KA IMITO ngeyo cawa, itimo gin ango? Ngene kene ni ibineno cawani. Itwero neno ni dong okato dakika 30 i nge cawa abiro me dye ceng. Ket kong ni laremi mo openyi ni, “cawa dong adi?” ibigamo nining?

Man lubbe ki ka ma ibedo iye. Me labolle, itwero wacci, “cawa dong 7:30” onyo “cawa dongo 13:30.” I kabedo mukene bene itwero wacci, “dakika 30 okato i nge cawa abiro,” ma tyen lokke ni odong dakika 30 me romo cawa aboro.

Onongo kikwano cawa nining i kare me Baibul? Gin bene onongo gitye ki yo mapatpat me kwano cawa. Ginacoya me leb Ibru (Cik Macon) otiyo ki nyig lok ni “odiko,” “cwiny dyeceng,” ki “piny dong oyuto.” (Acakki 8:11; 1 Luker 18:26) Ento i kine mukene, Baibul tiyo ki nyig lok mogo mapat me tito cawa kikome.

I lobo Icrael macon, onongo kiketo lukur-piny i dyewor. Cencwari mapol ma peya kinywalo Yecu, Luicrael onongo gipoko i dyewor ki bute adek ma lubbe ki cawa ma kiloko kwede ki lukur-piny. I kare ma kinywalo Yecu, onongo dong Lujudaya gipoko i dyewor i but cawa angwen, calo Lugrik ki Luroma.

Jiri oloko i kom cawa me dyewor magi tyen mapol. Me labolle, “i kine okogweno” Yecu owoto i wi pii kun bino tung bot lupwonnyene ma gitye i yeya. (Matayo 14:25) Dok bene Yecu otito i carolok ni: “Ka ce nene won ot ongeyo cawa mene i dyewor ma lakwo onongo obebino kwede, kono obedo ka kiyo piny, kono pe oweko gituro ode.”​—Matayo 24:43.

Yecu oloko i kom but cawa angwen magi ducu i kare ma en owaco ki lupwonnyene ni gubed ma gikiyo piny pien pe gingeyo “kare ma won ot bidwogo kwede; gwok dwog wi otyeno, nyo cwiny dyewor, nyo okogweno, nyo odiko.” (Marako 13:35) But cawa me acel me dyewor, onongo cakke i “wi otyeno” ka ceng opoto nio wa i kine ka cawa adek me dyewor. But cawa me aryo me dyewor, onongo cakke cawa adek me o i “cwiny dyewor.” But cawa me adek onongo cakke i cwiny dyewor nio wa cawa abongwen me odiko ma nongo ‘twon gweno kok’ iye. Nen calo man aye obedo cawa ma twon gweno okok iye i dyewor ma kimako iye Yecu. (Marako 14:72) But cawa me angwenne ma bene kilwongo ni “odiko” onongo cakke cawa abongwen nio wang ma ceng dong okatti.

Pi meno kadi bed ni jo me kare macon onongo gipe ki cawa me aruka i ngut cinggi nyo me kor ot, onongo pud gitwero ngeyo cawa adi kikome.