1. Ka kiryemo ngat ma wamaro ki i kacokke, man twero gudowa nining?

TIKA dong kiryemo ngat mo ma imaro ki i kacokke? Man twero turo cwinyi matek adada! Laminwa mo ma nyinge Hilda owaco ni: “I kare ma cwara ma lagen oto i nge mwaki 41 me nyomwa, atamo ni man aye dong gin marac loyo ma twero timme i kwona. * Ento i kare ma kiryemo woda ki i kacokke dok en okwero dakone ki lutinone aryo, obedo lit ma loyo to pa cwara tyen mapol ata.”

2-3. Ma lubbe ki Jabuli 78:40, 41, Jehovah winyo nining ka luticce gujuko tic pire woko?

² Tam kong kit ma cwiny Jehovah otur kwede i kare ma lumalaika mogo, ma gubedo jo me ode, guloko ngegi i kome! (Juda 6) Dok itam kit ma cwinye ocwer kwede i kare ma jo Icrael gubedo ka jemo i kome teretere. (Kwan Jabuli 78:40, 41.) Itwero bedo ki gen ni Wonwa me polo ma lamar-ri cwinye bene cwer ka kiryemo ngat ma imaro ki i kacokke. En niang arem ma itye ka kato ki iye. Ki cwiny me kica, en bimini cuko cwiny ki kony ma imito.

³ I pwony man, wabinyamo gin ma waromo timo me nongo kony pa Jehovah ka ngat ma wamaro ojuko tic pire woko. Wabinyamo bene kit ma watwero konyo kwede jo me kacokke ma gitye ki wat ma kiryemo woko ki kacokke. Ento mukwongo, wabinyamo tam mogo ma omyero wagwokke kwede.

4. Lunyodo mapol giwinyo nining ka wodgi nyo nyargi ojuko tic pi Jehovah?

⁴ Ka wodgi nyo nyargi ojuko tic pi Jehovah, pol kare lunyodo gibedo ka paro ka ce onongo tye gin mo ma giromo  timo me konyo latingi meno me medde ki tic pi Jehovah. I kare ma kiryemo wode woko ki i kacokke, omego mo ma nyinge Luke oye ni: “Abedo ka kok i koma kekena. Abedo bene ka leko lek maraco ma kubbe ki lok man. I kare mogo onongo akok matek dok cwinya rem adada.” Laminwa Elizabeth, ma bene kiryemo wode ki i kacokke, onongo pol kare tamo ni: “Gin ango ma atimo marac macalo mego? Onongo awinyo calo pe atimo jami ducu ma mitte me pwonyo woda me maro Jehovah.”

5. Anga ma omyero kikok i kome ka ngat mo ojuko tic pi Jehovah?

⁵ Wiwa myero opo ni Jehovah omiyo botwa ducu mot me bedo agonya. Man te lokke ni watwero yero ka wamito tic pire nyo pe. Lutino mogo ma lunyodogi pe gubedo lanen maber gumoko tamgi me tic pi Jehovah, ki me bedo lugen bote. Lutino mukene lunyodogi otiyo matek me pwonyogi me maro Jehovah, ento lacen gujuko tic pi Jehovah woko. I agikkine, wan ducu ki acel acel omyero wamok tamwa ka ce wabitiyo pi Jehovah. (Yoc. 24:15) Pi meno, wun lunyodo ma cwinywu tye ka cwer pien latinwu ojuko tic pi Jehovah, pe wukok i komwu kekenwu!

6. Ngat matidi twero winyo nining ka lanyodone ojuko tic pi Jehovah woko?

⁶ I kine mukene, lanyodo juko tic pi Jehovah dok bene kwero wa jo me ode woko. (Jab. 27:10) Man twero turo cwiny lutino adada pien nongo gimaro dok giworo lanyodogi meno. Esther, ma wonne kiryemo woko ki i kacokke owaco ni: “Onongo pol kare abedo ka kok matek pien aniang ni en onongo omoko tamme me juko tic pi Jehovah akaka. Amaro babana, pi meno i kare ma kiryeme woko ki i kacokke, abedo ka paro pire kare ducu. Onongo lworo maka matek ma weko awinyo calo abito woko.”

7. Jehovah winyo nining i kom ngat matidi ma lanyodone kiryemo woko ki i kacokke?

⁷ Wun jo matino, ka ce kiryemo lanyodowu mo ki i kacokke, cwinywa cwer adada piwu! Itwero bene bedo ki gen ni Jehovah ngeyo arem ma itye kwede. En marri dok cwinye yom ni itye ka medde ki tic pire. Dok wan omegini ki lumegini me kacokke, cwinywa yom piri bene. Myero wi bene opo ni, pe kitwero kok i komi pi tam ma lanyodoni omoko. Kit ma kitito kwede con, Jehovah oweko dano acel acel tye agonya me yero ka gimito tic pire nyo pe. Dok ngat acel acel ma odyere dok onongo batija “tye ki yecce ma myero oting.”—Gal. 6:5.

8. Gin ango ma jo me ot ma gin lugen gitwero timone ka giwoto ki kuro danogi ma kiryemo me dwogo cen bot Jehovah? (Nen bok ma wiye tye ni “Dwog Cen Bot Jehovah.”)

⁸ Ka ngat mo ma imaro ojuko tic pi Jehovah, ngene kene ni ibibedo ki gen ni i nino mo acel en bidwogo cen. Ngo ma itwero timone ka iwoto ki kure me dwogo cen bot Jehovah? Tim jami ducu ma itwero me gwoko niyeni wek obed matek. Ka itimo meno, ci ibiweko lanen maber pi jo gangwu mukene ma gitye lugen-ni nyo kadi wa pi ngat ma kiryemo-ni. Ibinongo bene teko ma mitte me kanyo arem ma itye ka kato ki iye-ni. Kong dong wanyamu jami mogo ma itwero timone.

9. I yo mapatpat ango ma itwero nongo kwede teko ki bot Jehovah? (Nen bene bok ma wiye tye ni “Ginacoya ma Romo Kweyo Cwinyi ka Ngat ma Imaro Ojuko Tic pi Jehovah.”)

⁹ Tim jami ducu ma itwero me gwoko niyeni matek. Pire tek adada ni imedde ki jingo watti ki wat pa jo gangi ki Jehovah. Itwero timo meno nining? Nong teko ki bot Jehovah kun ibedo ki yub maber me kwano ki lwodo Lok pa Lubanga kacel ki cito i cokke. Laminwa Joanna, ma wonne ki lamine madit gua woko ki i ada, owaco ni: “Awinyo wiya pye mot ka akwano lok i kom jo mogo ma i Baibul calo Abigail, Esta, Yubu, Yucepu, ki Yecu. Labolgi cuko cwinya dok konya me bedo ki neno ma atir ma kweyo arem ma i cwinya woko. Anongo bene ni werwa ma katti i JW Broadcasting dwe ki dwe cuko cwinya adada.”

10. Gin ango ma Jabuli 32:6-8 nyutiwa madok i kom kit me lweny ki par?

¹⁰ Tit ki Jehovah jami ducu ma keli par. Ka cwinyi tye ka cwer, pe ijuk lega bote. Medde ki lego Lubangawa ma lamar-ri me konyi me tam kit ma en tamo kwede ki me ‘pwonyi ki cimmi yo ma myero ilubi.’ (Kwan Jabuli 32:6-8.) Ngene kene ni, twero bedo tek adada me tito ki Jehovah kit ma iwinyo kwede kikome. Ento Jehovah niang maber arem ma tye i cwinyi. En marri adada dok cuko cwinyi me yabo cwinyi woko ducu bote.—Nia 34:6; Jab. 62:7, 8.

11. Ma lubbe ki Jo Ibru 12:11, pingo omyero wagen tira me mar ma Jehovah miyo? (Nen bene bok ma wiye tye ni “Ryemo Dano ki i Kacokke—Nyuto Mar pa Jehovah.”)

¹¹ Cwak tam ma luelda gumoko-ni. Ryemo labal ki i kacokke obedo yub pa Jehovah. Pwonnye meno obedo yo maber loyo me konyo dano ducu, kadiwa labalo-ni.  (Kwan Jo Ibru 12:11.) Jo mogo i kacokke gitwero waco ni luelda pe gumoko tam ma atir i kare ma guryemo ngat moni ki i kacokke. Ento, wi myero opo ni jo ma giloko kit meno pol kare pe giye tito jami maraco ma ngat ma kiryemo-ni otimo. Lok ada tye ni, pe wangeyo jami ducu ma otimme. Pi meno, bedo me ryeko me geno luelda ma gubedo i komitti me ngolo kop man pien gutute matek me lubo cik ma igi lac me Baibul dok gungolo kop “pi Rwot [Jehovah].”—2 Tekwaro 19:6.

12. Adwogi maber ango ma jo mogo gunongo pien gulubo tira pe me ribbe ki jo ma kiryemogi ki i kacokke?

¹² Ka icwako tam pa luelda me ryemo danoni me amara ki i kacokke, ci itwero konye me dwogo cen bot Jehovah. Laminwa Elizabeth ma kiloko i kome con-ni owaco ni, “Obedo tek adada me juko ribbe ki wodwa ma onongo dong dit-ti. Ento i kare ma en odwogo cen bot Jehovah, en oye ni onongo obedo tam maber adada ni kiryeme ki i kacokke. Lacen en owaco ni enongo pwony mabeco mapol. Apwonyo ni tira pa Jehovah kare ducu tye atir.” Cware Mark, omedde ni: “Lacen, wodwa owacca ni ebedo ki miti me dwogo cen pien pe waribbe kwede kadi kicel mo. Cwinya yom adada ni Jehovah okonyowa me bedo luwiny.”

13. Ngo ma twero konyi me kanyo arem cwiny ma itye kwede?

¹³ Lok ki lurem ma giniang kit ma iwinyo kwede. Bed ka ribbe ki omege ki lumege ma guteggi i yo me cwiny ma gitwero konyi pe me rwenyo gen woko. (Car. 12:25; 17:17) Joanna, ma kiloko i kome con-ni owaco ni: “I cwinya onongo awinyo ni atye kena. Ento lok ki lurema ma agenogi okonya me kanyo.” Ento ngo ma itwero timo ka jo mogo me kacokke giwaco jami ma cwero cwinyi medo ameda?

14. Pingo mitte ni ‘ngat acel acel odi cwinye i kom lawote, kun watimo kica ki luwotwa i kinwa kekenwa pi balwa’?

¹⁴ Di cwinyi i kom omegini ki lumegini. Pe watwero tamo ni dano ducu gibiwaco jami ma atir i kare ducu. (Yak. 3:2) Wan ducu watye ki roc, pi meno pe ibed ki ur ka jo mukene pe gingeyo gin ma omyero giwacci, nyo ka guwaco gin mo ma ocwero cwinyi kun nongo pe gutimo akaka. Wi opo i kom tira pa lakwena Paulo ni: “Wudi cwinywu kekenwu, ngat acel acel odi cwinye i kom lawote, kun wutimo kica ki luwotwu i kinwu kekenwu pi balwu. Ka ngat mo i kinwu tye ki lok mo i kom lawote, timo kica pi bal myero obed tye.” (Kol. 3:13) Lamego mo ma kiryemo wode ki i kacokke otito ni: “Jehovah okonya me timo kica ki omege ma onongo gimito cuko cwinya ento dok gucwero cwinya aye.” Gin ango ma jo me kacokke gitwero timo me konyo jo me ot ma gin lugen?

15. Ngo ma waromo timo me konyo jo me odi ma pud kiryemo danogi me amara ki i kacokke cokcok-ki?

¹⁵ Jol jo me odi ma gitye lugen ki cwiny  me lirem. Laminwa mo ma nyinge Miriam oye ni lworo obedo ka make me cito i cokke i kare ma kiryemo omine woko. “Onongo atye ki lworo i kom gin ma dano biwaco. Ento onongo tye omege ki lumege mapol ma cwinygi bene ocwer pi gin mutimme dok akemo pe omakogi i kom omera ma kiryemo-ni. Pi konygi, pe awinyo calo onongo atye kena.” Lamego mukene wiye po ni: “I kare ma kiryemo wodwa woko ki i kacokke, luremwa macok gubino ka cuko cwinywa. Mogo guye ni pe gingeyo gin ma omyero giwacciwa. Mukene gukok kacel kweda dok mogo gucwala waraga me cuko cwinya. Gin ma gutimo-ni okonya matek adada!”

16. Jo me kacokke giromo medde ki konyo jo ma kiryemo danogi me amara nining?

¹⁶ Medde ki miyo kony bot jo me odi ma gin lugen. Gimito mar ki cuko cwiny i kare-ni makato kare mo keken. (Ibru 10:24, 25) I kare mukene, lupaco pa ngat ma kiryemo ki i kacokke guneno ni jo mogo i kacokke dong pe gimito lok kwedgi, calo gin bene kiryemogi woko ki kacokke. Pe wuwek gin ma kit meno otimme! Tutwalle jo matino ma lunyodogi gujuko tic pi Jehovah woko gimito pwoc ki cuko cwiny. Maria, ma kiryemo cware woko ki kacokke dok lacen cware oweke ki lutinogi owaco ni: “Omege ki lumege mogo gubino i ganga ci gutedo dek piwa dok gukonyowa ki woro macalo jo me ot. Gin guwinyo arem ma atye kwede dok gukok kacel kweda. Guloko pira dok gucwaka i kare ma dano gubedo ka loko lok anii i koma. Man ocuko cwinya adada!”—Rom. 12:13, 15.

17. Ngo ma luelda gitwero timo me cuko cwiny jo ma cwinygi otur?

¹⁷ Luelda, wuti ki kare mo keken ma onen me jingo cwiny lupaco ma lugen. Wutye ki tic ma pire tek adada me kweyo cwiny luye luwotwu ma danogi me amara ojuko tic pi Jehovah woko. (1 Tec. 5:14) Me cuko cwinygi, lok kwedgi i cawa ma nongo cokke peya ocakke ki dok i ngeye. Limgi i pacigi dok ileg kacel kwedgi. Ti kacel kwedgi i ticwa me pwony, nyo i kare mukene iromo lwongogi me ribbe kacel kwedwu i woro pi jo me ot. Mitte ni luelda gukony jo ma  cwinygi otur dok gunyutigi kica kacel ki mar ma gimito.—1 Tec. 2:7, 8.

18. Ma lubbe ki 2 Petero 3:9, Lubanga mito ni jo ma gujuko tic pire gutim gin ango?

¹⁸ Jehovah “pe mito ni ngat mo orweny woko matwal, ento mito ni jo ducu guo i ningut.” (Kwan 2 Petero 3:9.) Kadi bed ni ngat moni otimo bal madit, kwone pud pire tek bot Lubanga. Wi opo ni Jehovah oculo wel madit adada—kwo pa Wode me amara—pi wan ducu ki acel acel. Ki cwiny me kica, Jehovah tute me konyo jo ma gujuko tic pire me dwogo cen. En tye ki gen ni gibiyero me timo meno, kit ma watwero neno kwede ki i carolok pa Yecu i kom latin murwenyo. (Luka 15:11-32) Jo mapol ma onongo guweko ada lacen gudwogo bot Wongi me amara me polo. Dok omege ki lumege cwinygi obedo yom adada me jologi. Elizabeth, ma kiloko i kome con-ni, cwinye obedo yom adada i kare ma kidwoko wode cen i kacokke. Ka en opo i kom kare meno en waco ni, “Atye ki pwoc madit ni jo mapol gucuko cwinywa pe me rwenyo gen ni wodwa bidwogo cen.”

19. Pingo watwero medde ki geno Jehovah?

¹⁹ Watwero geno Jehovah kare ducu. En pe miniwa tira mo keken ma twero kelo peko i komwa. En obedo Wego ma cinge yot dok lakica, ma tye ki mar madwong pi jo ducu ma gimare dok giwore. Bed ki gen ni Jehovah pe biweki i kare ma nongo cwinyi otur. (Ibru 13:5, 6) Omego Mark ma kiloko i kome con-ni owaco ni, “Jehovah pe owekowa matwal. En pe bedo cen ka mabor kwedwa ka watye ka kato ki i peko.” Jehovah bimedde ki mini “tek madwong me twero.” (2 Kor. 4:7) Ada, itwero medde ki gwoko watti ki Jehovah kun bene pe irwenyo gen kadi bed danoni me amara ojuko tic pi Jehovah woko.