1. Pingo Lucaden pa Jehovah gubedo jo ma cwinygi yom? (Nen cal ma tye i pot karatac 15.)

LUCADEN PA JEHOVAH gubedo jo ma cwinygi yom. Kare ducu ka gitye i kacokke, i gure me adwol, nyo ka namo kacel nongo giloko ki luwotgi ma igi yom adada. Pingo cwinygi yom tutwal? Tye kit meno pien ni gingeyo Jehovah, “Lubanga ma layomcwiny.” Gitiyo pire dok gitute me lubo lanene. (1 Temceo 1:11, NW; Jabuli 16:11) Jehovah aye Wang It me yomcwiny, pi meno en mito ni wabed ki yomcwiny, dok omiyowa tyen lok mapol me bedo ma cwinywa yom. * (Nen lok ma tye i tere piny.)​—Nwoyo Cik 12:7; Latitlok 3:12, 13.

2, 3. (a) Tyen lokke ngo me bedo ngat ma cwinye yom? (b) Pingo i kare mukene tek tutwal me bedo ki yomcwiny?

² In kono? Tika itye ki yomcwiny? Bedo ma cwinyi yom  tyen lokke ni nongo iwinyo maber dok iyeng ki kwoni. Baibul nyuto ni jo ma Jehovah ogoyo laane i komgi aye gitwero bedo ki yomcwiny me ada. Ento pingo twero bedo tek tutwal me bedo ki yomcwiny i lobo ma wakwo iye i kare-ni?

³ Twero bedo tek adada me bedo ma cwinywa yom tutwalle ka watye ka kato ki i pekki calo to pa danowa me amara, ka kiryemo ngat ma wamaro ki i kacokke, ka nyomwa oket nyo warwenyo ticwa woko. Tek bene me bedo ma cwinywa yom ka kuc pe i pacowa, ka lutic nyo lutino kwan luwotwa ginywarowa nyo bene ka kiunowa dok kitweyowa i buc pi bedo lutic pa Jehovah. Nyo yotkomwa twero balle woko, kun watwoyo two ma pe cang, nyo wabedo ki turcwiny mukato kare woko. Ento wi opo ni Yecu Kricito onongo maro kweyo cwiny dano dok oweko gubedo ki yomcwiny. (Matayo 11:28-30) I Pwonye me Wi Got, Yecu oloko i kom kit mogo ma twero konyowa me bedo ki yomcwiny kadi bed watye ki pekki mapol pi kwo i lobo pa Catan.

4, 5. Gin ango ma omyero watim wek wanong yomcwiny dok wamedde ki bedo ma cwinywa yom?

⁴ Gin mukwongo ma Yecu oloko iye pire tek adada. En owaco ni: ‘Gitye ki yomcwiny jo ma gingeyo ni gin lucan i lok me cwiny, pien ker me polo megi.’ (Matayo 5:3) Ka wangeyo ni wan lucan i lok me cwiny, ci nongo waniang ni omyero wange Lubanga dok ni wamito konye ki tirane. Wanyuto meno nining? Wanyuto ki kwano Baibul, winyo Lubanga, ki dong keto pi worone bedo gin me acel i kwowa. Timo jami magi bikonyowa me bedo ki yomcwiny. Niyewa ni cikke pa Lubanga ducu cok cobbe bijing doko matek. Dok ‘yomcwiny ma genwa cung iye’ ma wanongo ki i Baibul cuko cwinywa.​—Tito 2:13.

⁵ Ka wamito ni wabed ki yomcwiny kadi bed watye ki pekki mapol, ci omyero wamedde ki jingo watwa ki Jehovah wek obed matek. Lakwena Paulo ocoyo ni: “Wubed ki yomcwiny i Rwot kare ducu. Dok anwoyo waco botwu aye ni, Wubed ki yomcwiny!” (Jo Pilipi 4:4) Me bedo larem Jehovah, omyero wanong ryeko mua ki bot Lubanga. Lok pa Lubanga wacci: “Dano ma dong onongo ryeko tye ki yomcwiny, ki dano ma dong olimo niang matut bedo kit meno, . . . Ryeko tye macalo yat me kwo bot jo ma gumako matek liking; jo ma gumake matek liking gilwongogi [ni] jo ma cwinygi yom.”​—Carolok 3:13, 18.

6. Ngo mukene ma omyero watim wek wabed ma cwinywa yom?

⁶ Ento wek wabed ma cwinywa yom,  pire tek adada ni wamedde ki keto i tic gin ma wapwonyo ki i Baibul. Yecu onyuto kit ma man pire tek kwede i kare ma en owaco ni: “Ka wungeyo lok man, ci wubibedo ki yomcwiny ka wutiyogi.” (Jon 13:17; kwan Yakobo 1:25.) Man pire tek ka wamito cobo mitiwa me cwiny wek wabed ki yomcwiny. Ento watwero bedo ki yomcwiny nining kadi bed ni tye jami mapol ma romo kwanyo yomcwinywa woko? Kong dong wanenu gin mukene ma Yecu owaco i Pwonye me Wi Got.

7. Jo ma gikumo dok gitwero bedo ki yomcwiny nining?

⁷ ‘Gitye ki yomcwiny jo ma kumo, pien gibikweyo cwinygi.’ (Matayo 5:4) Watwero pennye kekenwa ni, ‘Jo ma gitye ka kumo dok gitwero bedo ki yomcwiny nining?’ Yecu onongo pe tye ka lok i kom jo ducu ma gikumo. Pol pa dano maraco gikumo, nyo cwinygi cwer pien gitye ka wok ki i pekki mapol i “kare me agikki” man ma ‘piny tye marac-ci.’ (2 Temceo 3:1) Ento nongo gitye ka paro pigi kengi pe pi Jehovah, pi meno pe gitwero dongo wat macok kwede dok pe gitwero bedo ki yomcwiny. Yecu onongo tye ka lok i kom jo ma gingeyo ni gin lucan i lok me cwiny. Gikumo pien gineno ni jo mapol gukwero Lubanga woko nyo pe gitye ka kwo i yo ma Lubanga mito. Gingeyo bene ni gin lubalo, dok gineno jami maraco ma tye ka timme i lobo-ni. Jehovah neno jo ma gikumo pi tyen lok matir, tiyo ki Lokke me kweyo cwinygi, dok miyogi yomcwiny ki kwo.​—Kwan Ejekiel 5:11; 9:4.

8. Bedo ngat ma mwol twero konyi me bedo ki yomcwiny nining?

⁸ ‘Gitye ki yomcwiny jo ma mwol, pien gibileyo lobo doko megi.’ (Matayo 5:5) I yo ango ma bedo ngat ma mwol twero konyi me bedo ki yomcwiny? Pol pa dano me lobo-ni giger dok gimaro daa, ma man kelo pekki mapol. Ento ka gupwonyo ada, gilokke ci giruko ‘kit pa dano manyen.’ Kombeddi dong ginyuto ‘cwiny ma miyo giparo pi can pa luwotgi, gibedo ki kica, mwolo, woro ki diyo cwiny.’ (Jo Kolocai 3:9-12) Macalo adwogine, gitye ki kuc, gibedo ki wat maber ki jo mukene, dok cwinygi yom. Medo i kom meno, Lok pa Lubanga ocikke ni “gibileyo lobo doko megi.”​—Jabuli 37:8-10, 29.

9. (a) Lok ma Yecu owaco ni jo ma mwol “gibileyo lobo doko megi” tyen lokke ngo? (b) Pingo “jo ma kec ki orwo pii nekogi pi bedo jo ma kitgi atir” gitye ki yomcwiny?

⁹ Lok ma Yecu owaco ni jo ma mwol “gibileyo lobo doko megi” tyen lokke ngo? Jo ma kiwirogi gibileyo lobo i kare ma gibiloyo lobo macalo rwodi ki lulamdog. (Niyabo 20:6) Dano milion mapol ma pe gitye ki gen me cito i polo gibileyo lobo i kare ma kibiwekogi me bedo kwo i lobo pi naka. Gibibedo labongo roc mo, dok ki kuc kacel ki yomcwiny. Gin aye gubedo jo ma Yecu oloko i komgi ni: ‘Gitye ki yomcwiny jo ma kec ki orwo pii nekogi pi bedo jo ma kitgi atir.’ (Matayo 5:6) Jehovah bicobo mitigi me bedo jo ma kitgi atir i kare ma en bikwanyo jami maraco ducu. (2 Petero 3:13) I lobo manyen, jo ma kitgi atir  gibibedo ki yomcwiny dok pe dong gibikumo matwal pi jami ma lutim maraco timo.​—Jabuli 37:17.

10. Bedo ngat ma lakica tyen lokke ngo?

¹⁰ ‘Gitye ki yomcwiny lukica, pien gin bene gibitimo kica botgi.’ (Matayo 5:7) Bedo ngat ma lakica tyen lokke ni iparo pi jo mukene dok iwinyo aremgi ka gitye ka deno can. Kadi bed kit meno, kica pe obedo gin ma iwinyo awinya ki i cwinyi. Baibul pwonyowa ni bedo ngat ma lakica kwako timo gin mo me konyo jo mukene.

11. Labol i kom Lacamaria maber-ri pwonyowa gin ango?

¹¹ Kwan Luka 10:30-37. Labol pa Yecu i kom Lacamaria maber-ri nyuto botwa tyen lok me bedo lakica. Lacamaria-ni owinyo arem pa Lajudaya-ni, dok man oweko en otute me konye. I nge miyo labol meno, Yecu owaco ni: “In bene cit, icitim kit meno.” Dong waromo pennye kekenwa ni: ‘An bene atye ka timo kit meno? An tika atye ka timo gin ma Lacamaria maber-ri otimo? Ka jo mukene gitye ka deno can, tika atwero timo gin mo me konyogi? Me labolle, tika atwero konyo jo me kacokke ma mwakagi oteggi, nyo mon to, nyo lutino ma lunyodogi pe gitiyo pi Jehovah? An mono atwero ‘cuko cwiny jo ma cwinygi otur?’​—1 Jo Tecalonika 5:14; Yakobo 1:27.

12. Pingo wabedo ki yomcwiny ka wan lukica?

¹² Pingo wabedo ki yomcwiny ka wan lukica? Ka wanyuto kica bot jo mukene, nongo watye ka miyo mic, dok Yecu owaco ni miyo mic kelo botwa yomcwiny. Tyen lok mukene aye ni wangeyo ni nongo watye ka yomo cwiny Jehovah. (Tic pa Lukwena 20:35; kwan Jo Ibru 13:16.) Kabaka Daudi oloko kit man i kom dano ma lakica ni: ‘Jehovah bigwoko en dok miyo bedo kwo; gibilwonge ni ngat ma cwinye yom i lobo.’ (Jabuli 41:1, 2) Ka waparo pi dano dok wanyuto kica botgi, ci wan bene wabinongo kica pa Jehovah dok wabibedo ki yomcwiny pi naka.​—Yakobo 2:13.

13, 14. Pingo pire tek me bedo “jo ma cwinygi leng”?

¹³ Yecu owaco ni: ‘Gitye ki yomcwiny jo ma cwinygi leng, pien gin aye gibineno Lubanga.’ (Matayo 5:8) Me bedo jo ma cwinygi leng, omyero wagwok tamwa ki mitiwa obed maleng. Man pire tek tutwal ka wamito ni Jehovah ojol worowa.​—Kwan 2 Jo Korint 4:2; 1 Temceo 1:5.

¹⁴ Jo ma cwinygi leng gitwero bedo ki wat macok ki Jehovah, ma owaco ni: ‘Jo ma lwoko ginarukagi gitye ki yomcwiny.’ (Niyabo 22:14) Lok man ni “lwoko ginarukagi” tyen lokke ngo? Pi Lukricitayo ma kiwirogi, tyen lokke ni Jehovah nenogi calo jo maleng, en bimiyogi kwo ma dong pe to i polo, dok gibibedo ki yomcwiny pi naka. Pi lwak dano mapol ata-ni, ma gitye ki gen me kwo i lobo, man tyen lokke ni Jehovah oye ni gubed lureme pien nenogi macalo jo ma kitgi atir. Baibul waco ni gin “gutyeko lwoko jorgi i remo pa Latin romo odoko matar adada.”​—Niyabo 7:9, 13, 14.

15, 16. I yo ango ma jo ma cwinygi leng “gibineno Lubanga”?

¹⁵ Jehovah owaco ni: “Dano pe neno wanga ci bedo kwo.” (Nia 33:20) Dong, i yo ango ma jo ma cwinygi leng “gibineno Lubanga”? Nyig lok me leb Grik ma kigonyo ni “neno” twero bene gonye ni tamo, niang, nyo ngeyo gin moni. Dong ‘neno Lubanga’ tyen lokke ni niang kodi dano ango ma en obedo ki dong maro kite. (Jo Epeco 1:18) Yecu olubo kit pa Lubanga macok adada mumiyo en owaco ni: “Ngat ma oneno an dong oneno Won.”​—Jon 14:7-9.

¹⁶ Medo i kom meno, ‘waneno Lubanga’ ka waneno kit ma en konyowa kwede i kwowa. (Yubu 42:5) Watwero bene ‘neno’ nyo keto tamwa i kom jami mamwonya ma Lubanga ocikke me timone pi jo ma cwinygi leng dok gitiyo bote ki gen. Dok jo ma kiwirogi gibineno Jehovah wang ki wang ka kicerogi ci gucito i polo.​—1 Jon 3:2.

17. Pingo jo ma kelo kuc gitye ki yomcwiny?

¹⁷ I nge meno, Yecu dok owacci: ‘Gitye ki yomcwiny jo ma kelo kuc.’ (Matayo 5:9) Ka waketo tek me bedo ki kuc ki jo mukene, ci wabibedo ki yomcwiny. Lapwonnye Yakobo ocoyo ni: “Jo ma kelo kuc gicoyo kodigi i kuc me nyako kit ma atir.” (Yakobo 3:18) Pi meno, ka itye ka tute me bedo ki kuc ki ngat mo i kacokkewu, nyo i gangwu, leg Jehovah wek okonyi me bedo ngat ma kelo kuc. Ci Jehovah bimini cwiny mere maleng ma bikonyi me nyuto kit pa Lukricitayo, dok man bimedo yomcwinyi. Yecu onyuto kit ma pire tek kwede me kwanyo kare me yubo wat i kare ma en owaco ni: “Pi meno, ka ikelo motti bot  Lubanga, ma itye ka tyerone i kom keno tyer, ka ce ipo ni omeru onongo tye ki lok mo i komi, ci myero iwek motti kunnu i nyim keno tyer, ci idok cen; mukwongo kong wumer wuribbe ki omeru, ka lacen dong idwogi ityer motti.”​—Matayo 5:23, 24.

18, 19. Pingo Lukricitayo gibedo ki yomcwiny kadi bed kitye ka unogi?

¹⁸ ‘Wutye ki yomcwiny ka dano ngalowu, kun giyelowu ma giwaco kit lok ducu maraco gobagoba i komwu pira.’ Gin ma Yecu owaco-ni tyen lokke ngo? En omedo ni: “Wupwo, cwinywu obed yom atika, pien bakacic ma gibimiyowu me pwoc dit, tye i polo, pien lunebi ma yam gukwongo nyimwu dano guketo ayelayela i komgi kit meno.” (Matayo 5:11, 12) I kare ma kigoyo lukwena dok kicikogi pe me tito kwena, gin “gua woko ki i nyim Lukiko ma onongo cwinygi yom.” Ngene kene ni, pe gunongo mit pa odoo ma kigoyogi kwede. Ento cwinygi obedo yom “pien Lubanga otamo ni gimyero pi dit man me nongo lewic pi nying Yecu.”​—Tic pa Lukwena 5:41.

¹⁹ I kare-ni, jo pa Jehovah bene giciro can ki yomcwiny ka kiunogi pi nying Yecu. (Kwan Yakobo 1:2-4.) Calo lukwena, wan bene i kare-ni pe wanongo mit pa aunauna nyo can ma kiketo i komwa. Ento ka wagwoko genwa bot Jehovah, ci en biminiwa tekcwiny me kanyo. Tam kong gin mutimme i kom Henryk Dornik ki omine. I Agucito 1944, kimakogi ci kicwalogi i kam ma kigwoko iye mabuc. Jo ma gubedo ka keto ayelayela i komgi guwacci: “Pe twere kulu me loko tam pa jo-ni. Deno can wa i to pi niyegi keligi yomcwiny.” Omego Henryk otito ni: “Kadi bed ni onongo pe amito to, deno can ki tekcwiny dok ki woro pi genena bot Jehovah okela yomcwiny.” En omedo ni: “Lega ki cwinya ducu omiyo anyikke cok ki Jehovah, dok en onyuto ni etye Lami kony ma genne.”

20. Pingo cwinywa yom me tic pi “Lubanga ma layomcwiny”?

²⁰ Ka Jehovah, “Lubanga ma layomcwiny,” cwinye yom i komwa, ci wan bene wabedo ki yomcwiny kadi bed kiunowa, jo ma gangwa gijemo i komwa, komwa lit, nyo wati woko. (1 Temceo 1:11, NW) Watwero bene bedo ki yomcwiny pien Lubangawa, “ma pe loko lok goba,” ocikke me timo jami mabeco mapol piwa. (Tito 1:2) Ka Jehovah ocobo cikkene, wiwa biwil woko i kom pekki ma watye kwede i kare-ni. Ki lok ada, pe watwero byekone i yo ducu kit ma kwo bibedo ma mwonya kwede i Paradic! Ada, wabinongo ‘yomcwiny pi lonyo madwong ma wabilimo.’​—Jabuli 37:11.