1-2. Oyengyeng mene ma lanebi Aggai otito ni bitimme i karewa-ni?

“I KIN dakika mo manok keken, dukan kacel ki gedo mogo mutii gucako poto ni rwat i ngom.” “Dano ducu komgi ocako myel . . . Jo mapol guwaco ni otero dakika aryo keken. Ento ki tung bota, obedo calo orii matwal.” Magi gubedo lok pa jo mogo ma gubwot ki i oyengyeng mo ma otimme i lobo Nepal i mwaka 2015. Ka onongo gin marac kit meno otimme i komi, wi pe twero wil iye.

² Ento i kare-ni, oyengyeng mo mapat tye ka yengo piny, dok pe i citi nyo lobo acel keken. Jehovah tye ka yengo rok me lobo ducu, dok en dong otimo man pi mwaki mapol. Lanebi Aggai otito con pi oyengyeng man. En ocoyo ni: “Rwot [Jehovah] me mony owaco kuman ni, ‘Odong kare manok keken, abiyengo polo ki lobo, nam ki ngom mutwo.’”—Ag. 2:6.

3. I yo ma nining ma oyengyeng ma Aggai otito pire-ni pat ki oyengyeng kikome-ni?

³ Oyengyeng ma Aggai otito pire-ni pat ki oyengyeng kikome-ni ma balo piny adada. Me ka meno, oyengyeng man kelo adwogi maber. Jehovah kikome tittiwa ni: “Abiyengo rok ducu, wek lonyo me rok ducu obin iye, ka dong abipongo ot man ki deyo.” (Ag. 2:7) Lok pa lanebi man onongo tyen lokke ngo pi jo ma gukwo i kare pa Aggai? Dok tyen lokke ngo piwa i kare-ni? Wabinyamo lagam me lapeny magi dok wabipwonyo kit ma watwero nywako kwede i tic me yengo lobo ducu i kare-ni.

4. Pingo Jehovah ooro lanebi Aggai bot Jone?

⁴ Jehovah omiyo ki lanebi Aggai tic mo ma pire tek. Tam kong i kom gin mutimme ma peya kimine tic meno. I mwaka  537 K.M.P., gurup pa Lujudaya gudwogo i Jerucalem kun gia ki i opii i Babilon. Aggai nen calo odwogo kacel kwedgi. I nge dwe mogo ma guo i Jerucalem, luworo ma lugen magi guketo te guti me ot pa Jehovah. (Ejira 3:8, 10) Ento ma pe orii i nge meno, gin mo me cwercwiny otimme. Gujuko tic i ot pa Lubanga pien ni jo mukene ma gibedo i lobo meno gucako balo cwinygi. (Ejira 4:4; Ag. 1:1, 2) Pi meno i mwaka 520 K.M.P., Jehovah ooro Aggai me cito ka tugo cwiny Lujudaya wek gibed ki mit kom me tyeko ot pa Lubanga. *—Ejira 6:14, 15.

5. Pingo kwena pa Aggai nen calo obedo me cuko cwiny adada bot jo pa Lubanga?

⁵ Tyen lok me kwena pa Aggai onongo obedo me cuko cwiny Lujudaya me dongo niye i kom Jehovah. Ki tekcwiny, lanebi man otito bot Lujudaya ma onongo cwinygi oballe woko ni: “‘Wun jo ducu ma wubedo i lobo-ni, wubed ki tekcwiny,’ man lok pa Rwot [Jehovah] kikome; ‘wuti tic, pien atye kwedwu,’ man lok pa Rwot me mony kikome.” (Ag. 2:4) Lok man ni “Rwot me mony” nen calo obedo me cuko cwiny adada. Jehovah telo dul mony ma tye iye lumalaika mapol adada, pi meno onongo mitte ni Lujudaya gujenge i kome me cobo ticgi.

6. Gin ango ma onongo bitimme macalo adwogi me oyengyeng ma Aggai otito pire-ni?

⁶ Jehovah ooro Aggai me tito ki Lujudaya ni ebiyengo rok ducu. Lok pa lanebi man ocuko cwiny Lujudaya ma onongo cwinygi oballe woko dok gujuko gero ot pa Lubanga. Lok pa lanebi man onyuto ni Jehovah onongo biyengo lobo Percia, ma i kare meno onongo obedo oteka ma loyo wi lobo. Dong oyengyeng meno onongo bikelo adwogi ango? Mukwongo, jo pa Lubanga onongo gibityeko gero ot pa Lubanga. I nge meno, kadi wa lurok onongo gibinywako i woro Jehovah i ot pa Lubanga ma kigero odoco-ni. Meno pud dong obedo kwena me cuko cwiny bot jo pa Lubanga ya!—Jek. 8:9.

7. Tic ango ma watye ka nywako iye i kare-ni ma tye ka yengo lobo ducu? Tit kong.

⁷ Lok pa lanebi Aggai gudowa nining i kare-ni? Jehovah dok tye ka yengo rok ducu, dok i kare-ni watye ka konye ki timo tic meno. Tam kong i kom lok man: I mwaka 1914, Jehovah oketo Yecu Kricito macalo Kabaka me Kerre ma i polo. (Jab. 2:6) Obedo kwena marac bot luloc me lobo-ni i kare ma Ker-ri ocako loc. Meno onyuto ni “kare pa Lurok” ocobbe woko. Me ketone i yo mukene, kare ma onongo pe tye laloc mo keken ma cung pi Jehovah onongo dong otum woko. (Luka 21:24) Pi tyen lok meno, tutwalle cakke i mwaka 1919, jo pa Jehovah gitye ka tito bot dano ducu ni Ker pa Lubanga keken aye bicobo peko ducu. Tic man me tito “kwena maber me Ker” oyengo lobo ducu.—Mat. 24:14.

8. Ma lubbe ki Jabuli 2:1-3, pol pa lobe gudok i kwena man nining?

⁸ Dano gidok i kwena man nining? Pol pa dano gikwero woko. (Kwan Jabuli 2:1-3.) Rok gucako jemo ki kiniga. Gukwero jolo Laloc ma Jehovah oketo. Pe gineno kwena me Ker ma watito calo “kwena maber.” Ki lok ada, gamente mukene guketo kigeng i kom ticwa me tito kwena! Kadi bed pol pa luloc me lobe magi  giwaco ni gitiyo pi Lubanga, ento pe giye jalo twerogi. Dong calo luloc ma i kare pa Yecu, luloc me kare-ni bene gijemo i kom Ngat ma Jehovah Owiro kun giketo aunauna i kom lulub kor Kricito.—Tic 4:25-28.

9. Jehovah dok i kom jemo pa rok magi nining?

⁹ Jehovah dok i kom jemo pa rok magi nining? Jabuli 2:10-12 gamo ni: “Kombeddi dong wuwiny lokka, wun luker, wubed ryek; myero wuwiny pwony man, wun luloc me lobo. Wuti bot Rwot [Jehovah] ki lworo ki myel kom, wurum congwu i nyime; wek kiniga pe omake i komwu, miyo wuto woko i yo; pien akemo make oyotoyot mada. Gitye ki gum jo ducu ma giringo gilaro bote.” Jehovah lakica dok miyo botgi kare me moko tam ma atir. Pud gitwero loko tamgi ci gijolo Ker pa Jehovah. Ento, kare dong odic woko. Watye ka kwo i “kare me agikki” me lobo man. (2 Tem. 3:1; Ic. 61:2) Pud dong mitte i kare-ni ma loyo kare mo keken ni dano gunge lok ada dok guyer me tic pi Jehovah.

10. Adwogi maber ango ma tic me yengo rok tye ka kelo kit ma kitito kwede i Aggai 2:7-9?

¹⁰ Tic me yengo rok ma Aggai otito pire-ni tye ka kelo adwogi maber i kom jo mogo. En otitiwa ni macalo adwogi me yengo lobo ducu-ni, ‘lonyo [jo ma cwinyi atir] me rok ducu gibibino’ me woro Jehovah. * (Kwan Aggai 2:7-9.) Icaya ki Mika bene gutito ni gin ma kit man bitimme “i kare ma pud tye anyim.”—Ic. 2:2-4, Mika 4:1, 2.

11. Gin ango ma omego mo acel otimo i kare ma en owinyo kwena me Ker-ri?

¹¹ Tam kong i kom gin ma omego mo ma nyinge Ken, ma i kare-ni tiyo i gang kalwa madit, otimo i kare ma owinyo kwena me yomcwiny meno. Wiye pud po maber tyen mukwongo ma en owinyo kwena me Ker-ri mwaki ma romo 40 angec. Ken owaco ni: “Tyen mukwongo ma awinyo  lok ada ma i Lok pa Lubanga, abedo ki pwoc me niang ni watye ka kwo i kare me agikki me lobo-ni. Aniang ni wek anong cwak pa Lubanga ki kwo ma pe tum, onongo mitte ni pe abed dano me lobo-ni dok acung tung bot Jehovah. Cutcut amoko tamma me timo meno dok atito ki Jehovah i lega. Ajuko miyo cwak ki lobo-ni dok cutcut ajolo gwok ma Ker pa Lubanga miyo ma pe kitwero kwanyone woko.”

12. I yo ma nining ma ot pa Jehovah i yo me cwiny opong ki deyo i kare man me agikki-ni?

¹² Nen ka maleng ni Jehovah tye ka goyo laane i kom jone. I kare man me agikki-ni, wel dano ma gitye ka woro Jehovah tye ka medde ameda. I mwaka 1914, onongo welwa tye alip abic ki wiye manok. I kare-ni, jo makato milion aboro dong gitye ka woro Lubanga, dok dano milion mapol ata giribbe kwedwa mwaka ki mwaka me kwero Nipo. I yo man, dyekal me ot pa Jehovah i yo me cwiny—ma cung pi yub ma en oketo piwa me wore i yo ma atir—opong ki “lonyo me rok ducu.” Alokaloka ma jo magi gitimo ka guruko kit pa dano manyen bene kelo deyo i kom nying Jehovah.—Ep. 4:22-24.

13. Medde pa wel dano ma gitye ka woro Jehovah okonyo me cobo lok pa lunebi mene? (Nen cal ma tye i pok ngeye.)

¹³ Medde pa wel dano ma gitye ka woro Jehovah bene tye ka cobo lok pa lunebi mukene, calo ma nonge i Icaya cura 60. Tyeng 22 me cura meno waco ni: “Joni nok ento olo dong bidoko kaka, ngat matidi mada bidoko twon rok mo matek. An a Rwot [Jehovah]; abimiyo man timme oyot ka karene oromo.” Kit macalo dano mapol gitye ka cako woro Jehovah, gin mo mamwonya adada tye ka timme. “Lonyo” nyo jo magi gibino ki diro mapatpat, kacel ki miti me tito “kwena maber me Ker.” Macalo adwogine, jo pa Jehovah gitwero tic ki diro magi ma Icaya olwongo ni “cak pa jo me rok ducu.” (Ic. 60:5, 16) Ki kony pa omege ki lumege magi, watye ka tito kwena maber-ri i lobe 240 dok wagoyo bukke i leb makato 1,000.

14. Tam ango ma mitte ni dano gumoki i kare-ni?

¹⁴ I kare man me agikki-ni, tic me yengo rok ducu tye ka diyo dano me moko tamgi. Tika gibicwako Ker pa Lubanga nyo gibiketo gengi i kom gamente me lobo-ni? Meno aye tam ma dano ducu gibikemme kwede. Kadi bed jo pa Jehovah gilubo cik pa gamente me lobo ma gibedo iye, gin gimedde ki bedo ma pe gicwako tung ka mo ka odok i kom lok me wibye. (Rom. 13:1-7) Gingeyo ni Ker-ri keken aye bicobo peko pa dano ducu. Ker-ri pe obedo me lobo man.—Jon 18:36, 37.

15. Buk me Niyabo nyuto nining ni kibitemo genne pa jo pa Lubanga?

¹⁵ Buk me Niyabo tittiwa ni kibitemo genne pa jo pa Lubanga i kare me agikki. Atematema meno biketo lyeto matek adada i komwa. Gamente me lobo-ni gibimito ni waminigi worowa dok gibiketo aunauna i kom jo ma gikwero cwakogi. (Yabo 13:12, 15) Gibiketo “poyo i kom dano ducu, jo matino ki jo madito, lulonyo ki lucan, jo ma gilone kengi wa ki opii bene, i cinggi tung lacuc nyo i tur nyimgi.” (Yabo 13:16) Opii ma i kare macon onongo kiketo poyo i komgi me nyuto anga ma obedo laditgi. I yo acel-lu, i karewa-ni bimitte ni dano ducu gubed ki poyo i cinggi nyo tur nyimgi. Tamgi kacel ki jami ma gitimo binyuto ka maleng ni gicwako tim me wibye me lobo-ni.

16. Pingo pire tek ni wajing gennewa bot Jehovah kombeddi?

¹⁶ Tika wabiye ni kiket poyo man i komwa ma te lokke ni nongo wacwako gamente me lobo-ni? Jo ma gibikwero ni kiket poyo man i komgi gibikato ki i kwo matek. Buk me Niyabo tito ni: “Dano mo pe owil jami, nyo kadi ki catone, ka pe tye ki poyo meno i kome.” (Yabo 13:17) Ento jo pa Lubanga gingeyo gin ma Lubanga bitimone bot jo ma gitye ki poyo ma kiloko iye i Niyabo 14:9, 10. Me ka ye ni kiket poyo meno i komgi, bibedo calo gin gucoyo i cinggi ni, “Jo pa [Jehovah].” (Ic. 44:5) Man aye dong kare me neno ni gennewa bot Jehovah tye matek. Ka tye kit meno, Jehovah bibedo ki yomcwiny me waco ni wan wabedo jone!

17. Gin ango ma myero wiwa opo iye ka odok i kom diyo cwiny pa Jehovah?

¹⁷ Jehovah tye ka diyo cwinye matek i kare man me agikki-ni. En pe mito ni ngat mo orweny woko matwal. (2 Pet. 3:9) En tye ka miyo kare ki dano ducu me ngut ki me moko tam ma atir. Ento en pe bidiyo cwinye matwal. Jo ma gikwero miyo cwak bot Ker pa Lubanga gibinongo adwogi acel ma Parao onongo i kare pa Moses. Jehovah owaco bot Parao ni: “Kono aryeyo cinga apwodi ki lwakki ducu ki two gemo magwa, kono tin atyekowu woko ki i lobo; ento aweko in makwo pi lok man, wek anyut tekka boti, wek nyinga oywek i lobo ducu.” (Nia 9:15, 16) I agikkine, rok ducu gibingeyo ni Jehovah aye Lubanga acel me ada. (Ejek. 38:23) Man bitimme nining?

18. (a) Oyengyeng mukene ango ma kitito pire i Aggai 2:6, 20-22? (b) Wangeyo nining ni lok pa Aggai man bicobbe i kare me anyim?

¹⁸ Mwaki miya mapol i nge to pa Aggai, lakwena Paulo ocoyo bot Lukricitayo ma Luibru me nyuto ni lok ma nonge i Aggai 2:6, 20-22 dok bicobbe i kare me anyim. (Kwan.) Paulo ocoyo ni: “Kombeddi en ociko ni, ‘Odong kicel, pe dong abiyengo lobo keken, ento abiyengo wa polo bene.’ Lok man ni, ‘Odong kicel,’ nyuto  ni, gibikwanyo gin ma yenge woko, meno ginaketa, ka gin ma pe yenge cako dong.” (Ibru 12:26, 27) Oyengyeng man pat ki ma kitito pire i Aggai 2:7. Oyengyeng man bityeko jo ma gitye calo Parao kun gikwero twero me loc pa Jehovah.

19. Gin ango ma pe biyenge, dok wangeyo man nining?

¹⁹ Gin ango ma pe biyenge, nyo pe kibikwanyone woko? Paulo omedde ni: “Myero wapwoyu Lubanga, pien dong wanongo ker ma pe twero yenge, dok bene myero waworu Lubanga i yo ma twero yomo cwinye, kun bene wamiye deyo ki lworo.” (Ibru 12:28) Ada, ka oyengyeng me agikki man dong okato, Ker pa Lubanga keken aye pe biyenge. Bicung bedo matwal!—Jab. 110:5, 6; Dan. 2:44.

20. Tam ango ma myero dano gumoki, dok waromo konyogi nining?

²⁰ Cawa pe me abala! Dano omyero gumok tamgi: Ka guyero me medde ki miyo cwak ki lobo-ni, ci kibijwerogi woko. Ka guyero me tic pi Jehovah kun gitimo alokaloka ma mitte i kwogi, ci gibinongo kwo ma pe tum. (Ibru 12:25) Watwero konyo dano me moko tam ma pire tek man ki ticwa me tito kwena. Dong walego ni wamedde ki konyo jo mapol me cung pi Ker pa Lubanga. Dok omyero kare ducu wiwa opo i kom lok pa Rwotwa Yecu man ni: “Lok man me kwena maber me ker pa Lubanga gibitito i wi lobo ducu, me bedo caden bot rok ducu; ka dong lacen agikki piny bibino.”—Mat. 24:14.