Lok ma i tyeng man kwanne ni: “Pe myero ibed ki ur mo ka ce ineno ni lucan ma gitye i dul lobo mo gitye ka unogi, ma kopgi pe gingolo atir kun gitimogi ki tim me bwami; pien tye ngat ma tye malo makato ladit ma loyo wi lwak, dok pud tye ngat mo ma tye malo makato gin aryo-nu ducu.”​—Latit. 5:8.

Ka pe walwodo gin ma Jehovah tamo, tyeng man bedo calo tye ka lok i kom luloc me gamente keken. Ento ka watamo iye matut, ci wanongo ni tito bene lok ada madok i kom Jehovah, ma myero okwe cwinywa dok ominiwa gen.

Latitlok 5:8 loko i kom laloc ma uno lucan dok pe ngolo kopgi atir. Laloc man myero wiye opo ni ngat mo ma rwomme lamal nyo tye ki twero madwong loye i gamente tye ka nene. Ki lok ada, twero bedo ni jo mukene ma rwomgi lamal katogi bene gitye. Tye me cwercwiny ni, i gamente pa dano, luloc magi ducu gitwero bedo lucamucana, dok lutedero gideno can i te locgi.

Ento, kadi bed nen calo gen mo keken pe, watwero nongo kwe cwiny ki i ngeyo ni Jehovah tye ka ‘neno kadi wa ludito ma loyo wi lwak’ i gamente. Watwero lego Lubanga wek okonywa kun wacwalo pekowa bote. (Jab. 55:22; Pil. 4:6, 7) Wangeyo ni “wang Rwot [Jehovah] neno lobo ducu, me nyuto tekke bot jo ma gibedo ki lengic i kome.”​—2 Tekwaro 16:9.

Pi meno, Latitlok 5:8 poyo wiwa i kom lobo ma watye ka kwo iye-ni; kare ducu tye ngat mo ma rwomme lamal loyo i gamente. Ma dong pire tek loyo, tyeng man twero poyo wiwa ni Jehovah aye Laloc ma Rwomme Lamal Loyo. En dong tye ka loc kun tiyo ki Wode, Yecu Kricito, Kabaka me Ker-ri. Won Twer Ducu, ma tye ka neno jami ducu ki dano ducu, ngolo kop atir, dok Wode bene tye kit meno.