I kine ka mwaka 1940, lunyodona gukwano Baibul ki Lucaden pa Jehovah. Kwangi ogik woko, ento mamana omedde ki gamo magajin me Wi Lubele ki Awake! I mwaka 1950, gure madit ma kwako lobe mapol obedo tye i boma me New York City, dok jo gangwa gujolo lwongo me cito iye.

Ma pe orii i nge gure man, Omego Lawrence Jeffries ocako limowa. En otute me konya pwonyo lok ada. I acakkine, atamo ni Lucaden pa Jehovah omyero gunywak i tim me wibye kacel ki tic i mony. Awaco ki omego-ni ni, ket kong ni dano ducu ma i lobo Amerika gukwero cito ka lweny woko, lumony twero bino mayo lobowa woko. Omego Jeffries odiyo cwinye dok openya ni: “Itamo ni Lubanga Jehovah bitimo gin ango ka dano ducu ma i lobo Amerika onongo gitiyo pire dok lumony gubino ka lweny i komgi?” Lokke meno ki mukene mapol okonya me niang ni par ma atye kwede kara konye pe. Man oweko abedo ki miti me pwonyo lok ada me Baibul.

Onongo acwalo cawa malac ka kwano Wi Lubele ki Awake! macon ma mamana ogwokogi. I nge kare mo, aniang ni atye ka pwonyo lok ada, pi man aye yub me kwano Baibul ki bot Omego Jeffries. Acako bene cito i cokke kare ki kare. Onongo amaro jami ma atye ka pwonyo, dok adoko latit kwena. Yubba i kwo olokke woko i kare ma aniang ni “nino madit pa Rwot [Jehovah] tye cok.” (Jep. 1:14) Onongo dong pe amito cito i univaciti. Me ka meno, onongo amito konyo dano me pwonyo lok ada me Baibul.

Atyeko kwanna me cinia i nino dwe 13 Juni, 1956, dok i nge nino adek, anongo batija i gure me adwol. I kare meno onongo pe abyeko kulu ni abinongo mot mapol ki bot Jehovah pien ayero me tic ki kwona me nongo pwonnye ki bote kacel ki pwonyo jo mukene lok i kome.

Dwe abicel i nge nongo batija, adoko painia marii. Ticwa Me Ker me Decemba 1956 obedo ki pwony ma wiye tye ni: “Tika Itwero Tic ka ma Can Lutit Kwena Tye Iye?” An onongo atwero tiyo tic man. Onongo amito miyo kony ka ma can lutit kwena maber me Ker-ri tye iye.—Mat. 24:14.

Akobo acito i Edgefield, South Carolina. Kacokke man onongo tye ki lutit kwena angwen keken. I kare ma akobo kunu, an aye adoko latit kwena me abic-ce. Onongo wabedo ki cokkewa i nyim ot pa omego mo. Dwe ki dwe, onongo acwalo cawa 100 i tic me pwony. Onongo atye ki tic mapol adada pien an aye onongo adoro wi ticwa me pwony dok onongo amiyo pwony i kacokke. Ki yomcwiny madit, ma ticca omedde i kacokke, ngecca i kom Jehovah bene omedde.

Dako mo acel ma akwano kwede Baibul i taun me Johnston, onongo tye ki kampuni ma giyiko dano, dok onongo pe bor ki ka ma abedo iye. En owacca ni atwero tic bote pi nino mogo cabit ki cabit pien onongo atye ka mito tic me atiya adada, dok oweko watiyo ki otte mo matidi macalo Ot me Ker.

Omego Jolly Jeffries, wod pa omego ma okwano kweda Baibul odak ki i Brooklyn, New York, obino bota ci odoko painia lawota. Onongo wabedo i mutoka mo matidi ma omego mo okonyowa kwede.

Cente ma onongo kiculo ki lutic onongo tidi adada ka ma wabedo iye. Onongo kiculowa dollar aryo nyo adek keken pi tic me nino acel kulu. I nino mo acel, centena otum woko i nge wilo cam ki i dukan. I nge kati woko ki i dukan, laco mo obino bota ci openya ni: “Tika imito tic me atiya? Abiculli dollar acel pi tic me cawa acel acel.” En omina tic me nino adek kun onongo acoko yugi ki i ka gedo. Onen ka maleng ni Jehovah onongo tye ka konya wek abed i Edgefield. Kadi bed centena onongo tidi adada, abedo ki kare me cito i gure madit ma kwako lobe mapol ma obedo i New York City i mwaka 1958.

I nino me aryo me gure man, gin mo mamwonya adada otimme. Arwatte ki lamego Ruby Wadlington, ma onongo tye ka tic macalo painia marii i Gallatin, Tennessee. Pien wan ducu onongo wamito tic macalo lumiconari, wacito i cokke me Gilead ma obedo tye i gure man. Lacen wacako coyo waraga i kinwa. I nino mo kilwonga me miyo pwony pi lwak i Gallatin. Atiyo ki kare meno ma owec-ci me pennye wek wanyomme. I nge meno, akobo i kacokke pa Ruby, dok wanyomme i mwaka 1959.

I kare ma atye ki mwaka 23, kicima macalo congregation servant (ma i kare-ni kilwongo ni lakub kin luelda) i kacokke me Gallatin. Kacokkewa aye obedo kacokke mukwongo ma Charles  Thompson olimo macalo laneno me adwol. En onongo tye ki ngec madwong adada; kadi bed kit meno, en openyo tamma i kom gin ma omege gimito kacel ki kit ma luneno mogo onongo gikonyo kwede kacokke. Anongo pwony ki bote ni ber adada me penyo lapeny dok ber iniang jami ducu ma peya imoko tam.

I Mai 1964, kilwonga me cito i Cukul me Ticwa me Ker ma obedo tye pi dwe acel i South Lansing, New York. Omege ma gupwonyowa i cukul man guweko abedo ki miti madwong me pwonyo jami mapol i kom Jehovah wek anyikke cok kwede.

An ki Ruby kilwongowa me cako tic me limo adwol i Januari 1965. Adwol ma onongo walimo onongo dit adada. Onongo cakke ki i Knoxville, Tennessee, dok onongo cok o i Richmond, Virginia. Adwol man onongo tye ki kacokke ma i North Carolina, Kentucky, ki West Virginia. Onongo alimo kacokke pa utmege ma ocol keken pien i kare meno apokapoka onongo tek adada i tung kupiny me lobo Amerika. Pi man, ocol onongo pe gicokke kacel ki muni. Omege onongo gubedo lucan, dok wapwonnye me nywako jamiwa kwedgi. Omego mo ma otiyo pi kare malac macalo laneno me adwol opwonya gin mo ma pire tek adada ni: “Bed omego. Pe ilim kacokke ci itimme calo ibedo rwot. Ibikonyogi ka guniang ni ibedo omingi.”

I kare mo ma onongo watye ka limo kacokke mo matidi, Ruby ocako kwano Baibul ki dako mo matidi ma tye ki nyare me mwaka acel. I kare ma onongo ngat mo pe ma twero kwan kwede ki i kacokke, Ruby okwano kwede Baibul kun gicoyo waraga. I limwa ma olubo meno, dako-ni obino i cokke ducu. I kare ma lumege aryo ma gitye painia keken gucito i kacokke meno, gin gumedde ki kwano Baibul kwede dok ma pe orii en onongo batija. I nge mwaki 30 i mwaka 1995, i Betel me Patterson, laminwa mo matidi otito ki Ruby anga ma en ebedo. Man kara onongo obedo latin anyaka pa lamego ma Ruby onongo okwano kwede Baibul-li. Anyaka-ni kacel ki cware onongo gitye i kin lutino kwan me Cukul me Gilead me kilaci me 100.

Adwolwa me aryo onongo kwako tung kudyere me Florida. I kare meno, mutoka onongo mitte adada i ticwa, pi man wawilo mutoka mo i wel ma lapiny dok maber adada. Ento, i cabit mukwongo me limwa, gin mo i inyjin me mutoka man oballe woko. Onongo dong pe watye ki cente mo me yubone. Agoyo cim ki omego mo ma atamo ni en twero konyowa. En ocwalo laticce mo acel ka yubo mutokawa. Dok lacen, en okwero cente ma onongo wamito mine pi yubo mutokawa. En owaco ni, “Banyawu mo keken pe bota.” Me kaka meno en dok ominiwa mot me cente! Man obedo labol mamwonya adada ma nyuto kit ma Jehovah gwoko kwede luticce. Man opoyo wiwa ni omyero wabed jo ma cinggi yot bot jo mukene.

Kare ducu ma onongo walimo kacokke, onongo wabedo i gangi pa utmege. Macalo adwogine, wamako lurem mabeco mapol adada. Nino mo acel, acako coyo ripotta me kacokke dok aweko odong i kom typewriter i kare ma atye ka a ki gang odiko. I kare ma adwogo cen gang otyeno, aniang ni latin me mwaka adek pa ngat ma onongo watye ka bedo i gange-ni obedo ka tuko ki typewriter ci “okonya” tyeko coyo ripot. Pi meno onongo mitte ni acak coyone odoco. Pi mwaki mapol onongo amaro yelo latin-ni pi gin ma en otimo-ni.

I mwaka 1971, anongo waraga ma nyuto ni omyero acak tic macalo laneno me distrik i New York City. Wabedo ki ur madit adada! I kare ma wakobo kunu, onongo atye ki mwaka 34 keken. Utmege gujola macalo lanenogi me distrik ki yomcwiny madit adada kadi bed atye ocol.

Macalo laneno me distrik, onongo amaro pwonyo lok i kom Jehovah i tum cabit ducu i gure me adwol. Pol pa luneno me adwol magi onongo gitye ki ngec madwong loya woko. Ngat acel i kingi onongo en aye omiyo pwony me batijana. Laneno mukene onongo obedo Omego Theodore Jaracz, ma lacen otiyo macalo lamemba me Lukiko Madit. Onongo bene tye omege mapol ma gitye ki ngec adada ma gitiyo i Betel me Brooklyn. Abedo ki pwoc madwong adada ni luneno me adwol magi kacel ki Lubetel guweko abedo agonya.  Aneno ki wanga ni utmege magi gubedo lukwat ma lumar, ma gijenge i kom Lok pa Lubanga dok gikonyo dulwa ki cwinygi ducu. Mwologi okonya me tic macalo laneno me distrik.

I mwaka 1974, Lukiko Madit gucwalo luneno me distrik mogo cen i tic me limo adwol, dok anongo mot me tic macalo laneno me adwol i South Carolina. Ki yomcwiny, i kare meno onongo utmege ma ocol kacel ki muni ma i lobo Amerika dong gitwero cokke kacel dok man oyomo cwiny utmege adada.

I agikki me mwaka 1976, kicwala ka tic i adwol ma i Georgia ma tye i kin Atlanta ki Columbus. Wiya pud po maber adada kit ma amiyo kwede pwony me yiko lutino abic ma ocol ma guto i kare ma jo mogo guwango otgi woko. Mamagi onongo tye i ot yat pi awano ma onongo. Utmege ma ocol ki muni mapol adada gubino i ot yat ka limo lunyodo man. Aneno ni mar i kin utmege onongo tye matek adada. Ka lutic pa Lubanga ginyuto mar ma kit man i kingi, ci gitwero kanyo kit peko mo keken.

I mwaka 1977, kilwongowa me bino i Betel me Brooklyn pi dwe mogo manok me miyo kony i tic mo. I kare ma tic man cok tum, lumemba aryo me Lukiko Madit gurwatte kweda dok gupenya ka an ki Ruby watye atera me tic i Betel matwal. Wajolo lwongo man.

Pi mwaki 24, abedo ka tic i Dipatmen ma Neno Tic me Tito Kwena, dok dipatmen man kare ki kare konyo omege me gamo lapeny mogo matego adada. Pi mwaki mapol Lukiko Madit dong gubedo ka miyo tira ma jenge i Baibul. Man konyo Dipatmen ma Neno Tic me Tito Kwena me gamo lapeny dok gitiyo ki tira magi me yubo jami me pwonyo luneno me adwol, luelda kacel ki painia. Jami ma kitiyo kwede me pwony-nyi okonyo jo mapol me dongo i yo me cwiny. Dok man bene ojingo dul pa Jehovah.

Cakke i mwaka 1995 me o i mwaka 2018, alimo jang gang kal mapol macalo lacungo pi gang kal madit, ma yam con onongo kilwongo ni laneno me jon. Onongo arwatte ki Komitti me Jang Gang Kal, Lubetel, kacel ki lumiconari wek acuk cwinygi kun bene akonyogi ki pekkigi. Dok omege ki lumege ma gunywako kacel kwedwa gin mutimme i kwogi kare ducu gucuko cwinywa. Me labolle, walimo lobo Rwanda i mwaka 2000. Winyo kit ma utmege kacel ki Lubetel gukato ki i nek lumuku ma otimme i mwaka 1994 ogudo cwinywa adada. Jo mapol i kingi gurwenyo danogi me amara. Kadi bed gukato ki i pekki mapol, utmege magi gunyuto niye, gen, kacel ki yomcwiny.

I kare-ni dong watye i kine ka mwaka 80 ki wiye. Pi mwaki 20 ma okato-ni, abedo ka tic macalo lamemba me Jang Gang Kal me Amerika. Pe akwano wa i univaciti; kadi bed kit meno, anongo pwonnye maber loyo ducu ki bot Jehovah kacel ki dulle. Man oweko atye ma ayubbe me pwonyo dano lok ada me Baibul ma twero konyogi pi naka. (2 Kor. 3:5; 2 Tem. 2:2) Aneno kit ma kwena me Baibul okonyo kwede jo mapol me yubo kwogi kun bene gidongo wat macok ki Lacwecgi. (Yak. 4:8) An ki Ruby kare ducu watute me cuko cwiny jo mukene me bedo ki pwoc pi nongo pwonnye ma a ki bot Jehovah kacel ki pwonyo jo mukene lok i kome. Meno aye obedo mot madit loyo ducu ma latic pa Jehovah twero nongone!