1. Ngo ma Jehovah neno i kom jone?

LUBANGA JEHOVAH “cwinye yom i kom lwakke.” (Jab. 149:4) Meno weko wabedo ki yomcwiny madwong adada! Jehovah neno kitwa mabeco ki kero ma watye kwede me doko jo mabeco dok konyowa me doko lureme. Ka wagwoko gennewa bote, en bibedo cok kwedwa pi naka!​—Jon 6:44.

2. Pingo jo mukene ginongo ni tek adada me ye ni Jehovah twero marogi?

² Jo mogo giromo waco ni, ‘Angeyo ni Jehovah maro jone macalo gurup, ento atwero moko nining ni Jehovah mara?’ Pingo ngat mo twero pennye ki lapeny man? Laminwa Oksana, * ma okato ki i kwo matek i kare ma pud latin matidi owaco ni: “Cwinya obedo yom adada i kare ma anongo batija ci acako tic macalo painia. Ento mwaka 15 i nge nongo batija, wiya ocako po i kom jami maraco mutimme i koma i kare ma pud atidi. Acako tamo ni Jehovah dong pe ki cwak mo i koma dok pe apore me nongo mar ma mege.” Yua, laminwa ma tye painia ma bene okato ki i kwo matek i kare ma pud tidi owaco ni: “Adyero kwona bot Jehovah pien onongo amito yomo cwinye. Ento onongo amoko woko ki i cwinya ni en pe twero mara matwal.”

3. Gin ango ma wabinyamo i pwony man?

³ Calo lumegiwa aryo ma kiloko i komgi malo-ni, in bene imaro Jehovah matek ento itwero bedo ki akalakala ka ce en mari. Pingo pire tek ni imok piri keni ni en mari matek?  Dok ngo ma romo konyi ka icako tamo ni Jehovah pe mari? Kong dong wanenu lagam pi lapeny magi.

4. Pingo rac adada me bedo ki akalakala i kom mar pa Jehovah piwa?

⁴ Ka wamoko ada ni Jehovah marowa, wabibedo ki miti me tic pire ki tekowa ducu, kadi bed watye ka kato ki i kwo matek. Ki tungcel, ka wakalo akala ka ce Lubanga paro piwa, ci ‘tekowa bibedo nok adada.’ (Car. 24:10) Dok ka cwinywa otur dok wacako tamo ni Lubanga pe marowa, pe wabibedo ki kero me cung matek i kom atematema pa Catan.​—Ep. 6:16.

5. Ngo ma otimme i kom omege ki lumege mogo ma onongo gitamo ni Lubanga pe marogi?

⁵ Omegiwa ki lumegiwa mukene gucako tamo ni Jehovah pe paro pigi, dok meno oweko niyegi odoko goro. Laelda mo ma nyinge James owaco ni: “Kadi bed ni onongo atye ka tic i Betel dok atye ka nongo mit pa tito kwena i kacokke ma gitiyo ki leb mukene, onongo atye ki akalakala ka ce Jehovah cwinye yom pi tic ma tye ka timo pire. I kare mo, acako bene pennye kekena ka ce Jehovah winyo legana.” Eva, ma bene tiyo pi kare malac owaco ni: “Aniang ni rac adada me bedo ki akalakala i kom mar pa Jehovah pien tam ma kit man gudo jami ducu ma watimo pi Jehovah. Weko wajuko bedo ki miti pi tic pa Lubanga dok rwenyo yomcwinywa woko.” Michael, ma tye painia marii ki laelda owaco ni: “Ka pe iye ni Lubanga paro piri, ci ibia woko motmot ki bote.”

6. Gin ango ma omyero watim ka wacako tamo ni Lubanga pe marowa?

⁶ Jami mutimme i kom jo magi nyuto kit ma tam ni Jehovah pe marowa twero balo kwede niyewa. Dong ngo ma omyero watim ka wacako tamo ni Jehovah pe marowa? Myero wakwer tam ma kit meno cutcut! Leg Jehovah wek okonyi me leyo kaka ‘tam maraco’ ki ‘kuc pa Lubanga ma bigwoko cwinywu ki tamwu maber.’ (Jab. 139:23; Pil. 4:6, 7) Dok wi opo ni, pe in keni aye itye ki tam ma kit meno. Omege ki lumege mukene ma lugen bene gitye ka yelle ki tam maraco. Kadi wa lutic pa Jehovah i kare mukato angec bene gulwenyo ki kodi tam magi. Nen kong gin ma  watwero pwonyo ki i lanen pa lakwena Paulo.

7. Pekki ango ma Paulo obedo kwede?

⁷ Tika i kare mogo iwinyo calo itye ki tic mapol tutwal dok tek adada me cobo jami ducu ma omyero itim? Ka tye kit meno, ci itwero niang kwo pa lakwena Paulo. En obedo ki par, pe pi kacokke acel keken, ento “pi jo muye Kricito i kabedo mapatpat ducu.” (2 Kor. 11:23-28) Tika itye ki two mo ma pe cang ma pol kare rwenyo yomcwinyi woko? Paulo onongo tye ki ‘okuto ma girwako i kome,’ ma nen calo obedo two mo, dok olego teretere ni kikwany two meno woko. (2 Kor. 12:7-10) Tika i kare mogo cwinyi tur pi roc ma itye kwede? Paulo bene onongo kare mogo winyo kit meno. En olwonge kekene ni “an ma koma kec kuman-ni” pien kare ducu onongo mitte ni en olweny matek me timo gin ma atir.​—Rom. 7:21-24.

8. Ngo ma okonyo Paulo me kanyo kadi bed en okato ki i pekki mapol?

⁸ Kadi bed Paulo okato ki i pekki magi ducu, en omedde ki tic pi Jehovah. Ngo ma omine kero me timo meno? Kadi bed en onongo ngeyo gorone maber adada, en obedo ki niye i kom ginkok. En onongo ngeyo cikke pa Yecu ni ‘dano ducu ma ye en [Yecu] obed ki kwo ma pe tum.’ (Jon 3:16; Rom. 6:23) Labongo akalakala mo, Paulo onongo tye i kin jo ma gitye ki niye i kom ginkok. En onongo ye ni Jehovah tye atera me timo kica kadi wa bot jo ma gutimo bal madongo ka gungut.​—Jab. 86:5.

9. Ngo ma wapwonyo ki i lok pa Paulo ka kicoyo i Jo Galatia 2:20?

⁹ Paulo onongo bene tye ki niye ni Lubanga mare matek pien en onongo ngeyo ni Lubanga ocwalo Wode me to pire. (Kwan Jo Galatia 2:20.) Nen kong lok me cuko cwiny ma en oloko i agikki me tyeng meno. Paulo owaco ni: ‘Wod pa Lubanga omara ka omine gire pire kene pira.’ Paulo pe otamo ni en ebedo dano marac tutwal ma oweko Lubanga pe twero mare. En pe otamo ni, ‘Atwero neno pingo Jehovah romo maro utmegina, ento en pe twero mara matwal.’ Paulo opoyo wi Lukricitayo ma i Roma ni: ‘Kricito yam oto piwa i kare ma pud wan lubalo.’ (Rom. 5:8) Pe tye gin mo keken ma romo gengo Lubanga ki marowa!

10. Gin ango ma wapwonyo ki i Jo Roma 8:38, 39?

 ¹⁰ Kwan Jo Roma 8:38, 39. Paulo onongo ngeyo kit ma mar pa Lubanga tek kwede. En ocoyo ni pe tye gin mo ma “bibedo ki twero mo me pokowa woko ki i kom mar pa Lubanga.” Paulo onongo ngeyo kit ma Jehovah odiyo cwinye kwede i kom rok me Icrael. En bene onongo ngeyo kit ma Jehovah otimme kwede kica. Dong Paulo onongo tye ka waco ni, ‘Kit macalo Jehovah ocwalo Wode me to pira, ci omyero pe abed ki akalakala mo keken ni en mara.’​—Rom. 8:32.

11. Kadi bed Paulo onongo otimo bal calo ma kititogi i 1 Temceo 1:12-15, pingo en onongo pe ki akalakala mo keken ni Jehovah mare?

¹¹ Kwan 1 Temceo 1:12-15. Paulo nen calo onongo i kare mogo cwinye tur adada ka otamo i kom jami ma en otimo ma peya odoko Lakricitayo. Dong pe tye me ur ni en olwonge kekene ni “labal mukwongo”! Ma peya Paulo opwonyo ada, en obedo ka uno Lukricitayo i boma mapatpat, kun bene cwako lukiko ka gitye ka ngolo to i wi Lukricitayo mukene. (Tic 26:10, 11) Tika itwero goyo i wi kit ma Paulo onongo winyo kwede ka orwatte ki Lakricitayo mo matidi ma lunyodone kinekogi woko macalo adwogi me cwak ma mege? Paulo okoko ange pi bal ma otimo, ento en onongo dong pe twero loko gin mutimme con. En oye ni Kricito oto pire, dok ki gen matek en ocoyo ni: “Pi kica ma Lubanga omiya en mumiya atye macalo atye-ni.” (1 Kor. 15:3, 10) Pwony ango ma wanongo? Mitte ni imok piri keni ni Kricito oto piri dok oweko twere piri me bedo ki wat macok ki Jehovah. (Tic 3:19) Gin ma pire tek bot Lubanga obedo gin ma watwero timo kombeddi ki i anyim, ento  pe jami maraco ma watimo i kare mukato, kadi bed onongo watye Lucaden pa Jehovah i kare meno nyo pe.​—Ic. 1:18.

12. Lok ma kicoyo i 1 Jon 3:19, 20 twero konyowa nining ka wawinyo calo konywa pe dok pe wapore me amara?

¹² Ka itamo i kom kit ma Yecu oto kwede pi balwa, iromo waco ni, ‘Awinyo calo konya pe dok pe apore me nongo mot meno.’ Pingo itwero tamo kit meno? Cwinywa ma tye ki roc-ci twero bwolowa, kun weko wawinyo calo konywa pe dok pe wapore me amara. (Kwan 1 Jon 3:19, 20.) Ka wacako tam kit meno, bedo ber ka wiwa opo ni “Lubanga dit kato cwinywa woko.” Mitte ni wamok piwa kenwa ni Wonwa me polo marowa matek adada dok mito timiwa kica. Me niang maber kit ma Jehovah nenowa kwede, mitte ni wakwan Lokke kare ducu, waleg bote kare ki kare, dok waribbe kacel ki luticce ma lugen. Pingo timo jami magi pire tek tutwal?

13. Kwano Lok pa Lubanga twero konyowa nining? (Nen bene bok ma wiye tye ni “ Kit ma Lok pa Lubanga Konyogi Kwede.”)

¹³ Kwan Lok pa Lubanga nino ducu, ci ibiniang matut kit pa Jehovah mamwonya-ni. Ibiniang kit ma en mari kwede matek. Ka ilwodo but Lok pa Lubanga mo olo nino ducu, ci ibibedo ki kare me tam maber pien bitiro tam ki miti maraco ma itye kwede. (2 Tem. 3:16) Laelda mo ma nyinge Kevin ma obedo ka lweny ki tam ni konye pe owaco ni: “Kwano Jabuli 103 ki lwodone okonya me tiro tamma ki me niang kit ma Jehovah tamo kwede.” Eva, ma kiloko i kome con-ni owaco ni: “I agikki me nino ducu, akwanyo kare me tam i kom gin ma pire tek bot Jehovah. Weko abedo ma wiya opye mot dok dongo niyena.”

14. Lega twero konyowa nining?

¹⁴ Leg kare ducu. (1 Tec. 5:17) Ka imito mako larem ki ngat mo, mitte ni ilok kwede kare ki kare dok ititte kit ma iwinyo kwede. Meno bene tye ada ka odok i kom watwa ki Jehovah. Ka watite kit ma wawinyo kwede, tamwa, ki parwa i lega, wanyuto ni watye ki gen i kome dok ni wangeyo ni en marowa. (Jab. 94:17-19; 1 Jon 5:14, 15) Laminwa Yua, ma kiloko i kome con-ni, owaco ni: “Ka atye ka lega, pe awaco ki Jehovah gin mutimme i koma i nino meno keken. Atitte tamma ki kit ma awinyo kwede kikome. Motmot, acako neno Jehovah, pe macalo menija me kampuni mo madit, ento macalo Wego ma maro lutinone.”​—Nen bok ma wiye tye ni “ Tika Dong Ikwano?”

15. Jehovah onyuto nining ni eparo pi dano?

¹⁵ Ribbe kacel ki lurem ma lugen; gubedo  mot ma oa ki bot Jehovah. (Yak. 1:17) Wonwa me polo nyuto ni eparo piwa ki miniwa omege ki lumege i kacokke ma ginyuto “mar i kare ducu.” (Car. 17:17) I waragane bot jo Kolocai, Paulo oloko i kom Lukricitayo mogo ma gukonye, dok en owaco ni ‘gukweyo cwinye tutwal.’ (Kol. 4:10, 11) Kadi wa Yecu Kricito onongo mito dok obedo ki pwoc pi kony ma en onongo ki bot lureme, ma lumalaika ki dano.​—Luka 22:28, 43.

16. Lurem ma lugen giromo konyowa nining me nyiko cok ki Jehovah?

¹⁶ Tika iyenyo dok ijolo kony ki bot luremi ma i kacokke? Nywako par ma watye kwede ki larem ma oteggi i yo me cwiny pe nyuto ni niyewa goro, me ka meno, twero gwokowa. Tam kong i kom gin ma James, ma kiloko i kome con-ni owaco: “Mako lirem ki Lukricitayo ma guteggi i yo me cwiny okonya matek. Ka tam maraco obwoya woko, lurema me amara magi giwinyo lokka kun gidiyo cwinygi, dok gipoyo wiya ni gimara. Ka gutimo meno, aniang maber ni Jehovah mara dok paro pira.” Pud dong pire tek ya ni wadong dok wagwok lirem macok ki omege ki lumege me kacokke!

17-18. Anga ma omyero wawiny lokke, dok pingo?

¹⁷ Catan mito ni wail cingwa woko i lwenywa me timo gin ma atir. En mito ni watam ni Jehovah pe marowa dok ni pe wapore me alara. Ento kit ma waneno kwede, meno pe lok ada.

¹⁸ Jehovah mari. Piri tek adada bote. Ka ibedo lawiny bote, ci ‘ibibedo i marre’ pi naka, kit macalo Yecu bene tye i marre. (Jon 15:10) Pi meno, pe iwiny lok pa Catan nyo cwinyi ka iwinyo ni Jehovah pe mari. Me ka meno, winy lok pa Jehovah, ma neno jami mabeco ma watimo. Mok piri keni ni en “cwinye yom i kom lwakke,” kadiwa in!