1. I yo ango ma luwor Jehovah ginyuto kwede ni gimaro omegigi?

LUWOR Jehovah i twok lobo-ni ducu gitye calo jo me ot. Gubedo omege ki lumege ma gimare matek i kingi. (1 Jon 4:16, 21) I kine mogo, gijalo jami ma pigi tego pi konyo omegigi, ento pol kare ginyuto margi i jami matinotino ma gitimo pi omegigi. Me labolle, giromo waco lok mo maber bot omegigi nyo giterogi i yo me kica. Ka wan lukica bot jo mukene, ci nongo watye ka lubo kit pa Wonwa me polo.​—Jo Epeco 5:1.

2. Yecu olubo lanen me mar pa Wonne nining?

² Yecu olubo lanen pa Wonne maber adada. En onongo tero dano kare ducu i yo me kica. En owaco ni: “Wubin bota, jo ducu muol ki ma yec onurowu, ci abimiyo wuywe.” (Matayo 11:28, 29) Ka walubo lanen pa Yecu me “paro pi lucan,” ci wabikelo yomcwiny bot Jehovah, kun  wan bene wabedo ki yomcwiny. (Jabuli 41:1) I pwony man, wabineno kit ma wan bene watwero nyuto cwiny me kica bot jo me odiwa, bot omege ki lumege, ki dong jo ma warwatte kwedgi i ticwa me tito kwena.

3. Laco twero nyutone nining ni eparo pi dakone? (Nen cal ma tye i pot karatac 27.)

³ Wegi odi omyero guwek lanen maber kun ginyuto kit ma giparo kwede pi jo me odigi. (Jo Epeco 5:25; 6:4) Baibul waco ni co omyero guter mongi ki kica dok ki niango. (1 Petero 3:7) Laco ma niang ngeyo ni kadi bed epat ki dakone i yo mapol, ento meno pe te lokke ni eber eloyo dakone. (Acakki 2:18) En paro pi kit ma dakone winyo kwede dok nyute woro kun miye deyo bene. Dako mo i lobo Canada oloko kit man i kom cware: “En pe cayo kit ma awinyo kwede dok bene pe wacca ni, ‘Pe mitte ni iwiny kit meno.’ En obedo ngat ma tero ite dok winyo lokka mot. Ka tye ka konya me loko kit ma atamo kwede i kom gin mo, en timo man i yo me kica.”

4. Kit ma laco tero kwede ki mon mukene twero nyutone nining ni en paro pi kit ma dakone winyo kwede?

⁴ Laco ma paro pi kit ma dakone winyo kwede pe loko lok ore nyo nyuto miti ma pe opore i kom mon mukene, kadi bed wang ki wang nyo i Intanet. (Yubu 31:1) En pe tiyo ki ka nywako lok me Intanet pi loko lok ore, dok bene pe neno cal macilo i Intanet. Ada, en medde ki bedo lagen bot dakone pien maro dakone, maro Jehovah dok dag gin marac.—Kwan Jabuli 19:14; Amoc 5:15.

5. I yo ma nining ma dako twero nyutone ni eparo pi cware?

⁵ Ka won ot lubo lanen pa lawiye, ma en Yecu Kricito, ci bibedo yot pi dakone me ‘wore.’ (Jo Epeco 5:24, 25, 33) Dok ka dakone wore, ci dakone bitute matek me niang kit ma en winyo kwede kun tero cware ki mwolo ka en tye ka tiyo tic me kacokke nyo ka peko mo tye. Laco mo i lobo Britain owacci: “Pol kare dakona niang woko ki i wanga ka lok mo tye ka yelo tamma. En keto cik ma iye lac ma tye i Carolok 20:5 i tic, kadi bed ni mitte ni kong okur kare mupore me ‘golo woko’ tam ma tye i cwinya, ka obedo gin mo ma atwero nywakone kwede.”

6. Wan ducu watwero cuko cwiny lutino nining me nyuto kica ki paro pi jo mukene, dok adwogi maber ango ma ginongo ki iye?

⁶ Ka lunyodo ginyuto kica i kingi, ci giweko lanen maber pi lutinogi. Omyero bene gupwony lutinogi me paro pi jo mukene ki dok me bedo lukica. Me labolle, lunyodo gitwero pwonyo lutinogi pe me ngwec i Ot me Ker. Nyo ka gitye ka namo i kin lwak, omyero guwac bot lutinogi ni kong gukur wang ma jo ma mwakagi muteggi gutoko dek. Ngene kene ni, jo me kacokke ducu gitwero konyo lunyodo. Pi meno, omyero wapwo latin ka otimo gin mo ma nyuto  ni en paro pi dano, me labolle, ka oyabiwa doggola. Man bimiyo latin winyo maber dok konye me pwonyo ni ‘miyo mot kelo yomcwiny makato gamo agama.’​—Tic pa Lukwena 20:35.

7. Yecu onyuto nining ni eparo pi laco mo ma ite oding, dok ngo ma watwero pwonyone ki i lanene?

⁷ I nino mo acel, Yecu onongo tye i dye lobo Dekapoli ci “gikelo bote dano ma ite oding ma te lebe oto.” (Marako 7:31-35) Yecu ocango laco-ni, ento pe i dye lwak. Pingo? Kit macalo laco-ni onongo ite oding, nen calo en onongo pe winyo agonya i kin lwak. Yecu oniang kit ma laco-ni winyo kwede, “otere cen i mung” ka ma dano pe iye ci ocange ki kunnu. Ki lok ada, wan pe watwero timo tango, ento omyero watam pi miti pa utmegiwa dok wanyut botgi kica. Lakwena Paulo ocoyo ni: “Myero watamu kit macalo watwero tugo kwede cwinywa kekenwa i mar ki i tiyo tic mabeco.” (Jo Ibru 10:24) Yecu oniang kit ma laco ma ite oding-ngi winyo kwede dok otere ki cwiny me kica. Man pud dong obedo lanen maber adada piwa!

8, 9. I yo ma nining ma watwero nyutone ni waparo pi jo muteggi ki jo ma gitye ki goro? (Mi labol mogo.)

⁸ Par pi jo muteggi ki jo ma gitye ki goro. Gin ma pire tek loyo i kacokke pa Lukricitayo aye mar, ento pe cobo tic maber. (Jon 13:34, 35) Mar miyo watute matek me konyo omegiwa ki lumegiwa ma mwakagi oteggi nyo ma gitye ki goro, me cito i cokke nyo i tic me pwony. Wakonyogi kadi bed ni timo meno balo yubwa nyo pe gitwero tic pi cawa malac. (Matayo 13:23) Micheal, ma woto ki lela pa lungolo, tye ki twon pwoc madit adada pi kony ma en nongo ki bot jo gange kacel ki omege me kacokke. En owacci: “Pi kony ma gimina, pol kare abedo tye i cokke dok anywako i tic me tito kwena. Amaro tutwalle tito kwena i dye lwak.”

⁹ I Betel mapol, tye omege ki lumege ma lugen mapol ma mwakagi oteggi nyo gitye ki goro. Luelda ma i Betel ginyuto botgi mar ki konyogi me tito kwena kun gitiyo ki cim nyo coyo waraga. Omego Bill, ma tye ki mwaka 86 dok coyo waraga bot jo ma gibedo i bor piny owacci: “Watye ki pwoc madit pi mot me coyo waraga bot jo mukene.” Lamego Nancy, ma mwakane cok 90 owacci: “Pe atero coyo waraga calo obedo mere piko karatac i baaca keken. Man obedo tito kwena. Mitte ni jo mapol gunge ada!” Lamego Ethel, ma kinywalo i mwaka 1921 owacci: “Arem dong odoko gikoma. I nino mukene anongo wa ruko bongo i koma tek adada.” Kadi bed kit meno, en maro miyo caden kun tiyo ki cim dok tye ki jo ma  gunyuto miti. Barbara, ma tye ki mwaka 85, otito ni: “Two ma atye kwede oweko anongo tek adada me wot i tic me tito kwena. Ento miyo caden ki cim konya me lok ki jo mukene. Apwoyi matek adada Jehovah!” I kare ma pe kato mwaka acel, gurup pa jo ma guteggi ma gibedo i Betel mo gutero cawa 1,228 i tito kwena, gucoyo waraga 6,265, gugoyo cim tyen makato 2,000 dok gumiyo jami akwana 6,315 kulu! Labongo akalakala mo, wangeyo ni tutegi-ni oyomo cwiny Jehovah matek adada!​—Carolok 27:11.

10. Waromo konyo omegiwa nining me nongo adwogi maber ki i cokke?

¹⁰ Par pi jo mukene i cawa me cokke pa Lukricitayo. Ka wan lukica, wakonyo omegiwa me nongo adwogi maber ki i cokke. I yo ma nining? Yo acel aye me o con wek pe wawir tamgi ki i cokke. I kare mukene, jami ma ngole atura weko wao i cokke lacen. Ento ka dong waweko odoko kitwa me o i cokke ma cawa okato, ci omyero watam kit ma man gudo kwede omegiwa, ki alokaloka ango ma waromo timone wek wanyut ni waparo pigi. Wi opo ni Jehovah gin ki Wode aye gilwongowa i cokke. (Matayo 18:20) Myero wanyut woro botgi kun wao con!

11. Pingo omyero omege ma gitye ki pwony i cokke gulub tira ma nonge i 1 Jo Korint 14:40?

¹¹ Ka waparo pi omegiwa, ci wabilubo tira me Baibul man: “Gin mo ducu wutim i kit maber, dok kore ki kore.” (1 Jo Korint 14:40) Omege ma gitye ki pwony i cokke gilubo tira man ka gityeko pwonygi i kom cawa kikome. Ka itimo kit man, inyuto ni iparo pi omego ma obimiyo pwony i nge in dok bene iparo pi jo ducu me kacokke. Tam kong kit ma cokke ma orii okato wang cawa gudo kwede jo mukene. Tye omege  mogo ma myero gudwo mutoka nyo guwot pi cawa malac me dok cen gang. Jo mukene omyero guit bac. Dok bene tye jo mogo ma luotgi pe woro Jehovah dok nongo gimito ni gudok cen gang i cawa kikome.

12. Pingo luelda gupore me nongo worowa ki marwa? (Nen bok ma wiye tye ni “ Nyut Woro pi Jo ma Gitelo Wiwa”.)

¹² Luelda gitiyo matek i kacokke ki i tic me pwony, pi meno gupore me nongo worowa ki marwa. (Kwan 1 Jo Tecalonika 5:12, 13.) Labongo akalakala mo, itye ki pwoc madit pi jami ducu ma gitimo piri. Itwero nyuto man ki bedo atera me winyo ki cwakogi, pien ‘gitye ka gwoko kwowu labongo yweyo macalo jo ma Lubanga bipenyogi pi ticgi.’​—Jo Ibru 13:7, 17.

13. Pwony ango ma wanongo ki i kit ma Yecu otero kwede dano?

¹³ Lok pa lanebi Icaya i kom Yecu otito ni: “En pe bituro lagada ma okak, dok pe bineko mac tara ma lyel niminimi.” (Icaya 42:3) Mar ma Yecu onongo tye kwede pi dano okonye me winyo aremgi. En oneno jo ma cwinygi otur dok ma gigoro calo “lagada ma okak” nyo “mac tara ma lyel niminimi” ci oniang kit ma giwinyo kwede, pi meno en odiyo cwinye i komgi dok oterogi ki kica. Kadi wa lutino matino onongo gimito bedo ki Yecu. (Marako 10:14) Ngene kene ni, pe watwero nyuto niango nyo pwonyo dano kit ma Yecu otimo kwede kikome! Ento watwero nyuto ni waparo pi dano ma i wang ticwa i kit ma waloko kwedgi, cawa mene ma walimogi, ki dong kare ma rom mene ma watero ka walimogi.

14. Pingo omyero watam i kom kit ma waloko kwede ki jo mukene?

¹⁴ Omyero walok ki dano nining? Dano milion mapol i kare-ni “gitye ka unogi matek, dong gudoko goro.” Aunauna man a ki bot lutim biacara madongo ma gin lucamucana, lucung i wibye, ki dong lupwonye dini me lobo-ni. (Matayo 9:36) Macalo adwogine, pol pa dano dong pe gigeno ngat mo dok pe gitye ki gen mo keken pi anyim. Meno aye gin mumiyo nyig lok ma watiyo kwede ki dwanwa myero onyutigi ni wan lukica dok waparo pigi! Dano mapol gimito winyo kwenawa pe ni pien watiyo ki Baibul i yo maber keken, ento bene pien waparo pigi dok wanyutigi woro.

15. Yo mapatpat ango ma watwero nyuto kwede ni waparo pi dano me wang ticwa?

¹⁵ Tye yo mapol ma watwero nyuto kwede bot jo me wang ticwa ni waparo pigi. Omyero wapeny lapeny i yo me kica dok ki woro. Painia mo acel otiyo i wang tic ka ma pol pa jone gubedo lulewic, pi meno en onongo gwokke ki penyo lapeny ma lano dano tutwalle ka pe gingeyo lagam ma atir. En onongo  pe penyo lapeny calo, “In mono ingeyo nying Lubanga?” nyo “Tika ingeyo gin ma Ker pa Lubanga obedo?” Me ka meno, en onongo waco ni, “Apwonyo ki i Baibul ni Lubanga tye ki nyinge. Atwero nyutti nying meno?” Yo me pwony man pe tiyo ka mukene, pien kit pa dano ki tekwarogi patpat. Ento myero kare ducu water dano me wang ticwa ki kica dok ki woro. Me timo man, omyero wangegi maber.

16, 17. I yo ango ma watwero nyuto kwede kica ka watye ka moko (a) cawa ma opore me limo dano? (b) kare ma rom mene ma omyero warii i pacigi?

¹⁶ Omyero walim dano i cawa mene? Ka watye ka tito kwena i ot ki ot, dano nongo pe gitamo ni wabibino pien nongo pe gulwongowa ganggi. Dong pire tek atika ni walimgi i cawa ma nongo gitwero bedo agonya me lok kwedwa. (Matayo 7:12) Me labolle, tika dano ma i wang ticwu gimaro rii i kabuto i tum cabit? Ka tye kumeno, ci iromo cako ticci ki miyo caden i teng gudi, nyo i dye lwak, nyo ki dok cen ka limo dano ma ingeyo ni gitye agonya me lok kwedwa.

¹⁷ Omyero warii i pacigi pi cawa ma rom mene? Dano tye ki tic mapol, pi meno, romo bedo ber ka walimogi pi cawa manok keken, tutwalle i acakkine. Bedo ber ka wadolo lokwa oyotoyot loyo ka warii tutwal. (1 Jo Korint 9:20-23) Ka dano oneno ni waniang ni gitye ki tic mapol, ci gitwero bedo ki miti me winyo lokwa i nino mukene ka wadok cen. Ka wanyuto nyig ma nyak pi cwiny pa Lubanga ci wabidoko “lutic kacel ki Lubanga.” Jehovah twero bene tic kwedwa me pwonyo ngat moni ki lok me ada!​—1 Jo Korint 3:6, 7, 9.

18. Ka waparo pi jo mukene, mot ango ma watwero bedo ki gen me nongone?

¹⁸ Dong wayelle wunu matek me timo gin mo keken ma watwero me nyuto kica bot jo me paciwa, omegiwa ki lumegiwa, ki dong jo ma warwatte kwedgi i tic me pwony. Man bimiyo inongo mot mapol i kare-ni ki i kare me anyim. Jabuli 41:1, 2 waco ni: ‘Tye ki yomcwiny dano ma paro pi lucan! Jehovah bilarre woko i kare me can. Jehovah bigwoko en dok miyo bedo kwo; gibilwonge ni ngat ma kome gum i lobo.’