1-2. (a) Ma lubbe ki Carolok 16:31, omyero wanen jo muti ma gin lugen nining? (b) Lapeny mene ma wabigamogi i pwony man?

KIDI dayaman ma peya kirudo pe ryeny dok pe nen mamwonya i wang dano. Pi meno, ka ngat mo oneno kidi dayaman ma peya kiyubo maber, en twero cayone kun nongo pe ngeyo ni etye ka neno gin mo me wel. En twero wot kato ki i ka ngete dok weko kidi meno i ngom ata.

² Utmegiwa ma guti gitye calo kidi dayaman ma wele tek adada. Lok pa Lubanga poro lwar wic pa jo muti magi ki lalukana. (Kwan Carolok 16:31; 20:29) Ento watwero cayo jo muti ma gitye calo lonyo-ni acaya. Jo matino ma giniang kit ma jo muti pigi tek kwede, gitwero nongo gin mo maber ma loyo kidi me wel. I pwony man wabigamo lapeny adek: Pingo Jehovah neno jo muti ma gin lugen calo gubedo lonyo ma welle dit adada? Tic ango ma Jehovah tye kwede i dulle pi jo ma kit meno? Gin ango ma watwero timone wek wanong adwogi maber loyo ki i lanengi?

3. Ma lubbe ki Jabuli 92:12-15, pingo jo muti ma gin lugen pigi tek adada bot Jehovah?

³ Jo muti ma gin lugen pigi tek adada bot Lubanga Jehovah. En ngeyo kit dano ango ma gubedo dok marogi pi kitgi mabeco magi. En bedo ki pwoc ka jo muti ginywako ki jo matino ryeko ma gunongo pi mwaki mapol ma gubedo ka tic pi Lubanga-ni. (Yubu 12:12; Car. 1:1-4) Jehovah bene tye ki pwoc pigi pi kit ma gubedo ka diyo kwede cwinygi. (Mal. 3:16) Gukato ki i pekki mapol i kwogi; ento gumedde ki bedo ki niye matek i kom Jehovah. Gengi pi  anyim tye matek adada i kare-ni loyo i kare ma pud gupwonyo ada nyen. Dok Jehovah marogi pien gimedde ki tito pi nyinge “kadi guti.”—Kwan Jabuli 92:12-15.

4. Kodi tam ango ma twero kweyo cwiny omege ki lumege ma guteggi?

⁴ Ka dong itye ka tii woko, bed ki gen ni wi Jehovah po i kom tic ma itimo pire i kare mukato angec. (Ibru 6:10) Icwako tic me tito kwena ki mit kom, dok meno yomo cwiny Wonwa me polo. Ikanyo dong pekki mapol—kadi wa mogo ma guturo cwinyi. Ilubo rwom me kit ma atir me Baibul i kwoni, icobo tic madongo i dul pa Jehovah, dok ipwonyo jo mukene. Itute matek me wot kacel ki dul pa Jehovah ma tye ka lokke oyotoyot. Imiyo cwak bot jo ma gitye i tic pi kare malac dok icuko cwinygi me medde ki tic man. Lubanga Jehovah mari matek adada pi bedo lagen bote. En ocikke ni, ‘pe ebiwoto jo ma gigeno en’! (Jab. 37:28) En bene mini gen man ni: “Abibedo ka tingowu kadi wa i kare ma nongo lwar dong otwi i wiwu.” (Ic. 46:4) Pi meno, pe itam ni kit ma dong iti woko-ni, ipe ki tic mo ma pire tek i dul pa Jehovah. Piri tek adada!

5. Gin ango ma myero jo ma guteggi wigi pe owil iye?

⁵ Jo muteggi gitye ki tic mapol. Kadi bed pe gitye ki kero kit ma onongo gitye kwede i kare me bulu, ento gitye ki ngec madwong adada ma gunongo pi mwaki mapol. Jehovah pud twero tic kwedgi i yo mapol adada, kit ma lanen magi me kare macon ki me kare-ni nyuto kwede.

6-7. Mi labol ma tye i Baibul ma nyuto kit ma Jehovah omiyo kwede mot bot jo muti pi gwoko gennegi.

⁶ Watwero nongo labol mabeco i Baibul pa jo ma lugen ma gutiyo pi Jehovah nio wa i kare ma onongo guti woko. Me labolle, Moses onongo tye i kine ka mwaka 80 i kare ma Jehovah oyere me tic macalo lalok ki latela pa rok me Icrael. Jehovah onongo pud tye ka tic ki Daniel macalo lalok pire i kare ma lanebi man tye i kine ka mwaka 90 ki wiye. Dok lakwena Jon bene onongo tye i kine ka mwaka 90 ki  wiye i kare ma Lubanga omine tic me coyo buk me Niyabo.

⁷ Jo ma lugen mukene onongo pe gingene tutwal, dok dano mapol onongo gitwero cayogi woko. Kadi bed kit meno, Jehovah onenogi dok ogoyo laane i komgi pi bedo lugen bote. Me labolle, laco mo ma nyinge Cimeon ma “kite atir ma lworo Lubanga,” kiloko i kome manok adada i Baibul, ento Jehovah onongo ngeye maber dok omine mot me neno latin Yecu kacel ki me lok macalo lanebi i kom latin meno ki mine. (Luka 2:22, 25-35) Tam bene i kom dato Anna ma onongo tye lanebi ma dako. En onongo tye ki mwaka 84 ento ‘en yam pe keng bino i ot pa Lubanga.’ Anna onongo mot pi bedo tye i ot pa Lubanga kare ducu pien en bene nino mo acel oneno Yecu ma pud latin lakere. Cimeon kacel ki Anna onongo pigi tek adada bot Jehovah.—Luka 2:36-38.

8-9. Tic ma pire tek ango ma mon to pud gimedde ki timone?

⁸ I kare-ni, jo muteggi mapol ma lugen gitye ka weko lanen maber me aluba pi jo matino. Nen kong labol pa Lamego Lois Didur. En onongo tye ki mwaka 21 i kare ma ocako tic macalo painia keken i lobo Canada. I nge meno, en kacel ki cware John, gubedo ka tiyo tic me limo adwol pi mwaki mapol. Gutiyo bene i Betel ma i lobo Canada pi mwaki makato 20 kulu. I kare ma lamego Lois tye ki mwaka 58, en kacel ki John kilwongogi me cito ka tic i lobo Ukraine. Gin ango ma onongo gibitimo? Tika onongo gibiwaco ni gin dong guti woko ma pe gitwero cito ka tic i lobo mukene? Gin gujolo mot me tic man, dok kicimo John me tic macalo lamemba me komitti me Jang Gang Kal me lobo meno. Mwaka abiro i nge meno, John oto woko, ento Lois omoko tamme me medde ki bedo i lobo Ukraine. I kare-ni, Lois tye ki mwaka 81, en tye ka medde ki tic matek, dok kimare adada i Betel ma tye i lobo Ukraine.

⁹ Mon to calo Lois pol kare dano pe giketo cwinygi i komgi tutwal calo i kare ma onongo coggi pud kwo; kadi bed kit meno, gin pud pigi tek adada. Jehovah tye ki pwoc madit pi lumege ma gumiyo kony bot coggi pi mwaki mapol, dok i kare-ni ma gitye mon to pud gitye ka medde ki tic pire ki gen. (1 Tem. 5:3) Medo i kom meno, gin bene gicuko cwiny jo matino.

10. Lanen maber ango ma omego Tony owekiwa?

¹⁰ Jo ma guti ma dong pe gitwero a woko ki gang pi goro nyo mitte ni kigwokgi agwoka pud pigi tek adada bot Jehovah. Me labolle, omego mo ma nyinge Tony i kare-ni bedo i kabedo ma kigwoko iye jo muti. En onongo batija i boma me Pennsylvania, i lobo Amerika i Agucito 1942, i kare ma en tye ki mwaka 20. Ma pe ori i nge nongo batijane, kimine rukca  ni odony i mony. Pien en okwero timo meno woko, kikete i buc pi mwaki aryo ki nucu. En kacel ki dakone Hilda, gunywalo lutino aryo dok gin ducu gudongo i ada. Pi mwaki mapol, Tony otiyo macalo wonkom pa luelda (ma i kare-ni kilwongo ni lakub kin luelda) i kacokke adek mapatpat dok macalo lanen wi yub me gure me adwol. En onongo cito i buc mo acel ci doro cokke dok kwano Baibul ki lumabuc. Kadi bed Tony tye ki mwaka 98 i kare-ni, en pe tye atera me juko tic pi Jehovah. En tye ka medde ki tic matek ki kerone ducu pi Jehovah dok bene tiyo kacel ki kacokkene!

11. Watwero nyuto nining ni waparo pi jo muti ma gibedo kengi nyo gibedo ki wadigi ma pe gitye Lucaden?

¹¹ Watwero miyo deyo bot jo muti ma dong pe gitwero a ki gang nining? Ka twere, luelda myero gukonygi me bedo tye i cokke nyo gukubgi wek guwiny awinya ki dok gukonygi me tito kwena. Watwero nyuto pwocwa pigi ki limogi nyo lok kwedgi kun wakubbe ki vidio. Mitte ni wanyut ni waparo pi jo muti ma twero bedo ni gibedo kengi nyo gibedo ki wadigi ma pe gubedo Lucaden ka mabor ki kacokke. Ka pe waketo cwinywa i komgi, ci wiwa twero wil woko i kom jo muti magi. Mogo i kingi ginongo ni tek nyo gineno ni pe opore me lok tutwal i komgi kekengi. Ento wabinongo adwogi maber ka wakwanyo kare me lok kwedgi dok watero itwa ka winyo ka gititiwa yomcwiny ma gunongo i tic pi Jehovah.

12. Kodi omege ki lumege mene ma watwero nongogi i kacokkewa?

¹² Watwero bedo ki ur madit adada me niang ni watye ki lanen mabeco i kacokkewa pa jo ma gunyuto genne. Laminwa mo ma nyinge Harriette otiyo pi Jehovah ki gen pi mwaki mapol i kacokke ma en opwonyo iye ada i boma me New Jersey, i lobo Amerika. Lacen en okobo i kabedo mukene ka kwo kacel ki nyare. Utmege ma i kacokke ma en okobo iye-ni gukwanyo kare me ngeye maber, dok gunongo ni en tye lanen maber adada me nyuto genne. En ocuko cwinygi ki tittigi kit ma onongo tic me pwony tye kwede i kine ka mwaka 1920 i kare ma en opwonyo ada nyen. I kare-ca, ka en onongo tye ka cito i tic me pwony, en onongo tingo lajwa lak pien onongo kitwero make ci kibole i buc pi kare mo. Ki lok ada, i mwaka 1933, kimake kiryo dok i kare ducu ma kimake, en obedo i buc pi cabit acel. Cware onongo pe tye lacaden ento onongo mine kony. I kare ma kibole i buc, cware ogwoko lutinogi adek ma gitino-ni. Labongo akalakala mo, utmege ma guteggi ma gin lugen calo Harriette gupore me awora!

13. Gin ango ma wapwonyo madok i kom tic ma jo muteggi gitye kwede i dul pa Jehovah?

¹³ Omegiwa ki lumegiwa ma guti gitye ki tic ma pire tek i dul pa Jehovah. Guneno yo mapatpat ma Jehovah ogoyo kwede laane i kom dulle kacel ki i komgi kekengi. Gunongo pwony mapol ki i jami ma pe gutimo maber. Nengi macalo ‘wang it me ryeko,’ dok inong pwony ki i lanengi. (Car. 18:4) Ka ikwanyo kare me ngeyogi maber, niyeni bijing dok ibipwonyo jami mapol ki botgi!

14. Gin ango ma Nwoyo Cik 32:7 cuko cwiny jo matino me timone?

¹⁴ Kwany kare me lok ki jo muteggi. (Kwan Nwoyo Cik 32:7.) Twero bedo ni pe dong gineno piny maber, giwoto motmot, dok giloko ki dwan magoro.  Kadi bed kit meno, pud gitye ki miti me medde ki tic matek, dok gitye ki “nying maber” ki Jehovah. (Latit. 7:1) Wi pe owil i kom tyen lok ma omiyo Jehovah nenogi calo jo ma pigi tek adada. Medde ki minigi deyo. Bed calo Elica. En omoko matek i kom Elia i nino me agikki ma gubedo kacel. Tyen adek kulu Elica owaco ni: “An pe abibwoti.”—2 Luker 2:2, 4, 6.

15. Lapeny mene ma watwero penyo ki jo muteggi?

¹⁵ Nyut miti me ada i kom jo muteggi kun ipenyogi lapeny ma twero tugo cwinygi me cako boko lok. (Car. 1:5; 20:5; 1 Tem. 5:1, 2) Penygi lapeny calo magi: “Gin ango ma oweko imoko ni inongo ada?” “Jami ma gutimme i kwoni onyiki cok ki Jehovah nining?” “Gin ango ma inongo ni obedo mung me medde ki bedo ki yomcwiny i tic pi Jehovah?” (1 Tem. 6:6-8) I nge meno, ter iti iwiny ka giboko gin mutimme i kwogi.

16. Boko lok i kin ngat muteggi ki ngat matidi twero kelo adwogi maber bot gin ducu nining?

¹⁶ Ka ngat ma oteggi ki ngat matidi giloko i kingi, gin ducu ginongo adwogi maber. (Rom. 1:12) Ngat matidi-ni bidongo genne pi kit ma Jehovah gwoko kwede luticce ma lugen dok ngat ma oteggi-ni biwinyo ni kimare. Cwinye bibedo yom me titi kit ma en winyo kwede pi mot ma onongo i kwone pi tic pi Jehovah.

17. Pingo watwero waco ni omegiwa ki lumegiwa ma gin lugen gidoko mwonya ka giwoto ki tii?

¹⁷ Ber kom ngat moni woto ki rwenyo woko ka en woto ki tii, ento jo ma lugen bot Jehovah giwoto ki doko mwonya bote ka giwoto ki tii. (1 Tec. 1:2, 3) Pingo man tye lok ada? Pien, pi mwaki magi ducu ma gubedo ka tic pi Jehovah, guye ni cwiny pa Lubanga okonygi me dongo kit mabeco. Ka wamedde ki ngeyo omegiwa ki lumegiwa ma guteggi i yo maber dok wanongo pwony ki botgi, ci wabimedde ki nenogi calo lonyo ma welle dit adada!

18. Gin ango ma wabinyamo i pwony ma lubo man?

¹⁸ Kacokke woto ki doko tek ka jo matino gitero jo muteggi calo jo ma pigi tek dok jo ma guteggi bene gineno jo matino calo jo ma pigi tek. I pwony ma lubo man, wabineno kit ma jo ma guteggi gitwero nyuto kwede ni gitero jo matino ma i kacokke calo pigi tek.