1. Ma peya Petero oto, Jehovah otiyo kwede me timo gin ango?

 LAKWENA Petero onongo ngeyo ni dong ecok to woko. I ticce pi Jehovah pi mwaki mapol, en obedo ki kare me tito kwena kacel ki Yecu, obedo ngat mukwongo me tito kwena bot Lurok, dok otiyo macalo lamemba me lukiko madit. Kadi bed en onongo dong ecok to, Jehovah pud omine tic mukene. I kine ka mwaka 62-64 K.M., Jehovah otiyo kwede me coyo waraga aryo​—ma gin aye buk pa Petero me 1 ki 2. Petero onongo tye ki gen ni waragane magi bikonyo Lukricitayo i nge tone.​—2 Pet. 1:​12-15.

2. Pingo waromo waco ni Petero ocoyo waragane i kare ma mitte kikome?

² Petero ocoyo waraga aryo magi i kare ma utmegine “kitye ka unogi i yo mapatpat.” (1 Pet. 1:​6, NWT) Jo maraco onongo gitye ka tute me kelo pwony goba kacel ki tim mogo macilo i kacokke pa Lukricitayo. (2 Pet. 2:​1, 2, 14) Ma pe orii, Lukricitayo ma gibedo i Jerucalem onongo gibikemme ki “agikki me jami ducu”​—ma en aye jwero boma meno kacel ki ot pa Lubanga, ma onongo lumony me Roma aye bitimone. (1 Pet. 4:7) Labongo akalakala mo, waraga pa Petero magi okonyo Lukricitayo me niang gin ma gitwero timone me kanyo pekkigi kacel ki yubbe pi pekki mukene ma bibino i anyim. b

3. Pingo pire tek botwa me nyamo lok ma tye i waraga aryo pa Petero-ni?

³ Kadi bed Petero onongo ocoyo waragane magi bot Lukricitayo  me cencwari me acel, Jehovah oweko kiketogi i kin bukke me Baibul. (Rom. 15:4) Calo Lukricitayo magi, wan bene watye ka kwo i lobo ma opong ki tim macilo adada ma twero weko bedo tek botwa me tic pi Jehovah. Medo i kom meno, cokcok-ki wabikato ki i twon can madit atika ma loyo ma Lujudaya gukato ki iye i kare me jwero Jerucalem ki ot pa Lubanga. Waraga pa Petero aryo magi tye ki lapo wic ma pigi tego adada. Gibikonyowa me bedo ma wayubbe pi agikki me lobo man, pe me lworo gin ma dano gitamo i komwa, dok me bedo ki mar matut i kinwa. Lapo wic magi twero konyo luelda bene me niang kit ma gitwero konyo kwede omege ki lumege ma i kacokke me cung matek.

4. Kit ma kitito kwede i 2 Petero 3:​3, 4, gin ango ma twero weko niyewa doko goro?

⁴ Watye ka kwo i kin dano ma pe giye gin ma Baibul waco ni bitimme i anyim. Lumonewa gitwero ngalowa pien ni dong wabedo ka tito pi mwaki mapol ni agikki piny tye ka bino. Jo mogo giwaco ni agikki pe bibino matwal. (Kwan 2 Petero 3:​3, 4.) Ka wawinyo lok ma kit meno ki bot jo ma watito kwena botgi, lutic luwotwa, nyo wadiwa, ci man twero weko wabedo ki akalakala i kom niyewa. Petero otito gin ma twero konyowa.

5. Gin ango ma bikonyowa me bedo jo ma gidiyo cwinygi ka wakuro agikki me lobo man? (2 Petero 3:​8, 9)

⁵ Twero nen bot jo mukene calo Jehovah tye ka galle tutwal ki kelo agikki me lobo man marac-ci. Lok ma Petero owaco twero konyowa me bedo ki neno ma atir pien poyo wiwa ni, kit ma Jehovah neno kwede ki cawa pat adada ki kit ma dano neno kwede. (Kwan 2 Petero 3:​8, 9.) Ki bot Jehovah, mwaka alip acel rom ki nino acel. Jehovah tye ka diyo cwinye, dok pe mito ni ngat mo oto. Ka nino me agikki piny oo, ci lobo man marac-ci bigik woko. Pud dong obedo mot madit ya me tic ki kare ma wadong kwede me tito kwena bot dano ducu ma i lobo-ni!

6. Watwero nyuto ni watye ka ‘kuro nino pa Jehovah’ nining? (2 Petero 3:​11, 12)

⁶ Petero ocikowa ni ‘waket cwinywa’ i kom nino pa Jehovah. (Kwan 2 Petero 3:​11, 12.) Watwero timo meno nining? Nino ducu, omyero wabed ka tam i kom kit ma kwo bibedo mit kwede i lobo manyen. Go ni itye ka ywayo yamo mangic, camo cam mabeco, jolo joni me amara ma kicerogi, ki dong pwonyo jo mapol ma gukwo con kit ma lok pa lunebi me Baibul ocobbe kwede. Ka ibedo ka lwodo jami magi, ci bikonyi me kuro nino pa Jehovah ki miti madwong ki me moko ni agikki piny dong cok. Bedo ki ‘ngec matut’ madok i kom anyimwa, bikonyowa bene wek lupwonye ma lugoba pe ‘gungakwa woko.’​—2 Pet. 3:17.

7. Lworo dano twero gudowa nining?

⁷ Kit macalo wangeyo ni nino pa Jehovah dong cok oo, mitte ni watim jami ducu ma watwero me nywako kwena maber-ri ki jo mukene. Ento i kare mogo, waling mot. Pingo? Pien nongo wabedo ki lworo i kom gin ma dano gitamo i komwa. Gin ma kit man otimme i kom Petero. I dyewor ma luloc gumako iye Yecu, Petero obedo ki lworo me waco ni ebedo lapwonnye pa Yecu dok okwero tyen adek ni pe engeyo Yecu. (Mat. 26:​69-75) Ento lacen, Petero oloyo lworo ma en onongo tye kwede, dok en ocoyo ni: “Pe wulworgi, dok cwinywu bene pe opoti.” (1 Pet. 3:14) Lok pa Petero man cuko cwinywa ni watwero loyo lworo ma watye kwede i kom dano.

8. Gin ango ma twero konyowa me loyo lworo ma watye kwede i kom dano? (1 Petero 3:15)

 ⁸ Gin ango ma twero konyowa me loyo lworo ma watye kwede i kom dano? Petero otitiwa ni: “Wuwor Kricito i cwinywu macalo Rwotwu.” (Kwan 1 Petero 3:15.) Man kwako poyo wiwa ni Yecu Kricito aye obedo Kabakawa dok ni en tye ki teko madwong. Ka iwinyo ni lworo tye ka maki i cawa ma nongo imito nywako kwena maber ki ngat mo, wi opo i kom Kabakawa. Go i wi kit ma en obedo i wi kom kerre dok lumalaika mapol gucung ka ngete. Wi opo ni en tye ki “twero ducu . . . i wi polo ki i lobo” dok ni en ‘tye kwedi kare ducu, nio i agikki piny.’ (Mat. 28:​18-20) Petero ocuko cwinywa me ‘bedo ma wayubbe kare ducu’ me lok i kom niyewa. Tika imito miyo caden bot ngat mo i gang ticci, i cukul, nyo ka mo mukene? Tam i kom cawa mene ma imito miyo iye caden, dok iyub gin ma ibiwacone con. Leg pi tekcwiny, dok igen ni Jehovah bikonyi me loyo lworo ma itye kwede i kom dano.​—Tic 4:29.

9. I nino mo acel, ngo ma Petero otimo ma pe onyuto mar? (Nen bene cal.)

⁹ Petero opwonyo kit me nyuto mar. En obedo tye i kare ma Yecu owaco ni: “Amiyowu cik manyen, ni, wumarre kekenwu; wumarre kekenwu macalo ceng amarowu.”  (Jon 13:34) Kadi bed kit meno, Petero lacen okwero nywako cam kacel ki omege ki lumege ma gitye Lurok pien onongo lworo Lukricitayo ma gubedo Lujudaya. Lakwena Paulo owaco ni tim pa Petero-ni “pe nyuto cwiny me ada” nyo obedo tim me goba. (Gal. 2:​11-14) Petero ojolo tira pa Paulo dok onongo pwony ki iye. I waragane aryo ducu, en ocoyo ni pe omyero wabed ki mar pi omegiwa ki lumegiwa keken ento omyero bene wanyut mar meno.

10. Gin ango ma twero konyowa me nyuto “mar ma goba pe iye”? (1 Petero 1:22)

¹⁰ Petero owaco ni omyero wabed ki “mar ma goba pe iye macalo utmego.” (Kwan 1 Petero 1:22.) Mar ma kit meno bino macalo adwogi me “lubo lok ada.” Lok ada acel tye ni “Lubanga pe poko kin dano.” (Tic 10:​34, 35) Ka wayero ayera anga ma omyero wanyut mar bote ci nongo pe watye ka lubo cik ma Yecu omiyo me nyuto mar. Ngene kene ni, lirem i kinwa twero bedo cok ki jo mogo loyo jo mukene. (Jon 13:23; 20:2) Ento Petero opoyo wiwa ni omyero watute matek me marre kekenwa “macalo utmego”​—pien omege ki lumege gitye jo me ot acel.​—1 Pet. 2:17.

11. Tyen lokke ngo me ‘marre kekenwa mada ki cwinywa ducu’?

¹¹ Petero ocoyo ni, “Wumarre kekenwu mada ki cwinywu ducu.” Ma lubbe ki lok pa Petero man, ‘marre kekenwa mada’ tyen lokke ni omyero wamar ngat moni kadi bed tek me nyutone. Me labolle, ket kong ni omego mo ocwero cwinywa. I acakkine, watwero bedo ki tam ni omyero wadwok gin marac i kom marac, me ka nyutte mar. Ento Petero opwonyo ki bot Yecu ni dwoko gin marac i kom marac pe yomo cwiny Lubanga. (Jon 18:​10, 11) Petero ocoyo ni: “Pe wudwok tim marac pi tim marac, nyo yet ki yet; ento ma ka timo meno, wuleg gum pa Lubanga obed i komgi.” (1 Pet. 3:9) Ka watye ki mar matut, wabibedo lukica kun waparo kadi wa pi jo ma gucwero cwinywa.

12. (a) Gin ango mukene ma mar matut pi utmegiwa bikonyowa me timone? (b) Gin ango ma imito tute me timone, kit ma kinyuto kwede i vidio ma wiye tye ni Gwok Ribbe ma Tye i Kinwa?

¹² I waragane mukwongo, Petero otiyo ki lok man ni “wumok matek i marre kekenwu.” Mar ma kit meno pe umo bal manok keken ento “lwak bal mapol.” (1 Pet. 4:8) Twero bedo ni Petero wiye opo i kom pwony madok i kom timo kica ma Yecu opwonye kwede mwaki mapol angec. I kare ma Yecu pwonye-ni, nen calo Petero otamo ni ka etimo kica ki omine “tyen abiro,” ci nongo ebedo ngat ma kite ber adada. Ento Yecu opwonyo Petero​—kacel ki wan ducu—​me timo kica ‘tyen pyerabiro wiye abiro,’ ma meno tyen lokke ni agikki me timo kica pe. (Mat. 18:​21, 22) Ka inongo ni tek me keto tira man i tic, pe iwek cwinyi otur! Macalo lutic pa Jehovah ma gitye ki roc, wan ducu wanongo timo meno tek kare mogo. Gin ma pire tek kombeddi aye ni omyero itim gin ma itwero me timo kica ki omeru dok wuyub wat i kinwu. c

13. Gin ango ma weko bedo tek bot luelda me cobo ticgi me gwoko omege ki lumege?

¹³ Ki lok ada, wi Petero pe owil i kom gin ma Yecu owacce ni otim i nge cere, ni: “Gwok romina.” (Jon 21:16) Ka ibedo laelda, nge ni tira man gudi bene. Pe twero bed yot ki laelda me nongo cawa me cobo tic ma pire tek ma en tye kwede i kacokke. Mitte ni luelda kong gukwong ki cobo miti pa jo me pacogi i  yo me kom, kacel ki i yo me cwiny. Gitelo wi kacokke i tic me tito kwena dok giyubo kun bene gimiyo pwony i kacokke, gure me adwol, ki gurewa madito. Luelda mogo bene gitiyo ki Komitti ma Kubu kin Lucaden ki Ludaktari nyo ki Dipatmen me Gedo (LDC). Ki lok ada, luelda gitye ki tic mapol adada!

14. Gin ango ma bikonyo luelda me cuko cwiny omege ki lumege? (1 Petero 5:​1-4)

¹⁴ Petero ocuko cwiny luelda luwote ni, “Wukwa romi pa Lubanga.” (Kwan 1 Petero 5:​1-4.) Ka in laelda, wangeyo ni imaro utmegini dok imito cuko cwinygi. Ento i kare mogo, iromo winyo ni itye ki tic mapol nyo inongo ni iol adada ma pe iromo cobo ticci. Gin ango ma itwero timone? Tit ki Jehovah parri ducu kacel ki kit ma imito konyo kwede omege ki lumege. Petero ocoyo ni: “Ngat ma miyo kony oti macalo ngat ma tiyo ki tek ma Lubanga omiyo.” (1 Pet. 4:11) Twero bedo ni omege ki lumege gitye ka lweny ki pekki ma pe kitwero cobogi i lobo man. Ento wi opo ni “lakwat madit” Yecu Kricito, twero konyogi makato. En twero timo meno i kare-ni ki dok i lobo manyen bene. Gin ma Jehovah mito ni luelda gutim aye me maro utmege, cuko cwinygi, ki dok me bedo “lanen maber bot romi.”

15. Laelda mo acel cuko cwiny utmege nining? (Nen bene cal.)

¹⁵ William, ma dong otiyo macalo laelda pi mwaki mapol, ngeyo kit ma pire tek kwede me cuko cwiny omege ki lumege. I kare ma two Korona opoto, en kacel ki luelda luwote guketo macalo yubgi me kubbe ki ngat acel acel ma i gurupgi me tito kwena cabit ducu. En otito pingo timo man onongo pire tek. En owaco ni: “Pol pa utmege onongo gibedo i pacigi kengi, dok onongo yot pigi me cako bedo ki tam maraco.” Ka omego nyo lamego mo tye ka kato ki i pekki, William onongo ciko ite me niang par ma gitye kwede kacel ki gin ma gimito. Ci en tute me nongo ginakwana nyo vidio mo ki i kabedowa me Intanet ma en twero tic kwede me cuko cwiny omego nyo lamego meno. En ocoyo ni: “Pire tek adada me cuko cwiny omege i kare-ni makato kare mo keken. Pol kare watiyo matek me konyo jo mukene wek gunge Jehovah; pi meno pire tek makato me konyo omege ki lumege me medde ki bedo i ada.”

16. I yo mapatpat ango ma watwero keto i tic pwony ma wanongo ki i waraga aryo pa Petero?

¹⁶ Wanyamo pwony mogo manok keken ma watwero nongo ki i waraga aryo ma Petero ocoyo. Twero bedo ni ineno ka mo i kwoni ma mito ayuba. Me labolle, tika imito medo cawa ma itero ka lwodo lok i kom mot ma wabinongo i lobo manyen? Tika dong iketo yub me miyo caden i gang ticci, i cukul, nyo i kabedo mo keken ka kare owec? Tika ineno yo mogo ma itwero medde kwede ki nyuto mar matut pi omege ki lumege? Wun luelda, tika wumoko tamwu me medde ki kwayo romi pa Jehovah ki mit kom? Ka ingine maber, ci itwero nongo ni itye ki goro mo, ento pe iwek cwinyi otur. ‘Rwot Yecu lakica,’ dok en bikonyi me yubo ka ma mito ayuba. (1 Pet. 2:3) Petero ocuko cwinywa ni: “Lubanga . . . kikome aye ma bicobo pwonnyewu. Bimiyowu tek, dok bimiyo wucung matek liking.”​—1 Pet. 5:​10, NWT.

17. Adwogine bibedo nining ka pe wailo cingwa dok waye ki Jehovah me cobo pwonnyewa?

¹⁷ I acakkine, Petero onongo winyo calo pe epore me bedo cok ki Yecu. (Luka 5:8) Ento ki kony pa Jehovah kacel ki Yecu, Petero omedde ki tic matek me bedo lalub kor Yecu. Macalo adwogine, Jehovah oye ni Petero odony “i ker ma ri nakanaka pa Rwotwa ma en Lalarwa Yecu Kricito.” (2 Pet. 1:11) Meno pud dong obedo twon mot madit ya! Ka idiyo cwinyi calo Petero dok iye ni Jehovah ocob pwonnyeni, ci in bene ibinongo mot me kwo ma pe tum. Ibinongo ‘adwogi me niyeni, ma en aye larre.’​—1 Pet. 1:9.