Nen kong kit ma Baibul gamo kwede lapeny magi.

Tic pa Lukwena 24:15 wacciwa ni ‘dano gibicer woko, jo ma kitgi atir wa ki jo ma kitgi pe atir.’ Jo ma kitgi atir gubedo jo ma luwiny bot Lubanga ma peya guto, pi man nyinggi kicoyo i buk me kwo. (Mal. 3:16) Jo ma kitgi pe atir gubedo jo ma guto labongo nongo kare me pwonyo lok i kom Jehovah, pi man nyinggi pe kicoyo i buk me kwo.

Jon 5:28, 29 bene loko i kom gurup aryo ma kiloko i komgi i buk me Tic pa Lukwena 24:15. Yecu owaco ni ‘jo ma ceng gutimo maber bidonyo i cer me kwo, jo ma ceng gutimo marac bidonyo i cer me ngolo kop.’ Jo ma kitgi atir gutimo jami mabeco i kare ma peya guto. Gibidonyo i cer me kwo pien nyinggi tye kicoyo i buk me kwo. Ento, jo ma kitgi pe atir gutimo jami maraco ma peya guto. Gibidonyo i cer me ngolo kop. Nyinggi peya kicoyo i buk me kwo, dok gibikato ki i kare me ngolokop nyo ngiyo kitgi wek kinen ka gupore. I kare meno, gibibedo ki mot me pwonyo lok i kom Jehovah wek kico nyinggi i buk me kwo.

Niyabo 20:12, 13 tito ni bimitte ni jo ducu ma kicerogi gulub jami ma “gicoyo i buk magi,” ma en aye cik manyen ma Lubanga biminiwa i lobo manyen. Jo ma pe gibilubo cik magi kibijwerogi woko.—Ic. 65:20.

Daniel 12:2 otito ni jo mogo ma i kare-ni guto woko gibicer, “jo mukene gibidonyo i kwo ma bedo nakanaka, ento jo mukene gibinongo megi lewic ki cac ma bedo nakanaka.” Tyeng man loko i kom ngolo kop me agikki i kom jo ma kicerogi. Gibinongo ‘kwo ma bedo nakanaka’ nyo ‘lewic ki cac ma bedo nakanaka.’ Dong i agikki me mwaka 1,000 jo mogo gibinongo kwo ma pe tum dok jo mukene kibijwerogi matwal.—Yabo 20:15; 21:3, 4.

Nen kong lapor man. Kwo pa gurup aryo ma kibicerogi-ni, kitwero porone ki welle ma gimito kobo me bedo i lobo mukene. Jo ma kitgi atir gitye calo welle ma gunongo waraga me tic nyo me bedo i lobo meno ma weko gibedo agonya i wang gamente. Kitungcel, jo ma kitgi pe atir gitye calo welle ma gunongo waraga me limo nyo bedo pi tutunu i lobo meno. Mitte ni welle ma kit magi gucob jami mogo ma peya kiye ni gubed i lobo manyen meno. I yo acel-lu, bimitte ni jo ma kitgi pe atir gulub cik pa Jehovah dok gunyut ka maleng ni kitgi atir wek gumedde ki bedo i Paradic. Dok labongo paro pi waraga ma welo moni onongo me donyo i lobo mukene, welle mogo i agikkine kiminigi twero me bedo calo anywali ento mukene kiryemogi woko ki i lobo meno. Tam me agikki ma gamente bimoko jenge i kom kitgi ki jami ma gutimo i lobo manyen meno. I yo acel-lu, ngolo kop me agikki i kom jo ma kibicerogi bijenge i kom kitgi ki gwoko gennegi i lobo manyen.

Jehovah pe obedo Lubanga me mar keken ento bene Lubanga ma ngolo kop atir. (Nwo. 32:4; Jab. 33:5) En binyuto mare ki cero jo ma kitgi atir kacel ki jo ma kitgi pe atir. Ento En bimito ni gin ducu gulub rwomme me kit ma atir. Jo ma gibimare dok gibilubo rwomme keken aye kibiye ni gumedde ki kwo i lobo manyen.