1. Kit marac pa jo me lobo-ni twero gudo mwolowa nining?

PINGO tek tutwal me keto i tic gin ma wapwonyo ki i Lok pa Lubanga? Tyen lok acel aye ni mitte ni wabed jo ma mwol wek watim gin ma atir. “I kare me agikki” ma watye ka kwo iye-ni, bedo ngat mamwol tek adada pien pol pa dano ma gurumowa ‘gimaro komgi kengi kun gubedo lumar lim, luwakke, lucac,’ dok ‘mitigi pe jukke.’ (2 Temceo 3:1-3) Macalo lutic pa Lubanga, wangeyo ni tim ma kit meno rac, ento twero nen calo jo ma kit magi kwogi tye maber dok cwinygi yom adada. (Jabuli 37:1; 73:3) Watwero bene pennye ni: ‘Tika pire tek me tute me keto miti pa jo mukene me bedo mukwongo? Tika dano gibiwora ka abedo ngat mamwol? (Luka 9:48) Ka waweko tam me ‘par piri keni’ ma tye i lobo-ni odonyo i kwowa, man twero balo watwa ki utmege dok weko bedo tek adada ki dano me ngeyo ka ada wabedo Lakricitayo. Ento ka wakwano lanen pa lutic mamwol pa Lubanga  dok walubo, ci wabinongo adwogi maber atika.

2. Ngo ma wapwonyo ki bot lutic ma lugen pa Lubanga?

² Ngo ma okonyo lutic mamwol pa Lubanga i kare macon me bedo lureme? Guyomo cwiny Jehovah nining? Gunongo kero me timo gin ma atir ki kwene? Ka wakwano lanengi ki i Baibul dok walwodo, niyewa bidoko tek.

3, 4. (a) Jehovah pwonyowa nining? (b) Pingo bedo ki ngec keken pe romo weko niyewa bedo tek?

³ Jehovah miyowa jami ducu ma mitte wek niyewa obed matek. Wanongo tira ki pwony ki i Baibul, bukkewa, kabedowa me Intanet, JW Broadcasting, cokke, kacel ki gure mapatpat. Ento Yecu otitiwa ni bedo ki ngec keken pe romo. En owaco ni: ‘Camma en tiyo gin ma ngat ma oora mito, ki cobo ticce.’​—Jon 4:34.

⁴ Timo miti pa Lubanga onongo tye calo cam bot Yecu. Camo cam ma moje tye ber pi yotkomwa dok weko wawinyo maber. I yo acel-lu, timo miti pa Lubanga weko wawinyo maber dok jingo niyewa. Me labolle, tika dong icito i cokke me tito kwena ma nongo iwinyo iol adada ento ka idok cen gang i nge tito kwena nongo iwinyo agonya dok cwinyi tye ma yom?

5. Adwogi maber ango ma wanongo ka wabedo jo maryek?

⁵ Ka watimo jami ma Jehovah mito ki botwa, meno nyuto ni wabedo jo maryek. (Yakobo 3:13) Dok bene jami mabeco mapol timme bot jo ma gitye ki ryeko. “Pe tye gin mo ma imito ma gitwero poro kwede. . . . Ryeko tye macalo yat me kwo bot jo ma gumako matek liking; jo ma gumake matek liking gilwongogi [ni] jo ma cwinygi yom.” (Carolok 3:13-18) Yecu owaco ni: “Ka wungeyo lok man, ci wubibedo ki yomcwiny ka wutiyogi.” (Jon 13:17) Lupwonnye pa Yecu onongo gibibedo ki yomcwiny ka gumedde ki timo ngo ma Yecu owaccigi ni gutim. Lubo lanene ki pwonye odoko yo me kwogi.

6. Pingo mitte ni wamedde ki keto i tic gin ma wapwonyo?

⁶ I kare-ni, mitte ni wan bene wamedde ki keto i tic jami ma wapwonyo. Tam kong i kom makanika ma tye ki ngec kacel ki jami me tic. Jami magi twero konye me bedo makanika ma ladiro ka en tiyo kwedgi. Romo bedo ni en tye ki ngec pien otiyo pi mwaki mapol, ento mitte ni omedde ki tic ki ngecce wek omedde ki bedo makanika ma ladiro. I yo acel-lu, i kare ma pud wapwonyo ada apwonya, cwinywa onongo yom pien waketo ngec ma wakwano ki i Baibul i tic. Ento wek wabed ki yomcwiny ma ri nakanaka, omyero wamedde ki keto i tic gin ma Jehovah pwonyowa kwede.

7. Ngo ma omyero watim me nongo pwony ki i lanen pa jo me Baibul?

⁷ I pwony man, wabinyamo jami mogo ma twero weko bedo tek tutwal me bedo jo mamwol. Wabipwonyo bene kit ma jo ma lugen i kare macon gumedde ki bedo jo mamwol. Ento pe mitte ni wakwan ngec man akwana keken. Omyero watam matut iye dok watute matek me keto i tic i kwowa.

8, 9. Tic pa Lukwena 14:8-15 pwonyowa gin ango i kom mwolo pa Paulo? (Nen cal ma tye i pot karatac 3.)

⁸ Lubanga mito laro jo ducu “dok mito ni jo ducu gunge lok me ada.” (1 Temceo 2:4) In mono ineno jo ducu ma pud peya gupwonyo ada nining? Lakwena Paulo otito kwena bot Lujudaya ma onongo dong gingeyo lok mo i kom Jehovah. Ento en bene otito kwena bot jo ma onongo giworo lubange me goba. Tito kwena botgi otemo mwolo pa Paulo matek adada. I yo ma nining?

⁹ I kare ma Paulo tye i wotte pi tyen mukwongo macalo lamiconari, en owoto kacel ki Barnaba i boma me Licitra. Jo me Likaonia gutero Paulo ki Barnaba calo gubedo lubange kun gilwongogi ki nying lubangegi me goba ni Jeuc ki Ermec. Tika man opilo wi Paulo and Barnaba? Tika guneno alokaloka man ki yomcwiny pien kibedo ka unogi i boma aryo ma gua ki iye-ni? Tika gutamo ni yweka man onongo bikonyo jo mapol me winyo kwena maber-ri? Pe! Man ocwero cwinygi matek dok oweko gudange ni: “Wutimo kuman pingo? Wan bene wa dano, ma kitwa rom ki mewu.”​—Tic pa Lukwena 14:8-15.

10. Pingo Paulo ki Barnaba pe gutero ni pigi dok tek loyo jo Likaonia?

¹⁰ I kare ma Paulo ki Barnaba guwacci, “wan bene wa dano,” onongo gitye ka nyuto ni gin bene gitye ki roc. Ento onongo pe gitye ka wacci kit me worogi rom ki pa jo me Likaonia. Paulo ki Barnaba onongo Lubanga aye ma oorogi calo lumiconari. (Tic pa Lukwena 13:2) Gin onongo kiwirogi ki cwiny maleng dok gitye ki gen mamwonya adada. Ento meno pe obedo tyen lok ma oweko gutamo ni pigi dok tek loyo jo magi. Gin guniang ni jo magi bene pud gitwero nongo mot me cito i polo ka guye kwena maber.

11. Watwero bedo calo Paulo ka watye ka tito kwena nining?

¹¹ Man aye yo acel ma wanyuto ni wan jo mamwol calo lakwena Paulo. Pe omyero watam ni piwa dok tek tutwal ma loyo jo mukene pien watye ki mot me tito kwena dok Jehovah konyowa me cobo ticwa maber. Watwero pennye ni: ‘Aneno jo ma i wang ticwa nining? Tika atye ki cwiny me apokapoka i kom jo mogo?’ I wi lobo ducu Lucaden pa Jehovah gitute me nongo jo ma gimito winyo kwena maber-ri. Omege mukene bene gitute me pwonyo leb nyo tekwaro pa jo ma kinenogi calo konygi pe. Ento pe gitero calo pigi dok tek loyo jo ma gitito kwena botgi-ni. Me ka meno, gitute me niang ngat acel acel wek gukony jo mapol kit ma gitwero me ye kwena maber me Ker-ri.

12. Epapira onyuto nining ni eparo pi jo mukene?

¹² Yo mukene ma wanyuto kwede mwolo aye me lega pi omegiwa ki lumegiwa ma dong ‘gunongo niye ma pire tek ma rom ki mewa.’ (2 Petero 1:1) Man aye gin ma Epapira otimo. Baibul oloko i kome tyen adek keken. I kare ma kitweyo Paulo i ode macalo mabuc i Roma, en ocoyo waraga bot Lukricitayo ma i Kolocai kun loko i kom Epapira ni: “En po piwu kare ducu i legane matek.” (Jo Kolocai 4:12) Epapira onongo ngeyo  utmege magi maber, dok en oparo pigi matek. Paulo olwonge ni “mabuc wadiwa,” ma tyen lokke ni Epapira onongo bene tye ka kato ki i peko. (Pilemon 23) Kadi bed kit meno, en onongo pud paro pi jo mukene dok otimo gin mo me miyogi kony. Epapira olego pi omege ki lumege, dok wan bene watwero timo kit meno kun walwongo nyinggi i legawa. Lega ma kit man tye ki teko adada.​—2 Jo Korint 1:11; Yakobo 5:16.

13. Itwero lubo lanen pa Epapira nining ka itye ka lega?

¹³ Tam pi ngat mo ma itwero lega pire kun ilwongo nyinge. Itwero tam i kom lurem mogo me kacokke nyo jo me odi ma gitye ka kato ki i peko mo. Twero bedo ni gitye ka kato ki i atematema nyo mitte ni gumok tam mo ma pire tek. Itwero bene lega pi utmege ma nyinggi tye i jw.org i te wi lok ma wacci “Lucaden pa Jehovah ma Kitweyogi i Buc pi Niyegi.” (“Jehovah’s Witnesses Imprisoned for Their Faith.” Nen i te NEWSROOM > LEGAL DEVELOPMENTS.) Iromo bene lega pi jo ma cokcok-ki gurwenyo jo me amaragi i to, gubwot ki i can ma poto atura nyo lweny, ki jo ma gitye ki peko ma can lim. Tye omege ki lumege mapol ma omyero waleg pigi! Ka walego pigi, wanyuto ni pe watye ka tamo pi mitiwa keken ento pi miti pa jo mukene bene. (Jo Pilipi 2:4) Jehovah winyo lega ma kit meno.

14. I yo ango ma Jehovah aye obedo ngat ma winyo lok maber loyo?

¹⁴ Yo mukene ma wanyuto kwede ni wabedo jo mamwol aye obedo ciko itwa me winyo lok pa jo mukene. Yakobo 1:19 wacciwa ni ‘wuwiny lok oyotoyot.’ Jehovah obedo ngat ma winyo lok maber loyo. (Acakki 18:32; Yocwa 10:14) Me labolle, kwan lok ma kicoyo i Nia 32:11-14. (Kwan.) Kadi bed ni Jehovah  onongo pe mito tam ki bot Moses, en oye ni Moses otit kit ma ewinyo kwede. Tika onongo ibidiyo cwinyi iwinyo ka dok ilubo tam pa ngat ma obalo i kare mukato angec? Ento, Jehovah diyo cwinye kun winyo lega pa dano ducu ma gilego bote ki niye.

15. Watwero lubo lanen pa Jehovah nining kun wamiyo deyo bot jo mukene?

¹⁵ Pennye kekeni ni: ‘Ka Jehovah mwol ma twero winyo tam pa dano kit ma owinyo kwede tam pa Abraim, Lakeri, Moses, Yocwa, Manoa, Elia ki Kejekia, ci pingo pe an bene awiny tam pa jo mukene? Tika atwero miyo deyo bot omege ducu kun awinyo tamgi dok alubo ka twere? Tika tye ngat mo i kacokke nyo i gangwa ma atwero mine cawana kun awinyo lokke? Atwero keto lok man i tic nining?​—Acakki 30:6; Lungolkop 13:9; 1 Luker 17:22; 2 Tekwaro 30:20.

16. Kabaka Daudi odok iye nining i kare ma Cimei otere marac?

¹⁶ Mwolo bene konyowa me jukke kenwa ka ngat mo oterowa marac. (Jo Epeco 4:2) Waneno lapor maber adada me jukke ken i 2 Camuel 16:5-13. (Kwan.) Cimei, ma obedo wat pa Kabaka Caulo, obedo ka oyeto Daudi ki luticce kun celogi ki got. Daudi onongo twero juko Cimei woko, ento me ka meno en odiyo cwinye okanyo yet pa Cimei. Daudi ocako dongo kit man me jukke ken-ni nining? Wanongo lagamme ka wakwano Jabuli me adek.

17. Ngo ma okonyo Daudi me jukke ken, dok watwero lubo lanene nining?

¹⁷ Daudi ocoyo Jabuli me adek i kare ma wode Abcalom onongo mito neke woko. I kare man aye bene Cimei oyeto iye Daudi, ento Daudi obedo ki kero me jukke kene. Man otwere nining? I Jabuli 3:4, wakwano lok pa Daudi ni: “Akok bot Rwot [Jehovah] matek, ci en gamo ki i wi got mere maleng.” Ka kiterowa marac, mitte ni waleg kit ma Daudi otimo. Ci Jehovah bimiyowa cwiny mere maleng wek wakany. Tika mitte ni idong kit me jukke ken nyo ibed ngat ma timo kica ka ngat mo oteri marac? Tika itye ki tekcwiny ni Jehovah paro piri dok bikonyi kun goyo laane i komi?

18. Adwogi maber ango ma wanongo pi keto i tic tira pa Jehovah?

¹⁸ Ka watimo gin ma atir, wabibedo ryek dok Jehovah bigoyo laane i komwa. I Carolok 8:11, Baibul wacciwa ni “Ryeko ber makato jami me wel-gu.” Kadi bed ni ryeko jenge i kom ngec, ento bedo ki ngec keken pe romo. Ryeko kwako wa tam ma wamoko. Kadi wa nginingini bene ginyuto ryeko kun gigwoko cam pi kare me cwir. (Carolok 30:24, 25) Kricito, ma kilwonge ni “ryeko pa Lubanga,” kare ducu tiyo gin ma Wonne mito. (1 Jo Korint 1:24; Jon 8:29) Lubanga bigoyo laane i komwa ka wanyuto ryeko ki timo jami ma tye atir kun wamedde ki bedo jo mamwol. (Kwan Matayo 7:21-23.) Pi meno medde ki tute matek wek kacokke obed kabedo ma dano weng tiyo pi Jehovah ki mwolo. Tero kare ki diyo cwiny me keto i tic gin ma wangeyo ni tye atir. Ento timo meno nyuto mwolo, dok mwolo bikeliwa yomcwiny i kare-ni ki pi naka.