1-2. Pingo omyero wabed ki miti me kwano lok madok i kom Samson?

 GIN ango ma itamo iye ka iwinyo nying Samson? Nen calo itamo pi laco mo ma onongo kome tek adada dok meno lok ada. Ento Samson omoko tam marac ma oweko en odeno can malit adada. Kadi bed kit meno, Jehovah oketo cwinye i kom jami ducu ma Samson otimo me tic Pire. Dok Lubanga oweko kicoyo lok madok i kom Samson i Baibul wek obed me pwony botwa.

² Jehovah otiyo ki Samson me cobo jami madongo me konyo jo Icrael. Mwaki miya mapol i nge to pa Samson, Jehovah oweko lakwena Paulo ocoyo nying Samson i kare ma tye ka ryeyo nying co ma gunyuto niye matek. (Ibru 11:​32-34) Lanen pa Samson twero cuko cwinywa. En ojenge i kom Jehovah kadiwa i kare ma kwo tek adada. I pwony man, wabinyamo gin ma watwero pwonyo ki bot Samson ki kit ma lanenne twero cuko kwede cwinywa.

3. Tic ango ma Jehovah omiyo ki Samson?

³ I kare ma kinywalo Samson, jo Piliciti aye onongo gitye ka loyo rok me Icrael kun giuno Luicrael matek. (Lungol. 13:1)  Luicrael gubedo ka deno can malit pi loc aconya pa Lupiliciti. Jehovah oyero Samson me “laro jo Icrael ki i cing jo Piliciti.” (Lungol. 13:5) Meno pud dong obedo tic matek ya! Me cobo tic man, onongo mitte ni Samson ojenge i kom Jehovah.

4. Jehovah okonyo Samson nining me loyo jo Piliciti? (Lungolkop 15:​14-16)

⁴ Nen kong labol ma nyuto kit ma Samson ogeno kwede Jehovah dok ojenge i kome pi kony. I nino mo acel, lumony pa Lupiliciti gubino me mako Samson ki i kabedo ma kilwongo ni Leki, ma nen calo onongo tye i Juda. Lworo omako co me Juda matek, pi meno gumoko tamgi me miyo Samson i cing lumonegi. Jo pa Samson kikome gutweye matek ki tol aryo manyen ci gukele bot jo Piliciti. (Lungol. 15:​9-13) Ento, “cwiny pa Rwot [Jehovah] obino opoto i kome ki tek” oweko Samson ocodo tol ma kitweye kwede-ni woko. Ci en “ocop i kom cogo cwak kana manyen,” okwanyo, dok otiyo kwede me neko co 1,000 me Piliciti!​—Kwan Lungolkop 15:​14-16.

5. I yo ma nining ma tic ki cogo cwak kana onyuto ni Samson ojenge i kom Jehovah?

⁵ Cogo cwak kana onongo pe tye i kin jami ma kitiyo kwedgi me lweny. Dong pingo Samson otiyo kwede? Labongo akalakala mo, Samson onongo ngeyo ni Jehovah aye bikonye me loyo lweny i kom jo Piliciti labongo paro pi jami lweny ma etiyo kwede. Ada, laco ma lagen-ni otiyo ki gin ma nonge bote me cobo miti pa Jehovah. Onen ka maleng ni Samson oloyo jo magi ducu pien ojenge i kom Jehovah.

6. Ka odok i kom cobo tic ma Jehovah ominiwa, pwony ango ma watwero nongo ki bot Samson?

⁶ Jehovah biminiwa bene teko me cobo tic ma en ominiwa, kadiwa tic mogo ma nen calo pe watwero cobone. Lubanga twero timone i yo ma weko wabedo ki ur. Bed ki gen ni Jehovah, ma omiyo teko bot Samson, bene bikonyi me timo mitine ka in ijenge i Kome pi kony.​—Car. 16:3.

7. Labol mene ma nyuto ni pire tek adada piwa me yenyo tira ki bot Jehovah?

⁷ Omege ki lumege mapol ma gimiyo kony i  tic me gero odi me worowa gunyuto ni gigeno Jehovah. I kare mukato, utmege aye onongo pol kare gigoyo pulan dok gigero Odi me Ker kacel ki gedo mukene. Ento kit macalo dano mapol dong gitye ka nongo batija, onongo mitte ni dulwa otim alokaloka. Omege ma gitye ka telo dulwa gulego pi tira pa Jehovah ci gutemo yo manyen, calo wilo odi ma kigero con kacel ki rocone. Robert, ma i mwaki mogo macok cok-ki oneno wi ticwa me gedo i lobe mapatpat owaco ni, “I acakkine, pe obedo yot me timo jami i yo manyen man.” En omedde ni: “Onongo pat adada ki gin ma wabedo ka timo pi mwaki mapol. Ento utmege gubedo atera me jolo alokaloka man, dok onen ka maleng ni Jehovah tye ka goyo laane i kom yub man.” Man obedo labol acel keken i kom kit ma Jehovah tye ka tiro kwede jone me cobo mitine. Kare ki kare, wan ducu omyero wapennye kekenwa ni, ‘Tika atye ka yenyo tira ki bot Jehovah kun atye atera me timo alokaloka wek ati pire i yo maber loyo?’

8. Gin ango ma Samson otimo i nino mo ma orwo pii oneke matek?

⁸ Oromo bedo ni ikwano lok i kom jami mukene me aura ma Samson otimo. En oneko labwor ki cinge nono dok lacen oneko co 30 i boma pa Lupiliciti ma kilwongo ni Acikelon. (Lungol. 14:​5, 6, 19) Samson oniang ni onongo pe etwero timo jami magi labongo teko pa Jehovah. Meno onen ka maleng nino mo acel ma orwo pii oneke matek i nge en neko Lupiliciti 1,000 kulu. Ngo ma en otimo? Me ka yenyo pii amata en kikome, en okok bot Jehovah pi pii amata.​—Lungol. 15:18.

9. Gin ango ma Jehovah otimo i kare ma Samson olego pi kony ki bote? (Lungolkop 15:19)

⁹ Jehovah ogamo lega pa Samson i yo me tango ki baro wang it i kor got. I kare ma Samson omato pii meno, “cwinye odwogo, olimo tek doki.” (Kwan Lungolkop 15:19.) Nen calo wang it man onongo pud tye kadi wa i nge mwaki mapol i kare ma lanebi Camuel ocoyo buk pa Lungolkop. Luicrael ma onongo gineno pii man ka mol, onongo wigi po ni ka gujenge i kom Jehovah, ci en bikonyogi i kare ma gimito kony.

10. Ngo ma omyero watim wek wanong kony ki bot Jehovah? (Nen bene cal.)

¹⁰ Wan bene omyero wajenge i kom Jehovah labongo paro pi diro ma watye kwede nyo gin ma dong wacobo i ticce. Omyero wabed mwol kun waye ni watwero cobo tic ma Jehovah ominiwa keken ka wajenge i kome. Samson onongo teko i kare ma omato pii ma Jehovah omiyo. I yo acel-lu, mitte ni wajol kony pa Jehovah wek wamedde ki bedo lugen bote.​—Mat. 11:28.

11. Watwero jenge i kom Jehovah pi kony nining? Mi labol.

¹¹ Nen kong labol pa Aleksey, ominwa mo i lobo Russia ma tye ka kanyo aunauna magwar. Ngo ma okonye me bedo ki niye matek kadi wa i kare me aunauna man? En otito ni en kacel ki dakone onongo dong guketo yub maber me woro Lubanga. En owaco ni: “Atute matek me medde ki yubba me kwan pira kena kacel ki kwano Baibul nino ducu. Odiko ducu an ki dakona wanyamo Ginacoya me nino meno dok walego kacel.” Labol man pwonyowa gin ango? Me ka jenge i kom tekowa kekenwa, omyero wajenge i kom Jehovah. Watwero timo meno nining? Watimo man ka kare ducu watimo jami ma dongo niyewa calo kwano Baibul, lega, bino i cokke, ki tito kwena. Ka watimo jami magi, ci Jehovah biminiwa kony ma wamito me medde ki tic pire. En omiyo teko bot Samson, dok bimiyo botwa bene teko.

12. I yo ma nining ma winnye pa Samson ki Delila obedo pat ki winnyene mogo macon ki mon ma Lupiliciti?

¹² Samson onongo tye ki roc calo wan, pi meno i kare mogo en omoko tam maraco. Tam acel mo ma en omoko okelo adwogi maraco pien Samson pe obedo ka tamo pi tic ma Lubanga omine. I kare ma Samson dong otiyo macalo langolkop pi mwaki mogo, en “omaro dako mo ma i nota me Corek, ma nyinge Delila.” (Lungol. 16:4) Winnye i kin en ki Delila obedo pat ki winnyene mogo macon ki mon ma Lupiliciti. Con kong Samson onongo mito nyomo nyako mo ma Lapiliciti, ento ‘lok meno onongo oa ki bot Jehovah,’ ma onongo ‘tye ka yenyo alii mo i kom jo Piliciti.’ Dok lacen, Samson obedo i ot pa dako mo ma lakwele i boma pa Lupiliciti ma kilwongo ni Gaja. I nino meno, Lubanga omiyo ki Samson teko me putu ki tingo woko dog cel me boma meno, ma man oweko boma meno odoko goro adada. (Lungol. 14:​1-4; 16:​1-3) Ento Delila nen calo onongo obedo Laicrael, pi meno winnyegi pe omiyo ki Samson kare mo me lweny i kom Lupiliciti.

13. Gin ango ma Delila otimo i kom Samson?

¹³ Delila ogamo cente madwong adada ki bot jo Piliciti me dobo Samson. Nen calo Samson onongo maro Delila matek adada ma oweko en pe oniang gin ma Delila tye ka timone. Delila obedo ka dido Samson matek nino ki nino ni otitte ka ma tek kome a ki iye, ci i agikkine Samson otitte. Ki cwercwiny, bal ma Samson otimo-ni oweko en orwenyo tek kome kacel ki watte ki Jehovah pi kare mo.​—Lungol. 16:​16-20.

14. Can malit ango ma Samson okato ki iye pi geno Delila?

¹⁴ Samson onongo adwogi malit adada pi geno Delila me ka geno Jehovah. Jo Piliciti  gumako Samson ci gukolo wange woko. Gutweye i mabuc i Gaja, ka ma yam con en oputo iye dog celgi woko. Jo ma i gang meno guweko en odoko opii ma rego bel i mabuc. Ci jo Piliciti gulanye matek i kare ma gugure pi kwergi mo. Gutyero gitum madwong bot lubangagi Dagon pien gutamo ni en aye okonyogi me mako Samson. Gukelo Samson ki i mabuc ‘wek otuk tuko mo me galo wanggi’ kun gibedo ka nyware.​—Lungol. 16:​21-25.

15. I yo ma nining ma Samson onyuto kwede ni dok etye ka jenge i kom Jehovah? (Lungolkop 16:​28-30) (Nen cal ma tye i pok ngeye.)

¹⁵ Samson onongo otimo bal madit ento en pe oilo cinge woko. En oyenyo kare me lweny i kom jo Piliciti, ma meno aye tic ma onongo Jehovah omine. (Kwan Lungolkop 16:​28-30.) Samson obako doge bot Jehovah ni: “Alegi iwek acul kwor i kom jo Piliciti.” Lubanga me ada ogamo lega pa Samson dok omine tek kom ma yam tye kwede. Macalo adwogine, Samson oneko jo Piliciti i nino meno makato ma en onongo onekogi con.

16. Pwony ango ma watwero nongo ki i bal ma Samson otimo?

¹⁶ Kadi bed Samson okato ki i arem malit adada macalo adwogi me tam marac ma en omoko, en pe oilo cinge woko ka tiyo miti pa Jehovah. Dong kadi bed watimo bal ma nongo mitte ni wanong tira nyo warweny mot me tic ma watye kwede i kacokke, pe omyero wail cingwa woko. (Jab. 103:​8-10) Kadi bed onongo watimo bal, Jehovah pud twero miniwa teko me timo mitine, kit ma en otimo kwede pi Samson.

17-18. Gin ango ma ocuko cwinyi ki i labol pa Michael? (Nen bene cal.)

¹⁷ Nen kong labol pa omego mo ma bulu ma nyinge Michael. En onongo tye ki tic mapol kun tiyo macalo lakony kor tic kacel ki painia marii. Ento ki cwercwiny, en otimo bal ma oweko orwenyo mot me tic ma en tye kwede i kacokke. En owaco ni, “Nio wa i kare meno, onongo atye ka tiyo tic mapol pi Jehovah. Ento apo ni dong pe atwero timo gin mo pi Jehovah. Pe atamo ni Jehovah biweka niyak, ento abedo ka paro kace watta kwede dok biyubbe bedo maber nyo kace abibedo ki kare me tic pire i kacokke kit ma yam onongo atimo kwede.”

¹⁸ Tye me yomcwiny ni, Michael pe oilo cinge woko. En omedde ni: “Atiyo matek me yubo watta ki Jehovah kun alego bote kare ki  kare, dok akwanyo kare me kwan pira kena kacel ki lwodo lok.” I nge kare mo, Michael dok onongo mot me tic i kacokke. I kare-ni, en tiyo macalo laelda ki painia marii. En otito ni: “Kony kacel ki cuko cwiny ma anongo, tutwalle ki bot luelda, okonya me niang ni Jehovah pud mara. Atwero dok tic i kacokke ma cwinya pe pida. Gin mutimme man opwonya ni Jehovah bitimo kica ki ngat mo keken ma ongut ki cwinye ducu.” Watwero bedo ki tekcwiny ni Jehovah bitic kwedwa dok bigoyo laane i komwa bene kadi bed watimo bal, teke watimo jami ducu ma watwero pe me nwoyo bal meno kun wamedde ki jenge i kome.​—Jab. 86:5; Car. 28:13.

19. I yo ma nining ma lanen pa Samson omini teko?

¹⁹ I pwony man, wanyamo jami mogo manok ma otimme i kwo pa Samson. En onongo tye ki roc, ento en pe oilo cinge woko i tutene me tic pi Jehovah, kadi wa i nge timo bal ki Delila. Dok Jehovah bene pe oilo cinge i kom Samson. Lubanga dok otiyo ki Samson i yo me aura. Jehovah onongo pud nene macalo laco ma tye ki niye matek, dok oweko kiryeyo nyinge i kin jo ma lugen ma kiloko i komgi i Jo Ibru cura 11. Pud dong cuko cwinywa ya me ngeyo ni watiyo pi Wonwa me polo ma lamar ma tye ki miti me miniwa tek, tutwalle ka wagoro! Dong, calo Samson, wan bene omyero wabak dogwa bot Jehovah ni: ‘Po pira, alegi ba do, ci imiya teko.’​—Lungol. 16:28.