1-2. Ginkok obedo ngo, dok pingo wamito?

I KARE ma Adam, laco ma pe ki roc mo otimo bal, en orwenyo mot me kwo ma pe tum pe pire kene, ento pi lutino ma onongo gibinywalo i kare me anyim bene. Adam onongo pe ki lok mo keken ma en twero tic kwede me gengo ngeye. En otimo bal akaka. Ento lutinone kono? Gin onongo pe gutimo gin mo marac dok pe gin aye guweko wongi otimo bal. (Rom. 5:12, 14) Tika onongo tye gin mo ma kitwero timo me larogi ki i to ma wongi opore pire-ni? Ada tye! Cutcut ma Adam otimo bal, Jehovah ocako nyuto kit ma ebilaro kwede lutino pa Adam milion mapol ki i bal ki to. (Acak. 3:15) I kare ma en oyubo, Jehovah onongo bicwalo Wode ki i polo “pi miyo kwone me lakok lwak dano mapol.”​—Mar. 10:45; Jon 6:51.

² Ginkok obedo ngo? Ka kiloko iye i Ginacoya me leb Grik, ginkok obedo wel ma Yecu oculo me wilo gin ma Adam orwenyo. (1 Kor. 15:22) Pingo wamito ginkok? Pien rwom me kit ma atir ma Jehovah oketo i Cik waco ni kwo kiculo ki kwo. (Nia 21:23, 24) Adam orwenyo kwone ma roc mo pe iye. Wek obed ma rwatte ki cik pa Lubanga ma kwako gin ma tye atir, Yecu omiyo kwone ma roc mo pe iye calo ginkok. (Rom. 5:17) Pi meno en odoko “Won ma Bedo Nakanaka” bot jo ducu ma ginyuto niye i kom ginkok.​—Ic. 9:6; Rom. 3:23, 24.

3. Ma lubbe ki Jon 14:31 ki 15:13, pingo Yecu onongo tye atera me miyo kwone ma roc mo pe iye?

³ Yecu onongo tye atera me miyo kwone macalo ginkok pien en maro Wonne me polo kacel ki wan. (Kwan Jon 14:31; 15:13.) Pi marre meno, en onongo omoko tamme  me gwoko gennene pi kwone ducu ki dok cobo miti pa Wonne. Yecu otimo meno ki gwoko gennene nio wa i to. Macalo adwogine, yub pa Jehovah pi lobo ki dano bicobbe kakare. I pwony man, wabinyamo pingo Lubanga oye ni Yecu oden can malit ma peya en oto. Wabinyamo bene wiye wiye labol pa laco Baibul mo ma onongo tye ki pwoc matut pi ginkok. Me agikkine, wabinyamo kit ma watwero nyuto kwede pwocwa pi ginkok ki kit ma waromo dongo mar matut pi gityer ma Jehovah ki Yecu gumiyo piwa.

4. Tit kong kit ma Yecu oto kwede.

⁴ Go kong kit ma nino me agikki me kwo pa Yecu obedo kwede. En onongo twero penyo pi kony pa lumalaika milion mapol wek gugwokke, ento en pe otimo man. Me ka meno, en oye ni lumony me Roma gumake dok gugoye matek. (Mat. 26:52-54; Jon 18:3; 19:1) Gugoye ki del anino ma oyeco del kome woko. Lacen, gin gudiye me tingo yat mapek adada i dye ngeye ma onongo tye ka cwer remo. Yecu otemo tingo yat man me tero i kabedo ma onongo kibineke iye, ento ma pe orii kerone otum woko dok lumony gumiyo rukca ki laco mukene ni oting yat man pire. (Mat. 27:32) I kare ma Yecu oo i kabedo ma kibineke iye, lumony guguro cinge ki tyene i kom yat. I kare ma kiilo yat man ocung atir, pek pa kome obedo ka yeco wang bwur ka ma cumar odonyo kwede i tyene ki cinge-ni. Lureme gubedo ka kumo dok mine obedo ka koko, ento Lujudaya gubedo ka ngalo Yecu. (Luka 23:32-38; Jon 19:25) Yecu odeno can pi cawa malac. Pi kit ma kigure kwede-ni, onongo mitte ni adunune ki oboone guti matek, dok yweyo obedo ka doko tek medde ameda. Yecu onongo ngeyo ni egwoko gennene dok ma peya en oto, en olego bot Jehovah pi tyen me agikki. I nge meno, en okulo wiye dok ojalo kwone. (Mar. 15:37; Luka 23:46; Jon 10:17, 18; 19:30) Adada, man obedo yo me to malit dok me lewic!

5. Ki tung bot Yecu, ngo ma obedo lit makato kit ma kineke kwede?

⁵ Ki tung bot Yecu, kit ma onongo kibineke kwede aye onongo pe obedo gin malit loyo. Gin ma obedo ka cwero cwinye loyo aye tyen lok ma kimiyo me neke. Kikelo adot gobagoba i kome ni en oyeto Lubanga, ma nyuto ni en pe ki woro mo pi Lubanga ki nyinge. (Mat. 26:64-66) Tamo i kom adot meno okele par madit ma oweko en obako doge ni Lubanga pe oye ni ekat ki i alano madit kit man. (Mat. 26:38, 39, 42) Pingo Jehovah oye ni Wode me amara oden can dok oto kit man? Kong wanenu tyen lok adek.

6. Pingo onongo mitte ni kigur Yecu i kom yat?

⁶ Mukwongo, onongo mitte ni kigur Yecu i kom yat me gonyo Lujudaya ki i kom cen mo. (Gal. 3:10, 13) Gin gudonyo i te cen man pien onongo gucikke me lubo Cik pa Lubanga ento pe gulubo. Pi meno, onongo pore ni guto pien gubedo likwayo pa Adam, ento cen man bene onongo tye i wigi. (Rom. 5:12) Cik pa Lubanga bot jo Icrael onongo waco ni laco ma otimo bal ma kelo to myero kineke woko. I nge meno, i kare mogo onongo kingabo kom lato-ni i wi yat. * (Nwo. 21:22, 23; 27:26) Dong kit macalo kingabo Yecu i kom yat, onongo dong kitwero gonyo Lujudaya ki i  te cen man dok ginkokke onongo twero konyogi kadi bed gukwere woko.

7. Tyen lok me aryo mene ma oweko Lubanga oye ni Wode oden can?

⁷ Nen kong dok tyen lok me aryo ma oweko Lubanga oye ni Wode oden can. En onongo tye ka pwonyo Yecu pi ticce macalo Lalamdogwa Madit i anyim. Yecu oneno ki wange kit ma lubo cik pa Lubanga tek kwede ka itye ka kato ki i kwo matek. En okato ki i lyeto matek adada mumiyo olego kun “bako doge ma pe twere ki koko ki pig wange.” Kit macalo Yecu okato ki i can malit adada, en niang gin ma wamito dok ‘twero konyowa’ ka ‘gibitowa.’ Pud dong watye ki pwoc madit bot Jehovah pi miniwa Lalamdog Madit ma lakica ma twero “winyo arem kacel kwedwa pi gorowa”!​—Ibru 2:17, 18; 4:14-16; 5:7-10.

8. Tyen lok me adek mene ma oweko Lubanga oye ni kitem Wode matek tutwal?

⁸ Me adek, Jehovah oye ni Wode oden can malit wek ogam lapeny ma pire tek adada: Tika tye dano mo ma twero gwoko gennene bot Jehovah kadi bed okato ki i atematema matek adada? Catan owaco ni pe twere! En waco ni dano tiyo pi Lubanga mere pien gimito ni Lubanga ominigi gin mo. Dok en tamo ni pe gimaro Jehovah, kit ma Adam onongo pe maro Jehovah. (Yubu 1:9-11; 2:4, 5) Kit macalo Jehovah onongo tye ki gen ni Yecu bigwoko gennene, en oye ni kitem Wode i rwom ma lamal. Yecu ogwoko gennene dok omoko ni Catan lagoba.

9. Lanen maber ango ma lakwena Jon owekiwa?

⁹ Pwony me ginkok okonyo Lukricitayo mapol me gwoko niyegi. Gitye ka medde ki tito kwena kadi bed aunauna tye dok gukanyo atematema mapatpat nio wa i tiyo. Nen kong labol pa lakwena Jon. En otito lok ada madok i kom Kricito ki ginkok, nen calo pi mwaki makato 60. I kare ma mwakane dong cok 100, onongo kinene macalo lamone me Ker me Roma ma oweko kitweye i cula nam me Patimo. Bal ango ma en onongo otimo? En obedo ka ‘otito lok ma Lubanga oloko, ki lok me caden ma Yecu omiyo.’ (Yabo 1:9) Man pud dong obedo lanen mamwonya ya me niye ki ciro can!

10. Bukke ma Jon ocoyo nyuto nining ni en onongo tye ki pwoc matut pi ginkok?

¹⁰ I bukke me Baibul ma Jon ocoyo, en otito marre matut pi Yecu kacel ki pwocce pi ginkok. Tyen makato 100 kulu en oloko i kom ginkok nyo mot ma ginkok weko twere. Me labolle, Jon ocoyo ni: “Ka ngat mo obalo, watye ki lakony ma cung piwa bot Lubanga Won, en Yecu Kricito ma kite atir.” (1 Jon 2:1, 2) Bukke ma Jon ocoyo bene nyuto kit ma pire tek kwede me tito “lok me caden ma Yecu omiyo.” (Yabo 19:10) Labongo akalakala mo, Jon onongo tye ki pwoc matut pi ginkok. Watwero nyuto nining ni wan bene watye ki pwoc kit meno?

11. Ngo ma romo konyowa me kwero atematema?

¹¹ Kwer atematema me timo bal. Ka ada watye ki pwoc pi ginkok, ci pe wabibedo ki kodi tam man ni: ‘Pe mitte ni atute matek me kwero atematema ma ongolle i nyima. Atwero mere timo bal, ci lacen akwayo kica.’ Me ka meno, ka kibitowa me timo gin marac, wabiwaco ni: ‘Pe! Atwero timo gin ma kit man nining i nge  jami ducu ma Jehovah ki Yecu gutimo pira?’ Ma lubbe ki meno, watwero penyo Jehovah pi teko, kun walege ni: ‘Konya wek pe adony i atematema.’​—Mat. 6:13.

12. Watwero lubo tira ma nonge i 1 Jon 3:16-18 nining?

¹² Mar omegini ki lumegini. Ka wanyuto mar ma kit man, nongo watye bene ka nyuto pwoc ma watye kwede pi ginkok. Pingo? Pien Yecu omiyo kwone pe pi wan keken ento pi omegiwa ki lumegiwa bene. Yecu onongo tye atera me to pigi. Man nyuto ni en marogi bene. (Kwan 1 Jon 3:16-18.) Wanyuto marwa pi omegiwa ki lumegiwa i kit ma waterogi kwede. (Ep. 4:29, 31–5:2) Me labolle, wakonyogi ka komgi lit nyo ka gitye ka kato ki i pekki madongo, calo can ma poto atura. Ento ngo ma omyero watim ka laye lawotwa mo owaco nyo otimo gin mo ma owango iwa?

13. Pingo omyero wabed jo ma timo kica?

¹³ Tika pol kare imaro mako kiniga i cwinyi i kom luye luwoti? (Levi. 19:18) Ka tye kit meno ci lub tira man ma waco ni: “Wudi cwinywu kekenwu, ngat acel acel odi cwinye i kom lawote, kun wutimo kica ki luwotwu i kinwu kekenwu pi balwu. Ka ngat mo i kinwu tye ki lok mo i kom lawote, timo kica pi bal myero obed tye macalo Rwot [Jehovah] bene ceng otimowu kica.” (Kol. 3:13) Kare ducu ka watimo kica ki omegiwa ki lumegiwa, wanyuto bot Wonwa me polo ni ada watye ki pwoc pi ginkok. Watwero medde ki dongo pwocwa pi mic man mamwonya ma oa ki bot Lubanga-ni nining?

14. Yo acel ma watwero dongo kwede pwocwa pi ginkok obedo ngo?

¹⁴ Pwo Jehovah pi ginkok. Laminwa Joanna ma tye ki mwaka 83 dok bedo i lobo India owaco ni: “Atamo ni pire tek adada ni alok i kom ginkok i legana nino ducu dok apwo Jehovah pire.” I legani piri keni, tam i kom bal mogo ma itimo i nino meno dok ipeny Jehovah wek otimmi kica. Ngene kene ni, ka itimo bal madit, ci nongo imito kony pa luelda bene. Gin gibiwinyo lokki dok gibimini tira ki i Lok pa Lubanga. Gibilega kacel kwedi kun gipenyo Jehovah ni otimmi kica wek ibed ki wat maber kwede doki.​—Yak. 5:14-16.

15. Pingo omyero wakwany kare me kwano ki lwodo lok i kom ginkok?

 ¹⁵ Lwod lok i kom ginkok. Laminwa Rajamani ma tye ki mwaka 73 owaco ni, “Kare ducu ka akwano can ma Yecu odeno, pig wanga cwer.” In bene itwero nongo ni lit adada me tam i kom kit ma Wod pa Lubanga odeno kwede can. Ento ka imedde ki lwodo lok i kom gityer pa Yecu, ci marri pi Yecu kacel ki Wonne bene bidongo matek. Me konyi lwodo lok i kom ginkok, pingo pe iket yub me kwano lok meno?

16. Pwonyo jo mukene lok i kom ginkok keliwa adwogi maber nining? (Nen cal ma tye i pok ngeye.)

¹⁶ Pwony jo mukene lok i kom ginkok. Kare ducu ka watito bot jo mukene lok i kom ginkok, pwocwa pire bene dongo. Watye ki jami tic mabeco adada ma waromo tic kwede me pwonyo jo mukene tyen lok mumiyo Yecu oto. Me labolle, watwero tic ki pwony me 4 i brocuwa me Kwena Maber Mua ki Bot Lubanga! Wi pwony meno tye ni “Yecu Kricito En Anga?” Nyo waromo tic ki dul me 5 i buk me Baibul Twero Pwonyowa Gin Ango? Wi lok madit me dul meno tye ni “Ginkok​—Mic Madit Loyo Ducu pa Lubanga.” Dok mwaka ki mwaka wadongo pwoc pi ginkok ki bedo tye i Nipo me to pa Yecu ki dok lwongo jo mukene me ribbe kwedwa i kwer man. Jehovah pud dong ominiwa deyo madit ya me pwonyo jo mukene lok i kom Wode!

17. Pingo ginkok obedo mic madit loyo ducu ma Lubanga omiyo bot dano?

¹⁷ Labongo akalakala mo, watye ki tyen lok maber me dongo pwoc matut pi ginkok. Pi ginkok, watwero bedo ki wat macok ki Jehovah kadi bed watye ki roc. Pi ginkok, kibituro tic pa Catan woko. (1 Jon 3:8) Pi ginkok, yub pa Jehovah pi lobo-ni bicobbe. Lobo ducu bidoko paradic. Ngat mo keken ma ibirwatte kwede bibedo dano ma maro Jehovah dok tiyo pire. Dong, wan ducu omyero nino acel acel wayeny yo ma watwero nyuto kwede pwoc pi ginkok​—mic madit loyo ducu ma Lubanga omiyo bot dano!