1-2. I yo ma nining ma Latitlok 11:6 kubbe kwede ki tic me tito kwena me Ker-ri?

I LOBE mogo, dano gijolo lok me kwena maber ki miti madwong. Man aye gin ma onongo gubedo ka kurone kikome! I lobe mukene, pol pa dano pe ginyuto miti i kom Lubanga nyo lok me Baibul. Dano me kabedowu kono gidok i lok me kwena maber-ri nining? Kadi bed gijolo nyo pe, Jehovah mito ni wamedde ki tito kwena wang ma en owaco ni tic dong otum.

² Jehovah dong otyeko moko awene ma en bigiko iye tic me tito kwena. I nge meno “agikki piny bibino.” (Mat. 24:14, 36) Ka wawoto ki kuro kare meno, watwero lubo lok ma waco ni “pe ijuk cingi ka tic” nining? *​—Kwan Latitlok 11:6.

3. Ngo ma wabinyamo i pwony man?

³ I pwony ma okato-ni, wanyamo jami angwen ma myero watim wek wadok “lumak dano” ma ludiro. (Mat. 4:19) Pwony man binyamo yo adek ma watwero jingo kwede mitiwa me tito kwena, kadi bed watye ka kato ki i kwo matek. Wabipwonyo pingo pire tek me (1) keto pi tic me tito kwena bedo mukwongo i kwowa, (2) diyo cwinywa, ki dong (3) bedo ki niye matek.

4. Pingo omyero waket cwinywa i kom tic ma Jehovah ominiwa?

⁴ Yecu otito con jami ma bibedo lanyut me kare me agikki, dok en ongeyo ni jami magi twero weko lupwonnyene pe giketo cwinygi i tic me tito kwena. En ociko lupwonnyene ni, “wubed ma wangwu twolo.” (Mat. 24:42) I kare  pa Nua, onongo tye jami mapol ma owiro tam pa dano oweko pe guketo cwinygi i kom lok pa Nua. Jami magi bene twero wiro tamwa i kare-ni. (Mat. 24:37-39; 2 Pet. 2:5) Pi meno, wamito ni waket cwinywa i kom tic ma Jehovah ominiwa.

5. Tic pa Lukwena 1:6-8 nyuto ni kwena maber-ri kibititone lakwene?

⁵ I kare-ni, mitte ni waket cwinywa adada i tic me tito kwena me Ker-ri. Yecu otito ni lulub kore gibimedde ki tito kwena i nge tone dok gibititone i kabedo mapol dok pi kare malac makato en. (Jon 14:12) I nge to pa Yecu, lupwonnyene mogo gudok cen i ticgi me mako rec. I nge cerre, Yecu otimo tango ma oweko lupwonnyene gumako rec mapol adada. En otiyo ki kare meno me nwoyo botgi ni tic me tito kwena ki loko dano me doko lulub kore pire tek loyo tic mo keken. (Jon 21:15-17) Ma peya Yecu odok i polo, en otito bot lupwonnyene ni tic me tito kwena ma en ocako-ni pe bigik i lobo Icrael keken ento bimedde wa i agikki lobo ducu. (Kwan Tic pa Lukwena 1:6-8.) Lacen i nge mwaki mogo, Yecu omiyo ginanyuta bot lakwena Jon me nyutte gin ma onongo bitimme “i nino pa Rwot.” * Gin acel me ur ma Jon oneno i ginanyuta aye lamalaika ma “onongo tye ki lok me kwena maber me atita” bot “rok ducu ki kaka ki leb-gu ki jo mapatpat ducu.” (Yabo 1:10; 14:6) Dong nen ka maleng ni, miti pa Jehovah tye ni wanywak i tic me tito kwena ma tye ka timme i wi lobo-ni wang ma tic otum.

6. Ngo ma twero konyowa me keto cwinywa i kom tic me pwony?

⁶ Watwero keto cwinywa i kom tic me pwony ka watamo matut i kom jami ducu ma Jehovah tye ka timo me konyowa. Me  labolle, en tye ka miniwa cam me cwiny muromo calo bukke ma kigoyo ki ma nonge i Intanet, dwan ma kimako, vidio, kacel ki purogram me JW Broadcasting. Tam kong: I kabedowa me Intanet, ngec nonge i leb makato 1,000 mapatpat! (Mat. 24:45-47) I lobo ma opong ki apokapoka me wibye kacel ki dini, dok jo mukene lucan kun mukene lulonyo, lutic pa Lubanga ma welgi kato milion aboro i twok lobo-ni lung gitye ma gunote. Me labolle, i Ceng Abic, nino dwe 19 me April, 2019, Lucaden ma i wi lobo-ni ducu gunote ka neno vidio ma onyamo ginacoya me nino meno. Otyeno meno, dano 20,919,041 kulu gucokke ka kwero Nipo me to pa Yecu. Man tugo cwinywa me medde ki tito kwena me Ker-ri ka watamo i kom mot ma watye kwede me neno ki dok nywako i jami me aura magi.

7. Lanen pa Yecu twero konyowa nining me medde ki keto cwinywa i tic me pwony?

⁷ Yo mukene ma watwero bedo ma waketo cwinywa i tic me pwony aye ka walubo lanen pa Yecu. En pe oye ni gin mo owir tamme ki i tito kwena. (Jon 18:37) En pe oye bita pa Catan i kare ma onyutte “ker ducu ma i wi lobo ki deyogi ducu”; dok okwero dic mua ki bot lwak i kare ma gimito make tetek pi kete me bedo kabaka. (Mat. 4:8, 9; Jon 6:15) En pe oweko miti pi jami me kom odwoyo tamme; dok pe oye bwura ma a ki bot jo ma gidage. (Luka 9:58; Jon 8:59) Ka watye ka kato ki i jami ma temo niyewa, waromo medde ki keto cwinywa i ticwa ka wiwa opo i kom tira ma lakwena Paulo omiyo. En ocuko cwiny Lukricitayo me lubo lanen pa Yecu ‘wek pe guol, dok cwinygi pe opoti!’​—Ibru 12:3.

8. Diyo cwiny obedo ngo, dok pingo mitte tutwal kombeddi?

⁸ Diyo cwiny obedo kero me kuro mot wang ma gin moni olokke. Kadi bed watye ka kuro ni peko moni ogik woko nyo ni gin mo maber otimme, pud wamito diyo cwiny. Lanebi Kabakuk obedo ka kuro agikki me tim bwami ma onongo opong i Juda. (Kab. 1:2) Lupwonnye pa Yecu onongo gitye ki gen ni Ker-ri “binen cutcut” ci larogi ki i dic pa Luroma. (Luka 19:11) Watye ka kuro ki miti madit nino ma Ker pa Lubanga bijwayo tim maraco woko ci kelo lobo manyen ka ma kit ma atir bibedo iye. (2 Pet. 3:13) Ento, omyero wadi cwinywa kun wakuro kare ma Jehovah oyero me cobo jami magi. Kong wanenu yo mogo ma Jehovah pwonyowa kwede me diyo cwinywa.

9. Labol mene ma nyuto diyo cwiny pa Jehovah?

⁹ Jehovah oweko lanen maber loyo me diyo cwiny. En omiyo ki Nua kare ma oromo me yubo yeya ki dok me tic macalo “latit lok me kit ma atir.” (2 Pet. 2:5; 1 Pet. 3:20) Jehovah odiyo cwinye ka winyo lok pa Abraim i kare ma Abraim obedo ka penye teretere i kom Tamme me jwero jo maraco me Codom ki Gomora. (Acak. 18:20-33) Pi mwaki mapol adada, Jehovah obedo ka diyo cwinye i kom rok me Icrael ma pe luwiny-nyi. (Nek. 9:30, 31) Waneno lanyut me diyo cwiny pa Jehovah i kare-ni pien en omiyo ki dano ducu ma gimito bedo lureme kare muromo wek “guo i ningut.” (2 Pet. 3:9; Jon 6:44; 1 Tem. 2:3, 4) Lanen pa Jehovah miniwa tyen lok maber me diyo cwinywa ka wamedde ki tito kwena kacel ki pwonyo dano. En bene pwonyowa me diyo  cwinywa kun tiyo ki labol mo ma kicoyo i Lokke.

10. Labol pa lapur ma kicoyo i Yakobo 5:7, 8 pwonyowa gin ango?

¹⁰ Kwan Yakobo 5:7, 8. Labol pa lapur ma opito camme pwonyowa kit me diyo cwinywa. Tye ada gire ni, ginapita mukene dongo oyotoyot. Ento, pol pa ginapita dongo motmot, tutwalle ma ginyako nyiggi. Kare me pur i lobo Icrael onongo bedo pi dwe abicel. Lapur onongo pito kodine i nge kot me acel, ma poto i kin dwe me Apar, ci kayo kacce i nge kot me aryo, ma poto i kin dwe me Angwen. (Mar. 4:28) Wabinyuto ryeko ka walubo lanen me diyo cwiny pa lapur. Ento timo meno pe twero bedo gin ma yot.

11. Diyo cwiny bikonyowa nining i ticwa me pwony?

¹¹ Wan dano ma watye ki roc pol kare wamito neno adwogi me ticwa cutcut. Ento, ka wamito ni potowa ocek cam, omyero wati iye kare ki kare​—kun wapuro, wapito cam, wabedo ka doyone ki onyo pii iye. Tic me tito kwena bene mito tute matek. Kare mitte me putu doo me apokapoka ki i cwiny lutino kwanwa wek gudong mar. Diyo cwiny bikonyowa pe me ilo cingwa woko ka dano gukwero winyo lokwa. Ka wanongo dano ma gitye ki miti me winyo ki pwonyo lok me Baibul, pud omyero wadi cwinywa. Pe waromo diyo latin kwan me dongo oyotoyot i yo me cwiny. I kine mukene, kadi wa lupwonnye pa Yecu bene gutero kare me niang gin ma en onongo tye ka pwonyo. (Jon 14:9) Wiwa myero opo ni watwero pito kodi ki onyo pii iye, ento Lubanga aye weko dongo.​—1 Kor. 3:6.

12. Watwero diyo cwinywa nining ka watye ka tito kwena bot wadiwa ma pe gubedo Lucaden?

¹² Watwero nongo ni tek adada me diyo cwinywa ka watye ka tito kwena bot wadiwa ma pe gubedo Lucaden. Cik ma iye lac  ma nonge i Latitlok 3:1, 7 twero konyowa. Waco ni: “Tye . . . kare me ling alinga, ki kare me lok.” Ber kitwa twero weko wadiwa gibedo ki miti me winyo kwenawa. Ento omyero bene wabed atera me tito botgi lok i kom Jehovah. (1 Pet. 3:1, 2) Wadiyo cwinywa i kom dano ducu​—kadi wa wadiwa​—ka wawoto ki tito kwena kacel ki pwonyo dano ki mit kom.

13-14. Labol me diyo cwiny ango ma watwero lubone?

¹³ Watwero pwonyo kit me diyo cwiny ki i labol pa jo ma lugen ma gukwo i kare me Baibul ki ma i kare-ni. Kabakuk onongo mito ni tim marac ogik woko, ento en onyuto diyo cwiny i kare ma owaco ni: “Abicung i kabedona kun akiyo.” (Kab. 2:1) Lakwena Paulo bene obedo ki miti me ‘cobo’ ticce me pwony wek enong motte me cito i polo. Kadi bed kit meno, en omedde ki diyo cwinye kun “tito lok me kwena maber” kore ki kore.​—Tic 20:24.

¹⁴ Tam kong i kom labol pa luot mo ma gutyeko kwangi i cukul me Gilead ci kicwalogi i lobo mo ma Lucaden nok iye dok pol pa dano pe gubedo Lukricitayo. Jo mapol onongo pe gitye ki miti i kom Baibul. Ki tungcel, luwotgi ma gukwano kwedgi i kilaci acel i Gilead ma gitye ka tic i lobe mukene onongo gicwalo botgi lok i kom jo mapol ma gitye ka kwano Baibul kwedgi. Ento luot man gudiyo cwinygi kun gimedde ki tito kwena kadi bed pol pa dano me wang ticgi onongo pe gimito winyo lok. I nge tito kwena pi mwaka aboro i wang tic ma nen calo pe nyako nyige, gubedo ki yomcwiny me neno ka latin kwangi acel nongo batija. Labol magi me kare macon ki me kare-ni pwonyowa gin ango? Jo ma lugen magi komgi pe odoko wac nyo guilo cinggi woko, dok Jehovah ominigi mot pi diyo cwinygi. Myero dong ‘walub kit pa jo ma pi niyegi, ki pi diyo cwinygi, gitye ka nongo gin ma yam Lubanga ociko pire.’​—Ibru 6:10-12.

15. I yo mene ma niye jingo kwede mitiwa me medde ki tito kwena?

¹⁵ Watye ki niye i kwena ma watito, pi meno wabedo ki mit kom me nywakone ki dano mapol kit ma watwero kwede. Wageno cikke ma nonge i Lok pa Lubanga. (Jab. 119:42; Ic. 40:8) Waneno lok pa lunebi me Baibul ma tye ka cobbe i karewa-ni. Waneno kit ma kwo pa dano yubbe kwede ka gucako lubo tira me Baibul i kwogi. Neno jami magi weko wamoko ada ni kwena maber me Ker-ri obedo gin ma mitte pi dano ducu.

16. Ma lubbe ki Jabuli 46:1-3, i yo ma nining ma bedo ki niye i kom Jehovah jingo kwede mitiwa me medde ki tito kwena? Bedo ki niye i kom Yecu konyowa nining?

¹⁶ Watye bene ki niye i kom Jehovah, ma kwena ma watito-ni a ki bote, ki i kom Yecu, ma Jehovah ocime macalo Kabaka me Ker-ri. (Jon 14:1) Kadi bed gin ango otimme i komwa, Jehovah kare ducu bibedo ka larrewa ki tekowa. (Kwan Jabuli 46:1-3.) Medo i kom meno, watye ki gen ni Yecu tye ka doro tic me tito kwena ki i polo, kun tiyo ki teko kacel ki twero ma Jehovah omine.​—Mat. 28:18-20.

17. Mi labol ma nyuto pingo omyero wamedde ki tito kwena.

¹⁷ Niye weko wabedo ki gen matek ni Jehovah bigoyo laane i kom tutewa, i kare mukene i yo ma nongo pe wabyeko. (Latit. 11:6) Me labolle, dano alip mapol ata gineno meja nyo lalor bukkewa  ka watye ka tito kwena i dye lwak. Tika yo me tito kwena man tiyo maber? Ada, tiyo! Ticwa Me Ker me Novemba 2014 otito pi anyaka mo ma kwano i univaciti ma onongo mito coyo pwony i kom Lucaden pa Jehovah. En oyenyo Ot me Ker kwe, ento oneno meja ma kicano iye bukkewa i univaciti ma en kwano iye, dok onongo ngec ma en mito pi coyo pwonye. Lacen, en onongo batija macalo Lacaden pa Jehovah, dong i kare-ni tye ka tic macalo painia marii. Jami mutimme ma kit meno tugo cwinywa me medde ki tito kwena pien nyuto ni pud tye jo mapol ma gimito winyo kwena me Ker-ri.

18. Pingo watye ki gen ni tic me tito kwena me Ker-ri bitum kit ma Jehovah mito kwede?

¹⁸ Watwero bedo ki gen ni tic me tito kwena me Ker-ri bigik i karene kikome. Go kong gin mutimme i kare pa Nua. Jehovah onyuto ni en aye Ngat ma gwoko cawa maber loyo. Mwaki 120 ma peya Pii Aluka otimme, Jehovah omoko awene ma Pii Aluka bicakke iye kikome. Mwaki mapol i nge meno, Jehovah owaco ki Nua ni opa yeya. Pi mwaki ma romo 40 nyo 50 ma peya Pii Aluka ocakke, Nua omedde ki tic matek. Kadi bed dano pe guwinye, en omedde ki tito kwena me ciko dano nio wa i kare ma Jehovah owacce ni ocak kelo lee i yeya. Ci i kare ma en omoko kikome, “Rwot [Jehovah] oloro wigi woko.”​—Acak. 6:3; 7:1, 2, 16.

19. Mot ango ma wabinongone ka pe wajuko cingwa ka tic?

¹⁹ Cokcok-ki, Jehovah bigiko tic me tito kwena me Ker-ri woko. I nge meno, en bijwero lobo pa Catan ci kelo lobo manyen ma opong ki dano ma luwiny bot Lubanga. Nio wa i kare meno, wamedde wunu ki lubo lanen pa Nua, Kabakuk, ki jo mukene ma pe gujuko cinggi ka tic. Dong omyero wamedde ki keto cwinywa i tic me pwony, diyo cwinywa, ki bedo ki niye matek i kom Jehovah ki cikkene.