Pingo Yecu owaco lok pa Daudi ma nonge i Jabuli 22:1 i kare ma dong cok to?

Ma Yecu cok to, en owaco lok ma kicoyo i Matayo 27:46 ni: “Lubangana, Lubangana, itenya woko pingo?” I kare ma Yecu owaco lok man, en ocobo lok pa Daudi ma kicoyo i Jabuli 22:1. (Mar. 15:34) Pe tye atir me waco ni Yecu owaco lok magi pien cwinye oballe woko i kom Jehovah nyo ni orwenyo niyene i kom Lubanga pi kare mo. Yecu onongo ngeyo maber adada tyen lok mumiyo myero eto, dok en onongo tye atera me timo meno. (Mat. 16:21; 20:28) En bene onongo ngeyo ni i cawa me tone, onongo mitte ni Jehovah okwany “cel” ma orume nyo owek gwokke woko. (Yubu 1:10) Pi meno, Jehovah ojuko gwoko Yecu woko, wek Yecu onyut ka maleng ni ebigwoko gennene kare ducu kadi bed okemme ki to malit adada.​—Mar. 14:35, 36.

Dong pingo Yecu owaco lok ma i jabuli man? Kadi bed pe wangeyo tyen lokke kikome, wabinyamo wiye wiye tyen lok mogo. *

I kare ma Yecu owaco lok magi, nen calo en onongo tye ka nyuto ni Jehovah pe birwako wiye i tone. Onongo mitte ni Yecu ocul ginkok labongo kony pa Jehovah. En onongo obedo dano, dong onongo mitte ni en oto wek “ebil to pi jo ducu.”​—Ibru 2:9.

I kare ma Yecu owaco nyig lok mogo ki i jabuli man, twero bedo ni en onongo mito  ni dano gutam pi tyeng ducu ma i jabuli meno. I kare meno, onongo pol pa Lujudaya gimako i wigi tyeng ducu ma i jabuli moni. Ka guwinyo tyeng acel ki i jabuli moni, onongo pol kare gitamo i kom jabuli meno ducu. Ka man aye onongo gin ma Yecu mito timone, ci en onongo twero konyo lulub kore ma gin Lujudaya me po i kom lok pa lunebi ma nonge i jabuli man ma kwako tone. (Jab. 22:7, 8, 15, 16, 18, 24) Medo i kom meno, tyeng mogo ma tye i agikki me jabuli man pako Jehovah dok loko i kome macalo kabaka ma loyo lobo ducu.​—Jab. 22:27-31.

I kare ma Yecu owaco lok pa Daudi man, nen calo en onongo tye ka waco ni pe etimo bal mo. Ma peya kineko Yecu, lukiko pa Lujudaya gucokke pi pido dok gungolo kop i kom Yecu ni en oyeto Lubanga. (Mat. 26:65, 66) Lukiko gugure oyotoyot i cwiny dyewor, ci gungolo kop i wiye labongo lubo cik me kot. (Mat. 26:59; Mar. 14:56-59) Pi meno i kare ma en owaco lok ma i Jabuli 22:1, onongo bedo calo Yecu tye ka waco ni, “Lubangana, Lubangana, itenya woko pingo ka pe atimo gin mo marac?” Dong nen calo Yecu onongo tye ka nyuto ni en pe etimo bal mo.

Yecu nen calo obedo ka poyo wi jo mukene ni kadi bed kiye ni Daudi, ma ocoyo jabuli man, oden can, meno pe te lokke ni en orwenyo cwak pa Jehovah woko. Lapeny pa Daudi pe onyuto ni en onongo orwenyo niye woko i kom Lubanga. I nge penyo lapeny man, en owaco ni egeno ni Jehovah bilaro jone, dok Jehovah omedde ki goyo laane i kom Daudi. (Jab. 22:23, 24, 27) I yo acel-lu, kadi bed Yecu, “Lakwar Daudi,” onongo tye ka deno can i kom yat, man pe tyen lokke ni en orwenyo cwak pa Jehovah woko.​—Mat. 21:9.

Twero bedo ni Yecu onongo tye ka nyuto arem cwiny matek ma en tye kwede pien onongo mitte ni Jehovah okwany Gwokke woko ki i kome wek en onyut genne bot Jehovah. Onongo pe obedo yub pa Jehovah mukwongo ni Wode oden can dok oto. Man obino i nge jemo pa Adam ki Kawa i kom Lubanga. Yecu onongo pe otimo bal mo keken, ento onongo mitte ni en oden can dok oto wek ogam lapeny ma Catan openyo ki me miyo wel ginkok ma mitte me wilo gin ma dano orwenyo. (Mar. 8:31; 1 Pet. 2:21-24) Man onongo twere keken ka Jehovah kong okwanyo gwok ducu ki i kom Yecu pi tyen mukwongo i kwone.

Twero bedo ni Yecu onongo tye ka konyo lulub kore me tamo i kom tyen lok mumiyo Jehovah oye ni en oto i kom yat. * Yecu oniang ni tone macalo latim bal i kom yat onongo twero weko jo mapol gipoto. (1 Kor. 1:23) Ka lulub kore guketo cwinygi i kom tyen lok kikome ma oweko en oto, ci ada onongo gibiniang pingo mitte ni en oto kit meno. (Gal. 3:13, 14) Man onongo biweko ginene macalo Lalargi ento pe macalo latim bal.

Labongo paro pi tyen lok mumiyo Yecu owaco lok meno, en oniang ni ka eto i kom yat, ci nongo etye ka cobo miti pa Jehovah. Ma pe orii i nge waco lok ma i jabuli man, Yecu owaco ni: “Dong otum!” (Jon 19:30; Luka 22:37) Ada, pien Jehovah kong ojuko konyo Yecu pi kare mo manok, man omiyo ki Yecu kare me cobo jami ducu ma kicwale i lobo me timone. Omine bene kare me cobo jami ducu ma kicoyo i kome “i cik pa Moses, ki i lunebi, ki i jabuli.”​—Luka 24:44.