‘In aye ma iwinyo lega-gu ducu. Dano ducu gibibino boti.’​—Jabuli 65:2.

Jo mogo giwaco ni gilego pien ni weko giwinyo maber kadi bed gitamo ni pe tye ngat mo ma winyo lega. Ento lega pe obedo gin ma watimo mere wek wawiny maber nyo wakany pekkiwa. Baibul cuko cwinywa ni, “Rwot [Jehovah] * tye cok bot jo ducu ma kok bote, ma gikok bote ki ada. . . . dok winyo kokogi.”​—Jabuli 145:18, 19.

Pi meno, watwero bedo ki gen ni Jehovah winyo lega pa jo ma giwore. Ki cwiny me mar, en owaco ni: “Wubibino bota wulega, an abiwinyo legawu.”​—Jeremia 29:12.

‘Wumine kenwu i lego Lubanga ki cwinywu ducu.’​—Jo Roma 12:12.

I Baibul, kicuko cwinywa ni, “wuleg kare ducu” dok ni “wuleg Lubanga ma pe wukeng.” Nen ka maleng ni Lubanga Jehovah mito ni waleg bote.​—Jo Epeco 6:18; 1 Jo Tecalonika 5:17.

Pingo Lubanga mito ni waleg bote? Tam kong: Tika tye wego mo ma cwinye pe bedo yom ka latinne openye ni “Baba, itwero konya kong”? Ngene kene ni, wego dong ngeyo gin ma latinne mito nyo kit ma latinne winyo kwede ento ka en owinyo latinne tye ka lego pi kony, meno nyuto ni latinne genne dok tye cok kwede. I yo acel-lu, ka walego bot Jehovah, wanyuto ni wagene dok wamito bedo cok kwede.​—Carolok 15:8; Yakobo 4:8.

‘Wuket parwu ducu i kome, pien en paro piwu.’​—1 Petero 5:7.

Lubanga mito ni waleg bote pien en marowa dok paro piwa. En ngeyo pekkiwa ki jami ma keliwa par, dok en mito konyowa.

Pi kare me kwone ducu, Kabaka Daudi onongo lego Jehovah pi kony dok tite tamme ki kit ma en winyo kwede. (Jabuli 23:1-6) Lubanga owinyo nining i kom Daudi? Lubanga onongo maro Daudi dok winyo legane. (Tic pa Lukwena 13:22) I yo acel-lu, Lubanga bene winyo legawa pien en paro piwa.

Meno lok pa laco jabuli mo ma nonge i Baibul. En onongo tye ki gen matek ni Lubanga winyo legane, dok ngec meno okonye adada. En owinyo ni etye cok ki Lubanga dok onongo teko me kanyo pekki ma obino i kwone.​—Jabuli 116:1-9.

Ka watye ki gen matek ni Lubanga tye ka winyo legawa, wabimedde ki lega bote. Tam kong gin mutimme i kom omego Pedro, ma bedo tung kumalo me lobo Spain. En orwenyo wode me mwaka 19 i can me gudi. Pedro otito ki Lubanga cwer cwinye ki kit ma ewinyo kwede kikome dok olego teretere pi kwe cwiny ki kony. Ngo mutimme? Pedro owaco ni: “Jehovah ogamo legana kun tiyo ki Lukricitayo luwotwa me konyo ki cuko cwinywa wan ki dakona.”

Kadi bed lega pe ocero wode, ento okonyo Pedro ki jo gange i yo ma pire tek. Dakone, María Carmen, wiye po ni: “Lega okonya me kanyo arem cola. Onongo angeyo ni Lubanga Jehovah niang cwer cwinya pien ka alego bote ci awinyo kuc kun nongo cwinya opye mot.”

Lok ma i Baibul ki jami mutimme i kwo pa dano, nyuto ka maleng ni Lubanga winyo legawa. Kadi bed kit meno, nen bene ka maleng ni Lubanga pe gamo lega ducu. Pingo Lubanga gamo lega mogo ento pe mukene?