1, 2. (a) Apokapoka ango ma tye i kit ma Jehovah tero kwede dano ki kit ma luloc madongo me lobo man gitero kwede ki dano? (b) Ngo ma wabinyamo i pwony man?

JO MA gitye ki twero pol kare giloyo jo mukene ki tek nyo gidiyogi. (Matayo 20:25; Latitlok 8:9) Jehovah pe timo gin ma kit meno! Kadi bed ni en Won Twer Ducu, dok en Ngat matek loyo i polo ki lobo, En pud paro pi jo ma gitye ki roc. En lakica dok paro pi kit ma wawinyo kwede kacel ki jami ma mitte i kwowa. En ngeyo ni watye ki roc dok ngeyo gorowa, pi meno en pe penyowa me timo jami ma kerowa pe twero.​—Jabuli 103:13, 14.

² I Baibul, waneno kit ma Jehovah paro kwede pi jone. Kong dong wanyamo labol adek: Me acel, kit ma Jehovah okonyo kwede Camuel i kare ma en pud tidi wek omi tira bot Lalamdog Madit Eli. Me aryo, kit ma Jehovah odiyo kwede cwinye i kom Moses i kare ma Moses otamo ni pe etwero telo rok me Icrael me a ki i Ejipt. Ki dong me adek,  kit ma Jehovah oparo pi Luicrael i kare ma gia ki Ejipt. Ngo ma wapwonyo i kom Jehovah ki i labol magi, dok watwero lubo lanene nining?

3. Gin ango me aura ma otimme i kom Camuel i dyewor mo acel, dok lapeny ango ma watwero pennye kwede? (Nen cal ma tye i pot karatac 21.)

³ Camuel ocako tic i kema me woro ma onongo pud tidi adada. (1 Camuel 3:1) I dyewor mo acel, i kare ma en onino woko, gin mo me aura otimme. * (Nen lok ma tye i tere piny.) (Kwan 1 Camuel 3:2-10.) En owinyo ka ngat mo lwongo nyinge. Camuel otamo ni Lalamdog Madit Eli aye ma tye ka lwonge. Ki mwolo en oa malo, oringo bot Eli ci owaco ni: “An atye ene, ibedo ka lwonga.” Ento Eli ogamo ni: “An pe alwongi.” I kare ma gin man otimme tyen aryo mukene, Eli oniang ni Lubanga aye ma tye ka lwongo Camuel. Pi meno Eli owaco ki Camuel gin ma myero egam ka dok kilwonge, ci Camuel bene olubo. Pingo Jehovah pe owaco ki Camuel atir i acakkine ni en aye ma etye ka lwonge? Baibul pe tittiwa. Ento twero bedo ni Jehovah otimo kit meno pien onongo paro pi kit ma Camuel winyo kwede.

4, 5. (a) Ngo ma Camuel otimo i kare ma Jehovah omine kwena me atita bot Eli? (b) Lok man pwonyowa gin ango i kom Jehovah?

⁴ Kwan 1 Camuel 3:11-18. Cik pa Jehovah ociko lutino ni omyero guwor jo madongo, tutwalle jo ma gitye ki twero. (Nia 22:28; Lulevi 19:32) Pi meno, tek tutwal me tamo ni awobi matidi calo Camuel onongo twero a odiko ci cito bot Eli, kun wacce ki tekcwiny kwena me ngolo kop pa Lubanga. Baibul wacciwa ni Camuel obedo ka “lworo tito bot Eli lok ma Lubanga onyuto bote.” Ento Lubanga onyuto atir bot Eli ni En aye ma elwongo Camuel. Macalo adwogine, Eli owaco ki Camuel ni omyero pe omung lok mo ma Lubanga otite. Camuel owinyo lok pa Eli ci “otitte lok ducu.”

⁵ Kwena man onongo pe nyen tutwal bot Eli. Con kong, “dano pa Lubanga mo” onongo otito bot Eli lok ma kit man. (1 Camuel 2:27-36) Lok man pwonyowa kit ma Jehovah ryek dok paro kwede pi dano.

6. Pwony ango ma wanongo ki i kit ma Lubanga okonyo kwede Camuel i kare matidi?

⁶ Tika ibedo ngat ma pud tidi? Ka tye kit meno, lok i kom latin awobi Camuel nyuto ni Jehovah niang pekoni kacel ki kit ma iwinyo kwede. Oromo bedo ni in lalewic dok inongo ni tek me tito kwena bot jo madongo nyo me bedo pat ki lulwakki. Itwero bedo ki gen ni Jehovah mito konyi. Pi meno, leg bote dok ititte kit ma iwinyo kwede kikome.  (Jabuli 62:8) Tam matut i kom labol ma i Baibul i kom jo matino calo Camuel. Dok ilok ki omege ki lumege ma lulwakki nyo ma mwakagi kato megi ma dong gukato ki i pekki marom ki megi. Giromo titi pi kare mogo ma Jehovah okonyogi, gwok nyo i yo ma pe gubyeko.

7, 8. I yo ango ma Jehovah onyuto kwede ni eparo pi kit ma Moses winyo kwede?

⁷ I kare ma Moses onongo tye ki mwaka 80, Jehovah omine tic matek adada: me kwanyo rok me Icrael woko ki i opii i Ejipt. (Nia 3:10) Tic man nen calo okelo twon ur madit bot Moses, pien en onongo dong obedo lakwat i lobo Midian pi mwaki 40. Moses owacci: “An anga ma aromo cito bot Parao, ki kwanyo likwayo pa Icrael woko ki i Ejipt?” Jehovah ogamo ni: “An aye abibedo kwedi.” (Nia 3:11, 12) Jehovah bene ocikke bote ni ludongo pa jo Icrael “gibiworo” lok doge. Ento Moses pud dok openyo ni: ‘Ento ka pe guye lokka dok pe guwinyo doga kono?’ (Nia 3:18; 4:1) Moses onongo tye ka waco ni Jehovah pe ngeyo ngat ma myero eyer! Ento Jehovah odiyo cwinye i kom Moses. En bene omine teko me timo tango. Ki lok ada, Moses aye obedo dano mukwongo ma kicoyo pire i Baibul ma kimiye teko man.​—Nia 4:2-9, 21.

⁸ Kadi wa i nge meno ducu, Moses pud dok oyenyo yo mukene me gengo ngeye. En owaco ni pe engeyo lok maber. Pi meno Lubanga owacce ni: ‘Abibedo kwedi ka iloko, abipwonyi ki gin ma ibiloko.’ Tika man ojingo cwiny Moses? Ku, en openyo Lubanga ni ocwal ngat mukene! Lok man owango i Jehovah. Ento en pud onongo paro pi kit ma Moses winyo kwede, man oweko en ocwalo Aron me lok pi Moses.​—Nia 4:10-16.

9. Diyo cwiny ki kica pa Jehovah okonyo Moses nining me bedo latela maber?

 ⁹ Man pwonyowa gin ango i kom Jehovah? Pien Jehovah aye obedo Won Twer Ducu, en onongo twero tic ki tekone me bwuro Moses wek olub mitine. Me ka meno, Jehovah odiyo cwinye dok onyuto kica kun cuko cwiny laticce mamwol-li ni ebibedo kwede. Tika diro man otiyo? Ada otiyo! Moses odoko latela ma kwiri pa jo pa Lubanga. En otute me bedo mwol dok onongo paro pi jo mukene, kit macalo Jehovah bene otere kwede.​—Wel 12:3.

10. Adwogi ango ma wanongo ka walubo lanen pa Jehovah me paro pi jo mukene?

¹⁰ Pwony ango ma tye piwa i kare-ni? Ka itye lawi ot, lanyodo, nyo laelda, nongo itye ki twero i kom jo mukene. Pi tyen lok man, pire tek tutwal ni ilub lanen pa Jehovah kun ibedo lakica, idiyo cwinyi dok inyuto ni iparo pi dakoni, lutinoni, ki jo me kacokke. (Jo Kolocai 3:19-21; 1 Petero 5:1-3) Ka ilubo lanen pa Lubanga Jehovah ki Yecu Kricito, ma obedo Moses Madit, ci ibimiyo bedo yot bot jo mukene me lok kwedi, dok man bicuko cwinygi adada. (Matayo 11:28, 29) Ibibedo lanen maber botgi.​—Jo Ibru 13:7.

11, 12. Jehovah otimo ngo wek jone gubed agonya dok labongo lworo i kare ma en okwanyogi woko ki i Ejipt?

¹¹ Twero bedo ni Luicrael ma welgi kato milion adek kulu guweko Ejipt i mwaka 1513 ma Yecu peya obino. I kin lwak meno onongo tye lutino, jo ma mwakagi oteggi, ki nen calo jo mogo ma komgi lit nyo lungolo. Lwak ma kit man onongo gimito Latela ma niang dok paro pi dano. Man aye latela ma Jehovah obedo kikome dok man onen i kare ma en otiyo ki Moses me telogi. Macalo adwogine, Luicrael gubedo labongo lworo i kare ma guweko lobo acel keken ma onongo gingeyo.​—Jabuli 78:52, 53.

¹² Jehovah otimo ngo wek jone gubed agonya dok labongo lworo? En oguro rok me Icrael ‘ma guyubbe calo mony’ i kare ma gia ki i Ejipt. (Nia 13:18) Kit ma gubedo ma guyubbe i yo man, onongo gitwero neno ka maleng ni Lubanga tye ka doro jami ducu. Jehovah bene omiyogi “pol” i dye ceng ki  “mac ma lyel” i dye wor wek opo wigi ni etye kacel kwedgi, kun etelogi dok egwokogi. (Jabuli 78:14) Dok rok me Icrael onongo gimito cuko cwiny man pi gin ma otimme i nge meno.

13, 14. (a) Jehovah ogwoko Luicrael i Nam Makwar nining? (b) I yo ango ma Jehovah onyuto ni tekone dwong loyo pa jo Ejipt?

¹³ Kwan Nia 14:19-22. Go kong ni onongo itye ka wot kacel ki Luicrael. Dok kiguro wiwu woko. Lumony me Ejipt gitye i ngewu, dok Nam Makwar tye i nyimwu. Ci Lubanga otimo gin mo. Wir me pol ma onongo yam bedo i nyimwu oa odok i ngewu, kun poko kinwu ki jo me Ejipt. Lumony magi dong gitye i col piny ento wun wutye i dero ma obino i yo me tango! Ci ineno ka Moses oryeyo cinge i wi nam, dok yamo matek mua ki tung wok ceng ocako kodo ci opoko dye nam woko kun yabo yo i dyere. Dong in, jo me gangi kacel ki leyini ducu wucako wot i dye nam kun dano weng giwoto ma guyubbe maber. Itye ki ur ni ngom-me pe dyak dok pe pwot. Tye ma otwo dok tek ma wot iye yot. Macalo adwogine, kadi wa jo ma giwoto mot guo i loka nam tungcel.

¹⁴ Kwan Nia 14:23, 26-30. Ma jami magi ducu tye ka timme, Parao ma lawakke dok laming, ocako ryemo korwu. Ci Moses oryeyo cinge i wi nam, dok pii ocako dwogo cen kun mol kit ma con. Pii omwonyo Parao ki monnye ducu. Pe tye ngat mo ma obwot i kingi!​—Nia 15:8-10.

15. Gin ma otimme man pwonyowa ngo i kom Jehovah?

 ¹⁵ Gin ma otimme man pwonyowa bene gin mukene i kom Jehovah. En obedo Lubanga ma dag anyobanyoba dok kite man weko wabedo labongo lworo. (1 Jo Korint 14:33) Calo lakwat ma maro dok gwoko romine, Jehovah gwoko jone i yo ma nen. En gwokogi ki i cing lumonegi. Man cuko dok kweyo cwinywa matek kit macalo watye ka nyikke cok ki agikki me lobo-ni.​—Carolok 1:33.

16. Adwogi maber ango ma watwero nongo ka wakwano kit ma Jehovah olaro kwede ki jo Icrael?

¹⁶ I kare-ni, Jehovah pud paro pi jone macalo gurup. En konyogi me gwoko watgi kwede dok gwokogi ki i cing lumonegi. Dok bimedde ki timo meno i kare me twon can madit atika ma dong cok cakke-ni. (Niyabo 7:9, 10) Pi meno kadi bed ni pud gitino nyo gidito, komgi yot nyo gitye ki goro, jo pa Lubanga komgi pe bimyel i kare me twon can madit atika-ni. * (Nen lok ma tye i tere piny.) Ki lok ada, gibibedo ma cwinygi tek dok ma komgi opye mot! Wigi bipo i kom lok pa Yecu ma owaco ni: “Myero wunen malo, myero wuting wiwu malo, pien kare me kokowu dong onyiko cok.” (Luka 21:28) Kadi bed ni Gog, ma obedo gurup pa lobe ma gitek kato Parao, bibino ka lweny i komgi, jo pa Lubanga gibibedo ki tekcwiny ni Jehovah bigwokogi. (Ejekiel 38:2, 14-16) Pingo? Pien gingeyo ni Jehovah pe lokke. En dok binyuto bot jone ni en Lalar ma lamar dok lakica.​—Icaya 26:3, 20.

17. (a) Adwogi maber ango ma wanongo ka wakwano jami ma otimme ma nyuto kit ma Jehovah paro kwede pi jone? (b) Ngo ma wabinyamo i pwony ma lubo man?

¹⁷ I pwony man, waneno labol mogo ma nyuto kit ma Jehovah paro kwede pi dano dok lakica ka gwoko, telo, dok laro jone. Ka ilwodo jami magi ma otimme-ni, temme me pwonyo gin mo manyen i kom Jehovah kun ingiyo matut jami mogo ma onongo peya itamo iye con. Ka iwoto ki pwonyo kit pa Jehovah, mari pire kacel ki niyeni i kome bidoko tek. I pwony ma lubo man, wabipwonyo yo mogo ma watwero lubo kwede lanen pa Jehovah ka waparo pi jo me odiwa, jo me kacokke, ki jo ma watito kwena botgi.