene macalo luneno ma giwoto awota. (Tic 11:22) Pingo? Pi tyen lok acel ma omiyo kicimo lukony kor tic kacel ki luelda: me jingo kacokke. (Tic 15:​40, 41) Co magi gujalo jami mapol wek giti tic man maber. I kare mogo, guketo kwogi ka mading wek gibed ki kare me pwonyo kacel ki cuko cwiny jo mukene.—Kwan 1 Jo Tecalonika 2:​7, 8.

13. Tic mapatpat ango ma luneno me adwol gitye kwede?

¹³ Luneno me adwol giwoto i kabedo mapol mapatpat. Jo mogo i kingi giwoto pi kilomita miya mapol i kin kacokke mapatpat. Cabit ducu, laneno me adwol miyo pwony mapol, cito i lim me kwat, bedo i cokke ki lupainia, luelda ki lukony kor tic, dok doro cokke me cito i tic me pwony. En yubo pwony dok yubo gure me adwol kacel ki gure madito. En pwonyo cukul pa lupainia dok yubo cokke ma kite dok pat pi lupainia ma gitye i adwolle. Medo i kom meno ducu, i kare mukene mitte ni ocob tic mo ma mitte oyotoyot ma nongo jang gang kal omine.

14. Tit kong tyen lok mogo ma oweko watye ki pwoc pi luneno me adwol?

¹⁴ Adwogi maber ango ma jo me kacokke ginongo ki i tic pa luneno me adwol? Omego mo ma bedo i lobo Türkiye owaco ni:  “Kare ducu ka laneno me adwol olimowa, man cuko cwinya me cwalo cawa madwong ka konyo omege ki lumege. Dong arwatte ki luneno me adwol mapol; ento, pe tye mo acel i kingi ma oweko awinyo calo en tye ki tic mapol nyo pe emito lok kweda.” Johanna, ma kiloko i kome con-ni, nino mo ocito i tic me pwony kacel ki laneno me adwol, ento pe gunongo dano mo keken gang. Johanna owaco ni, “Kadi bed kit meno, wiya pe biwil i kom nino meno. Lumegina aryo ma gitye rudi-ni onongo pud gua ki i kabedo ma abedo iye ci gukobo ka mapat, dok onongo atye ka parogi mada. Laneno me adwol ocuko cwinya dok okonya me neno ni bor piny pe obedo gin ma bibedo matwal pien i lobo manyen wabibedo ki kare muromo me bedo ki lupacowa kacel ki luremwa.” Pol pa wan bene wamaro luneno me adwolwa dok watye ki pwoc pi kit ma gikonyowa kwede.—Tic 20:37–21:1.

15. (a) Ma lubbe ki lok ma kicoyo i 3 Jon 5-8, watwero nyuto pwoc nining pi luneno me adwol? (Nen bene cal.) (b) Pingo omyero wanyut pwoc bot mon pa omege ma kicimogi pi tic i kacokke, dok watimo meno nining? (Nen bok ma wiye tye ni “ Wi Pe Owil i kom Mongi.”)

¹⁵ Lakwena Jon ocuko cwiny Gayo ni ogwok omege ma gibino ka limo kacokke, dok ‘okonygi i kit ma myero, i wotgi i tic pa Lubanga.’ (Kwan 3 Jon 5-8.) Yo acel ma watwero timo kwede meno aye ki lwongo laneno me adwol ka cam i pacowa. Yo mukene aye ki bedo tye i tic me pwony i cabit ma nongo laneno olimo kacokkewa. Laminwa Leslie ma kiloko i kome con-ni, nyuto pwocce i yo mukene bene. En owaco ni: “Alego ni Jehovah ominigi jami me kom ma mitte. Wan ki cwara bene wacoyo waraga botgi me tittigi kit ma limgi okonyowa kwede.” Wi myero opo ni, luneno me adwol pe gubedo obar got. I kare mukene, komgi bedo lit, gilwenyo ki par, dok cwinygi  tur. Gwok nyo lok ma iloko ki kica nyo mic mo matidi ma imiyo twero bedo lagam me lega pa laneno me adwol pi kony!—Car. 12:25.

WAMITO “MOT MA GUBEDO DANO”

16. Ma lubbe ki Carolok 3:​27, lapeny mene ma omege gitwero pennye kwede?

¹⁶ I twok lobo-ni ducu, omege mapol mitte me tic macalo “mot ma gubedo dano.” Ka in omego ma dong inongo batija, tika itwero miyo kony i yo man? (Kwan Carolok 3:27.) Tika itye atera me tic matek wek ibed ma ipore me doko lakony kor tic? Ka in dong itye lakony kor tic, tika itye ki yub me tic macalo laelda? d Tika itye atera me timo alokaloka ma mitte i kwoni wek ipong fom me cito i Cukul pi Lutit Kwena me Ker-ri? I cukul meno, ibinongo pwonnye muromo wek Yecu oti kwedi i yo maber makato. Ka iwinyo calo pe itwero timo tic magi, leg bot Jehovah. Lege pi cwiny mere maleng wek okonyi me cobo tic mo keken ma kimiyo boti.—Luka 11:13; Tic 20:28.

17. Gin ango ma “mot ma gubedo dano” ginyuto i kom Kabakawa, Yecu Kricito?

¹⁷ Omege ma Yecu omiyogi macalo “mot” ginyuto ka maleng ni en tye ka telowa i kare man me agikki-ni. (Mat. 28:20) Watye ki pwoc madit ni watye ki Kabaka ma cinge yot dok lamar ma ngeyo gin ma wamito dok miniwa omege me konyowa. Pi meno, yeny yo me nyuto pwocci pi tic matek ma co magi gitimo. Dok wi pe owil me pwoyo Jehovah, pien en aye Lami “kit gin mo ducu maber, ki mot ducu mabeco twatwal.”—Yak. 1:17.